Buăl hăm ‘bôh hlĭch hlăch kơplah tơchĕng pơwao gah tơdrong ‘nâu ưh: tŏk bŏk măng thĕng hreh, mĭnh ‘nu kon nge tơpŭ tơ anih ‘bơng ‘nhĕt lăm drong rơmo, păng tơdrong ‘noh đei jing tơm kơnhăm kơ đĭ chăl đơ̆ng sơ̆! Lu bơ̆n krao ‘noh jơ̆ Nôel, păng hơdai ‘blŏk hơdơ̆r hăm hơdah ŭnh dreng drao hăm dôm tơmam apah rang rŏ. Mă lei đơ̆ng rŏng đĭ đăng dôm tơdrong chơt hiôk ‘lơ̆ng rŏ ‘noh jơ̆ mĭnh hơ’mon ơh sơ’ngon tơpă. Hơ’mon gah Tơ’ngla đei yak năm đĭ trong năm đơ̆ng ‘bơng ‘nhĕt truh tơ ‘long pơglang, yua kơ ‘mêm mơnat kơ kơdih buăl păng inh.

Năr ‘nâu, ‘năr 24/12/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Bruce C. Swaffield kơ̆l ‘bai YUA KƠ ‘BOK KEI-DEI ‘MÊM KƠ KON BƠNGAI.

“’Bok Kei-Dei ‘mêm mơnat tơpă rim ‘nu bơngai jơ̆p ala teh âu na Sư mah ăn Kon pôm Sư lôch tang kon bơngai. Bơngai bu lui kơ Kon Sư huay kơ lôch hiong ôh. Bơngai ‘noh sư gô oei hơdai hăm ‘Bok Kei-Dei arih ling-lang.”  (Yôhan 3:16)

Lăm tơdrong hiôk chơt ‘nă hal bơyan Nôel, đei mĭnh brŏ reh re hơdar hyoi kơjung sơ’ngon kơtơ̆ng đĭ chăl adrol sơ̆: ‘Bok Dŏng Pơklaih Yang Yêsu jur wă pŭ iŏk tơdrong lôch. Tơdrong Sư jur ba truh tơdrong chang hơmĕng păng nơ̆r pơkă plei ‘lơ̆ng, mă lei kơdih tơdrong lôch đơ̆ng Sư ‘noh ‘mơ̆i jơ̆ tơdrong pơih trong dŏng pơklaih kơ lu bơ̆n.

Lăm lơ rup jơhnơr chăl Tơiung Tơdrong Lui, rup yă Mari păng Kon Nge pơtih jrŭ să tơpă tơdrong ơh sơ’ngon ‘noh. Măt bơngai mĕ lăng kon nge ‘bĕnh tơdrong ‘mêm mơnat mă lei kŭm đei tơdrong ơh sơ’ngon. Sư hiôk chơt, hlĭch tơpă ‘bơ̆t anăp tơdrong mơsêh mă kơdih oei glơng pôk tơ ti, mă lei tơdrong hiôk chơt ‘noh đei hrŏu hăm đak măt, yua kơ sư băt kon kơdih đei tơpŭ wă pơkeh mĭnh tơdrong tơtă ‘bĕnh pơmat tat. Lăm tơdrong hiĕk đơ̆ng yă Mari đei đak măt.

Gah rŏng kơ rup anih bơng ‘nhĕt tơnŏ jơ̆ bôl ‘long pơglang oei gô lê̆ bơih. Ưh kơ đunh dơ̆ng, ‘long ‘noh gô chĕp iŏk akâu jăn iĕ ioch, ưh kơ đei tơdrong yoch ‘nâu. Ưh kơ đunh dơ̆ng, chăl arih lăm teh đak đơ̆ng Sư gô tang lê̆, wă pŭ iŏk tơdrong yoch đơ̆ng kon bơngai, na iung arih lăm kĕ jei tơdrong ư-ang.

