Rŏ lăng tam mă đei layơ kon bơngai arih hli tơrơ lơ thoi hrei âu. Hli kơ tơdrong arih tơ anăp đei tơdrong kơnê̆, hli kơ hiong răm, hli kơ bơngai bơ̆n ‘mêm lôch, hli kơdih ưh kơ đei đon hlôh wao, hli kơ kơdih arih ưh kơ ‘lơ̆ng… Mă khan adrin pơm tơ’bôh đei jơhngơ̆m pran, mă lei đei tơ âu tơ noh lu bơ̆n oei hli tơrơ, ưh kơ rơnŭk. Teh đak jum dăr kơ lu bơ̆n đei tơplih rim năr, păng kư̆m đei kơ tơ̆ng ang đei minh tơdrong truh iĕ đech pơm kơ jơhngơ̆m kon bơngai tơtơ̆ bơih. Mă lei kơplah đei dôm lu tơdrong hiơ̆k bơngơ̆t noh, Nôel truh wă kơ tơ’blŏk kơ lu bơ̆n thoi âu: Pơtao Hiôk Hian truh tơ teh đak. Kơplah đei Sư oei hơdai, dôm kơ tơdrong hli tơrơ huay kơ pơrăm lu bơ̆n bơih.

Năr ‘nâu, ‘năr 25/12/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Jonathan Macnab kơ̆l ‘bai NÔEL HUAY KƠ HLI TƠRƠ.

“Păng lu sư gô oei rơnŭk, yua kơ kơplah noh gô pơm tih hloh kơ đĭ-đăng bơngai tôch kơ teh.  Noh Sư boih gô pơm kơ bơ̆n rơnŭk rơnua.”  (Mika 5:3-4)

“Thoi noh Sư gô jao lu đe noh kơ lu bơngai ayăt kơ Sư dĭng tơ bơngai drŏ-kăn tơpŭ kơ Sư, tơpŭ boih păng lu bơngai Isơrael mă oei oei đơ̆ng lu ‘nhŏng oh Sư, lu sư gô wih brŏk tơ kon sâu bơngai Isơrael.” (Mika 5:2)

Nôel truh bơih, păng hrăt hrot kơ lơ tơdrong lăm tơdrong arih, inh đei mơn ‘bôh: inh ưh pă hli tơrơ bơih, mă khan dôm lu tơdrong kiơ. Na buăl thoi yơ? Năr ‘nâu, buăl hăm pơ̆n pơma pơsĭt tơdrong noh ưh? Tơdah buăl đei sơng iŏk Yang Yêsu lăm tơdrong arih, jing Pơtao pơgơ̆r lăm jơhngơ̆m, na buăl gô arih pă đei hli tơrơ bơih!

Kơplah noh sơ̆, ‘bok khan lê̆ hơdrol Mika đei pơma khan gô đei Pơtao truh (Mika 5;2), teh đak kơplah noh ưh kơ đei rơnŭk rơnua ‘biơ̆ thoi kơ hrei ‘nâu. Tơblah wang, ưh kơ hơđơ̆ng, hli tơrơ jơ̆p jang kơ anih, ưh kơ băt tơdrong kơnê̆ layơ wă truh dơ̆ng, ưh kơ phara kiơ kơ lu bơ̆n hrei âu. Na đơ̆ng dôm kơ tơdrong thoi noh, Nơ̆r ‘Bok Kei-Dei đei ăn kơ lu bơ̆n hơmĕng: Gô đei Minh ‘Nu pơtao, păng Sư gô pơrăm đĭ dôm lu tơdrong hli tơrơ.

Mika đei chih: “Sư gô dơ̆ng kơjăp păng gô gơnang kơ tơdrong pran kơtang đơ̆ng Kră Yang hăm tơdrong rŏ hơbŏ anăn Kră Yang ‘Bok Kei-Dei Sư kơdih păng wei-lăng khŭl Sư kơdih; păng lu sư gô oei rơnŭk, yua kơ kơplah noh gô pơm tih hloh kơ đĭ-đăng bơngai tôch kơ teh. Noh Sư boih gô pơm kơ bơ̆n rơnŭk rơnua. Tơdah lu bơngai Asiri wă truh tơ lăm teh đak lu bơ̆n păng pơjuă hnam yang bơ̆n, na lu bơ̆n gô iung tơpơh ‘nu bơngai wei-lăng păng tơhngam ‘nu kuan pơgơ̆r lu kon pơlei na iung blah plơ̆ lu sư.” (Mika 5:3-4)

Inh đơ̆ng minh ‘nu bơngai ngăl hli tơrơ. Hli kơ măng mu, hli kơ gre tangwang, hli kơ pơma dơnuh hăm bơngai nai. Inh ling lang tơchĕng inh gô răm, gô tơ’bơ̆p tơdrong mơlâu, dah dôm tơdrong hloh kơ wă bơwei gơh gơ̆t. Đơ̆ng tơdrong hli tơrơ noh na chô̆ pơkơ̆ng inh lăm “hnam pơnă” đơ̆ng kơdih pơm ăn ‘mơ̆i.

