“Pơm thoi yơ inh băt tơpă ‘nâu jơ̆ tơdrong Kră Yang wă, ưh kơ trŏ lăp jơ̆ tơdrong đơ̆ng kơdih wă?” Lăm trong yak năm kiơ̆ Kră Yang, bu lăm lu bơ̆n kŭm đei kơplah tơchĕng thoi noh, hloh ‘noh jơ̆ kơplah jum dăr đei lơ dêh tơdrong pơma jrông jrang tăp dăr. Mă lei dah lăng dơ̆ng hơ’mon kơ Mari, jơ̆ mĕ gah sĕch akar kơ ‘Bok Dŏng Pơklaih Yang Yêsu, lu bơ̆n gô ‘bôh khan ‘Bok Kei-Dei ưh kơ layơ ăn kơ kon pơlei Sư đei hli tơrơ, ngĭl ngŭl. Kră Yang ling lang đei trong kơdih wă pơsĭt tơdrong đơ̆ng Sư wă, wă kơ lu bơ̆n băt tơpă khan dôm lu nơ̆r pơkă đơ̆ng Sư jơ̆ tơpă, păng tơpă gô gơh đei trŏ thoi noh.

Năr ‘nâu, ‘năr 22/12/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Laura Bagby kơ̆l ‘bai ĐEI PƠSĬT ĐƠ̆NG KRĂ YANG.

“Ih hiôk tơpă yua kơ ih lui kơ nơ̆r Kră Yang khan kơ ih gô đei kon.” (Luka 1:45)

Dah lăng lăm chăl arih yă Mari, mĕ gah sĕch akar kơ ‘Bok Dŏng Pơklaih Yang Yêsu Krist, lu bơ̆n ‘bôh hơđăl ‘Bok kei-Dei ling lang pơsĭt tơdrong đơ̆ng Sư wă ‘măn ăn kơ yă Mari, đơ̆ng tơdrong ‘nâu truh tơ tơdrong nai. Păng kŭm thoi Mari, lu bơ̆n gơh lui kơjăp khan Kră Yang ling lang đei trong tơ’blŏk dơ̆ng tơdrong Sư wă kơ rim ‘nu lu bơ̆n, wă kơ lu bơ̆n băt tơpă khan dôm lu nơ̆r pơkă hơdai tơdrong ‘măn ăn đơ̆ng Sư jơ̆ tơpă, păng tơpă gô đei trŏ thoi noh.

Mă lei đei lơ wơ̆t, bơngai lui kơ Kră Yang đei jrok trong lăp yua kơ đei pơhlŭ kiơ̆ “ tơdrong juăt”, gĭt tơpă dah bơngai bu ‘noh pơtơm hăm pêng chư “Kră Yang khan…”. Lu bơ̆n lui, pơm kiơ̆, na pơ̆k huŏng păng ơh sơ’ngon. Đei bơngai lui khan Kră Yang wă kơ bơ̆n pơkong hăm bu noh, mă lei bơngai noh ưh kơ đei hơdai tơdrong lui ngeh. Đei bơngai mơ̆ng “nơ̆r khan lê̆ adrol” pơma Kră Yang gô tuh ăn pŭn hiôk kơ mĭnh tơdrong jang wă pơjing, lei na nŏng kơ năm tơ anăp na jing pă kĕ gah jơhngơ̆m pran păng bơhngol. Dah tơdrong ‘noh ưh kơ đei truh thoi chang hơmĕng, lu bơ̆n jet kơdih: “Kon đei pơm glăi kiơ? Hăm trŏ kon đei ưh kơ chu kiơ̆ nơ̆r Kră Yang?”

