Hăm đei layơ buăl mơlâu ưh kơ pơ̆n hơri ư ang kơ Kră Yang, yua kơ tơchĕng kơdih hơri ưh kơ hiôk? Buăl hăm đei hơri dơdar lăm jơ akŭm kơ kuh ưh, lei mă hơri lăm jơhngơ̆m đĕch krê pơm ưh kơ ‘lơ̆ng kơ bơngai nai. Kơkuh kơ Kră Yang lu bơ̆n kăl kơ đei nơ̆r hơri hiôk, mă lei Kră Yang kư̆m chă đơ̆ng lăm jơhngơ̆m hơri tơpă. kơplah buăl pơ̆n hơri mă khan ưh kơ hiôk, na kơplah đơ̆ng jơ noh, tơ pơlei ‘lơ̆ng oei hơri hơdai hăm buăl lăm tơdrong kơkuh hiôk chơt.

Năr ‘nâu, ‘năr 29/12/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Bill Gaultiere kơ̆l ‘bai PƠYƠ̆R KƠ KRĂ YANG NƠ̆R HƠRI.

“Păng bơ̆n athei hơri bơnê kơ Kră Yang hăm đĭ jơhngơ̆m, mă bơ̆n hơri tơdrong ‘Bok Kei-Dei hơdai hăm bơngai tơpôl, mă bơ̆n hơri tơdrong lu bơngai kră sơ̆, mă bơ̆n hơri tơdrong lu bơngai dang ei, mă bơ̆n hơri kiơ̆ kơ đon bơ̆n tơchĕng kơdih.” (Êphêsô 5:19)

Đei dôm kơ sơnăm adrol, inh đei pơm minh tơdrong mă adrol ki sơ̆ inh tam mă lah pơm: hơri ư ang kơ Kră Yang hăm nơ̆r Hơriso! Inh ‘bôh hlich kơplah ‘bôh inh thoi noh pơm kơ inh hiôk dêh tơpă. Bơhngol inh đei pôk tơ iung hnhoi lăng tơgah Kră Yang, tơdrong krao khan pơnam hloh, đei tơplih đon tơchĕng plơ̆ng tơ tơdrong ‘lơ̆ng, păng muh măt inh ling lang hiĕk chơt hiôk.

Inh đei mơn kơplah hơri nơ̆r Hơriso, mă tơ anih ayơ – mă khan lăm tơ anih hum, kơplah oei yak tŏk tơ kung, wơ̆r gre, dăr lăng pơgar, dah oei dơ̆ng proh hơmet – đĭ đăng jơ̆ thoi kơ minh “anih kơkuh” ‘bĕnh blai nơ̆r ư ang hiôk chơt pơyơ̆r kơ Kră Yang! Na tơdrong ‘nao trŏ tơpă kơ plah inh oei bơ̆l hăl, hiơ̆k bơngơ̆t, chhŭr nuih dah ơh sơ’ngon.

Wă kơ hlôh hơri ư ang kơ Kră Yang hăm nơ̆r Hơriso đei kăl yua thoi yơ, buăl băt kơ inh adrol sơ̆ inh mơlâu dêh kơ hơri, yua kơ inh ưh kơ băt hơri thoi yơ wă kơ trŏ nhip. Inh jơ̆ hơri dơdar đĕch lăm hnam akŭm, adrin hơri druh kiơ̆ bơngai nai wă huay kơ pơm kơ bơngai tơchĕng ưh kơ ‘lơ̆ng kơplah jơ akŭm kơkuh. Na kơplah pơ tơm blŭng a hơri rơ̆n re, inh lăng jum dăr hăm đei bơngai bu lăng tơ inh dang kơ minh hrĕng met ‘mơ̆i na inh pơ̆n hơri!

