Nơ̆r pơma lĕch đơ̆ng jơhngơ̆m đon. Minh ‘nu bơngai đei jơhngơ̆m tơ’bưh hăm Kră Yang gô đei tơ lĕch nơ̆r ‘lơ̆ng tơpăt đơ̆ng lăm jơhngơ̆m đon. mă lei kư̆m đei, lu bơ̆n đei tơlĕch nơ̆r khĕnh hơwĕng păng pơm kơ jơhngơ̆m chhŭr nuih, mă khan ưh kơ pơrơ̆ng dah pơrơ̆ng. Lăm kơplah thoi noh, kăl kơ đei tơ’blŏk lu bơ̆n gah tơdrong kiơ?

Năr ‘nâu, ‘năr 29/10/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Jessica Teed kơ̆l ‘bai KƠPLAH NƠ̆R PƠMA TƠ‘BÔH ĐƠ̆NG LĂM JƠHNGƠ̆M.

“Pôm nơ̆r pơma đĕch, lĕch đơ̆ng jơhngơ̆m đon kon bơngai, na pơm kơ kon bơngai jing yoch.  Yua kơ đơ̆ng jơhngơ̆m đon kon bơngai tơchĕng kơnê̆ na jing yoch: Sư pơlôch đe, kơtrŏ hăm akăn đe , sư pơm pơyô kư̆ kă, sư tơtông, sư oei pơma hơlĕnh, sư pơjăm pơjuă đe.” (Mathiơ 15:18-19)

Lu bơ̆n đêl đei pơm yoch lăm nơ̆r pơma kơplah tơlĕch nơ̆r kơnê̆, jô̆ jŏk, pơma hơlĕnh, roi ‘bơm, pơma ưh kơtrŏ dah dôm kơ nơ̆r kơnê̆ kơplah oei blĕk. Dôm kơ nơ̆r pơma thoi noh tơ’bôh lăm jơhngơ̆m tam mă đei tơplih, na jơhngơ̆m noh kăl kơ đei Yang Yêsu. Sơ̆p hla bơar ‘Bok Kei-Dei bơtho lu bơ̆n athei bơwei jơhngơ̆m hơdrol hloh, yua kơ đơ̆ng lăm jơhngơ̆m gô jing đei đon tơchĕng, đon lui păng lu bơ̆n băt lăng kơdih akâu, gah bơngai nai gah tơdrong arih jum dăr kơ lu bơ̆n. buăl hăm ‘bôh ưh, đơ̆ng lăm jơhngơ̆m gô jing đei đon tơchĕng, đon tơchĕng gô jing đei nơ̆r ‘bơ̆r pơma, nơ̆r ‘bơ̆r pơma tơ’bôh đơ̆ng lu bơ̆n đei đon lui ngeh, păng đon lui noh gô ‘bơm tơdrong lu bơ̆n oei pơm kơdih akâu păng hăm bơngai nai.
“Kơchăng bĕ ling-lang wă kơ wei-lăng jơhngơ̆m ih, Yua kơ tơdrong arih tơm lĕch đơ̆ng noh.” (Tơdrong Pơđơ̆k 4:23)

Đei minh ‘măng lăm chăl arih, dôm kơ nơ̆r inh đei tơlĕch tă kơ nơ̆r pơma kơnê̆ păng nơ̆r blĕk. Dôm kơ nơ̆r inh pơma noh tơ’bôh lăm jơhngơ̆m inh kơplah noh. Inh ngăl kơnhăm kơ anat anot, kơ’bah truh tơ pă đei kơnhăm kơ pŭn hiôk đơ̆ng Kră Yang ăn kơ inh. Dui inh năm lăm dôm tơdrong kơnê̆: đơ̆ng chhŭr nuih tơ lĕch jơhngơ̆m đon kơnê̆, păng đơ̆ng tơchĕng kơnê̆ tơlĕch nơ̆r ‘bơ̆r pơma kơnê̆. Pơm kơ inh jing bơngai kơnê̆ păng kư̆m kơnê̆ hăm bơngai nai. Đơ̆ng rim kơ nơ̆r pơma, đơ̆ng rim kơ đon tơchĕng kơ nê̆ nhen thoi tơlơ̆ inh huŏng tơ lăm sơlŭng jrŭ ơh sơ’ngon. Mă đơ̆ng tơdrong arih thoi noh, inh mơn băt kơ inh kăl wă kơ đei Yang Yêsu hloh kơ tôm tơdrong. Sư ưh kơ sĭ adrô̆ ‘Bok Dŏng Pơklaih đĕch ôh, mă jing Kră Yang pơgơ̆r chăl arih inh.

Sơ̆p hla bơar ‘Bok Kei-Dei đei pơma khan thoi âu “jơhngơ̆m kon bơngai hơlĕnh pơdăr hloh kơ đĭ đăng” ( Jêrêmi 17:9). Lăm Mathiơ 15, Yang Yêsu đei tơblang tơdrong pơtih gia ăn kơ bơngai pơhrăm păng sư wă kơ lu sư hlôh tơdrong kăl yua tôm tơmam mơ̆t đơ̆ng lăm ‘bơ̆r, păng tơmam lĕch đơ̆ng lăm ‘bơ̆r:

“Đĭ dôm tơmam sa, bơ̆n sa mơ̆t lăm klak, klaih kơ noh lĕch đĭ. Pôm nơ̆r pơma đĕch, lĕch đơ̆ng jơhngơ̆m đon kon bơngai, na pơm kơ kon bơngai jing yoch. Yua kơ đơ̆ng jơhngơ̆m đon kon bơngai tơchĕng kơnê̆ na jing yoch: Sư pơlôch đe, kơtrŏ hăm akăn đe, sư pơm pơyô kư̆ kă, sư tơtông, sư oei pơma hơlĕnh, sư pơjăm pơjuă đe. Tôm tơdrong kơnê̆ noh lĕch đơ̆ng jơhngơ̆m đon kon bơngai na jing yoch. Tơdrong iĕm sŏng sa ưh kơ ôp ti noh ưh kơ đei pơm kơ iĕm yoch ôh.” (Mathiơ 15:17-20)

