Hăm đei layơ buăl chang gô mĭnh tơdrong kiơ ‘noh đunh dêh, hăm đĭ kơ dôm tơdrong chang hơmĕng, mă lei bơngai nai tă kơ jơ̆ bơngai đei ‘bôh tơdrong yua ‘noh? Lu bơ̆n ‘bônh dêh kơ ơh klai, mă lei kŭm yua kơ thoi noh na hlôh kơ tơdrong gĭt kăl đơ̆ng tơdrong kĕ chơ̆n păng tơdrong đon lui anih Kră Yang. Sơ̆p Hla Bơar ‘Bok Kei-Dei đei roi khan dôm kơ ‘bok pơtao, bơngai khan lê̆ adrol ling lang chang gô gơh lăng ‘bôh ‘Bok Mêsia, mă lei dĭng truh jơhnơr đơ̆ng rŏng ‘mơ̆i gơh tơm măt ‘bôh. Păng kơplah Sư truh, Sư ưh kơ truh lăm tơdrong pơgơ̆r ‘lơ̆ng rŏ kơ teh đak, na Sư rơih iŏk hmă đĕch đơ̆ng mĭnh ‘nu bơngai ‘lơ̆p wă tơ’bôh Dêh Char Kơpal Plĕnh.

Năr ‘nâu, ‘năr 28/10/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Paul J. Palma kơ̆l ‘bai ĐON LUI THOI KƠ LU HƠ‘LƠ̆P.

“Ơ ‘Bă, Ih boih Kră Yang plĕnh teh. Inh bơnê kơ Ih yua kơ dôm tơdrong Inh bơtho, Ih tơbăt kơ lu bơngai âu mă băt gơnang kơ Ih thoi lu hơ’lơ̆p!” (Luka 10:21)

“Đơ̆ng noh na Yêsu hue tơ lu bơngai pơhrăm păng Sư na Yêsu khan kơdrô̆ lu sư: “Dôm lu bơngai ‘bôh tôm tơdrong iĕm ‘bôh Inh pơm ahrei, lu sư hiôk tơpă. Inh khan kơ iĕm tơpă, đei lơ bơngai pơtruh nơ̆r ‘Bok Kei-Dei păng lu đe ‘bok pơtao sơ̆ ‘maih ‘bôh tơpă dôm tơdrong mă iĕm ‘bôh dang ei ră, mă-lei lu sư ưh kơ đei ‘bôh ôh. Lu sư ‘maih mơ̆ng dôm tơdrong iĕm kơtơ̆ng dang ei ră, mă-lei lu sư ưh kơ đei kơtơ̆ng ôh.” (Luka 10:23-24)

Rup tơmo Yă Yang Rơngei đei pơm pơjing hloh kơ 20 sơnăm ‘mơ̆i keh. Sơnăm 1865, bơngai pơm pơjing bơngai Phap Édouard de Laboulaye đei tơlĕch tơdrong tơchĕng: Phap ăn tơmam kơ Hoa Ky mĭnh pôm rup yang wă kơ ‘blŏk kơ tơdrong rơngei đei pơjuă đunh kơplah chăl Napoléon III. Rup tơmo đei pơm pơjing tơ Phap, plôh hơmet, na chơ năm tơ New York wă tah hơmet kơpal tơmam jrơng. Năr 28 khei 10 sơnăm 1886, ‘Bok pơgơ̆r Grover Cleveland pơtơm pơm pơkeh rup tơmo.

Ala jơ̆ng rup tơmo đei chih nơ̆r pơđơ̆k:

“Athei pơjao kơ inh dôm lu bơngai tơrăn, dơnuh hin,
Khŭl bơngai pơmat tat hơring kơ tơdrong rơngei,
Dôm tơdrong pơmat ‘mê̆ ‘mach hoch đơ̆ng cheng anih tơtŭn băl.
Ăn kơ lu sư, bơngai ưh kơ đei hnam, kial hơbŭt klơ̆p năm tơ inh.
Inh tưk gŏl ŭnh cheng tơnang ‘măng maih!”

