Lăm bơyan phĕt pơgong ŭnh ‘lơ̆ng rŏ, đei bơngai ngăl chơchă tơdrong hiôk chơt lăm dôm lu hơnŭng tơmam, lăm tơdrong sŏng sa dah mơ̆ng ‘bai preh brŏ hơri ư ang kơ Nôel. Na dôm lu tơmam re hiôk noh, kư̆m đei pơm kơ jơhngơ̆m lu bơ̆n rơhông dêh tơpă. Rŏ lăng tơdrong lu bơ̆n tam mă tôm mah noh lu bơ̆n ưh kơ tam mă lui ngeh kơ lăm teh đak ưh kơ đei hơđơ̆ng ‘nâu, na oei đei anih hơđơ̆ng kơjăp wă gơnang kơ’nơp. Na lăm tơdrong arih ưh pă băt pơm thoi yơ ‘nâu, oei đei Tơ’ngla wei lăng lu bơ̆n hăm tơdrong ‘mêm ưh kơ đei lơyơ tơplih.

Năr ‘nâu, ‘năr 23/12/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Brian Simmons kơ̆l ‘bai NƠ̆R PƠKĂ GAH TƠDRONG HIÔK HIAN.

“Ư-ang kơ ‘Bok Kei-Dei mă oei tơ plĕnh ti. Sư wă ăn hiôk-hian kơ lu bơngai mă Sư lăp đon tơ ala teh âu.” (Luka 2:14)

Đơ̆ng sơnăm ki sơ̆, đei minh ‘nu ‘bok kră iơ̆m dim ‘lơ̆ng tơpăt sư juăt kơ pơm ‘bĕng kĕo. Sư ‘maih wă pơm ‘bĕng kĕo ăn kơ lu bơngai hơ’lơ̆p. Đei minh bơyan Nôel noh sơ̆, sư ‘maih pơm ‘bĕng kĕo phara wă kơ phara gah tơdrong hơ’mon, noh jơ̆ tơdrong hơ’mon gah Yang Yêsu.

Bơngai juăt kơ pơm ‘bĕng kĕo noh pơm blŭng a hăm ‘bĕng kĕo kok ‘lơ̆ng rơgoh, arăng nhen thoi tơmo. Tơmam kok tơ’bôh kơ tơdrong ‘lơ̆ng rơgoh, thoi kơ Yang Yêsu ưh kơ đei tơdrong yoch. Na gah ‘bĕng kĕo pơm arăng wă tơ’blŏk kơ lu bơ̆n Kră Yang jơ̆ anih gơ’nơp kơ jăp, nhen thoi tơmo kŭk tih kơjăp.

Na buăl hăm ‘bôh ‘bĕng kĕo thoi yơ ưh? Trŏ bơih, thoi kơ chư J, chư blŭng a lăm anăn Yang Yêsu, na kư̆m thoi kơ ‘long jra “Lu bơngai wei triu iơ̆m dim”. ‘Bơ̆t ‘long jra đŏng noh đei yua wă dui triu wơ̆l jrok brŏk, na gah tơpăt noh wă blah lu sem bri năm sa kon triu. Yang Yêsu kư̆m thoi noh, Sư pôk tơ iung, bơwei lu bơ̆n hiôk ‘lơ̆ng.

Tuch luch, bơngai pơm ‘bĕng kĕo chhơ̆ pêng trong đak brĕo wă tơ’blŏk kơ lu bơ̆n dôm lu rơka păng pham Yang Yêsu lĕch ro tơ kơpal ‘long pơglang yua kơ tơdrong yoch lu bơ̆n, wă kơ lu bơ̆n arih lăm tơdrong hiôk hian hăm ‘Bok Kei-Dei khŏm khŏm.

Na jơ̆ thoi noh, tơdrong hơ’mon gah ‘bĕng kĕo ưh kơ pơma adrô̆ kơ ‘bĕng kĕo đĕch, mă pơma gah tơdrong ‘mêm păng pŭ iŏk tih đơ̆ng Yang Yêsu ‘Bok Dŏng Pơklaih ăn kơ rim ‘nu lu bơ̆n. Păng kư̆m tơ’blŏk kơ lu bơ̆n gah tơdrong hiôk hian tơpă.

Hiôk hian, mơ̆ng jơ̆ juăt kơ tơ̆ng nơ̆r noh, mă kư̆m khăi kơ đei. Lu bơ̆n rơhing kơ hiôk hian lăm tơdrong arih, dôm lu tơdrong pơgơ̆p, lăm tơdrong bơ̆jang, lăm jơhngơ̆m pran, kư̆m đei truh tơ tơdrong arih lu bơ̆n đei hlôi mơn. Mă lei ưh kơ đei layơ kư̆m đei thoi noh, chăl arih đei tơsŭl tơwŏk, ưh kơ hơđơ̆ng păng gleh lap.
Mă đei thoi noh, kơplah năm tơ Nơ̆r Kră Yang, lăm Hơriso chăl 85 tơ’blŏk kơ lu bơ̆n ‘Bok Kei-Dei oei bơwei gah tơdrong hiôk hian đơ̆ng Sư. Bơngai chih tơ ‘blŏk lơ wơ̆t Kră Yang huay kơ jô̆ yo păng pơklaih kon pơlei Isơrael noh sơ̆:

“Ơ Kră Yang, Ih mơnat ăn boih tơdrong ‘lơ̆ng kơ dêh char Ih; Ih chông adrĕch Jakôp đêl pơm bơnă wih brŏk. Ih mơnat ăn boih kon pơlei Ih, đêl pơm kơnê̆. Păng klơ̆p lê̆ đĭ dôm yoch glăi lu sư.” (Hơriso 85:1-2)

Na lu bơngai mơ̆ng wă kơ băt năr ‘nâu Kră Yang pơma khan tơdrong kiơ. Păng tơdrong đơ̆ng Sư noh jơ̆ nơ̆r tơtă gah tơdrong hiôk hian. Tơdrong mơsêh mơyang păng tơ’bôh đơ̆ng Sư oei pơchrang hơdah, ư ang kơ Kră Yang krôp gom bơngai lui kơ Sư. (Hơriso 85:10).

Kơplah noh, jơhngơ̆m ‘mêm mơnat păng tơdrong ‘lơ̆ng tơpăt gô jing hơdai. Tơdrong ‘lơ̆ng tơpăt gô tơlang, na tơdrong ‘lơ̆ng tơpăt gô pơchrang hơdah nhen thoi măt ‘năr. ‘Bok Kei-Dei gô ăn kơ bơngai lui kơ Sư tơdrong ‘lơ̆ng tơpăt “Tơdrong tơpăt ‘lơ̆ng gô năm adrol ‘bơ̆t anăp Sư, gô pơm ăn trong kơ jơ̆ng Sư rok.” (Hơriso 85:13).

Đơ̆ng năr blŭng a, ‘Bok Kei-Dei đei pơkă gô iŏk dơ̆ng tơdrong hiôk hian đêl hiong bơih đơ̆ng kon bơngai, Yang Yêsu, jơ̆ tơm kơ anăn Kră Yang Hiôk Hian.

Yang Yêsu jur ba ăn tơdrong hiôk hian mă lu bơ̆n ưh kơ đei gơh pơm kơdih. Noh jơ̆ hiôk hian tơpă, tơdrong hiôk hian noh kon bơngai ưh kơ đei kơdih păng kư̆m ưh kơ gơh tơgar iŏk. Tơdrong hơ’mon kơ Nôel jơ̆ nơ̆r roi tơbăt ‘lơ̆ng dêh gah tơdrong hiôk hian mă lu bơ̆n ling lang kơ rơhing, đei ăn kơ rim ‘nu kon bơngai.
Nhen thoi linh jang ‘lơ̆ng đei roi tơbăt lăm măng Nôel blŭng a:

“Ư-ang kơ ‘Bok Kei-Dei mă oei tơ plĕnh ti. Sư wă ăn hiôk-hian kơ lu bơngai mă Sư lăp đon tơ ala teh âu.” (Luka 2:14)

Bơyan Nôel ‘nâu, hơpơi kơ buăl đei hlôi mơn đei tơdrong hiôk hian noh đei ‘bĕnh kơ lăm jơhngơ̆m, jơ̆ tơdrong hiôk hian đơ̆ng Yang Yêsu đĕch ăn.

Apĭnh đĭ đăng krao khan hơdai: Kơkuh kơ Kră Yang ‘mă ‘mêm, jơ̆ tơm kơ tơdrong hiôk hian! Kră Yang ơi! Kơplah jơhngơ̆m kon ngĭl ngŭl yua kơ dôm lu tơdrong ưh kơ hơdơ̆ng jum dăr lăm teh đak păng lăm jơhngơ̆m kon, apinh Kră Yang mơnat păng tơgŭm kon chĕp kơjăp tơdrong hiôk hian tơpă đơ̆ng Ih. Kơplah kon gleh lap yua kơ adrin hŏk pơhrăm lui gơnang kơ Tơ’ngla chĕp tơdrong arih kon. Păng lăm bơyan Nôel ‘nâu, apinh ăn kơ kon jing bơngai ba ăn tơdrong hiôk hian đơ̆ng Ih ăn kơ lu bơngai jum dăr kơ kon. Kon kŭp kơ̆l krao khan hăm anăn Yang Yêsu krist, A-men.

Ơ lu bơngai mơ̆ng mă ‘mêm kơ eng, bơyan Nôel sơnăm ‘nâu, rŏ lăng buăl tam mă đei tôm tơdrong thoi kơdih wă. Mă tơpă, buăl đei sơng iŏk tơmam gĭt hloh: noh jơ̆ Yang Yêsu, Sư jơ̆ Tơ’ngla jur tơ teh đak tơ’bĕnh tơdrong hiôk hian ăn kơ jơhngơ̆m kon bơngai. Buăl ưh kơ đei chă ‘bôh tơdrong hiôk hian tơpă mă tơ anih ayơ lăm chăl arih ‘nâu, ‘ngoaih kơ tơpang ti Yang Yêsu. Hơpơi kơ buăl đei krôp gom hăm tơdrong hiôk hian noh, hăm nơ̆r tơtă ưh kơ đei la yơ tơplih đơ̆ng Kră Yang: “ Inh ăn tơdrong hiôk hian ăn kơ lu iĕm.”

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.