Tơdrong arih đei lơ wơ̆t buăl “tơdŭ ‘măng mă lei ưh kơ đei tơl”. Kư̆m đei tơdrong bơ̆jang lăm hơpo, dôm tơdrong buăl chang hơmĕng lơ, dah lăng ‘bôh hmă đĕch wă kơ đei drơ̆ng iŏk. Đei lơ wơ̆t buăl iung yua kơ tơdrong tơpă tơpăt, mă lei kiơ̆ kơ kon bơngai kuă kơ drơ̆ng iŏk, achăng lê̆. Dôm tơdrong noh pơm kơ jơhngơ̆m sơ’ngon, đei mơn lăng kơdih iĕ dêh. Mă lei dôm tơdrong đơ̆ng sơ’ngon achăng lê̆ noh, Kră Yang oei wă pơjing ming chăl arih buăl, hơjơ̆m ming buăl jing minh ‘nu bơngai pran hloh, păng rang hơdah mă khan jum dăr tă kơ măng mu.

Năr ‘nâu, ‘năr 25/10/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Dayna Lovelady kơ̆l ‘bai KUĂ KƠ DRƠ̆NG IŎK YUA WĂ Ư-ANG KƠ KRĂ YANG.

“Păng inh kơtơ̆ng nơ̆r Kră Yang khan: “Inh gô wơh bu năm? Bu gô năm kơ lu bơ̆n?” Inh tơl: “Đei inh tơ âu, apinh ih wơh inh năm.” (Êsai 6:8)

Đơ̆ng oei ‘lơ̆p dĭng truh tơ dang ei, inh đei bơ̆jang lơ tơdrong: pơchơt ‘bŏng lŏng, hơri, hŏk pơhrăm, păng jing minh bơngai pơgơ̆r tơm. Inh đei pơlong lăng pơm sen lăm khŭl pơm sen, pơthi mơ̆t lăm khŭl bơngai preh brŏ hơri dah chih măt lăm lu khŭl đa ‘bŏng lŏng. Kư̆m đei kĕ jei ‘lơ̆ng, kư̆m đei jei đe. Jơhngơ̆m sơ’ngon kơplah ưh kơ đei kiơ̆ kơ kơdih dan ăn hơdrol, ưh kơ hiôk tŏ sĕt hloi. Mă lei ‘net ‘net inh kư̆m đei hlôi, pơtrơp dơ̆ng kơ kơnhăm plơ̆ng.

Rŏ lăng bu bu lăm lu bơ̆n kư̆m đêl đei rơhing minh tơdrong kiơ noh păng adrin kiơ̆ wă kơ đei. Kư̆m đei buăl hưch wă dêh kơ gưih hla bơar apinh tơdrong jang, dah adrin pơm ‘lơ̆ng hăm bôl buăl, mă lei ưh kơ đei drơ̆ng iŏk. Tơdrong noh pơm kơ bơ̆n bơ̆l hăl. Đei năr, lu bơ̆n ‘maih wă arih ‘lơ̆ng tơpăt păng pơm tơdrong trŏ, mă lei pơm kơ bơngai nai kuă kơ drơ̆ng iŏk.

Lăm Mathiơ 21:42, Yêsu jet lu sư: “Tơdrong ‘Bok Kei-Dei âu iĕm tam mă đŏk lăng tơpă hă? ‘Tơmo lu bơngai man hnam tŭk boih, tơmo noh ‘Bok Kei-Dei lăng gĭt tơpă man sư ‘bơ̆t mum hnam. Sư pơm thoi noh trŏ tơpă, mă măt bơ̆n lăng kư̆m ‘lơ̆ng mơ̆n.’?”

