Lăm bơyan Nôel, lu bơ̆n ngăl pơma ‘bơm kơ Mari bơngai iơ̆m dim, hiôk hian, pôk Nge Yêsu lăm tơpang ti sư. Mă lei tŏ sĕt đĕch bơngai tơchĕng kơ trong yak năm gah rŏng kơ bơngai drŏ kăn noh, trong yak năm đei lơ tơdrong pơlong lăng, hiong răm păng đei đak măt lĕch. Kư̆m đei, “Pŭn hiôk” mă Kră Yang ăn ưh kơ đei lơ̆k pơkao gôh, mă noh jơ̆ trong iĕ ưh kơ dơhnă. Kư̆m đei, kơplah lăm jĭ jăn păng gleh lap, lu bơ̆n mơn băt bơ̆n đei pŭn hiôk, yua kơ Kră Yang ling lang oei hơdai lu bơ̆n.

Năr ‘nâu, ‘năr 21/12/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Kay Camenisch kơ̆l ‘bai BƠNGAI ĐEI PŬN PĂNG PŬN HIÔK.

“Linh jang ‘lơ̆ng ei truh tơ Mari khan hloi thoi âu: “Kơkuh kơ ih, duch. ‘Bok Kei-Dei wă yua ih păng Sư lăp đon kơ ih boih.” (Luka 1:28)

Linh jang ‘lơ̆ng Gabrel năm roi kơ Mari, “Kơkuh kơ ih, duch. ‘Bok Kei-Dei wă yua ih păng Sư lăp đon kơ ih boih.” (Luka 1:28). Na đơ̆ng rŏng kơ noh, yă Êlisabet mĕ Yôhan ‘Batem kư̆m đei roi kơ Mari: “’Bok Kei-Dei wă ăn kơ ih hiôk hloh kơ đĭ-đăng lu drŏ-kăn đe nai. Sư ăn kơ kon mă ih wă tơpŭ ning-mônh kư̆m hiôk thoi noh mơ̆n.” (Luka 1:42). Kơplah ‘Bok Kei-Dei pơma thoi noh, hăm đei bu wă pơma tơplơ̆ dơ̆ng? Mă lei, inh ngăl đei jet kơdih: Mari hăm mơn kơ sư “đei pŭn” păng “pŭn hiôk” ưh?

Tơpă, jing mĕ gah akâu jăn ‘nâu kơ Kon ‘Bok Kei-Dei jơ̆ minh tơdrong pŭn hiôk tih. Mă lei chăl arih Mari ưh kơ đei hiôk lơ̆ng dah “đei ‘mêm” thoi bơ̆n tơchĕng noh ôh.

Sơ̆p hla bơar ‘Bok Kei-Dei ưh kơ đei chih lơ gah Mari, na sư tơl nơ̆r linh jang ‘lơ̆ng tơ’bôh kơ lu bơ̆n sư jơ̆ bơngai đei đon lui, iơ̆m dim păng chu yom. Sĭt tơpă rông ‘bôt ưh kơ đei layơ tơchĕng khan kơ sư gô “hơnăp ưh kơ thoi sư ‘maih wă”. Đei pơma khan “pŭn” pơm kơ anăn sư ưh kơ ‘lơ̆ng, păng hnam dơnŏ sư đei pơma bâu roi na đei mơlâu.

Tơdrong ưh kơ dơ̆ng ‘bơ̆t doh đĕch ôh. Mari hăm Yôsep đei yak năm trong ataih, trong kơnê̆ sư hao kơ pal aseh iĕ kơplah wă jê̆ jơ năr tơpŭ bơih. Yua kơ chă ưh kơ đei hnam ‘măn ăn kơ tơmoi tep, sư tơpŭ tơlăm hơdrong rơmo, dan Kon kơdră sư tơ kơpal bơ̆ng ‘nhĕt. Buăl tơchĕng lăng, lei kơplah noh Mari hăm mơn kơ sư đei pŭn hiôk dah ưh? Tam mă dơ̆ng ‘bơ̆t doh đĕch ôh, kơplah đơ̆ng kơ tơpŭ, lu sư năm chă ôn kơplah tŏk bŏk măng, năm tơ dêh char nai wă bơwei nge Yêsu đơ̆ng đe wă pơlôch.

