Dôm kơ năr wă jê̆ phĕt ‘blŏk kơ Nôel, lu bơ̆n mơn đei ‘bôh jơ năr chơt hiôk păng ‘nă hal hơđăl hloh kơ layơ. Mă lei tơ anih ayơ noh, lăm anih bơngai lơ chơt hiôk, tơpôl lơ noh, mưh lăp lu bơ̆n oei mơn ‘bôh rơhông păng gleh lap, ưh kơ hlôh Nôel tơpă đei tơdrong gĭt kăl kiơ hăm kơdih kâu. Păng lăm dôm kơplah thoi noh, jơhngơ̆m lu bơ̆n kăl kơ đei pel ‘bơm truh hăm tơdrong kiơ?

Năr ‘nâu, ‘năr 20/12/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Janet Ruth kơ̆l ‘bai CHĂ MING DƠ̆NG TƠDRONG GĬT KĂL BƠYAN NÔEL.

“ ‘Bok Kei-Dei ‘mêm mơnat tơpă rim ‘nu bơngai jơ̆p ala teh âu na Sư mah ăn Kon pôm Sư lôch tang kon bơngai. Bơngai bu lui kơ Kon Sư huay kơ lôch hiong ôh. Bơngai ‘noh sư gô oei hơdai hăm ‘Bok Kei-Dei arih ling-lang.” (Yôhan 3:16)

Bơyan Nôel đei wă jê̆ truh bơih. Dôm tơmam pơgong bơyan phang đei hơmet lê̆ bơih, ‘măn anih kơ dôm ŭnh hơdah dreng drao, ‘long hơngo dah ‘bok kră Nôel hao aseh iĕ. ‘Nâu jơ̆ bơyan kơ dôm tơdrong sŏng sa, dôm tơdrong tơdă brŏ reh hơri păng dôm jơ tơ’bơ̆p hơdai hnam dơnŏ. Mă lei, ưh kơ trŏ bu kŭm mơn ‘bôh ‘nă hal hăm jơ năr Nôel, hloh ‘noh jơ̆ hăm dôm lu bơngai bu lăng Nôel lăp jơ̆ năr phĕt ‘blŏk hơdơ̆r đơ̆ng Bơngai lui.

Dôm sơnăm adrol, lơ anih tĕch tơmam tih tơ Hoa Ky đei pơm tơdrong kơnhăm kơplah lu sư athei bơngai jang ưh kơ gơh pơma “Chơt Hiôk Năr Kră Yang Jur.” Na lu hnam trưng hŏk ‘noh krao “pơdơh bơyan tơngiĕt” tơplih yua kơ “bơyan pơdơh Nôel.” Lơ pơlei tih păng pơlei iĕ kŭm ưh pă pơm pơjing lơ tơdrong pơgong hơmet kơ bơyan phĕt. Nôel nhen thoi oei tơ hiong lê̆ tơdrong gĭt păng rai ưh kơ đei tơ‘bôh jơ̆p jang thoi adrol.