Yua kơ thoi noh, lăm tơdrong arih khŭl bơngai lui, lu bơ̆n kăl “athei chu yom kơ Yêsu Krist lăm tôm tơdrong” ( II Kôrintô 10:5) păng lu bơ̆n athei dan jơhngơ̆m đon bơ̆n tơ “tơchĕng tơdrong kiơ ‘lơ̆ng, tơdrong kiơ tơpăt, tơdrong kiơ trŏ, tơdrong kiơ kăl, tơdrong kiơ đe ư-ang, tơdrong kiơ hơiă, tơdrong kiơ kon bơngai lăp đon, tơdrong kiơ đe tơ’mêm băl.” (Philip 4:8). Mă lei, lu bơ̆n ưh kơ đei gơh pơm tơdrong ‘nâu tơdah lu bơ̆n ưh kơ apinh Kră Yang pơklaih păng tơplih jơhngơ̆m bơ̆n hơdrol hloh.

Inh đei arih adrô̆ lăm kơplah khei ‘năr noh. Dôm kơ tơdrong tơchĕng păng nơ̆r pơma kơnê̆ đei nơ̆r lăm đon inh nhen lu nơ̆r tơpă. Rai đunh inh rai ataih đơ̆ng Kră Yang, ưh pă ‘maih krao khan dah akŭm kơkuh, lăp minh Kră Yang đĕch jơ̆ Tơ’ngla dŏng pơklaih inh lĕch hlôi đơ̆ng tơdrong noh. Na hlôi đơ̆ng rim năr, Sư đei pơklaih dôm kơ jĭ rơka lăm jơhngơ̆m inh, tơgŭm inh lăng kơdih hăm măt Sư. Sư tơ’bôh tơbăt kơ inh Sư noh jơ̆ bu kơ plah inh ơh sơ’ngon. Na đơ̆ng rim wơ̆t, Kră Yang tơplih măt lăng inh lăng tơ Sư, gah kơdih inh păng bơngai nai. Kră Yang đei ba inh lĕch hlôi đơ̆ng măng mu, wă yak năm lăm hơdah mơsêh mơyang Sư.

“Mă-lei gah bơ̆n, Sư rơih iŏk bơ̆n wă kơ bơ̆n jing adrĕch adrung Sư, bơ̆n kư̆m thoi lu bơngai soi kơ ‘Bok Kei-Dei Pơtao bơ̆n, bơ̆n dang pơlei pơla Sư, teh đak Sư boih. Sư ăn kơ bơ̆n jing kon Sư wă kơ bơ̆n ră roi kơ đe dôm tơdrong ‘lơ̆ng Sư pơm. Sư boih krao iŏk bơ̆n đơ̆ng anih măng mu oei tơ anih hơdah Sư dang ei.” (I Pêtrôs 2:9)

Gơih truh ăn kơ lu đe bu oei đei tơdrong arih thoi inh: tơdah Kră Yang đei tơplih inh, na Sư kư̆m tơplih buăl. Kơplah jơ ‘nâu, Kră Yang oei chro ti Sư, dui buăl lĕch hlôi đơ̆ng ơh sơ’ngon păng ba buăl mơ̆t tơlăm hơdah hlĭch chrơp đơ̆ng Kră Yang. Năr ‘nâu, buăl hăm wă pơih jơhngơ̆m chhŭr nuih ăn kơ Kră Yang, ăn kơ Sư pơklaih, ôp rơgoh păng tơplih jơhngơ̆m buăl ưh?

Apĭnh đĭ đăng krao khan hơdai: Kră Yang ơi, kơplah nơ̆r pơma kon ưh kơ đei ‘lơ̆ng tơpăt păng kơnê̆, apinh Kră Yang tơ’blŏk kơ kon băt kơ lăng lăm jơhngơ̆m kơdih păng pơgơ̆p Ih hăm kon. Kon bơnê kơ Kră Yang yua kơ kon lăm Ih bơih, na apĭnh Kră Yang pơtho kon băt yua ‘bơ̆r pơma kon ră roi tơdrong ‘nao ‘lơ̆ng Ih păng pơlung bơngai nai. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, băt mơn kơ kơdih akâu noh jơ̆ “Sư ăn kơ bơ̆n jing kon Sư wă kơ bơ̆n ră roi kơ đe dôm tơdrong ‘lơ̆ng Sư pơm. Sư bơih krao iŏk bơ̆n đơ̆ng anih măng mu oei tơ anih hơdah Sư dang ei”, buăl hăm wă pơyơ̆r đĭ jơhngơ̆m, nơ̆r ‘bơ̆r pơma, păng đĭ tơdrong arih wă ră roi tơdrong Kră Yang ưh? Rim wơ̆t buăl mơn băt ‘bôh lăm jơhngơ̆m păng nơ̆r ‘bơ̆r pơma ‘bĕnh kơ jơhngơ̆m kơnê̆ păng klai gar, athei lăng ming tơdrong pơgơ̆p đơ̆ng buăl hăm Kră Yang? Buăl hăm băt kơ Kră Yang đơ̆ng dôm tơdrong arih kơdih ưh? Athei apinh Kră Yang pơklaih jơhngơ̆m buăl, yua kơ đơ̆ng lăm đei pơklaih păng tơplih jing ‘nao, buăl gô pơma păng arih nhen thoi bơngai lăm Kră Yang.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.