Kơplah lui kơ Kră Yang, rim ‘nu lu bơ̆n đei krao wă bơ̆jang kơ Sư păng hơdai pơih să dêh char Sư lăm teh đak. Mă lei, đei lơ wơ̆t lu bơ̆n mơn ‘bôh kơ dih iĕ ioch, ưh kơ đei tơdrong gơh hơgei, păng ngăl chă ‘bôh dôm tơdrong pơm kơdih chă đon ưh kơ drơ̆ng iŏk tơdrong jang mă Kră Yang pơjao.

Thoi noh tơdrong kiơ tơgŭm lu bơ̆n yak hlôi đơ̆ng tơdrong hli tơrơ păng wă sơng iŏk tơdrong jang Kră Yang pơjao hloi?

Năr ‘nâu, ‘năr 30/10/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Lina Johnson kơ̆l ‘bai KRĂ YANG HĂM ĐEI YUA INH ƯH?

“Kră Yang khan dơ̆ng: Bu pơjing kơ ‘bơ̆r adrĕch kon bơngai? Dah bu pơm kơmlo, pơm klĭk, pơm kơ măt hơdah păng ưh kơ bang? Hăm trŏ kơ Inh Kră Yang?” (Lĕch Đơ̆ng Êyiptơ 4:11)

Buăl hăm đei layơ đei Yang Bơhngol ‘Lơ̆ng pơtrŭt bơ̆jang mĭnh tơdrong jang kiơ noh, Mă lei tơdrong hli tơrơ đei gơgơ̆r đon tơchĕng buăl ưh? Buăl hăm đei layơ pơma hăm Kră Yang khan: “Kră Yang ơi, kon ưh băt lei kơdih hăm gơh jang tơdrong ‘noh ưh, yua kơ kon hli kơdih gô bơ̆jang ưh kơ gơh.” Kơdih inh, inh đei hlôi tơ’bơ̆p tơdrong ‘nâu lơ wơ̆t bơih.

Mĭnh năr ei, kơplah oei hơkŭm kơkuh kơ Kră Yang tơ Khŭl Lui, tơdrong hli tơrơ ‘noh đei lăm đon tơchĕng inh. Đơ̆ng rŏng kơ hơkŭm, inh năm tơ’bơ̆p păng pơma dơnuh hăm bơngai bơtho năr ‘noh. Inh ră roi hăm sư khan inh hli kơdih gô pơm ưh kơ ‘lơ̆ng tôm tơdrong mă Kră Yang krao inh, ưh kơ hơđăl Kră Yang hăm wă yua inh tơpă dah ưh, păng kŭm ưh băt athei pơm thoi yơ hăm dôm tơdrong Sư oei dan ăn lăm tơdrong arih inh.

Bơngai bơtho hiĕk păng pơma hăm inh: “Yua kơ kon băt kơdih ưh kơ gơh kơ bơ̆jang, ‘noh bơih jơ̆ tơdrong mă Kră Yang yua kon. Yua kơ tơdah kon gơh pơm dôm tơdrong mă ưh kơ đei pơm glăi, kon gô ‘bônh kơ pơ-ang. Mă lei Kră Yang đei rơih kon wă kơ Sư đei ư-ang.” Dôm lu nơ̆r ‘noh tơpă đei tơplih inh! Inh băt kơnăl khan kơdih ưh kơ kăl pơm dôm tơdrong ‘lơ̆ng tôm, mă lei tơdrong Kră Yang wă ‘bơ̆t inh jơ̆ mĭnh jơhngơ̆m wă chu yom hloi.

Lăm Lĕch Đơ̆ng Êyiptơ 3:4, ‘bok Môis đei tơ’bơ̆p ‘Bok Kei-Dei lăm pla ŭnh tŏk-bŏk jơ’bôt Jơla. Tơ anih noh, Kră Yang khan kơ sư athei năm tơ’bơ̆p Pharaôn wă ba kon pơlei Isơrael lĕch hlôi đơ̆ng Êyiptơ (3:10). Đơ̆ng rŏng kơ noh, Kră Yang tơ’bôh tơdrong proh hơmet đơ̆ng Sư kơ Môis (3:11-4:13). Dah đŏk tơdrong tơ’bôh đơ̆ng Môis lăm Lĕch Đơ̆ng Êyiptơ 4, inh nhen thoi ‘bôh kơdih inh lăm noh.

