Nôel jơ̆ bơyan hiôk chơt, kư̆m jơ̆ bơyan hiôk hian. Hiôk hian noh jơ̆ đei lăm jơhngơ̆m rim ‘nu kon bơngai, bu bu kư̆m rơhing ‘maih wă. Hiôk hian noh ưh kơ sĭ lăm teh đak pă đei tơblah wang, pă đei pơmat tat bơih ôh, mă jơ̆ hiôk chơt lăm jơhngơ̆m mă kơplah đei tơdrong kơnê̆ truh lăm chăl arih. Tŏk bŏk teh đak oei đei ưh kơ hơđơ̆ng, kon bơngai chă tơdrong hiôk hian tơpă noh tơ yơ?

Năr ‘nâu, ‘năr 19/12/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Katy Kauffman kơ̆l ‘bai HIÔK HIAN LĂM BƠYAN KRĂ YANG JUR.

“Inh wă tơklah đơ̆ng iĕm na Inh ăn kơ iĕm jơhngơ̆m hiôk. Jơhngơ̆m Inh hiôk dang yơ, Inh ăn kơ iĕm hiôk dang noh mơ̆n. Inh ăn kơ iĕm hiôk ưh kơ thoi lu bơngai ala teh ăn kơ iĕm hiôk ôh. Iĕm ‘nĕ sơ’ngon păng ‘nĕ kơ hli.” (Yôhan 14:27)

Đei dang kơ minh sơnăm hơdrol, hnam dơnŏ inh ‘bĭch tơhnam pơgang mơjĭt năr, păng đei năr inh kral prăt măng wei rong bơngai jĭ jăn. Măng blŭng a tơhnam pơgang, inh đei tep dang kơ 30 phŭt tơ kơpal tang dŏ lăm anih đe ‘măn kơ bơngai jĭ jăn, na kư̆m asong ăn kơ bơngai kư̆m dai đei pơdơh. Inh đei tơ oei ‘bơ̆t tang dŏ tơtil bơngai jĭ, lăng bơngai jĭ dui jơhngơ̆m kơplah oei tep. Lăm kơplah noh, inh lăng păng kư̆m krao khan.

Năr đơ̆ng rŏng, inh brŏk tơ hnam pơdơh wă kơ đei jơhngơ̆m pran na wei rong bơngai jĭ jăn noh, mă lei inh ưh kơ ‘maih weh đơ̆ng hnam pơgang. Tơchĕng tơ tơdrong kiơ noh kơplah inh ưh kơ đei tơnoh tơdrong kiơ gô đei truh, pơm kơ inh ưh kơ hơđơ̆ng. Yua kơ thoi noh, inh krao khan lăm jơhngơ̆m păng apinh Kră Yang inh oei tơ hnam pơgang dah brŏk. Na mơn hloi, jơhngơ̆m inh đei tơ’blŏk bơngai jĭ mă inh bơwei noh huay kơ đei tơdrong kơnê̆ truh. Inh băt kơ hnam pơgang wei rong ‘lơ̆ng, mă lei inh hlôh đơ̆ng Kră Yang oei wei rong bơngai jĭ noh lăm tơpang ti Sư.

Bơyan Nôel ‘nâu, lu bơ̆n hơpơi kơ hnam dơnŏ, bơngai bơ̆n juăt đei jơhngơ̆m hiôk hian păng grăng hiôk. Lu bơ̆n rơhing kơ đei rơngei tơ kơpal teh păng hiôk hian lăm jơhngơ̆m. Mă tơpă lu bơ̆n oei arih lăm teh đak đei lơ tơdrong pơmat tat, tơblah wang păng tơsŭl tơwŏk. Mă khan đei thoi noh, Yang Yêsu đei pơkă ăn kơ lu bơ̆n gô đei tơdrong hiôk hian đơ̆ng Sư. Yang Yêsu pơma khan:

“Inh wă tơklah đơ̆ng iĕm na Inh ăn kơ iĕm jơhngơ̆m hiôk. Jơhngơ̆m Inh hiôk dang yơ, Inh ăn kơ iĕm hiôk dang noh mơ̆n. Inh ăn kơ iĕm hiôk ưh kơ thoi lu bơngai ala teh ăn kơ iĕm hiôk ôh. Iĕm ‘nĕ sơ’ngon păng ‘nĕ kơ hli.” (Yôhan 14:27)

Kơplah tơpŭ kơ Yang Yêsu, lu linh jang đei roi tơbăt: “Ư-ang kơ ‘Bok Kei-Dei mă oei tơ plĕnh ti. Sư wă ăn hiôk-hian kơ lu bơngai mă Sư lăp đon tơ ala teh âu.” (Luka 2:14). Kơplah tơ pŭ kơ Yang Yêsu, teh đak kăl dêh kơ đei hiôk hian, păng loi kơ ‘bar rơbâu sơnăm đơ̆ng rŏng, tơdrong ‘maih wă noh ưh kơ đei tơplih. Mă khan chăl ayơ, kon bơngai đei chă tơdrong hiôk hian tơpă. ‘Bok Epictetus, minh ‘nu bơngai rơgei bơngai Grĕk đei pơma thoi âu: “Pơtao ăn tơdrong rơngei tơ kơpal teh hăm lăm đak dơsĭ, mă lei sư ưh kơ gơh dŏng pơklaih kon bơngai đơ̆ng hưch wă kơdih, ơh sơ’ngon păng klai gar. Sư ưh kơ gơh ăn kơ kon bơngai hiôk hian lăm jơhngơ̆m, tơdrong mă kon bơngai rơhing hloh kơ hiôk hian gah ‘ngoaih.”

