Đei layơ buăl apinh Kră Yang minh tơdrong kiơ noh mă lei mơn ‘bôh Sư thĕng hreh hăm bơ̆n. Đơ̆ng lơ khei, sơnăm lu bơ̆n ngeh kơ Kră Yang hiơt, dah ưh kơ mơ̆ng nơ̆r krao apinh bơ̆n bơih. Na lei, lu bơ̆n tam đei jơhngơ̆m adrin apinh Kră Yang păng dan đon lui kơ Sư ưh?

Năr ‘nâu, ‘năr 27/10/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Adam Howard kơ̆l ‘bai IH ĐEI ĐON LUI KƠJĂP TƠPĂ.

“Sư pơma trŏ thoi noh, na Yêsu khan: “Ơ yă, ih lui kơjăp tơpă. Tơdrong ih apinh noh gô đei kơ ih.” Kơplah noh kon adruh sư klaih hloi.” (Mathiơ 15:28)

Sơ̆p hla bơar ‘Bok Kei-Dei đei chih ră roi gah đon lui minh ‘nu bơngai drŏ kăn Kanaan kơplah Yang Yêsu năm truh tơ pơlei Tirơ păng Siđôn, jơ̆ anih tơring bơngai Kanaan, kon pơlei gah ‘ngoaih kơ dêh char sư:

“Đơ̆ng noh Yêsu năm tơ tơring Pơlei Tirơ hăm Pơlei Siđôn. Đei minh ‘nu drŏ-kăn bơngai Kanaan đơ̆ng tơring kiơ̆ ei năm tơ Yêsu apinh thoi âu:“Ơ ‘Bok, Ih kon sâu Đawit mă ‘Bok Kei-Dei wơh wă pơm pơtao kon bơngai. Dang ei inh apinh Ih mơnat kơ inh năm pơklaih kon adruh inh yang kơnê̆ mơ̆t, sư pơmat măng năr.”Mă-lei Yêsu ưh kơ tơl sư. Na lu bơngai pơhrăm păng Sư khan kơ Sư thoi âu: “Apinh Ih jah tơgŭm sư, na sư jah brŏk, sư kiơ̆ bơ̆n nŏng kơ pơma ‘bơ̆r re.” Yêsu khan: “Liơ, ‘Bok Kei-Dei wơh Inh wă kơ Inh tơgŭm lu bơngai Isơrael, yua kơ lu bơngai Isơrael thoi triu jrok trong, na iĕm khan wă kơ Inh tơgŭm sư?” Na bơngai drŏ-kăn ei kơkuh ‘nap ‘bơ̆t anăp Sư păng khan: “Ơ ‘Bok, apinh Ih mơnat tơgŭm inh ‘biơ̆ bĕ.” Yêsu khan: “Lu bơngai Isơrael dang kon Inh, dah Inh tơgŭm ih bơngai tơmoi, lei dang Inh klơ̆m tŭk tơmam sa kon Inh ăn kơ kŏ sa.” Bơngai drŏ-kăn ei khan: “Ơ ‘Bok, trŏ boih, mă-lei inh wă kơ Ih tơgŭm inh ‘biơ̆, yua kơ phŏ phŏ inh kư̆m ‘bôh kŏ năm alep sa đêl kon hơ’lơ̆p sa asĭ.”Sư pơma trŏ thoi noh, na Yêsu khan: “Ơ yă, ih lui kơjăp tơpă. Tơdrong ih apinh noh gô đei kơ ih.” Kơplah noh kon adruh sư klaih hloi.” (Mathiơ 15:21-28)

Yang Yêsu ‘nao đei hlôi kơ lăm khei năr hăm lơ tơdrong: tơdrong lôch Yôhan ‘Batem, ‘nhŏng oh Sư. Pơtrơp dơ̆ng sư pơm tơdrong mơsêh pơm ‘bĕng ăn kơ 5000 bơngai sa, păng tơ’bơ̆p tơdrong pơgăn đơ̆ng lu khŭl bơngai Pharisi. Kơplah năm tơ pơlei Tirơ păng Siđôn, Yang Yêsu đei tơ’bơ̆p bơngai drŏ kăn Kanaan truh tơ apinh Sư pơklaih kon drŏ kăn sư yang kơnê̆ mơ̆t. Yua kơ kon drŏ kăn sư, sư nhơ̆m ơh apinh Yang Yêsu kơ plah Sư hăm bơngai pơ hrăm păng Sư yak năm rok trong.

Na pơm tơwih đơ̆ng lu bơngai pơhrăm păng Sư ‘maih hil kơ yă noh. Lư sư pơma hăm Yang Yêsu thoi âu: “Apinh Ih jah tơgŭm sư, na sư jah brŏk, sư kiơ̆ bơ̆n nŏng kơ pơma ‘bơ̆r re.” (trong 23). Lu bơngai pơhrăm păng Sư apinh Kră Yang jah hơmet lê̆ yua kơ hrơ̆ng hreng. Mă lei Yang Yêsu ưh kơ pơm thoi noh. Blŭng a Sư thĕng hreh, na đơ̆ng rŏng kơ noh Sư pơma khan: “Liơ, ‘Bok Kei-Dei wơh Inh wă kơ Inh tơgŭm lu bơngai Isơrael, yua kơ lu bơngai Isơrael thoi triu jrok trong, na iĕm khan wă kơ Inh tơgŭm sư?”