Bơyan Nôel sơnăm ‘nâu, lu bơ̆n đei lơ tơdrong wă bơnê kơ Kră Yang. Hloh kơ ‘bar rơbâu sơnăm adrol, ‘Bok Dŏng Pơklaih đei jur tơ teh, ưh kơ sĭ lăp wă arih lăm lu bơ̆n, na kŭm wă chu pơmat, chu pơ̆ng kơ đĭnh. Sư pơm tôm tơdrong yua kơ ‘mêm mơnat kơ lu bơ̆n. Dang ei, Sư oei tơ tang dŏ pơgơ̆r, lăng tơ ala teh đak hăm jơhngơ̆m iơ̆m dim, păng pơtrơp tơ’bôh tơdrong ‘mêm mơnat đơ̆ng Sư hăm lu bơngai lăm tơdrong oei hơdai đơ̆ng Yang Bơhngol ‘Lơ̆ng lăm jơhngơ̆m dôm lu bơngai gah Sư, kŭm thoi kĕ chơ̆n chang gô dôm lu bơngai tơbral, wih brŏk lui sơng iŏk Sư.

Nôel ưh kơ đei truh kiơ̆ hăm trong hrơ̆ng hreng dah rang rŏ. ‘Bok Dŏng Pơklaih Yang Yêsu tơpŭ lăm hơdrong rơmo hmă đĕch, lăm măng mu păng re kơtơ̆ng hơdar đơ̆ng khŭl sem dơrong, hơdai hăm dôm lu bơngai wei triu dơnuh hin. Teh đak nhen thoi ưh kơ băt khan trŏ lăm măng noh đei tơplih đĭ đăng tơdrong so kon bơngai. Ưh kơ đei ŭnh dreng drao, ưh kơ đei ‘bai hơri Nôel, ưh kơ đei ‘bok kră Nôel, ưh kơ đei prĕl kok dah tơmam apah, ‘ngoaih kơ mĭnh tơmam ăn đĕch păng tih hloh: kơdih Sư.

Tơdrong ‘Bok Kei-Dei pơm lăm măng noh hloh kơ dôm tơdrong hlôh băt đơ̆ng kon bơngai. Đơ̆ng Kon Pôm Sư, Sư tơ’bôh tơdrong mă măt ưh tim mă ‘bôh, đon tơchĕng ưh tim mă hlôh. Sư ăn kơ teh đak băt gah mĭnh tơdrong chang hơmĕng lăp đei gơh mơn hăm jơhngơ̆m, tơdrong chang hơmĕng truh đơ̆ng tơdrong ‘mêm mơmat păng ăn đĕch đơ̆ng Sư.

Đơ̆ng rŏng kơ dôm ŭnh hơdah păng ‘long hơngo jơ̆ mĭnh tu hơdah nai, pơchrang hloh kơ đĭ đăng dôm tơdrong. Hmach dêh, lơ bơngai ưh kơ gơh ‘bôh hơdah noh, yua kơ hăt kơ lăng kơ tơdrong ‘lơ̆ng rŏ gah ‘ngoaih. Lu sư ưh kơ băt kơnăl khan kơplah kơdih ăn tơmam kơ bơngai lăm hnam dơnŏ lăm phĕt ‘blŏk hơdơ̆r, lu sư oei pơrơ̆ng pơchrang dơ̆ng tơdrong tơ’bôh ‘mêm mơnat tih hloh lăm chăl sơ̆: pơm tơ’bôh mă ‘Bok Kei-Dei đei pơm kơplah ăn đĕch kơdih Kon Sư kơ kon bơngai.

