Rŏ lăng lu bơ̆n ưh kơ hlôh tơpă thoi yơ noh tơdrong ‘mêm ăn đĕch dĭng truh tơ ‘bôh bơngai bu noh ‘mêm hăm tơdrong sư đei pơm tơ’bôh noh. Kơplah lăng dôm lu bơngai jing mĕ, ‘bă pôk glơng kon đơ̆ng oei nge dĭng truh tơ kon wơ̆ ‘lŏ, ‘bôh tơdrong noh hlĭch tơpă. Yua kơ lăm noh, lu bơ̆n bôh Kră Yang ‘Bok Kei-Dei -Tơ’ngla oei wei rong lu bơ̆n hăm tơdrong ‘mêm ưh kơ đei pơdah tơdrong pơ- ang, mă lei kơjăp păng lơ̆ng rŏ khŏm khŏm.

Năr ‘nâu, ‘năr 27/12/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Jeff Friend kơ̆l ‘bai ‘BĂ OEI TƠ ÂU!

“Kră Yang ‘Bok Kei-Dei ih oei tŏk-bŏk ih; Sư boih mơsêh gô dŏng pơklaih ih. Sư gô chơt hiôk đĭ-đăng yua kơ đơ̆ng ih. Yua kơ tơdrong ‘mêm mơnat Sư, Sư gô ĕnh; păng yua kơ đơ̆ng ih, Kră Yang gô hơri chơt hiôk.” (Jêphania 3:17)

Đĭ đăng bơngai hao gre păr tơ oei ngăl bơih na blư đei nơ̆r pơma ‘bơ̆t ‘măng gre păr. Minh ‘nu bơngai drŏnglo oei pôk kon drŏ nglo sơnăm mơlôh jo po, đei wă klen klon ‘bơ̆t ‘măng ‘bơ̆t rŏng bơngai wơ̆r wă năm tơ oei tơ tang dŏ blŭng a.
Mĕ sư adrin pĕng kơ̆l kon sư kuă kơ đei hơtŭt ‘bơm, na ‘bă sư pơ ‘lơ̆ng dan kon sư tơ oei jê̆ tơnang ‘măng ‘mŏk. Bơngai hơ’lơ̆p noh ưh kơ đei gơh wă bơwei akâu sư kơdih, na ‘bă sư adrin tơgŭm kon sư tơ oei wă kơ hiôk. Rim wơ̆t ‘bă sư hơmet rĭ ming, na kon sư đei tơ tok kơ jĭ, pơm kơ ‘bă sư hiơ̆k bơngơ̆t rĭ thoi yơ wă kơ kon sư tơ oei hiôk ‘biơ̆. Yua kơ ‘bă sư ‘maih wă dêh kơ kon sư hiôk, na sư chơ̆n jơhngơ̆m hơmet rĭ pơ‘lơ̆ng đĭ jơhngơ̆m sư.

Yua kơ thoi noh na sư hiơt đĭ kơ dôm lu tơdrong jum dăr kơ sư. Akăn sư tơ oei tơ tang dŏ pah rŏng kư̆m wŏng hơdai tơgŭm, na sư kư̆ kơ apinh thim khăn hơgơn wă dan ăn kơ kon sư, wă huay kơ pơpơ̆ dêh. Kơplah ‘bôh kon sư hơđơ̆ng ‘biơ̆ bơih, sư chhŭt hŭl hang klĕng sư, tơhôih minh ‘bar wơ̆t, na tơ oei, ưh kơ đei hiơt bơnê kơ lu bơngai bơ̆jang lăm gre păr yua kơ lu sư đei chơ̆n păng đĭ jơhngơ̆m tơgŭm.

Na truh tơ tơlei wăn akâu wă kơ hơđơ̆ng đei tah, sư grê akâu tơ jê̆ kon sư. Sư hơmet khăn hơgơn, hơmet khăn su na prot pơ’lơ̆ng ti, jơ̆ng kon sư. Rim wơ̆t kơtơ̆ng kon sư ôr khan jĭ, na sư tơl hloi, wă adrin chơchă wă kơ kon sư tơoei hiôk huay kơ jĭ.

Đơ̆ng rŏng kơ gre păr bơih, na kon sư tep. ‘Bôh thoi noh, ‘bă sư hăt hot kơ iung, lăng ming tăp dăr kơ akâu kon sư na dan khăn tơ jơ̆ng wă kơ hơbôn ‘biơ̆. Kơplah tơ oei, sư grê akâu tơ gah kon sư sư, pă đei lăng tơnai.

‘Bôh thoi noh pơm kơ inh ‘blŏk kơ nơ̆r krao khan apinh đơ̆ng Đawit lăm Hơriso 17:8: “Apinh Ih bơwei inh thoi bơwei kon-ngai lăm măt Ih, Apinh krôp inh ala pơnăr Ih Kră Yang.”