Na kơplah mơ̆ng kơ tơ̆ng gah Yang Yêsu, inh rai hli hloh. Inh tơchĕng: “Tơdah inh ưh kơmơ̆ng nơ̆r Pơtao ‘nâu, rŏ lăng chăl arih inh hiong răm bơih!” mă lei inh ưh kơ băt wă pơm thoi yơ wă kơ huay pă hli. Inh pơma hăm tơdrong hli: “Veh tơnai!” mă sư ưh kơ chu nơ̆r inh-sư rai gơrĕt chô̆ inh rai dêh hloh.

Truh tơ Yang Yêsu đei pơma lăm jơhngơ̆m inh. Sư pơma: “ Nĕ kơ hli!” thoi sư đei nơ̆r pơma tơ’bôh kơ Yôhan Tơdrong tơ’bôh 1:17-18 đei chih: Sư gô dơ̆ng kơjăp păng gô gơnang kơ tơdrong pran kơtang đơ̆ng Kră Yang hăm tơdrong rŏ hơbŏ anăn Kră Yang ‘Bok Kei-Dei Sư kơdih păng wei-lăng khŭl Sư kơdih; păng lu sư gô oei rơnŭk, yua kơ kơplah noh gô pơm tih hloh kơ đĭ-đăng bơngai tôch kơ teh. Noh Sư boih gô pơm kơ bơ̆n rơnŭk rơnua. Tơdah lu bơngai Asiri wă truh tơ lăm teh đak lu bơ̆n păng pơjuă hnam yang bơ̆n, na lu bơ̆n gô iung tơpơh ‘nu bơngai wei-lăng păng tơhngam ‘nu kuan pơgơ̆r lu kon pơlei na iung blah plơ̆ lu sư.”

Na đơ̆ng rŏng kơ noh, Yôhan roi dôm lu tơdrong mă sư ‘bôh: “Dang ei Kră Yang bơ̆n ‘Bok Kei-Dei blah dŏng kon bơngai boih, Sư yua tơdrong mơsêh mơyang Sư blah iŏk kon bơngai đơ̆ng yang Satan pơgơ̆r, na Sư wă pơgơ̆r kơdih. Na Sư kư̆m ăn kơ ‘Bok Krist pơgơ̆r mơ̆n, yua kơ yang Satan thuơ huŏng tơ teh boih.” (Tơdrong Tơ’bôh 12:9-10)

Kơplah tơpŭ kơ Yang Yêsu tơ pơlei ‘Betlehem sơ năm noh sơ̆, noh jơ̆ pơtơm blŭng a kơ sơnăm tơdrong kơnê̆ lăm teh đak gô hiong răm lăm noh kư̆m đei tơdrong hli tơ rơ! Minh năr ayơ noh, ưh kơ đei tơdrong kiơ pơm kơ bơ̆n hli tơrơ dơ̆ng bơih, yua kơ Yang Yêsu gô pơgơ̆r tôm tơdrong! Na lăm năr ‘nâu, kư̆m ưh kơ đei tơdrong kiơ pơm kơ bơngai lui kơ ‘Bok Kei-Dei hli tơrơ, mă hăm bu bu hăm tơdrong kiơ kiơ. Yua kơ Yang Yêsu oei hơdai tơ âu. Sư jơ̆ ‘Bok Kei-Dei oei hơdai lu bơ̆n.

Apĭnh đĭ đăng krao khan hơdai: Kơkuh kơ Kră Yang mă ‘mêm, kon bơnê kơ Ih yua kơ Yang Yêsu ‘Bok Dŏng Pơklaih ba ăn tơdrong hiôk hian tơpă kơ kon bơngai kơpal teh đak ‘nâu. Lơwơ̆t kon hli tơrơ yua kơ dôm lu tơdrong tih truh, apinh Kră Yang tơ’blŏk kơ kon Ih bơih Tơ’ngla chĕp tôm tơdrong lăm tơpang ti Ih. Hơpơi kơ tơdrong ‘mêm Ih puh tơweh dôm lu tơdrong hli tơrơ lăm kon, wă kơ kon arih hiôk hian păng pơ̆n nuih, kon băt kơ Ih jơ̆ Pơtao kơ kon, jơ̆ Pơtao Hiôk Hian wă pơgơ̆r khŏm khŏm. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, sơnăm ‘nâu, kơplah ‘blŏk hơdơ̆r kơ Kră Yang jur, lu bơ̆n athei kơ kuh kơ Tơ’ngla đei truh bơih, chĕp ba tơdrong ‘mêm mơnat puh tơweh tôm tơdrong hli tơrơ. Lu bơ̆n athei ‘măn jơ oei lăm Sư, păng kư̆m athei ră roi tơdrong ‘mêm mơnat Sư kơ đe bu oei kăl wă. Hơpơi kơ Kră Yang pơgơ̆r lăm jơhngơ̆m lu bơ̆n tơweh lê̆ tơdrong hli tơrơ, păng tuh tơ’bĕnh tơdrong hiôk hian tơpă đơ̆ng Sư lăm jơhngơ̆m lu bơ̆n.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.