Đei lu phim đei pơjing lăng nhen thoi ưh kơ tơproh mă lei truh tơ tuch luch, tôm kơ tơdrong ‘bôh hlĭch na pơm kơ bơngai lăng hơ iă tơpă. Nơ̆r hơmon gah tơdrong arih Esther kư̆m nhen thoi noh. Năr brĕi, lu bơ̆n đei ‘bôh proh hơmet “ưh kơ đei bu băt hơdrol”, kơplah ‘Bok Kei-Dei yua jơhngơ̆m chu yom minh ‘nu bơngai drŏ kăn iĕ đĕch mă tơplih tôm tơdrong arih kon pơlei. Mă lei tơdrong hlĭch tam mă dơ̆ng ‘bơ̆t doh, yua kơ năm rĭ rai tơ to dơ̆ng, lu bơ̆n gô ‘bôh đơ̆ng lăm tơdrong iĕ nhen thoi ưh kơ đei yua kiơ, mă lei tă kơ pơgơ̆p ‘lơ̆ng lăm tơdrong proh hơmet dŏng iŏk tih đơ̆ng Kră Yang.

Năr ‘nâu, ‘năr 23/10/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Tori Troncone kơ̆l ‘bai KƠPLAH KRĂ YANG THĔNG HREH, ATHEI LĂNG “YUA KƠ ĐÊL KIƠ”

“Bơ̆n ‘bôh bơngai bu mă ‘mêm kơ ‘Bok Kei-Dei, bơngai noh ‘Bok Kei-Dei rơih iŏk lui kơ Sư, lu bơngai thoi noh boih, mă sư tơ’bơ̆p tơdrong kiơ, bơ̆n băt kơ ‘Bok Kei-Dei ăn kơ sư hiôk ngăl.” (Rôm 8:28)

Jum dăr kơ buăl hăm đei bu băt khan hơdrol dôm kơ tơdrong ‘bôh hlĭch lăm phim? ‘Bă păng klo inh jơ̆ bơngai thoi noh. Lu sư ưh kơ đei layơ ‘bôh hlĭch. Bơngai rông ‘bôt hiôk hơ iă mă tơpă tă kơ bơngai kơnê̆ lăm phim bơngai hnhoi lăng gơh hơgei? Lu sư đŏk hla bơar kơđeh đĕch mă băt tôm tơdrong bơih. Na tuch luch phim đei chăl kơjung ‘nâu? Lu sư băt bơih hơdrol đơ̆ng chăl mă ‘bar. Ưh kơ đei tơdrong kiơ lăm phim pơm kơ lu sư ưh kơ hiôk, yua kơ lu sư lăng pơnhen đơ̆ng dôm tơdrong iĕ, dôm tơdrong lăm phim- na truh tơ tôch bơih tôm tơdrong rơđah đơ̆ng hơdrol bơih kơplah phim “tơ’bôh” ăn kơ lu sư.

Kơplah đŏk hla bơar Esther, lu bơ̆n kăl kơ lăng pơnhen mă rơđah thoi noh. Hiôk hơ iă tơpă, anăn ‘Bok Kei-Dei ưh kơ đei ‘bôh lăm sơ̆p hla bơar ‘nâu. Tơdrong noh ưh kơ sĭ Kră Yang ưh kơ tơnoh. Wă kơ lu bơ̆n lăng hơlen ‘biơ̆ tŏ sĕt wă kơ ‘bôh Kră Yang tơ’bôh Sư ăn kơ lu bơ̆n.

Lăm Esther chăl 2, sơ̆p hla bơar ‘Bok Kei-Dei chih:

“Morđêkai rong ba Hadasah, kư̆m krao anăn sư Esther, kon hơdruh ma sư, akâu sư hơbŏ ‘lơ̆ng. Đơ̆ng rŏng kơ mĕ ‘bă sư lôch boih. Morđêkai iŏk rong ba pơm jing kon hơdruh sư kơdih. Thoi noh kơplah đe đei roi tơbăt nơ̆r đơ̆ng pơtao tơtă păng đei lu hơdruh akŭm tơ lăm pơlei Susa pơjao ăn kơ Hêgai wei-lăng Esther đe kư̆m ba truh tơ hnam pơtao na kư̆m jao ăn kơ Hêgai wei-lăng.Kơplah năr Morđêkai hơ-oei ngôi ‘bơ̆t ‘măng jang pơtao đei ‘bar ‘nu kuan gak trong ‘măng tơm pơtao, anăn bre sư Bikthan păng Têres, bre sư hil kơ pơtao Asêrus păng chă đon wă pơlôch pơtao. Morđêkai băt tơdrong noh na sư roi ăn kơ yă pơtao Esther. Yă Esther băt đơ̆ng Morđêkai na sư roi ăn kơ pơtao băt, khan sư kơtơ̆ng đơ̆ng Morđêkai.” (Esther 2:7-8, 21-22)

Lăng lăp tŏ sĕt đĕch, dôm kơ nơ̆r hơ’mon ‘nâu nhen thoi tơdrong ưh kơ tơproh. Mă lei dah lăng mă jrŭ ‘biơ̆, lu bơ̆n gô ‘bôh tơpang ti ‘Bok Kei-Dei oei bơ̆jang, mă khan anăn Sư ưh kơ đei pơma ‘bơm lăm sơ̆p hla bơar âu.