Gre păr đei tơdrŏ lăp ai pơm kơ hơ’lơ̆p noh nhơ̆m. Na ‘bă sư pel tơ’bok kon sư hloi, gơning kơ̆l jê̆, na pơma hơdar ‘bơ̆t đon: “ ‘Bă oei tơâu, ‘nĕ kơhli, ‘bă ‘mêm kơ kon. Bă oei tơ âu”. Na sư hơli sŏk kon sư, pơma dôm kơ lu nơ̆r ‘mêm, adrin pơma dôm lu nơ̆r rơngơp wă kơ kon sư hiơt kơ tơdrong jĭ.

Kơplah kon sư tep dơ̆ng, ‘bă sư ưh kơ đei pơdơh pơma pơlung, na hơmet ming khăn hơgơn dah tơsu ming khăn wă kơ klĕp ‘lơ̆ng. Mă khan kon sư pă đei kơtơ̆ng dôm kơ lu nơ̆r ‘mêm mơnat noh ưh kơ đei pơdơh, thoi kơ nơ̆r ‘Bok Kei-Dei lăm Jêphania 3:17:

“Kră Yang ‘Bok Kei-Dei ih oei tŏk-bŏk ih; Sư boih mơsêh gô dŏng pơklaih ih. Sư gô chơt hiôk đĭ-đăng yua kơ đơ̆ng ih. Yua kơ tơdrong ‘mêm mơnat Sư, Sư gô ĕnh; păng yua kơ đơ̆ng ih, Kră Yang gô hơri chơt hiôk.”

Mă khan adrin kuă kơ lăng pơnhen, mă lei inh ưh kơ weh lăng tơnai kơplah ‘bôh thoi noh. Kơplah noh, inh đei mơn ‘blŏk: inh ‘bôh tơdrong ‘lơ̆ng pơdah tơdrong ‘mêm đơ̆ng ‘Bok Kei-Dei ăn kơ bơngai lui kơ Sư.

Kư̆m nhen thoi bơngai ‘bă noh, ‘Bok Kei-Dei ling lang wei rong inh, mă kơplah inh ưh kơ mơn băt. Sư ling lang krao, pơlung, chhŭt đak măt păng wei rong đơ̆ng Sư. Na sư pơma dơdar: “ ‘Bă oei tơ âu, ‘nĕ kơ hli, Bă ‘mêm kơ kon lơ tơpă.”

Apĭnh đĭ đăng krao khan hơdai: Kơkuh kơ ‘Bă ‘mă ‘mêm, bơnê kơ ‘Bă yua kơ tơdrong ‘mêm Ih ăn kơ kon, minh tơdrong ‘mêm ưh kơ đei gleh lap, ưh kơ tơplih, mă khan rơdu păng wơ̆l jrok. Apinh tơgŭm kon mơn băt kơ Ih oei hơdai đơ̆ng dôm lu tơdrong kon pơm, wă kơ kon đei pơdơh lăm tơpang ti Ih wei rong. Kơplah kon hli tơrơ, apinh tơ’blŏk kơ kon ‘Bă oei tơ âu, oei ‘mêm păng hnhoi lăng đơ̆ng rim trong kon yak năm. Hơpơi kơ jơhngơ̆m kon đei rơnŭk rơnua lăm tơdrong ‘mêm kơjăp đơ̆ng Ih. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, dôm kơ năr wă đĭ kơ sơnăm wă jê̆ bơih, lu bơ̆n hăm hơwơ̆l hơwang ưh yua kơ ơh sơ’ngon, anat anot dah pă đei chang hơmĕng kơ sơnăm tơ anăp ưh? Năr ‘nâu mă khan buăl oei tơ yơ dah đei tơdrong kiơ, athei ‘blŏk kơ ‘Bă ‘Bok Kei-Dei oei hnhoi lăng buăl đơ̆ng rim jơ phŭt. Sư ưh kơ đei achăng lê̆ buăl, bơwei ưh kơ pơdơh păng tuh tơdrong ‘mêm mơnat tơ lăm chăl arih buăl. Đơ̆ng rim tơdrong kon pơm, athei mơn kơ ‘Bă oei hơdai, Sư ling lang ‘mêm kơ buăl păng krôp kuăr buăl lăm tơpang ti ‘mêm mơnat Sư. Yua kơ thoi noh, mă khan buăl đei tơdrong arih thoi yơ, tơ’bơ̆p tơdrong arih thoi yơ, tơ’bơ̆p tơdrong anat anot ayơ, athei hơđơ̆ng yua băt kơ ‘Bă ‘Bok Kei-Dei oei hơdai buăl.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơp dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.