Mă tơpă, Sơ̆p Hla Bơar Nơ̆r ‘Bok Kei-Dei lơ wơ̆t khan tơbăt gah dôm lu bơngai khan lê̆ adrol hơlĕnh. ‘Bok Pôl đei chih kơ lu bơngai lui tơ Galati: “Inh sơleng kơ đon yua kơ kiơ iĕm lui kơ nơ̆r đe pơlung wă achăng lê̆ nơ̆r ‘Bok Kei-Dei ‘bônh đĕch. ‘Bok Kei-Dei krao bơ̆n wă kơ bơ̆n jing kon Sư, yua kơ Yêsu Krist lôch tang bơ̆n. Mă-lei dang ei iĕm wă kiơ̆ tơdrong ‘nao ‘lơ̆ng nai dơ̆ng. Mă tơpă đei minh tơdrong ‘nao ‘lơ̆ng đĕch, ưh kơ đei tơdrong ‘nao ‘lơ̆ng nai dơ̆ng ôh. Inh khan kơ iĕm thoi noh yua kơ đei lu bơngai nai pơtuah iĕm, lu sư wă hơmet ming pơthim tơdrong ‘nao ‘lơ̆ng Yêsu Krist.” (Galati 1:6-7). Ưh kơ trŏ bu krao anăn Kră Yang kŭm tơpă gơh mơ̆ng nơ̆r Sư. Lăm I Timôthê 1:7, ‘Bok Pôl pơma khan đei dôm lu bơngai “Lu sư wă bơtho lu tơdrong juăt ‘Bok Kei-Dei pơkă sơ̆, mă-lei lu sư ưh kơ hlôh wă bơtho thoi yơ. Lu sư khan gơh bơtho tơpă, mă-lei lu sư ưh kơ hlôh wao kơdih sư”. Đei dôm lu bơngai đei jơhngơ̆m, đĭ jơhngơ̆m, mă lei ưh kơ trŏ jơ̆ lu sư tơpă hlôh băt kơ tơdrong Kră Yang wă.

Thoi noh pơm thoi yơ băt ayơ jơ̆ nơ̆r tơpă đơ̆ng ‘Bok Kei-Dei? Adrol hloh, dôm tơdrong yua anăn Kră Yang kăl kơ trŏ hăm Nơ̆r ‘Bok Kei-Dei. Dah tơdrong kiơ ưh kơ trŏ hăm Nơ̆r Sư, ‘noh tơpă ưh kơ trŏ đơ̆ng Sư na truh. Mưh lăp dôm tơdrong “hơđăl” thoi rơih tơdrong jang, chă hnam dơnŏ, dah mĭnh trong yak năm ayơ noh, na ưh kơ đei bơtho tơ’bôh hơđăl lăm Sơ̆p Hla Bơar Nơ̆r ‘Bok Kei-Dei. Chăl Pah So, Kră Yang đei khan hơđăl rơđah, thoi bơtho kơ ‘bok Nôê pơm duk kiơ̆ kơ sô̆ pơtŏ hơđăl. Na dang ei, kơplah Kră Yang Yêsu arih lăm rim ‘nu bơngai lui kơ Sư, lei Sư oei pơma khan đơ̆ng Nơ̆r ‘Bok Kei-Dei, đơ̆ng tơdrong chông anhăk rơngơp đơ̆ng Yang Bơhngol ‘Lơ̆ng, đơ̆ng nơ̆r krao khan păng tơdrong pơsĭt kiơ̆ kơ Sư kơdih.

Đei mĭnh tơdrong juăt mă lu bơ̆n kăl kơ ‘blŏk răk: Dah Kră Yang tơ’bôh tơdrong Sư wă, Sư gô pơsĭt tơdrong ‘noh hăm lơ tơdrong pha ra băl. Sư gơh yua Nơ̆r Sư, Yang Bơhngol ‘Lơ̆ng, dôm lu bơngai jum dăr, dah anih mă Sư đei hơmet. Dah tơdrong kiơ tơpă truh đơ̆ng Kră Yang, buăl gô ‘bôh Sư pơsĭt tơdrong ‘noh lơ wơ̆t, hăm mĭnh tơdrong hơđăl păng hiôk hian lăm jơhngơ̆m.