“Môis tơl Kră Yang thoi âu: Ơ! Kră Yang bơnê kơkuh kơ Ih, đơ̆ng năr brei năr mơsơ̆, mă đơ̆ng krô Ih pơma bơtho đĭch đam Ih, inh ưh tam trŏ bơngai pơma gơh hơgei, yua kơ ‘bơ̆r păng hơpiĕt inh pơma arăk ưh kơ hơđăl.” (trong 10)

‘Bơ̆t tơdrong hli tơrơ sư, ‘Bok Kei-Dei đei tơ’blŏk khan Sư bơih jơ̆ Tơ’ngla Pơgơ̆r, Tơ’ngla tih hloh kơ tơdrong rơdu tơrăn păng tơdrong kon bơngai ưh kơ gơh pơm. Sư khan: “Bu pơjing kơ ‘bơ̆r adrĕch kon bơngai? Dah bu pơm kơmlo, pơm klĭk, pơm kơ măt hơdah păng ưh kơ bang? Hăm trŏ kơ Inh Kră Yang? Thoi ei, na năm bĕ; inh gô oei hơdai lăm ‘bơ̆r păng bơtho ih dôm nơ̆r trŏ wă pơma.” (trong 11-12)

Mă khan thoi noh, ‘bok Môis oei tơl khan: “Ơ! Kơkuh kơ Ih Kră Yang Ih wă wơh bu năm, wơh bĕ.” (trong 13)

Inh ‘bôh kơdih lei lăi thoi ‘bok Môis tơpă, yua kơ kŭm ngăl tơl hăm Kră Yang khan: “Kră Yang ơi, kon ưh kơ gơh pơm. Apĭnh Ih rơih bơngai nai.” Mă lei Kră Yang ưh kơ đei rơih bơngai nai, na Sư wơh thim bơngai năm hơdai wă dŏng tơgŭm inh. Lei lăi thoi ‘Bok Kei-Dei đei wơh Arôn năm tơgŭm Môis, Sư kŭm yua dôm lu bơngai thoi bơngai bơtho năr ‘noh wă pơlung tơiung inh.

Kơplah đŏk pơtrơp Lĕch Đơ̆ng Êyiptơ, lu bơ̆n ‘bôh ‘Bok Kei-Dei đei pơm tôm tơdrong Sư pơkă. Sư yua dôm lu kon bơngai ‘bĕnh tơdrong rơdu tơrăn păng ưh kơ ‘lơ̆ng tôm wă tơ’bôh tơdrong mơsêh mơyang, wă kơ anăn Sư đei ư-ang! Păng năr ‘nâu Sư oei bơ̆jang kiơ̆ trong ‘noh.

Brei mơsơ̆, inh đei jơ pơma dơnuh hăm mĭnh ‘nu ‘bok bơtho. Sư ră roi khan sư ưh kơ gơh wă bơtho gah tơdrong hnam dơnŏ kơ lu bơngai wă iŏk ŭnh om yua kơ lăm hnam dơnŏ sư kơdih kŭm đơ̆ng đêl đei dôm tơdrong pơchah. Mă khan dang ei sư đei hŏk iŏk lơ tơdrong đơ̆ng dôm lu tơdrong hlôi đei tơ’bơ̆p noh, păng oei đei hnam dơnŏ hiôk chơt, mă lei tơchĕng ‘noh oei druh kiơ̆. Tơdrong hli tơrơ noh đei tơgar iŏk jơnăr wă kơ sư gơh dŏng tơgŭm păng pơm pơjing kơ lu klo akăn lăm Khŭl Lui.

Lu bơ̆n ngăl đei pêng trong wă hŏk iŏk. ‘Lơ̆ng hloh jơ̆ hŏk đơ̆ng tơdrong kĕ jei đơ̆ng bơngai nai. Tŏ sĕt đĕch lăp đon hloh jơ̆ hŏk đơ̆ng tơdrong wơ̆l jrok đơ̆ng bơngai nai. Păng trong mă đĭ đăng lu bơ̆n ưh kơ hơpơi wă, ‘noh jơ̆ kăl kơ hŏk đơ̆ng kơdih dôm lu tơdrong glăi đơ̆ng kơdih kâu.

