Lăm teh đak ưh kơ pơdơh pơthi băl, lu bơ̆n kŭm adrin đĭ jơhngơ̆m kơdâu mă hrĕnh wă kơ huei kơ đei achăng lê̆ tơrŏng. Tơdrong jang, hơpơi wă, kĕ jei, păng dôm tơdrong hơdai- lu bơ̆n tơchĕng ‘noh jơ̆ dôm tơdrong kiơ pơm kơ bơ̆n chơt hiôk. Mă lei hăm đei layơ lu bơ̆n đei kơnhăm jet kơdih: “Lăm dôm tơdrong bơ̆n lăng jơ̆ gĭt kăl, lei bơ̆n oei dan Kră yang tơyơ?” Nơ̆r jet ‘noh trŏ jơ̆ nơ̆r tơ’blŏk pơ’lơ̆ng mă Kră Yang oei mơmơnh năr ‘nâu: Sư trŏ kơ đei pôk tơ anih ‘blŭng a hloh lăm jơhngơ̆m rim lu bơ̆n.

Năr ‘nâu, ‘năr 27/12/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Anissa Rowe kơ̆l ‘bai TƠDRONG KĂL KƠPƠM MĂ ADROL HLOH.

“Thoi noh na iĕm athei ăn kơ Sư pơgơ̆r iĕm, hăm adrin pơm ‘lơ̆ng thoi Sư wă, noh kăl hloh kơ dôm tơdrong nai; pơm thoi noh na Sư gô ăn kơ iĕm tôm tơmam iĕm kăl yua.” (Mathiơ 6:33)

“Thoi noh na iĕm athei ăn kơ Sư pơgơ̆r iĕm, hăm adrin pơm ‘lơ̆ng thoi Sư wă, noh kăl hloh kơ dôm tơdrong nai; pơm thoi noh na Sư gô ăn kơ iĕm tôm tơmam iĕm kăl yua.” (Mathiơ 6:33)

Nơ̆r ‘Bok Kei-Dei ‘nâu đei jing mĭnh “trong hơdơ̆ng” lăm jơhngơ̆m inh. Đơ̆ng oei ‘lơ̆p inh đei kơtơ̆ng hơnơ̆ng lơ wơ̆t. Mă lei kŭm đei kơplah inh đei jet kơdih:

“Tơpă athei ăn kơ Sư pơgơ̆r iĕm adrol hloh đei tơm kăl kiơ?”

Lăp kăl ‘bar nơ̆r wă tơblang: Adrol hloh.

Nơ̆r tơtă đơ̆ng Sư, tơdrong đơ̆ng Sư wă, tơdrong ‘mêm mơnat đơ̆ng Sư, đĭ đăng athei jơ̆ blŭng a kăl hloh lăm chăl arih păng lăm dôm tơdrong đơ̆ng lu bơ̆n wă pơm. Lăp kăl thoi noh, dôm tơdrong nai kŭm gô tơproh trŏ kơ anih sư.

Anat tơpă ăn tơdrong tơchĕng kon bơngai lu bơ̆n hlôh băt đĭ tơdrong ‘nâu. Mă lei inh băt kơnăl khan, nơ̆r noh ưh kơ sĭ lăp “yua ‘bơ̆t anih tơproh”, gĭt kăl jơ̆ hăm yua kơ đơ̆ng kiơ “jơnăr đei tơplih bơih” dah “Kră Yang hlôh jơ̆ kon hrăt hrot dêh nei.”

Kră Yang Yêsu đei khan hơđăl: “Yua kơ bơngai bu ưh kơ tŭk dôm tơdrong sư kơdih, bơngai ei ưh kơ gơh jing bơngai kiơ̆ Inh ôh.” Nơ̆r ‘noh Sư khan sơ̆, păng dang ei oei trŏ thoi noh. Mă tơdrong kiơ no đei tơm kăl jơ̆ athei pơm dôm tơdrong pơm kơ lu bơ̆n ưh kơ hiôk, athei achăng dôm tơdrong kiơ oei pơgăn tơdrong pơgơ̆p hăm Sư, dah đei chu pŭ iŏk achăng dôm tơdrong hơpơi wă đơ̆ng kơdih ‘maih.

Lơ bơngai lăm lu bơ̆n pơrơ̆ng pơm ưh kơ băt, ưh kơ wă tơ’bơ̆p hăm tơdrong ‘mong tơpă đơ̆ng tơdrong pơkăm ‘nâu.

Trŏ bơih, Kră Yang wă tuh ăn pŭn hiôk kơ lu bơ̆n lăm tôm tơdrong. Sư ‘maih wă pơih lu ‘măng ‘mŏk kơpal plĕnh păng tuh ăn pŭn hiôk gah bơhngol truh tơ mŭk tơmam kơ lu bơ̆n. Sư wă ăn dôm tơdrong hơpơi wă lăm jơhngơ̆m lu bơ̆n. Mă lei mưh lăp lu bơ̆n hiơt khan trŏ tơdrong chu iŏk đon ala, chu yom păng đon lui đơ̆ng lu bơ̆n ‘noh jơ̆ tơdrong pơm kơ Sư bơ̆jang.

Dah inh tơpă đĭ jơhngơ̆m pơma: “Kră Yang ơi, kon pơm dôm tơdrong yua kơ anăn Ih”, tơplih kơ nŏng kơ krao apinh Sư pơm dôm tơdrong tih hloh kơ akâu jăn inh, inh đei chă ‘bôh tơdrong hiôk hian hloh kơ tơdrong hlôh băt.

Achăng păng pơjao jơ̆ tơdrong anat hloh, ‘noh kŭm trŏ jơ̆ tơdrong lu bơ̆n kăl kơ pơm rim năr.

