Lăm dôm kơ lu tơdrong jang kiơ, dah ưh kơ đei tơdrong kơ nhăm, lu bơ̆n gô ‘bônh kơ wơ̆l jrok păng anat kơ đei yua tôm ‘lơ̆ng. Chăl arih kon bơngai kŭm thoi noh. Lu bơ̆n đei Tơ’ngla Pơjing đei pơjing hăm mĭnh tơdrong kơ nhăm ‘lơ̆ng rŏ, mă lei yua ưh kơ băt kơ tơdrong kơ nhăm ‘noh, lu bơ̆n ‘bônh kơ druh kiơ̆ dôm lu tơdrong ‘bônh kơ hlôi đơ̆ng teh đak. Trŏ kơ thoi noh, lăp kơplah wih brŏk hăm Nơ̆r Kră Yang, lu bơ̆n ‘nao wă hlôh tơpă tơdrong tơm đơ̆ng chăl arih bơ̆n păng băt hơđăl yua kơ kiơ bơ̆n arih lăm kơpal teh ‘nâu.

Năr ‘nâu, ‘năr 26/10/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Tori Troncone kơ̆l ‘bai ĐEI PƠJING WĂ KƠNHĂM KƠ MĬNH TƠDRONG.

“Inh pơjing bơih lu kon pơlei âu, ăn kơ Inh, lu sư gô ră roi bơnê kơ inh.” (Êsai 43:21)

Hăm đei layơ buăl yua mĭnh tơmam ưh kơ trŏ hăm tơdrong kơnhăm mă ‘noh đei pơm hơmet đơ̆ng blŭng a ưh? Wă khan thoi inh đơ̆ng đêl đei yua khoă gre wă pơih tơmam kơplah chă ưh kơ ‘bôh săng kep. Dah kơplah kơ’bang đei gĭl gŭl, inh chơ̆p mĭnh hlak hla ar wă lot ala jơ̆ng.

Dôm tơdrong gơh iĕ ‘nâu mă khan đei yua tơpă, mă lei inh kŭm ưh kơ hiơt kơ tơdrong yua tơm đơ̆ng lu sư. Tơdrong yua tơm đơ̆ng khoă jơ̆ wă pơih gre, ưh kơ trŏ jơ̆ săng chrek hla ar. Na che hla ar lei kăl kơ dan kơpal kơ’bang sŏng sa, ưh kơ trŏ dan lot hơla jơ̆ng kơ’bang. Yua kơ lu bơ̆n rai yua mĭnh tơmam kiơ ‘noh ưh kơ trŏ, ưh kơ tơdrong tơm jơ̆ tơdrong kơ nhăm tơpă sư ‘noh đei tơplih. Păng kon bơngai lu bơ̆n kŭm thoi noh. Mă khan lăm mĭnh kơ nao ayơ ‘noh, lu bơ̆n gơh arih ưh kơ weh đơ̆ng tơdrong kơnhăm tơpă, mă lei tơdrong wă đơ̆ng Kră Yang ‘măn kơ chăl arih lu bơ̆n oei ưh kơ đei tơplih. Wă băt kơ tơdrong kơ nhăm ‘noh hơ đăl, lu bơ̆n kăl kơ wơ̆t tơ Nơ̆r Sư.

Lăm kơplah jơnăr pơm bơnă tơ pơlei Babilôn, kon pơlei Isơrael đei hiong tơring, hiong hnam akŭm, hiong tơdrong rơngei, păng lu sư đei tơchĕng khan ‘Bok Kei-Dei đei achăng lu sư. Mă lei, đơ̆ng ‘bok khan lê̆ adrol Êsai, ‘Bok Kei-Dei tơ’bôh tơdrong ‘mêm mơnat păng tơdrong proh hơmet đơ̆ng Sư kơ kon pơlei. Sư ăn kơ lu sư băt tơdrong kơnhăm mă Sư đei pơjing lu sư jơ̆ yua kơ tơdrong ư-ang Sư păng lu sư athei pơchrang tơdrong ư-ang ‘noh.

“Lu bơngai mă Inh krao hăm anăn Inh, Inh bơih pơjing lu sư, wă ư-ang kơ Inh, tơpă Inh bơih pơjing lu sư. Inh pơjing bơih lu kon pơlei âu, ăn kơ Inh, lu sư gô ră roi bơnê kơ inh.” (Êsai 43:7,21)

‘Bok Kei-Dei đei pơjing kon bơngai hăm tơdrong kơnhăm jơ̆ wă kơkuh kơ Sư. Lu bơ̆n đei pơjing wă ư-ang kơ Sư hăm nơ̆r pơma păng chăl arih bơ̆n (I Pêtrôs 2:9, Êphêsô 1:11-12). ‘Nâu tơpă jơ̆ tơdrong kơ nhăm gĭt kăl mă rim ‘nu lu bơ̆n kăl kơ druh kiơ̆ lăm chăl arih.