Inh klah asong dôm trong hŏk pơhrăm ‘nâu wă kơ lu bơ̆n ‘bôh khan, mă ưh kơ ‘lơ̆ng tôm, mă lei lu bơ̆n oei gơh đei Kră Yang yua. Lu bơ̆n gô đei pơm glăi, mă lei lu bơ̆n gơh hŏk iŏk wă hơmet ming tơdrong glăi. Phŏ kŭm, tơdrong hlôi đei tơ’bơ̆p đơ̆ng lu bơ̆n kŭm gơh jing ‘bai pơhrăm wă pơlung tơiung păng pơm pơjing bơngai nai. ‘Bok Kei-Dei gơh yua đĭ dôm tơdrong ưh kơ ‘lơ̆ng tôm đơ̆ng lu bơ̆n wă bơ̆jang kơ Sư, kư̆ kơ jơ̆ bơ̆n gô wă bơ̆jang. Păng kơplah ‘noh, kơdih Sư gô đei pơ-ư pơ-ang!

Thoi noh, tơdah năr ‘nâu buăl oei ưh kơ băt Kră Yang hăm đei yua buăl ưh? Nơ̆r tơl tơpă jơ̆: Đei! ‘Nĕ ăn kơ dôm tơdrong hli tơrơ pơgăn buăl bơ̆jang kơ Sư, mă lei athei yak năm hăm đon lui, chu yom kơ Sư, păng pơyơ̆r tôm tơdrong ư-ang kơ Sư.

Apĭnh đĭ đăng krao khan hơdai: Kơkuh kơ ‘Bă mă ‘mêm, kon băt kơdih ưh kơ ‘lơ̆ng tôm păng pơm lơ tơdrong glăi, mă lei Kră Yang ơi, bơnê kơ Kră Yang lơ tơpă yua kơ Ih oei ‘mêm yua kon. Apĭnh tơgŭm kon ưh kơ bơ̆l hăl dah ‘bôh kơdih oei rơdu ưh kơ gơh, mă lei ăn kơ kon ling lang đei jơhngơ̆m wă tơl tơwih nơ̆r krao đơ̆ng Ih, wă kơ đei Ih yua păng pơjâm hơmet. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, ‘bok Môis, bơngai đêl đei hli tơrơ păng hơngah đơ̆ng nơ̆r krao đơ̆ng Kră Yang, đei jing bơngai đei Kră Yang yua wă chông anhăk đĭ mĭnh adrĕch adrŭng. Hăm đei layơ buăl mơn ‘bôh ưh kơ pơ̆n mơlâu kơplah ‘bôh tăp dăr đei lơ dêh bơngai gơh hơgei oei bơ̆jang kơ Kră Yang, lăm kơplah buăl ‘bôh kơdih oei ưh kơ tôm gơh hơgei wă bơ̆jang tơdrong Sư ưh?

Buăl mă ‘mêm, Kră Yang ưh kơ achăng hŭt lu bơ̆n yua kơ dôm tơdrong ưh kơ gơh dah tơdrong ưh tim mă ‘lơ̆ng, mă lei Sư yua lu bơ̆n mă khan kơplah lu bơ̆n ‘bôh kơdih ưh kơ tôm mah. Athei ‘blŏk khan Kră Yang ‘măn ăn kơ rim ‘nu bơngai dôm kơ tơdrong gơh hơgei păng dan lu bơ̆n lăm dôm anih hơdai mĭnh tơdrong krao wơ̆n ‘noh jơ̆: hơdai pơih să dêh char Sư kơpal teh ‘nâu.

Yua kơ thoi noh, athei krao apĭnh Kră Yang ‘măn ăn kơ buăl jơhngơ̆m chu yom wă kơ buăl gô tơl tơwih nơ̆r krao đơ̆ng Sư. Păng athei lui tơpă khan, dah Kră Yang pơjao kơ buăl tơdrong jang, kŭm trŏ kơ jơ̆ kơplah Sư pơthim ăn tơdrong pŭn hiôk kơ buăl.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.