Đei lơ tơdrong yua kơ kiơ wă kơ bơngai nai ưh kơ hơ iă kơ phĕt ‘blŏk Nôel. Hăm lơ bơngai ưh kơ lui, lu sư lăng Yang Yêsu lăp jơ̆ mĭnh ‘nu bơngai đơ̆ng chăl sơ̆. Na hăm dôm lu bơngai kiơ̆ tơdrong lui nai, Yang Yêsu nhen thoi ưh kơ đei hơtŭt ‘bơm chăl arih lu sư. Mă khan lăm mơ’nah dôm lu bơngai đei khan kơdih jơ̆ Bơngai Lui, đei lơ bơngai tơpă ưh kơ đei lui kơ Yang Yêsu trŏ jơ̆ ‘Bok Kei-Dei jur jing kon bơngai, dah lu sư lăng tơdrong ‘noh ưh kơ gan gĭt kăl kơ đon lui kơdih.
Trŏ yua kơ tơdrong phara lăm tơdrong lui ‘noh, lơ bơngai đei chă trong pơm kơ Nôel ‘bônh kơ sơng iŏk hloh hăm đĭ đăng kon bơngai hăm tơdrong yua rup bơngai prĕl, ‘bok kră Nôel dah lu rup pơtih tơplih kơ rup bơng ‘nhĕt păng Yang Yêsu. ‘Bok kră Nôel păng aseh iĕ, trŏ ưh kơ đei hơtŭt ‘bơm kiơ truh tơdrong lui Bơngai Lui, na đei ‘bôh rai lơ, lăm kơplah rup Yang Yêsu, Mari păng Yôsep tă ưh pă đei lơ bơih. Hơbŏ lăng kơ teh đak oei adrin pơm Nôel jing mĭnh năr phĕt “juăt hmă”, anih bu kŭm gơh chơt hiôk păng sơng iŏk, na hiơt kơ Yang Yêsu, jơ̆ gĭt kăl kơ bơyan phĕt ‘blŏk ‘nâu. Sơ̆p Hla Bơar Nơ̆r ‘Bok Kei-Dei đei ăn kơ lu bơ̆n mĭnh tơdrong kiơ gĭt tơpă đơ̆ng Nôel. ‘Noh jơ̆ yua kơ ‘Bok Kei-Dei ‘mêm kơ kon bơngai lơ tơpă. Yôhan 3:16 chih: “ ‘Bok Kei-Dei ‘mêm mơnat tơpă rim ‘nu bơngai jơ̆p ala teh âu na Sư mah ăn Kon pôm Sư lôch tang kon bơngai. Bơngai bu lui kơ Kon Sư huay kơ lôch hiong ôh. Bơngai ‘noh sư gô oei hơdai hăm ‘Bok Kei-Dei arih ling-lang.” Na Mathiơ 1:21 tơbăt Yang Yêsu jur wă “dŏng pơklaih bơngai bu mă lui kơ Sư đơ̆ng tơdrong yoch.”

Tơpă jơ̆ ưh kơ sĭ lăp dôm bơngai bu ưh kơ lui đĕch tơhiong tơdrong gĭt kăl tơpă đơ̆ng Nôel, mă mưh lăp hăm Bơngai Lui kŭm thoi noh. Trŏ yua kơ thoi noh, rim wơ̆t Nôel truh, jơhngơ̆m lu bơ̆n kăl kơ đei tơ’blŏk gah tơdrong ‘mêm mơnat đơ̆ng ‘Bok Kei-Dei, khan Sư đei lăng truh tơ kon bơngai păng kơdih akâu jăn lu bơ̆n. Lu bơ̆n đei oei lăm tơdrong “hiong răm” mă lei dang ei đei “hlôi đơ̆ng tơdrong yoch”, gơh jing kon hơdah hơdong kơ Sư. Păng yua kơ tơdrong ăn đĕch, ‘Bok Kei-Dei pơkă khan “bơngai bu lui” Kon Sư lei gơh “arih ling lang”. ‘Bok Pôl đei mơn đei tơdrong ‘mêm mơnat đơ̆ng ‘Bok Kei-Dei pran kơtang dĭng truh kơ sư pơkăm khan ưh kơ đei tơdrong kiơ gơh tơgar iŏk sư đơ̆ng tơdrong ‘mêm ‘noh. Sư chih khan: “Na dang ei inh băt tơpă boih, mă đei tơdrong kiơ kiơ truh kơ bơ̆n, ‘Bok Kei-Dei Sư oei ‘mêm kơ bơ̆n hơnơ̆ng đĕch, yua kơ bơ̆n băt kơ Kră Yang bơ̆n Yêsu Krist ‘mêm kơ bơ̆n tơgŭm bơ̆n lăm tôm tơdrong. Mă bơ̆n lôch, mă bơ̆n oei arih, ‘Bok Kei-Dei Sư ‘mêm kơ bơ̆n ling-lang tơpă. Na mă linh jang, mă yang kơnê̆, mă yang kiơ wă tơgar iŏk bơ̆n đơ̆ng ‘Bok Kei-Dei ‘mêm kơ bơ̆n ưh kơ kĕ ôh. Mă tơdrong truh kơ bơ̆n kơnh pơgê, dah layơ Sư ưh kơ lê̆ ôh, Sư wei-lăng lu bơ̆n tơpă. Mă ‘bok kiơ tơ kơpal plĕnh, dah tơ ala teh âu, mă hăm tơdrong kiơ kiơ wă pơrơ̆ng tơgar iŏk bơ̆n đơ̆ng tơdrong ‘Bok Kei-Dei ‘mêm, lu noh ưh kơ kĕ ‘mơ̆i.” (Rôm 8:38-39)