Păng ‘lơ̆ng rŏ tơpă, dah lu bơ̆n gơh pơm tơdrong ‘noh, Sư gô hiơ̆k bơngơ̆t đĭ đăng dôm tơdrong.

Lơ măng inh hơoei ưh kơ băt pơm liơ ‘bơ̆t anăp lơ tơdrong jang hơdrom kơjung thoi kông. Tơpă ‘nâu jơ̆ tơdrong lĕi lăi kơ đĭ đăng lu bơ̆n. Mă lei nơ̆r ‘Bok Kei-Dei noh đei kơtơ̆ng lăm jơhngơ̆m. Adrol kơ bơ̆jang dôm tơdrong jang kiơ, inh tơlĕch đĭ tôm tơdrong đơ̆ng đon tơchĕng păng ‘măn jơ năr hăm Kră Yang: krao khan, đŏk Nơ̆r Sư, dah mơ̆ng mĭnh ‘bai bơtho kơđeh.

Păng buăl băt ưh? Inh mơn đei praih ‘nao hloi. ‘Lơ̆ng hloh rơbâu wơ̆t kơ tơdrong ‘bĭch lăng điê̆n thoăi dah hơoei lăng hơlen lăm kơmăy tĭnh, hơpơi kơ sư jang keh kơdih tơdrong jang tơgŭm inh.

‘Bok Kei-Dei tuh ăn pŭn hiôk kơ lu bơ̆n kơplah Sư đei pôk tơ anih adrol hloh blŭng a. Yua kơ Sư jơ̆ ‘Bok Kei-Dei “băt kơ gar” (Bơtho Khôi Juăt 4:24).

Đĭ đunh khei năr, inh ưh kơ pơ̆n achăng tơpang ti. Inh ‘maih wă kơdih pơgơ̆r tôm tơdrong. Mă lei klui kŭm hloh kơ ưh, tuch luch inh kŭm hlôh khan tơdrong inh tơpă kăl kơ pơm trŏ jơ̆ lui gơnang kơ Sư. Lăp hmă thoi noh đĕch.

Ưh kơ trŏ ‘Bok Kei-Dei ưh kơ wă kơ lu bơ̆n adrin lăm chăl arih. Mă lei Sư wă kơ lu bơ̆n pơm kiơ̆ trong đơ̆ng Sư, đơ̆ng blŭng a pơtơm dĭng truh kơ pơkeh. Trŏ bơih Kră Yang wă kơ lu bơ̆n kĕ jei, mă lei Sư kŭm wă kơ lu bơ̆n tơ’bôh khan kơdih tơdrong mơsêh mơyang đơ̆ng Sư oei pơgơ̆r lăm rim ‘nu lu bơ̆n, yua kơ kơdih lu bơ̆n ưh kơ jơ̆ kiơ hloi.

Thoi noh na năr ‘nâu inh wă pơlung buăl: Athei pôk Kră Yang Yêsu Krist tơ anih adrol kơjung hloh lăm đon tơchĕng buăl, pôk Sư jơ̆ Tơ’ngla chông anhăk jơhngơ̆m buăl. Păng Sư gô proh hơmet dôm tơdrong oei đei. Sư đei pơkă hăm kon pơlei Sư thoi noh bơih.

Apĭnh đĭ đăng krao khan hơdai: Kơkuh kơ Kră Yang, kon băt khan lăp kơplah pôk Ih tơ kơpal hloh, chăl arih kon gơh đei tơm kăl tơpă. Apinh huay kơ jô̆ yo yua kơ dôm kơplah kon ăn dôm tơdrong nai tơgar pơgơ̆r anih tơm đơ̆ng Ih lăm jơhngơ̆m kon. Năr ‘nâu, kon apinh pơyơ̆r dơ̆ng kơ Ih đĭ tơdrong tơm blŭng a, lăm dôm tơdrong pơdrơ̆ng, dôm tơdrong hơpơi wă, lăm đĭ trong kon yak năm. Apinh bơtho kon băt lui gơnang kơ Ih hloh, băt achăng tơdrong pơgơ̆r, wă kơ kon gơh arih rim năr lăm tơdrong hiôk hian kơplah băt khan Ih oei hiơ̆k bơngơ̆t dôm tơdrong. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, dah Kră Yang Yêsu tơpă jơ̆ adrol hloh kơ chăl arih buăl, tôm tơdrong nai gô thar jing ‘lơ̆ng tôm păng tơproh ‘lơ̆ng. Dôm tơdrong đơ̆ng pơm kơ buăl hiơ̆k bơngơ̆t, tơtăm dah gleh lap rai jing phyơl hơ iơch, yua kơ buăl băt Tơ’ngla oei chĕp tơdrong pơgơ̆r chăl arih buăl. Năr ‘nâu, athei pơlong mĭnh tơdrong ‘bônh hmă đĕch: pơjao dơ̆ng anih adrol blŭng a kơ Kră Yang, păng buăl gô hlĭch hlăch ‘bơ̆t anăp tơdrong hiôk hian jrŭ să ưh kơ đei kiơ gơh pơtŏ pơting mă Sư ‘măn ăn. Athei achăng sơnăm so, sơng iŏk sơnăm ‘nao wă truh hăm mĭnh tơdrong pơkă “athei ăn kơ Sư pơgơ̆r iĕm, hăm adrin pơm ‘lơ̆ng thoi Sư wă” blŭng a, păng lu bơ̆n gô hlôi mơn đei Kră Yang tơpă jơ̆ Tơ’ngla “ ăn kơ iĕm tôm tơmam iĕm kăl yua.”

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.