Hơ’mon kơ yă Esther ưh kơ sĭ lăp dơ̆ng ‘bơ̆t jơhngơ̆m pơ̆n nuih pơ̆n dơ̆ng iung yua kơ adrĕch adrŭng. Kơplah hơlen jrŭ ‘biơ̆, lu bơ̆n kŭm đei ‘bôh hơđăl tơdrong proh hơmet hlĭch chrơp đơ̆ng ‘Bok Kei-Dei, kơplah Sư yua mĭnh ‘nu bơngai drŏkăn rơdu tơrăn wă blah kĕ jei đơ̆ng trong kơnê̆ đơ̆ng bơngai ayăt. Tŏk bŏk mĭnh tơdrong tơblah nhen thoi hloh kơ jơhngơ̆m pran bơ̆n, Esther đei rơih iŏk gơnang kơ Kră Yang, pơjao hloi tơdrong arih kơdih kơ Sư. Trŏ kơ đơ̆ng lăm tơdrong chu yom ‘noh, ‘Bok Kei-Dei đei tơ’bôh tơdrong proh hơmet đơ̆ng Sư. mĭnh tơdrong proh hơmet mă ayăt ưh kơ gơh băt adrol, mĭnh tơdrong proh hơmet đei ba tơdrong kĕ jei ư-ang kơ kon pơlei Sư.

Năr ‘nâu, ‘năr 22/10/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Vernell Windsor kơ̆l ‘bai KĔ JĔI YUA ĐƠ̆NG JƠHNGƠ̆M CHU YOM.

“Akŭm đĭ-đăng lu adrĕch bơngai Juđa tơ pơlei Susa bĕ, đơ̆ng noh athei ơ̆t kơ sŏng sa lăm pêng năr yua kơ inh, ‘nĕ sŏng sa, kư̆m ‘nĕ kơ nhă đak. Inh hăm lu bơngai awih awăn tơgŭm inh kư̆m ơ̆t kơ sŏng sa mơ̆n. Thoi noh inh gô mơ̆t tơ anih pơtao, mă khan pơm glăi kơ tơdrong juăt bưh mơ̆n. Tơdah trŏ kơ lôch lei inh lôch.” (Esther 4:16)

Bơngai gơh teh dêh Muhammad Ali đei pơma: “Đông tơ kơpal thoi măk mêng, sôch jĭ thoi sut. Ti bơngai ưh kơ gơh teh thoi dôm tơdrong kiơ măt ưh kơ gơh ‘bôh.”

Buăl gơh apĭnh: Yă pơtao Esther lei đei tơdrong kiơ hơtŭt ‘bơm bơngai gơh teh dêh Muhammad Ali deh? Mă lei kơplah đŏk sơ̆p hla ar Esther đơ̆ng chăl 3 truh tơ chăl 5, inh đei ‘blŏk truh kơ nơ̆r pơma đe pơ-ư ‘nâu. Ali đei ‘măn ăn mĭnh tơdrong tơdrong gơh hơgei mă lơ bơngai lăp hơpơi wă. ‘Noh jơ̆ tơmam ăn đĕch mă ‘Bok Kei-Dei Mơsêh mơyang đei ‘măn ăn kơ sư! Lĕi lăi thoi noh, Yă pơtao Esther kŭm đei mĭnh “tơmam ăn đĕch” mă ayăt ưh đei tơchĕng truh!

Tơpang ti ayăt ‘bĕnh tơdrong chă đon. Sư đei chop mơ̆t lăm pơgar ‘lơ̆ng đơ̆ng blŭng a. Inh oei ‘blŏk đei kơplah sư blah dôm tơdrong pơgơ̆p ‘lơ̆ng rŏ đơ̆ng inh hăm dôm lu bơngai. Nhen thoi yang kơnê̆ đei hơmet hloi mĭnh tơdrong “pơgơ̆p hơdai” ‘mê̆ ‘mach lăp wă chă đon wă pơrăm inh. Mă lei, Kră Yang khan: “ưh kơ đei layơ!”

Esther kŭm tơ’bơ̆p hăm mĭnh tơdrong pơlong lăng lôch arih đơ̆ng Haman chă trong. Sơ̆p hla ar Esther 3:8 đei roi khan:

“Haman khan kơ pơtao Asêrus thoi âu: Đei minh adrĕch adrung kơnê̆ dêh oei tơrak ‘brak lăm lu kon pơlei ih tơ jơ̆p-jang tơring ih pơgơ̆r, tơdrong juăt lu sư phara hloh kơ lu adrĕch nai, na lu sư kư̆m ưh wă kiơ̆ tơdrong juăt ih tơtă, lê̆ lu sư arih kư̆m ưh kơ đei yua kiơ kơ ih.”

Tơdrong chă đon wă pơm ‘mong đơ̆ng Haman đei pơm kơ mĭnh tơdrong kơnê̆ krưp kơ đĭ kon pơlei Juđa! Mă khan tơdrong inh ưh kơ đei krưp thoi kơ Yă pơtao Esther, mă lei tơdrong tơblah gah bơhngol mă inh hlôi tơ’bơ̆p kŭm hơđăl tơpă! Yă Pơtao đei pơtơm ơ̆t kơ sŏng sa krao khan păng krao đĭ đăng bơngai kŭm pơm thoi noh. ‘Bok Kei-Dei đei hơmet bơih mĭnh tơdrong proh hơmet ‘lơ̆ng rŏ mă Haman ưh kơ băt!