Păng dah đei băt tơpă kơ tơdrong ‘mêm mơnat đơ̆ng ‘Bok Kei-Dei, na lu bơ̆n mơn băt bơnê păng ưh pă ‘bôh ưh kơ hiôk yua kơ phĕt ‘blŏk Nôel. Lu bơ̆n kŭm ưh pă kăl adrin pơm kơ Nôel “ ‘bônh kơ jê̆” hloh hăm tơdrong pơm ưh gan ‘bôh tơdrong tơbăt tơpă, yua kơ ưh kơ trŏ bu kŭm gô ăn jơhngơ̆m sơng iŏk tơmam apah dŏng pơklaih đơ̆ng Kră Yang. Hăm dôm lu bơngai ưh tim mă lui kơ Kră Yang, Nôel gơh lăp thoi mĭnh năr hmă đĕch, pha ‘biơ̆ yua lăp jơ̆ anih chơt hiôk hloh. Mă lei trŏ yua kơ thoi noh, jơ̆ Bơngai Lui, dah lu bơ̆n lăp pơma nơ̆r “Hiôk Chơt Năr Kră Yang Jur” dah “Nôel hiôk hian” na ưh kơ wă ră roi gah Kră Yang kơ lu sư, lu bơ̆n ưh kơ đei phara kiơ pơma hăm lu sư athei răt ‘bĕng sa ă, lăm kơplah lu sư oei dơnuh hin păng ưh đei kiơ wă sa. Yua kơ thoi noh, tơplih yua kơ mơn ‘bôh sơ’ngon dah ưh pă hơmĕng dah bơngai nai ưh kơ hlôh kơ tơdrong gĭt kăl đơ̆ng Nôel, buăl athei năm kơdih păng ră roi kơ lu sư. Rŏ lăng lu sư kŭm jơ̆ dôm lu bơngai oei “dơnuh hoh” lăm bơhngol, oei chơ chă tơdrong chang hơmĕng păng tơdrong hiôk hian mă lăp đơ̆ng Kră Yang đĕch gơh ‘măn ăn. Păng ưh kơ đei bu nai, Kră Yang oei wă yua kơdih buăl wă pơma gah Kră Yang kơ lu sư!

Apĭnh đĭ đăng krao khan hơdai: Kơkuh kơ Kră Yang ‘mêm, apinh tơgŭm kon ưh kơ đei layơ hiơt kơ tơdrong ‘mêm tih mă Ih đei ‘măn ăn kơ kon. Mă khan kon wơ̆l jrok păng hiong răm, mă lei Ih đei ‘mêm mơnat păng dŏng pơklaih kon. Hơpơi kơ đơ̆ng bơyan Nôel ‘nâu, jơhngơ̆m kon ‘mêm kơ Ih hloh dơ̆ng, păng đĭ jơhngơ̆m ră roi gah Ih kơ lơ bơngai jum dăr kon. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, hăm đei tơdrong kiơ ‘lơ̆ng hloh jơ̆ lu bơ̆n tơchĕng pơwao gah tơdrong ‘mêm mơnat đơ̆ng ‘Bok Kei-Dei păng gơh pơtrŭt wă yak năm pơm kơdranh gah Sư lăm bơyan Nôel ‘nâu! Yua kơ thoi noh, athei ăn jơhngơ̆m buăl tơchĕng pơwao gah tơdrong gĭt kăl đơ̆ng Nôel păng pơtơm krao khan kơ mĭnh ‘nu bơngai bu ‘noh ưh tim mă lui kơ Kră Yang mă buăl băt. Athei pơ̆n nuih ră roi Tơdrong ‘Nao ‘Lơ̆ng kơ bơngai ‘noh lăm giĕng ‘nâu, rŏ lăng đơ̆ng mĭnh tơdrong sŏng sa, mĭnh tơdrong juăt pơma dơnuh, dah mĭnh nơ̆r krao wơ̆n năm hơdai tơ tơdrong tơdă Nôel tơ Khŭl Lui, tơ anih akŭm iĕ, dah minh tơdrong pơma dơnuh kơdih kâu klah song Tơdrong ‘Nao ‘Lơ̆ng… Mă khan hăm tơdrong ayơ, kŭm athei pơchrang tơdrong tơbăt ‘mêm mơnat păng chang hơmĕng đơ̆ng ‘Bok Dŏng Pơklaih Yang Yêsu lăm dôm năr gĭt kăl ‘nâu. Yua kơ kơdih buăl đei gơh sơng iŏk tơdrong ‘mêm mơnat, na athei klah song tơdrong ‘mêm mơnat kơ bơngai nai.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.