Mă lei dah chăl arih tơlơ̆ lu bơ̆n yak ưh kơ trŏ kơ trong năm blŭng a, lu bơ̆n ‘bônh hiơt kơ tơdrong kơ nhăm ‘noh. Lu bơ̆n pơtơm chơ chă tơdrong tơm dah tơdrong hiôk hian ‘bơ̆t dôm tơdrong nai: thoi dan tơdrong lui ngeh anih tơdrong kĕ jei wă kơ ‘bôh hơ đơ̆ng, chơ chă tơdrong lăp đon lăm jơhngơ̆m đơ̆ng dôm tơdrong pơgơ̆p, dah yak kiơ̆ tơdrong kơnhăm đơ̆ng dôm nơ̆r pơma đơ̆ng teh đak. Păng kơplah ayơ ưh kơ băt, lu bơ̆n ‘net ‘net kơkuh kơ rup yang tơplih kơ kơkuh kơ Tơ’ngla Pơjing. Dôm tơdrong ‘noh gơh ba truh tơdrong hiôk lăm jơhngơ̆m lăp tŏ sĕt, mă lei lu bơ̆n oei mơn ‘bôh rơhông. Yua kơ dôm lu tơdrong ‘noh ưh kơ layơ gơh tuh tơ’bĕnh jơhngơ̆m lu bơ̆n. Lu bơ̆n lăp jơ̆ dôm tơdrong tơplih dang ei đĕch, ưh kơ gơh wă pơting hăm tơdrong kơnhăm mă Kră Yang ‘măn ăn.

Tơdrong hiôk chơt jơ̆ mă khan lu bơ̆n đei wơ̆l jrok dah hiong tơdrong kơnhăm, lei lu bơ̆n oei gơh wih brŏk hăm Kră Yang păng chă ‘bôh tơdrong kơnhăm tơpă kơ chăl arih bơ̆n. Athei ăn kơ Kră Yang tơ’blŏk kơ buăl năr ‘nâu: buăl đei pơjing kơ tơdrong ư-ang Sư.

“Hơri bĕ kơ Kră Yang; minh tơdrong hơri ‘nao Ơ đĭ-đăng kon bơngai jơ̆p-jang kơ teh đak hơri bĕ kơ Kră Yang. Hơri bĕ kơ Kră Yang păng bơnê ư-ang kơ anăn Sư; Rim năr athei ră roi tơdrong Sư dŏng pơklaih, ‘Ră roi tơdrong ư-ang kơ Sư tơ jơ̆p dêh char. Roi tơbăt dôm tơdrong jang hlĭch chrơp Sư kơ rim adrĕch kon bơngai. Yua kơ Kră Yang Tih Hloh, trŏ kơkuh bơnê; Sư noh trŏ kơ hli yom hloh kơ đĭ-đăng yang, Yua kơ đĭ-đăng yang mă kon pơlei kơkuh noh jơ̆ yang man kơdih; Mă-lei Kră Yang Sư pơjing plĕnh. Athei hrŭk hơbĕn ao rơgoh na kơkuh kơ Kră Yang; Ơ đĭ-đăng teh đak, hli tơtey bĕ ‘bơ̆t anăp Sư.” (Hơriso 96:1-5,9)

Apĭnh đĭ đăng krao khan hơdai: Kră Yang ơi! Kon bơnê kơ Kră Yang yua kơ năr ‘nâu kon đei tơ’blŏk gah tơdrong kơnhăm tuch luch kơ chăl arih kon. Tŏk bŏk dôm tơdrong hiơ̆k tơtăm, adrin chơ chă păng hrăt hrot đơ̆ng tơdrong arih rim năr, apĭnh tơgŭm kon ling lang ‘blŏk khan kon gah Ih bơih, na dôm tơdrong kon bơ̆jang kăl kơ lăng gah Ih păng yua kơ tơdrong ư-ang Ih. Hơpơi kơ Kră Yang dŏng tơgŭm kon ăn kơ kon arih kiơ̆ trŏ tơdrong kơnhăm mă Ih đei ‘măn ăn kơ kon. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, ‘Bok Kei-Dei đei pơjing lu bơ̆n wă kơ lu bơ̆n kơkuh păng pơyơ̆r dôm tơdrong ư-ang kơ Sư. Lăp kơplah hlôh păng arih trŏ hăm tơdrong kơ nhăm ‘nâu, lu bơ̆n gô chă ‘bôh tơdrong tơm tơpă đơ̆ng chăl arih. Khei ‘năr hlôi bơih, buăl hăm hiơ̆k tơtăm lăm dôm tơdrong đơ̆ng teh đak na hiơt kơ tơdrong kơnhăm tih hloh đơ̆ng chăl arih jơ̆ arih kơ Kră Yang păng pơ-ư kơ Sư lăm rim tơdrong jang đơ̆ng bơ̆n ưh? Athei wih brŏk hăm Kră Yang năr ‘nâu hloi, wă kơ Sư pơklaih praih, tơplih păng tơgŭm buăl arih trŏ hăm tơdrong kơnhăm mă Sư đei ‘măn ăn.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.