Epictectus pơma tơ’bôh tơpă: kon bơngai pă băt wă chơ chă tơdrong hiôk hian tơpă. Rơhông lăm jơhngơ̆m rim ‘nu noh đei tơ’bĕnh đơ̆ng Pơtao Yêsu, Tơ’ngla đei pơma khan thoi âu Sư ăn kơ lu bơ̆n hiôk hian “ưh kơ thoi bơngai lăm teh đak ăn” kơplah lu linh jang đei pơma khan hiôk hian ăn kơ teh đak, tơdrong noh kon bơngai đei tơdrong hiôk hian tơpă kơplah đei ‘long sơlam hăm ‘Bok Kei-Dei đơ̆ng Yang Yêsu. Kơplah đei bơngai lui sơng iŏk Yang Yêsu lăm jơhngơ̆m, lu sư huay pă đei tơdrong yoch chô̆ păng hli tơrơ, na đei tơdrong chang hơmĕng păng đei tơdrong arih ‘nao. Jơhngơ̆m lu sư oei hiôk hian kơplah đei anat anot, kơ’bah, ơh sơ’ngon dah pă băt pơm thoi yơ. Tơdrong hiôk hian tơ’bôh hơđăl tơpă lăm dôm lu jơhngơ̆m đei Kon Nge ‘Betlehem pơm tơ’ngla.

Kơplah lu bơ̆n dan đon lui tơ Kră Yang, tơdrong hiôk hian ‘bĕnh kơ lu bơ̆n.

Tơdrong hiôk hian noh ăn kơ rim ‘nu bơngai, na lu bơ̆n athei pơih jơhngơ̆m sơng iŏk. Na kơplah đei sơng iŏk, lu bơ̆n băt kơ bơ̆n đei Kră Yang oei hơdai păng tơgŭm lăm tơdrong arih.Yang Yêsu ưh kơ ăn kơ lu bơ̆n tơdrong hiôk hian thoi kơ bơngai lăm teh đak ăn, noh jơ̆ tơdrong hiôk hian kơjăp ling lang, ‘bĕnh kơ tơdrong mơsêh.
Kơplah đei tơdrong pơlong lăng păng ưh kơ đei hiôk hơđơ̆ng lăm chăl arih, hơpơi kơ buăl chă ‘bôh Yang Yêsu “ tơdrong hiôk hian hloh kơ tôm tơdrong kon bơngai hlôh băt” ( Philip 4:7). Lu bơ̆n arih lăm tơdrong hiôk hian yua đơ̆ng Kră Yang đei pơkă ăn kơ lu bơ̆n. Lu bơ̆n arih đei chang hơmĕng yua kơ lu bơ̆n kơkuh kơ minh ‘nu ‘Bok Kei-Dei mơsêh mơyang. Lu bơ̆n pơdơh lăm Sư, yua kơ băt kơ Sư ling lang wei rong, tuh ăn păng bơwei lu bơ̆n lăm tơpang ti Sư.

Apĭnh đĭ đăng krao khan hơdai: Kơkuh kơ Kră Yang ‘mă ‘mêm, kon bơnê kơ Ih yua kơ tŏk bŏk dôm lu tơdrong ưh kơ hơđơ̆ng lăm tơdrong arih, kon oei chă ‘bôh nơ̆r Ih nơ̆r pơlung “ jơhngơ̆m iĕm ‘nĕ kơ sơ’ngon păng ‘nĕ kơ hli”. Apinh tơgŭm kon ling lang lui gơnang kơ Ih, mă kon oei lăm tơdrong pơlong lăng tih, kon oei mơn kơ tơdrong hiôk hian păng tơpang ti Ih chông anhăk. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, tơdrong tơpŭ kơ Yang Yêsu đei pơih ăn kơ chăl arih hiôk hian kơ kon bơngai. Kơplah mơn băt kơdih akâu đei tơdrong hiôk hian đơ̆ng Kră Yang, lu bơ̆n đei krao iŏk wă ră roi ăn kơ bơngai nai băt kơ tơdrong hiôk hian.

Buăl hăm băt kơ bu oei arih đei sơ’ngon păng ưh kơ hơđơ̆ng ưh? Buăl hăm đei ‘bôh bu oei chă tơdrong gĭt kăl lăm tơdrong arih tam mă đei tơ’bơ̆p ưh? ‘Nĕ kơ wer weh đơ̆ng lu sư, athei năm tơ’bơ̆p lu sư păng ră roi gah Yang Yêsu kơ lu sư mơ̆ng kơ tơ̆ng, wă kơ lu sư kư̆m đei hiôk chơt păng hiôk hian tơpă lăm bơyan Nôel ‘nâu.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.