Kuă kơ achăng weh, bơngai drŏ kăn drap sơtơ̆p kŭl tăng, na krao apinh Yang Yêsu: “Ơ ‘Bok, apinh Ih mơnat tơgŭm inh ‘biơ̆ bĕ.” Yang Yêsu tơl sư: “Lu bơngai Isơrael dang kon Inh, dah Inh tơgŭm ih bơngai tơmoi, lei dang Inh klơ̆m tŭk tơmam sa kon Inh ăn kơ kŏ sa.” Mơ̆ng nhen thoi pơma nơ̆r trăp dêh, mă lei Yang Yêsu yua nơ̆r juăt kơ pơdah lăm tơdrong juăt Isơrael wă pơma khan adrĕch adrŭng Isơrael phara kơ adrĕch đe nai. Chư “kŏ” mă Yang Yêsu đei pơma jơ̆ pơtih kơ “kŏ kon” đei rong lăm hnam, ngăl tơ oei hơla kơ’bang sa dôm tơmam tơphĕ kơcheh huŏng.

Bơngai drŏ kăn kơtơ̆ng nơ̆r noh, sư iŏk jơhngơ̆m đon ala păng pơma: “Ơ ‘Bok, trŏ boih, mă-lei inh wă kơ Ih tơgŭm inh ‘biơ̆, yua kơ phŏ phŏ inh kư̆m ‘bôh kŏ năm alep sa đêl kon hơ’lơ̆p sa asĭ.” Sư đei tơ’bôh đon lui tih mă kơ plah “alep sa” đơ̆ng tơdrong mơsêh păng ‘mêm mơnat đơ̆ng Kră Yang kư̆m đei gơh pơklaih ăn kơ kon drŏ kăn sư. Tơm đơ̆ng đon lui hăm iŏk jơhngơ̆m đon ala đơ̆ng yă âu pơm kơ Yang Yêsu ‘brơ̆k mơnat păng pơma khan: “Ơ yă, ih lui kơjăp tơpă. Tơdrong ih apinh noh gô đei kơ ih.” Kơplah noh kon adruh sư klaih hloi.” Na kơplah jơ noh hloi, kon drŏ kăn sư đei pơklaih.

Kơplah đŏk hơlơ̆k hơle tơdrong hơ’mon ‘nâu, inh đei mơn ‘bôh minh tơdrong ‘lơ̆ng. Lăm lu chăl adrol lăm Mathiơ, lu bơ̆n ‘bôh Yang Yêsu wăr tăp dăr kơ dôm tơdrong kăl wă. Mă khan hrăt hrot, Sư oei tơ’bôh tơdrong ‘mêm mơnat hăm lu bơngai Sư tơ’bơ̆p, na jơhngơ̆m ‘mêm mơnat noh ưh kơ đei tơplih mă khan kăl wă dang yơ.

Mă lei, kơplah tơ’bơ̆p bơngai drŏ kăn Kanaan, tơdrong Yang Yêsu ‘brơ̆k mơnat ưh kơ yua kăl dêh kơ kon drŏ kăn, mă hăm đon lui bơngai mĕ. Yă âu lui ngeh kơ tơdrong mơsêh pơklaih đơ̆ng Yang Yêsu păng krao apinh dĭng truh tơ dang yơ Yang Yêsu tơl sư, mă khan tôm tơdrong yă âu đei iŏk “dôm kơ tơmam sa đơ̆ng tơ’ngla huŏng tơ ala”. Hăm yă âu, dôm noh đĕch kư̆m gơh pơklaih kon drŏ kăn sư bơih.

Tơdrong pơm kơ bơ̆n ‘blŏk tơ Yakôp kơplah sư tơglơ̆m băl hăm linh jang ‘lơ̆ng ‘Bok Kei-Dei lăm Blŭng a 32:22-32, păng pơma: “Inh ưh kơ ăn ih năm ôh, tơdah ih ưh kơ sơkat ăn kơ inh tơdrong pŭn hiôk.”

Yang Yêsu gơh pơklaih tôm tơdrong jĭ jăn ‘bônh đĕch. Tơdah dôm tơdrong kăl wă Kră Yang tơl tơwih hloi, tơnat dêh wă ăn kơ bơ̆n hŏk pơhrăm iŏk jơhngơ̆m adrin. Tơm đơ̆ng lăm tơdrong chang gô, Kră Yang gô ăn kơ bơ̆n đei hlôi mơn đei Kră Yang lơ hloh: noh jơ̆ tơdrong pơjuăt gah đon lui, ‘bơ̆ hơmet tơdrong juăt kơ arih, păng lu bơ̆n hŏk pơhrăm lui gơnang kơ Sư.