Hơ’mon yă Mari jơ̆ tơdrong tơ’bôh hơđăl hloh. Kơplah linh jang Gabrel roi tơbăt khan sư gô tơpŭ mĭnh ‘nu kon drŏnglo, krao anăn Yêsu, păng Sư gô pơgơ̆r ling lang (Luka 1:26-33), ‘noh jơ̆ mĭnh nơ̆r khan lê̆ adrol rơđah hơđăl tơpă. Tơpă minh ‘nu adruh Juđê ‘mêm yom kơ Kră Yang thoi Mari kŭm đêl đei kơtơ̆ng nơ̆r ‘bok Êsai: “Đei tơpŭ ăn kơ lu bơ̆n minh ‘nu kon nge, ăn kơ bơ̆n minh ‘nu kon drŏ-nglo, tơdrong pơgơ̆r tơ kơpal hơngiĕng Sư, đe gô krao Sư Kră Yang pơlung tơgŭm Kră Yang ‘Bok Kei-Dei Mơsêh Mơyang, ‘Bă Arih Ling-Lang Kră Yang kon Pơtao Hiôk-Hian.” (Êsai 9:5). Thoi noh, Kră Yang đei khan hăm Mari adrol lăm Sơ̆p Hla Bơar ‘Bok Kei-Dei, na pơsĭt dơ̆ng đơ̆ng linh jang Gabrel.

Tim mă tôch, linh jang kŭm tơbăt kơ Mari băt khan mŏ pôm yă ‘bok sư hiơ̆ kơ đei ‘lơ̆p Êlisabet oei hơnăp. Thoi noh na Mari năm ngôi hơpong tơ sư, păng kơplah tơ’bơ̆p băl, Êlisabet đei ‘bĕnh blai Yang Bơhngol ‘Lơ̆ng păng pơma ‘bơ̆r re kơ Mari khan: “’Bok Kei-Dei wă ăn kơ ih hiôk hloh kơ đĭ-đăng kơ lu drŏ-kăn đe nai. Sư ăn kơ kon mă ih wă tơpŭ ning-mônh kư̆m hiôk thoi noh mơ̆n.” (Luka 1:42).

Sư ưh tim mă đei kơtơ̆ng tơdrong yă Mari, mă lei Kră Yang yua trŏ nơ̆r ‘noh wă pơsĭt dơ̆ng khan tơdrong linh jang pơma jơ̆ tơpă.

Na truh tơ lu bơngai wei triu tơpă ưh kơ băt băl, kŭm đei linh jang roi tơbăt gah tơdrong gô tơpŭ kơ ‘Bok Dŏng Pơklaih. Lu sư chơ chă, roi dơ̆ng dôm tơdrong mă lu sư mơ̆ng kơtơ̆ng păng ‘bôh, pơm kơ yă Mari mĭnh wơ̆t dơ̆ng đei pơsĭt khan kơdih tơpă oei pôk glơng Kon ‘Bok Kei-Dei lăm ti. Păng kơplah Kon Nge đei ba tơ hnam hơkŭm tơ’bơ̆p ‘bok Simiôn, jơ̆ bơngai đei Kră Yang pơkă gô ưh kơ lôch adrol kơ ‘bôh ‘Bok Mêsi, sư pôk kon nge păng pơma: “Ơ Kră Yang, dang ei Ih ăn kơ inh mă đĭch Ih âu lôch achăng lê̆ teh đak âu hiôk-hian. Kiơ̆ thoi Ih khan kơ inh sơ̆, ‘na dang ei inh ‘bôh boih bơngai mă Ih wơh wă dŏng pơklaih….” (Luka 2:29-30). ‘Noh jơ̆ tơdrong pơsĭt tuch luch, ‘bĕnh tơdrong mơsêh mơyang păng ưh kơ gơh wă pơjah pơjăng.

Đơ̆ng ‘bok Êsai, linh jang Gabrel, Êlisabet, dôm lu bơngai wei triu, dĭng truh tơ Simiôn, rim bơngai, rim tơdrong đei jơ̆ tơdrong Kră Yang pơsĭt tơdrong tơpăt đơ̆ng Sư lăm chăl arih Mari.