Sĭt tơpă Yang Yêsu ‘Bok Dŏng Pơklaih jơ̆ minh ‘nu bơngai ‘lơ̆ng tơpă, mă lei inh oei ngăl jet, hăm đei layơ lu đe oh sư klai gar ưh, pơm kơ lăm ŭnh hnam pơma tơhil dih băl ưh? Na kơplah Yang Yêsu jĭt ‘bar sơnăm, Sư oei tơ hnam akŭm tơpêng năr mă ưh kơ roi kơ mĕ ‘bă sư băt, pơm kơ Mari hiơ̆k bơngơ̆t chhŭr nuih. Tơdrong noh ưh kơ đei “pŭn hiôk” kiơ.

Mă lei yua kơ dôm lu tơdrong noh pơm kơ Mari đe lăng rai gĭt găl hloh đei oei hơdai kon nge drŏ nglo sư. Truh tơ lăng ‘bôh Yang Yêsu đe jâu Sư, pơma kơnê̆, teh dong na pŭ iŏk pơ̆ng hăm kơ đinh, tơdrong ơh sơ’ngon noh rŏ lăng pă kĕ pŭ iŏk bơih. “Đei pŭn” ? “ Đei Pŭn hiôk” ? Pơma thoi noh tơnat tơpă kơplah sư oei dơ̆ng ‘bơ̆t ala ‘long pơglang, lăng kon sư lôch mă ưh kơ đei tơdrong yoch kiơ.
Mă lei…Mari jơ̆ bơngai đei pŭn păng đei pŭn hloh kơ lu bơngai drŏ kăn nai. ‘Bok Kei-Dei đei rơih iŏk sư tơpŭ kơ ‘Bok Dŏng Pơklaih. Mă lei đei tơdrong thoi noh chĕp ba ơh sơ’ngon. Đơ̆ng “pŭn hiôk” noh jơ̆ tơm kơ chhŭr nuih.

Lăng chăl arih Mari, inh đei mơn kơ rim wơ̆t apinh Kră Yang ăn tơdrong pŭn hiôk, inh đei tơchĕng tơ tơdrong ‘lơ̆ng kơdih: thoi kơ jên tơmam, đei anăn pôk pơ ư, đei tôm mah dah đei tơdrong arih hiôk. Inh hiơt kơ tơdrong pŭn hiôk Kră Yang ăn wă kơ nhăm ăn kơ kơdih inh, mă wă kơ nhăm kơ tơdrong jang đơ̆ng Sư gơh keh. Păng kư̆m đei, tơdrong pŭn hiôk noh năm hơdai hăm tơdrong pơlong lăng.

Hăm đei layơ bơ̆n wă kơ đei pŭn hiôk mă ưh kơ pŭ iŏk tơdrong gleh ưh? Na pơlong jet lăng, hăm đei bơngai đei đon lui tih lăm sơ̆p hla bơar ‘Bok Kei-Dei mă ưh kơ đei tơ’bơ̆p tơdrong pơmat tat ưh? Pơmat tat noh jơ̆ tơdrong trŏ kơ đei ‘mơ̆i kơplah yak năm kiơ̆ Kră Yang. Kơdih Yang Yêsu đei pơma lu bơ̆n gô đei đe pơm kơnê̆ pơmat. Hlôi kơ đơ̆ng tơdrong pơmat, lu bơ̆n gô wơ̆ ‘lŏ lăm tơdrong hlôh wao, păng arih tơ’bôh đei Yang Yêsu Krist.

Tơplih kơ druh kiơ̆ tơdrong arih ‘bônh hiôk, lu bơ̆n kăl kơ ‘blŏk nơ̆r linh jang ‘lơ̆ng khan kơ Mari: “Kră Yang oei hơdai ih!” Tơdah lu bơ̆n hơdai jang kơ Kră Yang, tơplih kơ kiơ̆ tơdrong lu bơ̆n wă, lu bơ̆n gô đei pŭn hiôk tơpă. Na kơplah tơdrong pŭn hiôk năm hơdai tơdrong pơlong lăng, lu bơ̆n hŏk pơhrăm gơnang kơ jơhngơ̆m pran păng wei rong đơ̆ng Kră Yang.