Mă khan Laboulaye đei lôch adrol kơ ‘bôh tơdrong jang pơjing keh, mă lei Rup tơmo Yă Yang Rơngei oei đei thoi mĭnh tơdrong tơ’bôh wei lăng dôm lu bơngai dơnuh pơmat tat păng đe pơđep, chă truh tơ anih Hoa Ky wă krao chă rơngei. Sư đei chang gô lơ sơnăm wă kơ ‘bôh tơdrong tơchĕng đơ̆ng sư đei pơjing keh, mă lei jơ năr tơdrong jang pơjing tih ‘noh đei keh ‘lơ̆ng tôm ‘lơ̆ng rŏ tă kơ ‘măn ăn kơ dôm lu bơngai nai.

Đĭ lơ jơhnơr, kon pơlei Isơrael kŭm chang gô ‘Bok Mêsia, ‘bok pơtao mơsêh mơyang gô dŏng pơklaih lu sư đơ̆ng ayăt păng ‘măn ăn kơ lu sư tơdrong hiôk hian đunh sơnăm ‘bơ̆t anih Char Kanaan. Đĭ kơ jơhnơr ‘nâu truh tơ jơhnơr nai, đơ̆ng lu bơngai khan lê̆ adrol, lu ‘bok sek tơlang truh tơ ‘bok pơtao đei lôch mă ưh tim mă ‘bôh ‘Bok Krist. Lei na kơplah Sư truh, Sư ưh kơ đei tơpŭ lăm adrĕch mơdrŏng, na jur tơ anih bơng ‘nhet kro lăm war rơmo hmă đĕch. Sư jing mĭnh ‘nu bơngai jang ot ‘long hmă đĕch păng pơtơm tơdrong jang lăm khŭl bơngai traih ka ưh kơ đei anăn.

Kŭm lei lăi thoi Rup Tơmo Yă Yang Rơngei, ‘Bok Dŏng Pơklaih Yang Yêsu jơ̆ ‘Bok Mêsia kŭm đei tơ’bôh kơ dôm lu kon bơngai dơnuh hin. Laboulaye ưh kơ đei layơ gơh lăng ‘bôh rup tơmo pơm pơjing keh, mă lei tơmam đơ̆ng Rup Tơmo Yă Yang Rơngei oei đei arih ling lang nhen thoi tơdrong chang hơmĕng gah tơdrong rơngei. Lăm Luka chăl 10, lu bơngai pơhrăm ‘nă hal roi dơ̆ng dôm tơdrong mơsêh đơ̆ng Dêh Char Kơpal Plĕnh. Kơplah lăng ‘bôh tơdrong hiôk chơt lăm muh măt lu sư, Yang Yêsu đei krao khan: “Ơ ‘Bă, Ih boih Kră Yang plĕnh teh. Inh bơnê kơ Ih yua kơ dôm tơdrong Inh bơtho, Ih tơbăt kơ lu bơngai âu mă băt gơnang kơ Ih thoi lu hơ’lơ̆p băt gơnang kơ mĕ ‘bă păng Ih ưh kơ tơhlôh kơ lu bơngai mă gơnang kơ akâu sư kơdih hŏk hơgei. Ơ ‘Bă, Ih pơm thoi noh trŏ tơpă, kiơ̆ thoi Ih lăp đon.” (Luka 10:21)

‘Bok Mêsia đei pơkă ăn đei truh bơih! Mă lei Dêh Char Kơpal Plĕnh ưh kơ đei tơ’bôh adrol kơ lu bơngai hŏk kơjung gơh hơgei, na ăn kơ dôm lu jơhngơ̆m hmă đĕch thoi kơ bơngai hơ’lơ̆p. ‘Bok Dŏng Pơklaih Yang Yêsu ưh kơ truh kiơ̆ thoi bơngai Juđa chang gô- mĭnh ‘nu bơngai pơgơ̆r đe pơ-ư hao aseh mơ̆t tơ lăm Jêrusalem. Mă khan tơdrong roi tơbăt gah dôm tơdrong mơsêh mơyang Sư pơm rai tơbăt lơ, tơbăt anăn tih hloh đơ̆ng Sư, lei Sư oei rơih iŏk mơ̆t lăm Jêrusalem kơpal aseh iĕ. Phŏ kŭm đei blư hlĭch hloh- ‘noh jơ̆ mĭnh kon aseh oei hơiĕ! (Mathiơ 21:5)

‘Bok Kei-Dei hiôk hơ iă tơ’bôh Dêh char Sư lăm trŏ jơnăr đơ̆ng Sư, ưh kơ trŏ lăm tơdrong rang rŏ ‘măn kơ lu bơngai gĭt kăl, mă lei lăm tơdrong chu iŏk đon ala ‘măn kơ lu bơngai chu iŏk đon ala. Dêh char Sư ưh kơ gơh pơting hăm anih pơtao, khŭl lĭnh dah plei teh, mă hăm đon lui hmă đĕch đơ̆ng dôm lu bơngai kiơ̆ Sư- đon lui pơklep kơjăp hăm tơdrong pơm tơ’bôh chu iŏk đon ala truh tơ ala hloh: ‘long pơglang.