Păng kŭm thoi noh, lăm chăl arih lu bơ̆n năr ‘nâu, dah tơdrong kiơ tơpă jơ̆ tơdrong wă đơ̆ng ‘Bok Kei-Dei, Sư gô ưh kơ ăn buăl đei ưh kơ băt hơđăl dah hli tơrơ. Sư gô pơm kơ buăl băt hơđăl, đơ̆ng Nơ̆r Sư, đơ̆ng Yang Bơhngol ‘Lơ̆ng, đơ̆ng dôm lu bơngai jum dăr, păng đĭ đăng dôm tơdrong hơđăl iĕ hloh lăm tơdrong arih.

Yua kơ thoi noh, ‘nĕ kơ hăt hot lui kiơ̆ nơ̆r “Kră Yang khan” mă bơngai bu ‘noh pơma. Athei kĕ chơ̆n krao khan, mơ̆ng kiơ̆, păng chang gô tơdrong pơsĭt đơ̆ng kơdih Sư. Dah buăl tơpă oei lăm Sư, buăl gô băt kơ nơ̆r Sư tŏk bŏk lơ tơdrong re kơtơ̆ng hrơ̆ng hreng nai.

Dah buăl hŏk pơhrăm iŏk tơdrong chang gô păng lui gơnang, buăl gô ‘bôh Kră Yang tơpăt kiơ̆ thoi tơdrong Sư đei pơm hăm yă Mari. Kră Yang ưh kơ sĭ pơma, Sư kŭm đei pơsĭt. Kră Yang ưh kơ sĭ lăp pơkă đĕch ôh, Sư kŭm hơdai wă tơgŭm buăl lui kơjăp khan dôm nơ̆r pơkă đơ̆ng Sư gô đei jing tơpă.

Apĭnh đĭ đăng karao khan dai: Kơkuh kơ Kră Yang ‘mêm. Kon pơyơ̆r nơ̆r Bơnê kơ Kră Yang jơ̆ ‘Bok Kei-Dei ‘lơ̆ng tơpăt, Ih ling lang bơwei tôm dôm nơ̆r Ih pơkă. Apinh tơgŭm kon pơhrăm băt tơdrong chang gô păng mơ̆ng kơtơ̆ng nơ̆r Ih tŏk bŏk tơdrong hrơ̆ng hreng đơ̆ng chăl arih. Dah kon oei tơchĕng ưh kơ băt ayơ jơ̆ tơdrong đơ̆ng Ih wă, apinh Yang Bơhngol ‘Lơ̆ng Ih bơtho chông anhăk kon, păng ‘măn ăn kơ kon tơdrong hiôk hian lăm jơhngơ̆m wă kơ băt kơ tơdrong ‘lơ̆ng tơpăt Ih. Thoi Mari sơ̆ đei lui gơnang păng chu kiơ̆, apinh ăn kơ kon kŭm đei đon lui hmă wă kơjăp yak kiơ̆ Ih. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, hơpơi kơ buăl đei pơlung lăm bơyan Nô el ‘nâu, kơplah băt khan Kră Yang oei ling lang ‘lơ̆ng tơpăt gah dôm nơ̆r Sư pơkă ‘măn ăn kơ buăl, thoi Sư đei pơm hăm Mari sơ̆. Dah đei kơplah ayơ ‘noh buăl kăl thim mĭnh tơdrong pơsĭt wă lui khan dôm nơ̆r pơkă ‘noh jơ̆ tơpă, lei athei kư̆ kơ hơđơ̆ng yua kơ Kră Yang oei oei hơdai buăl, ling lang năm hơdai buăl rim trong yak năm kơnhăm gah dêh char Sư pơgơ̆r. Buăl lăp kăl chang gô lăm tơdrong hiôk hian, păng kơnhăm kơ dôm “tơ’bôh” mă Sư gơih truh đơ̆ng lơ trong mơsêh hlĭch, wă pơsĭt khan buăl oei năm trŏ trong lăm tơdrong ‘lơ̆ng tơpăt Sư.
Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.