Na lăm, Yôhan 3:16 re kơtơ̆ng ‘bĕnh tơdrong gĭt tơm lăm năr phĕt ‘blŏk hơdơ̆r Nôel: “’Bok Kei-Dei ‘mêm mơnat tơpă rim ‘nu bơngai jơ̆p ala teh âu na Sư mah ăn Kon pôm Sư….” Yua kơ jơhngơ̆m ‘mêm mơnat ưh kơ tôch noh, Sư đei pơyơ̆r Kon Sư yua kơ lu bơ̆n, đĭ lăm tơdrong arih truh lăm tơdrong lôch. Năr ‘nâu, lu bơ̆n athei hơri ư-ang hiôk chơt, yua kơ ‘Bok Dŏng Pơklaih Yang Yêsu jur đei ‘măn ăn kơ lu bơ̆n tơdrong arih ‘nao, dang ei păng dĭng truh ning mônh.

Apĭnh đĭ đăng krao khan hơdai: Kơkuh kơ Kră Yang Yêsu mă ‘mêm, rim wơ̆t ‘blŏk hơdơ̆r kơ năr Kră Yang Jur, hơpơi kơ jơhngơ̆m kon đei ‘blŏk răk tơdrong ‘mêm tih hloh mă Ih ‘măn ăn kơ teh đak ‘nâu păng kơ kơdih kon, khan Sư đei achăng plei ‘lơ̆ng ư-ang wă mơ̆t lăm teh đak iĕ ioch ‘nâu yua kơ tơdrong ‘mêm mơnat tih hloh noh. Kon bơnê kơ Ih đei rơih trong chu iŏk đon ala, đei pŭ iŏk pơmat, chu lôch wă kơ bơngai răm ‘băm thoi kon gơh sơng iŏk tơdrong ‘mêm, ăn đĕch păng tơdrong dŏng pơklaih ưh kơ đei kiơ gơh pơtŏ đơ̆ng anih Ih. Apinh Kră Yang tơgŭm kon ưh kơ sĭ lăp hơdai lăm tơdrong hiôk chơt Nôel, na kŭm băt tơ jur akâu kơdih ăn jơhngơ̆m bơnê kơ ‘Bă yua kơ tơdrong ‘mêm chu pŭ iŏk ‘lơ̆ng rŏ dêh noh. Hơpơi kơ tơdrong ‘mêm mơnat Ih tơ̆k hơdah lăm jơhngơ̆m kon, wă kơ lăm kon, bơngai nai kŭm ‘bôh băt kơ hơdah noh na năm kơkuh kơ Ih. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, rŏ lăng năr ‘nâu buăl oei chă mĭnh tơmam apah đei tơm gĭt wă ăn kơ dôm lu bơngai mă ‘mêm. Mă lei buăl băt ưh, kơdih ‘Bok Kei-Dei đei pơm bơih tơdrong noh adrol kơ buăl đunh dêh bơih. Sư đei ‘nŭng đĭ tơdrong ‘mêm mơnat tih hloh đơ̆ng Sư lăm rup kon nge, na ‘măn ăn kơ đĭ đăng kon bơngai. Rŏ lăng, đĭ đăng hơdah ŭnh dreng drao tơ ‘ngoaih to ưh kơ đei ba truh tơdrong gĭt tơm đơ̆ng tơdrong Nôel tơpă. Mă ‘noh jơ̆ jơ phŭt jơhngơ̆m lu bơ̆n pơih, wă mĭnh wơ̆t dơ̆ng sơng iŏk tơmam ăn gĭt kăl ‘noh: ‘Bok Dŏng Pơklaih Yang Yêsu, hơdah chang hơmĕng rang rŏ ưh kơ layơ đei păt. Đơ̆ng bơng ‘nhĕt truh tơ ‘long pơglang, jơ̆ rok trong đơ̆ng tơdrong ‘mêm kơpal plĕnh đei tơ’bôh kơ teh đak ‘nâu gơh sơng iŏk tơdrong dŏng pơklaih, lăm noh đei trŏ kơ dôm bơngai lăm lu bơ̆n. Bơnê kơ Kră Yang yua kơ Ih đei truh!
Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.