Đei minh tơdrong kăl mơ̆n, noh jơ̆ athei băt kơ kơdih đei pŭn hiôk. Tơdah buăl lui gơnang kơ Yang Yêsu ‘Bok Dŏng Pơklaih, na Sư oei lăm buăl. Nhen thoi Mari, lu bơ̆n kư̆m đei rơih iŏk wă kơ đei tơdrong arih Kon ‘Bok Kei-Dei ăn kơ teh đak.
Kư̆m thoi Mari, lu bơ̆n đei nơ̆r sĭt tơpă thoi âu: Kră Yang oei hơdai lu bơ̆n. Sư tuh ăn tơdrong pŭn hiôk kơ lu bơ̆n rim năr. Mă khan tơdrong arih ưh kơ đei ‘bônh ngăl, na Sư đei pơkă huay kơ achăng dah hiơt kơ bơngai lui kơ Sư.

Mă khan oei tơ’bơ̆p tơdrong anat anot ayơ, athei kư̆ kơ lui ngeh thoi âu Kră Yang gô pơm kơ tơdrong jing minh gô đei lơi yua kơ lu bơngai ‘mêm kơ Sư păng đei krao iŏk kiơ̆ kơ Sư. Ơh sơ’ngon Mari tih dêh, na athei tơchĕng lăng: đơ̆ng pŭ iŏk tơdrong chhŭr nuih noh, đĭ đăng kon bơngai đei sơng iŏk tơdrong ‘nao ‘lơ̆ng tih hloh kơ đĭ đăng.

Yua kơ thoi noh, kơplah lu bơ̆n ‘blŏk hơdơ̆r tơpŭ kơ Yang Yêsu, athei hiôk chơt mă khan đei tơdrong pơlong lăng, yua kơ lu bơ̆n jơ̆ bơngai đei pŭn hiôk.

Apĭnh đĭ đăng krao khan hơdai: Kơkuh kơ Kră Yang mă ‘mêm kơ kon! Kră Yang ơi, kư̆m đei kon khan tơdrong pŭn hiôk đei kiơ̆ kơ chăl arih ‘nâu, mă hiơt kơ tơdrong pŭn hiôk tơpă noh đei đơ̆ng Ih, đơ̆ng tơdrong mơsêh mơyang Ih oei hơdai lăm jơhngơ̆m kon. Apinh Kră Yang tơgŭm kon ‘blŏk kơ Ih ling lang oei hơdai kon mă kơplah dôm lu năr anat anot dêh. Truh tơ kon rơdu, kon oei pơma khan kon đei pŭn hiôk, yua kơ rơih iŏk kon, păng Ih huay kơ achăng lê̆ kon. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, bơyan Nôel sơnăm ‘nâu, rŏ lăng buăl oei đei tơdrong anat anot lăm chăl arih, kơplah tôm tơdrong đei ưh kơ thoi bơ̆n wă, păng dôm kơ lu nơ̆r krao khan ưh kơ đei tơl tơwih. Mă lei athei ‘blŏk, pŭn hiôk tơpă noh ưh kơ sĭ khan hiôk ngăl hăm thoi kơ bơ̆n hơpơi wă. Nhen thoi Mari noh sơ̆, rim ‘nu lu bơ̆n Kră Yang đei rơih iŏk wă kơ chĕp tơdrong hơdah, jơhngơ̆m chang hơmĕng păng tơdrong ‘mêm mơnat đơ̆ng Yêsu Krist ăn kơ teh đak. Lăm bơyan phĕt ‘nâu, athei mơ̆ng nơ̆r rơngơp đơ̆ng Kră Yang pơlung buăl thoi kơ Mari sơ̆ noh: “Kơkuh kơ ih, duch. ‘Bok Kei-Dei wă yua ih păng Sư lăp đon kơ ih boih.” Kăl kơ thoi noh đĕch, kăl kơ đei Kră Yang oei hơdai ling lang, rim ‘nu kơ lu bơ̆n đei pŭn păng pŭn hiôk bơih!

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.