Lăm tơdrong arih hrei ‘nâu, lu bơ̆n juăt kơ dôm tơdrong athei mă hrĕnh, đei hloi dang ei. Yua kơ thoi noh, lu bơ̆n tơhiong lê̆ jơhngơ̆m adrin. Inh đei jet kơdih, tơdah dan kơdih ‘bơ̆t bơngai drŏ kăn Kanaan, lei lu bơ̆n achăng hloi kơplah tơ’bơ̆p tơdrong pơgăn blŭng a, kơplah lu bơngai pơhrăm păng Sư chă đon pơgăn tơdrong kăl wă bơ̆n ưh? Rŏ lăng lơ bơngai lăm lu bơ̆n kư̆m ưh kơ kĕ wă chơ̆n jơhngơ̆m thoi kơ ‘bok Jakôp, mă hloh loi kơplah mơn kơdih akâu gleh lap dêh lăm tơdrong apinh.

Năr ‘nâu, inh ‘maih wă pơlung buăl: athei adrin lăm tơdrong krao khan. Mă khan buăl oei apinh Kră Yang tơdrong kiơ, athei adrin rôp kơjăp Kră Yang. Buăl kư̆m đei mơn gleh lap bơih yua kơ apinh đunh bơih, đei pơgơ̆p hăm Kră Yang rim măng đei đak măt lĕch ro, na Kră Yang oei thĕng hreh. Mă lei inh athei buăl: athei đei jơhngơ̆m hơđơ̆ng păng yak năm tơ anăp.

Lu bơ̆n athei kơjăp lăm tơdrong krao khan păng lui gơnang kơ tơdrong mơsêh păng pơgơ̆r đơ̆ng ‘Bok Kei-Dei. Nơ̆r tơtă ăn kơ bơngai bu adrin, Yang Yêsu đei pơma lăm Mathiơ 7: 7-8: “Krao khan apinh ‘Bok Kei-Dei khŏm khŏm na Sư gô asong kơ iĕm. Iĕm nŏng kơ chă khŏm khŏm, Sư gô tơ’bôh kơ iĕm. Iĕm dơdŭ ‘măng Sư khŏm khŏm, na Sư gô pơih ăn. Bơngai bu krao khan apinh ‘Bok Kei-Dei kiơ kiơ, ‘Bok Kei-Dei gô asong. Bơngai bu chă kiơ kiơ, ‘Bok Kei-Dei gô tơ’bôh ăn. Bơngai bu dơdŭ ‘măng ‘Bok Kei-Dei, ‘Bok Kei-Dei gô pơih ăn.”

Kơplah lu bơ̆n đei jơhngơ̆m hơđơ̆ng kơjăp lăm krao khan, hăm đon lui kơjăp, na truh tơ minh năr ayơ noh Kră Yang gô pơma khan hăm lu bơ̆n thoi Sư pơma khan kơ bơngai drŏ kăn Kanaan ki sơ̆: “ Ih lui kơjăp tơpă. Tơdrong ih apinh noh gô đei kơ ih.”

Apĭnh đĭ đăng krao khan hơdai: Kơkuh kơ Kră Yang ‘mă ‘mêm! Ih jơ̆ Tơ’ngla oei mơ̆ng dôm nơ̆r apinh đơ̆ng kon Ih. Kră Yang ơi! Apinh Ih mơnat yua lơ wơ̆t kon tam mă adrin lăm tơdrong krao khan, tam mă lui ngeh Ih gô pơm tôm tơdrong kon oei chang gô. Apinh Ih huay kơ jô̆ yo păng tơgŭm kon pơ̆n nuih arih lăm đon lui păng pơ̆n pŭ iŏk dôm tơdrong kon apinh. Kon kŭp kơl krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, đei tơdrong kơnê̆ kiơ lăm buăl đei apinh Kră Yang mơnat ăn đunh khei sơnăm mă lei tam mă ‘bôh Kră Yang tơl ăn ưh? Bơngai drŏ kăn Kanaan sơ̆ noh kư̆m tơ’bơ̆p lơ tơdrong pơgăn, mă lei sư ưh kơ achăng lê̆, mă ling lang lui gơnang kơ tơdrong ‘mêm mơnat đơ̆ng Kră Yang, mă khan tơdrong ‘mêm mơnat nhen thoi “dôm kơ tơmam sa đơ̆ng tơ’ngla huŏng tơ ala”. Tơdah buăl nhen thoi achăng lê̆ dôm kơ nơ̆r apinh Kră Yang, na năr ‘nâu jơ̆ năr buăl pơtơm đơ̆ng blŭng a, adrin wă kơ jê̆ Kră Yang hloh dơ̆ng, wă kơ băt dôm tơdrong kơnê̆, buăl huay kơ yak năm adrô̆. Kư̆m athei lui gơnang kơ tơdrong pơgơ̆r Kră Yang. Tơdah Sư tơl tơwih, buăl hiôk chơt. Tơdah sư thĕng hreh, rŏ lăng Kră Yang đei tơdă tơdrong ‘lơ̆ng hloh ăn kơ chăl arih buăl. Yua kơ thoi noh, lu bơ̆n huay kơ bơ̆l hăl, athei rôp kjơjăp Kră Yang đơ̆ng lăm tôm tơdrong arih.
Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.