Dôm wơ̆t ơ̆t kơ sŏng sa păng krao khan đei ba ăn lơ tơdrong đei lơi yua lăm chăl arih inh. Đơ̆ng rŏng kơ ơ̆t kơ sŏng sa, inh ‘bôh hơđăl hloh, mơ̆ng kơtơ̆ng hơđăl hloh, păng tơdrong tơchĕng kŭm gơh hơgei hloh. Yă pơtao Esther juăt kơ tơdrong arih ơ̆t kơ sŏng sa krao khan. Sư kŭm đei khan kơ Morđêkai:

“Akŭm đĭ-đăng lu adrĕch bơngai Juđa tơ pơlei Susa bĕ, đơ̆ng noh athei ơ̆t kơ sŏng sa lăm pêng năr yua kơ inh, ‘nĕ sŏng sa, kư̆m ‘nĕ kơ nhă đak. Inh hăm lu bơngai awih awăn tơgŭm inh kư̆m ơ̆t kơ sŏng sa mơ̆n. Thoi noh inh gô mơ̆t tơ anih pơtao, mă khan pơm glăi kơ tơdrong juăt bưh mơ̆n. Tơdah trŏ kơ lôch lei inh lôch.” (Esther 4:16)

Pơtao Esther đei jing bơngai nuih kơtang lăm jơhngơ̆m inh! ‘Bok Kei-Dei ưh kơ sĭ hơtŭt lăm chăl arih yă mă Sư kŭm đei dŏng tơgŭm kơ chăl arih inh hloi. Tơdrong hơ’mon ‘nâu tơ’blŏk kơ inh khan inh đei Bơngai ‘Bă ‘mêm mơnat, Tơ’ngla ling lang dŏng tơgŭm inh hlôi kơ đơ̆ng trong chă đon đơ̆ng ayăt. Sư ling lang đei dôm tơdrong tơblah wă ăn tơdrong kĕ jei kơ kon pơlei Sư. Ayăt ưh kơ gơh hơgei kŭm ưh kơ đei mơsêh mơyang- mă lei Kră Yang lu bơ̆n lei đei!

‘Bok Kei-Dei oei bơtho lu bơ̆n băt kơ “đông tơ kơpal thoi măt mêng, sôch jĭ thoi sut.” Sư oei oei tơbăt khan “ti (bơngai ayăt) ưh kơ gơh teh dôm tơdrong kiơ măt ưh kơ gơh ‘bôh.” Sư oei wă pơm kơ dôm tơdrong chă đon đơ̆ng ayăt jing ưh kơ gơh!

Apĭnh đĭ đăng krao khan hơdai: Kơkuh kơ ‘Bă mă ‘mêm, apĭnh ‘Bă pơih jơhngơ̆m kon ăn kơ kon sơng iŏk dôm tơdrong pŭn hiôk păng tơdrong chông anhăk đơ̆ng Ih. Dah tơ’bơ̆p hăm dôm tơdrong chă đon đơ̆ng ayăt, apĭnh tơgŭm kon dơ̆ng kơjăp păng bơwei tôm tơdrong lui anih Ih đơ̆ng tơdrong ơ̆t kơ sŏng sa păng krao khan. Apĭnh ăn kơ kon jơhngơ̆m pơ̆n nuih thoi Yă Pơtao Esther, pơ̆n chu yom kiơ̆ thoi Ih wă mă đei tơ’bơ̆p tơdrong kơnê̆. Hơpơi kon ling lang arih lăm tơdrong kĕ jei mă ‘Bok Dŏng Pơklaih Yang Yêsu đei ‘măn ăn. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, Kră Yang ling lang đei trong dŏng pơklaih păng ăn kĕ jei kơ kon pơlei Sư, mă khan kơplah ayăt nhen thoi đei chĕp kơjăp gah kĕ jei lăm ti. Dang ei, Sư oei bơ̆ jang wă pơm kơ dôm tơdrong chă đon đơ̆ng yang kơnê̆ jing ưh kơ gơh. Tơdrong ‘noh lu bơ̆n hăm wă pơjao dôm tơdrong kơ Sư thoi Esther đei pơm ưh? Mĭnh ‘nu bơngai drŏ kăn hmă đĕch mă lei pơ̆n lui gơnang kơ anih Kră Yang, na ba tơdrong dŏng pơklaih kơ đĭ adrĕch adrŭng tơ’blŏk lu bơ̆n khan: dah dan đĭ jơhngơ̆m lui ngeh anih Kră Yang, lu bơ̆n gô ‘bôh Sư ‘măn ăn kơ bơ̆n tơdrong gơh hơgei, jơhngơ̆m pơ̆n nuih păng tơluch kĕ jei, ưh kơ sĭ lăp ăn kơdih buăl păng inh mă kŭm ăn kơ đĭ đăng dôm lu bơngai mă lu bơ̆n ‘mêm dai.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.