Mă lei tơdrong hơ’mon ưh kơ dơ̆ng ‘bơ̆t doh- yua kơ ‘Bok Dŏng Pơklaih lu bơ̆n đei iung arih! Kon Triu chu pơmat tơplih kơ lu bơ̆n ưh kơ đei oei hơnơ̆ng tơ dêh lôch. Đơ̆ng tơdrong chu tơjur đơ̆ng ‘Bok Dŏng Pơklaih Yang Yêsu, ‘Bok Kei-Dei ‘Bă đei pơm tơdrong mơsêh tih hloh: pơm kơ Kon ‘mêm Sư arih đơ̆ng dêh lôch.
Năr ‘nâu, ‘Bok Kei-Dei krao đĭ đăng lu bơ̆n năm tơ ‘long pơglang hăm đon lui hmă đĕch, mă khan lu bơ̆n đei jơ̆ “bơngai khan lê̆ adro dah ‘bok pơtao”. Mă anih jang kơpal teh đak lu bơ̆n đei thoi yơ, lei dah dơ̆ng tơ ala ‘long pơglang, lu bơ̆n đei năm hăm jơhngơ̆m chang hơmĕng. Yua kơ ‘Bok mă lu bơ̆n ling lang hơpơi wă đei “ ‘bôh” păng “kơtơ̆ng” đei arih tơpă, păng Sư oei chro ti krao, pơjao ăn nơ̆r pơkă gah tơdrong rơngei păng kĕ jei kơ đĭ đăng kon bơngai.

Apĭnh đĭ đăng krao khan hơdai: Kơkuh kơ Kră Yang mă ‘mêm! Kon bơnê kơ Kră Yang yua kơ Ih tơ’bôh Dêh Char Kơpal Plĕnh păng tơdrong oei hơdai ‘bĕnh tơdrong ư-ang đơ̆ng Ih kơ dôm jơhngơ̆m hmă đĕch thoi kon hơ’lơ̆p. Kră Yang ơi! Apĭnh dui kon kơdâu tơ jơ̆ng ‘long pơglang hăm đon lui chu iŏk đon ala, ưh kơ gơnang kơ jơhngơ̆m pran kơdih, tơdrong gơh hơgei kơdih, dah anih tơdrong jang kơpal teh đak, mă lei gơnang đĭ anih tơdrong mơnat ăn đĕch đơ̆ng ‘Bok Dŏng Pơklaih Yang Yêsu. Apĭnh Yang Bơhngol ‘Lơ̆ng tơ gŭm kon arih rim năr lăm tơdrong rơngei păng kĕ jei mă Ih đei ‘măn ăn đơ̆ng tơdrong iung arih đơ̆ng Kon Ih. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, lu bơ̆n ưh kơ kăl kơ jơ̆ ‘bok pơtao dah jơ̆ bơngai đei tơdrong jang tih ‘mơ̆i gơh tơ’bơ̆p Kră Yang. Tơdrong Kră yang chơ chă anih rim bơngai ‘noh bơih jơ̆ jơhngơ̆m hmă đĕch, lui gơnang păng rơhing kơ Sư. ‘Long pơglang ưh kơ trŏ jơ̆ pơtôch lê̆, mă lei jơ̆ tơnang ‘măng pơih kơ tơdrong iung arih ư-ang. ‘Bok Dŏng Pơklaih Yang Yêsu đei iung arih, ăn kơ buăl păng inh gơh sơng iŏk tơdrong chang hơmĕng, tơdrong rơngei păng kĕ jei ling lang. Lei na, năr ‘nâu hloi, rim ‘nu lu bơ̆n athei pơdrơ̆ng năm tơ Sư, păng dan đĭ jơhngơ̆m anih Sư hăm đon lui hmă đĕch thoi bơngai hơ’lơ̆p!

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.