Esther đêl hlôi mơn đei tơdrong ơh sơ’ngon tih kơplah mĕ ‘bă sư lôch. Na sơ̆p hla bơar ‘Bok Kei-Dei đei tơbăt thoi âu: “Bơ̆n ‘bôh bơngai bu mă ‘mêm kơ ‘Bok Kei-Dei, bơngai noh ‘Bok Kei-Dei rơih iŏk lui kơ Sư, lu bơngai thoi noh boih, mă sư tơ’bơ̆p tơdrong kiơ, bơ̆n băt kơ ‘Bok Kei-Dei ăn kơ sư hiôk ngăl.” (Rôm 8:28). Yua kơ đơ̆ng mĕ ‘bă sư lôch na Esther đei Marđôkai wei rong, yua kơ thoi noh na sư đei mơ̆t oei tơ anih pơtao. Yua kơ Esther oei lăm anih pơtao na Marđôkai roi kơ sư gah tơdrong chă đon wă pơlôch pơtao. Yua kơ thoi noh na pơtao oei liĕm akâu. Tơdrong ‘nâu ưh kơ đei kơdih! Rơđah dêh, tơpang ti ‘Bok Kei-Dei oei pơgơ̆r, Sư oei proh hơmet tôm tơdrong tih hloh.

Tơdrong hơ’mon ‘nâu jơ̆ minh lăm dôm tơdrong pơtih gia, tơ ‘bôh dôm kơ lăm sơ̆p hla bơar Esther đei Kră Yang ‘Bok Kei-Dei lăm tôm tơdrong – Tơ’ngla đei chih rim năr lăm chăl arih lu bơ̆n, hơdrol kơ tơpŭ lu bơ̆n ( Hơriso 139:16)! Tơdah đŏk pơ‘lơ̆ng păng kơ nhăm kơ dôm “tơdrong tơ’bôh ăn” buăl gô ‘bôh sơ̆p hla bơar Esther ling lang tơ’bôh ‘Bok Kei-Dei – Tơ’ngla ‘bôh tôm tơdrong păng pơgơ̆p ăn tơdrong tih hloh. Păng tơdrong kơnhăm noh tuch luch gô ba truh tơ tơdrong dŏng pơklaih kon pơlei Kră Yang.

Lei lu bơ̆n thoi yơ? Hăm đei la yơ ‘Bok Kei-Dei oei bơ̆jang lăm chăl arih buăl mă buăl tam mă mơn hloi dang ei? Kră Yang yua dôm kơ tơdrong pơlong lăng ayơ wă ba buăl năm tơ anih ‘lơ̆ng hloh? Dôm kơ tơdrong kơnê̆ truh – mă khan chhŭr nuih dah ưh kơ hlôh kơplah noh – na tơ anăp gô tơ’bôh tơpang ti ‘lơ̆ng tơpăt đơ̆ng Sư? Tơdrong hơ’mon gah Esther krao wơ̆n lu bơ̆n pơjuăt pơm “bơngai hnhoi lăng gah bơhngol”, chă pơnhen hơlen kơ tôm tơdrong đêl pơm, păng lui ngeh kơplah Kră Yang oei thĕng hreh, Sư ưh kơ đei layơ ataih, păng Sư ưh kơ đei layơ pơdơh kơ bơ̆jang, wă kơ đei yua ăn kơ kon pơlei Sư.

Apĭnh đĭ đăng krao khan hơdai: Kơkuh kơ Kră Yang, kon bơnê kơ Ih, yua kơ ling lang lăng ‘bôh păng hnhoi lăng tôm tơdrong lăm tơdrong arih kon. Athei tơ’blŏk kơ kon, mă khan kon mơn kon iĕ đĕch păng rơdu tơrăn, Ih oei yua kon dan ăn kơ tơdrong kơnhăm đơ̆ng Ih tih hloh. Apinh ăn kơ kon đei đon lui gơnang, gơh hơgei thoi kơ Esther, wă kơ kon lăng ‘bôh tơpang ti Ih oei bơ̆jang, lăm ŭnh hnam, tơdrong jang, păng dôm tơdrong Ih đei dan ăn kơ kon. Hơpơi kơ tơdrong arih kon tơ’bôh tơdrong ‘lơ̆ng păng mơsêh Kră Yang wă kơ ba lơ bơngai đei dŏng pơklaih đơ̆ng Ih. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, ‘Bok Kei-Dei ưh kơ đei layơ achăng lê̆ kon pơlei Sư, hloh loi lu bơngai lăng nhen rơdu, bơngai iĕ đĕch. Kră Yang đei yua minh ‘nu bơngai drŏkăn mơti dŏng iŏk adrĕch adrŭng sư. Năr ‘nâu, Kră Yang yua kơdih buăl – mă khan bơngai jing akăn, jing mĕ, dah minh ‘nu bơngai drŏkăn lăng hmă đĕch – wă tơ’bôh tơdrong proh hơmet tih đơ̆ng Kră Yang. Buăl tam pơih jơhngơ̆m lui gơnang kơ Kră Yang ưh? Athei pơih măt đon lui sơng iŏk tơpang ti Kră Yang oei bơ̆jang lăm tơdrong arih buăl, păng yak năm hăm jơhngơ̆m pơsĭt Kră Yang ling lang oei hơdai buăl păng oei bơ̆jang hăm tơdrong mơsêh lăm chăl arih buăl.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.