Rŏ lăng buăl kư̆m đei kuă kơ drơ̆ng iŏk kơplah pơm tơdrong ‘lơ̆ng. Tơdah thoi noh buăl nhen thoi Yang Yêsu. Lơ bơngai ưh kơ sơng iŏk Sư, mă khan Sư ‘lơ̆ng tôm tơdrong păng ưh kơ đei tơdrong yoch kiơ. Buăl adrin iung ăn kơ tơdrong tơpă tơpăt, mă lei jei dôm tơdrong plêl hơlĕnh jơ̆p kơ anih. Na lăm Hơriso đei tơtă thoi âu: “Sư gô pơdah tơdrong tơpăt ih thoi hơdah hơdong. Păng sek tơ’bôh tơdrong trŏ ih thoi ‘năr dơ̆ng.” ‘Bok Kei-Dei gô pơm kơ tơdrong tơpăt buăl jing hơdah, mă kơplah măng mu jum dăr. Apinh ‘nĕ kơ bơ̆l hăl, yua kơ Kră Yang gô yua iŏk đơ̆ng tơdrong kuă kơ drơ̆ng iŏk noh gô ‘bơ̆ hơmet buăl păng pơih dôm tơdrong tih hloh lăm chăl arih buăl.

Tơpă bơih, lăm kơ plah pơjuăt, gô đei pơm jơhngơ̆m lu bơ̆n bơ̆l hăl păng sơ’ngon. Mă lei bơnê kơ Kră Yang, Yang Yêsu băt hơđăl tơdrong noh yua kơ Sư đêl hlôi mơn tơdrong noh thoi kơ lu bơ̆n. Sư băt thoi yơ noh jơ̆ sơ’ngon, chhŭr nuih. Êsai 53:3 chih: “Sư bơngai đe areh păng đe kuă kơ sư. Sư ling-lang pŭ iŏk tơdrong ơh sơ’ngon pơmat-tat jĭ jơhngơ̆m. Thoi bơngai mă đe ôn muh măt ưh kơ sư. Đe areh kơ sư; lu bơ̆n lăng sư kư̆m ưh kơ đei rơ-a kiơ.”
Kơdih Yang Yêsu – Tơ’ngla đơ̆ng đei pơjăm păng achăng lê̆ đơ̆ng sơ̆ đunh kơ jơhnơr bơih – jơ̆ Tơ’ngla hlôh kuă kơ drơ̆ng iŏk mă lu bơ̆n oei adrin pŭ iŏk dang ei. ‘Nâu jơ̆ tơdrong ‘Nao ‘Lơ̆ng ‘mêm mơnat ăn đĕch kơ jơhngơ̆m, ăn kơ bơhngol lu bơ̆n. Lu bơ̆n gah Tơ’ngla Dŏng Pơklaih, Tơ’ngla đêl đei sơ’ngon yua kơ đe kuă kơ drơ̆ng sơng iŏk păng Sư băt kơ kĕ jei tơdrong kuă kơ drơ̆ng iŏk noh lăm tơdrong ư ang hơdah hơdong.

Apĭnh đĭ đăng krao khan hơdai: Kơkuh kơ ‘Bă tơ kơpal plĕnh ti, apinh Ih pơlung kon kơplah đe achăng lê̆ kon. Apinh tơ ‘blŏk kơ kon Yang Yêsu kư̆m đêl kon bơngai tŭk lê̆, mă lei Hnam Akŭm đei pơjing lăm Ih jơ̆ tơmo ‘bơ̆t anih mum hnam. Hơpơi kơ tơdrong arih kon đei pơjing hơnă kơjăp lăm Ih păng adrô̆ Ih đĕch. Kơplah rơdu, apinh tơgŭm kon băt gơnang kơ Ih – Tơ’ngla kơjăp ling lang. kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, rŏ lăng năr ‘nâu buăl oei jĭ jơhngơ̆m yua kơ nơ̆r kuă kơ drơ̆ng iŏk ayơ noh. Mă lei athei ‘blŏk: kơdih Yang Yêsu kư̆m đêl đei kuă kơ drơ̆ng iŏk Sư, păng Sư jing ‘Bok Dŏng Pơklaih kon bơngai. Kuă kơ drơ̆ng iŏk ưh kơ đei wă tơbăt kon bơngai buăl, mă jing tơmam wă kơ Kră Yang man pơjing, jing tơmam ư ang ‘lơ̆ng hloh lăm chăl arih buăl. Athei chang gô Kră Yang pơm dôm tơdrong đe nai lăng buăl ưh kơ rơ a jing jơmŏng hơdah hơdong đơ̆ng lăm tôm tơdrong bơ̆jang Kră Yang.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.