Rŏ lăng buăl kư̆m hlôh tơdrong wă huay kơ mơlâu noh. Bă inh jơ̆ bơngai hlôh kơ inh. Kơplah sư hŏk lăm tơdrâu, khŭl hơri hơmet ‘bai hơri Nôel. Bu bu kư̆m hưch hanh wă tơgŭm nơ̆r hơri lăm tơdrong tơdă phĕt sơnăm noh! Wă hơmet adrol, Kô athei dơ̆ng rim ‘nu lu sư pơlong hơri adrol. Na truh tơ ‘bă inh, sư hơri hiôk chơt, mă lei kô hơ’nhĕo kơ muh măt na pơma khan: “Kon mơ̆t tơ khŭl hơri “Ưh kơ đei Nôt hơ!”

“Ưh kơ đei Nôt”! mơ̆ng nhen thoi nơ̆r sek tơlang tơpăt! Khŭl “Ưh kơ đei Nôt” jơ̆ tă kơ lu bơngai hưch wă kơ đă ‘bŏng lŏng ngăl đĕch, ‘bôh akâu jăn tih pran mă hơri tă kơ ‘bơ̆r ‘bro. Lu sư hơri ưh kơ đei tơlĕch nơ̆r, wă kơ lăng dai khan đei hơri đĕch! Na kô pơma khan kơ ‘bă inh hăm buăl sư thoi âu, lăm năr tơdă phĕt Nôel, lu sư hơri ha ‘bơ̆r đĕch mă ‘nĕ kơ tơlĕch nơ̆r. Noh jơ̆ khŭl “Ưh kơ đei Nôt”.

Sơ’ngon tơpă đơ̆ng noh, ‘bă inh lui ngeh nơ̆r hơri thoi noh ưh kơ ‘lơ̆ng ‘bơ̆t anăp Yang Yêsu Krist, na sư pă pơ̆n hơri dơ̆ng bơih. Na kư̆m rơđah dêh bơih tơpă, Yang Yêsu ưh kơ đei layơ pơm thoi noh! Sư ưh kơ đei layơ pôk tơjur bu “khŭl Ưh kơ đei Nôt”.

Inh hơmĕng kơ buăl hlôh thoi âu “Mă-lei Kră Yang khan kơ Samuel; ‘Nĕ kơ lăng akâu rŏ hơbŏ tih bơngai noh, Inh ưh kơ iŏk sư. Inh ưh kơ lăng kiơ thoi kon bơngai lăng, kon bơngai lăng gah ‘nguaih; mă-lei Kră Yang lăng ‘bôh lăm jơhngơ̆m.” (I Samuel 16:7). Kơplah lu bơ̆n hơri ư ang kơ Kră Yang, Sư ưh kơ dan ăn điêm nơ̆r hơri đơ̆ng lu bơ̆n. Mă Sư mơ̆ng lăm jơhngơ̆m, păng sơng iŏk đơ̆ng lăm jơhngơ̆m lu bơ̆n kơkuh kơ Sư tơpă (Êsai 29:13)

Lei pơm liơ bơngai “Ưh kơ đei Nôt” thoi kơ inh đei hơri nơ̆r Hơriso ‘bơ̆t anăp tơpôl lơ? Thoi yơ inh đei hlôi kơ tơdrong hli tơrơ păng mơlâu? Kư̆m đei che bơle hiĕk kơ inh hơri ưh kơ hiôk, na dang ei inh hiôk sơng iŏk dôm lu tơdrong noh, yua kơ inh băt inh pơm tơdrong mă Kră Yang lăp đon. Tơdrong kiơ pơm kơ inh pơ̆n nuih pơyơ̆r nơ̆r hơri đơ̆ng lăm jơhngơ̆m nơ̆r Hơriso rim năr?

Inh đei gơh pơm tơdrong noh kơplah inh đei ‘bôh dôm kơ lu nơ̆r so ‘nâu. Sơnăm 1728, ‘Bok William Law ‘Bok bơtho đei chih bơtho ‘bôh ăn kơ inh, pơm kơ inh tơplih đĭ đăng tơdrong krao khan đơ̆ng lăm Hơriso:

“Ưh kơ đei kiơ pơm kơ nơ̆r krao khan đơ̆ng buăl ‘lơ̆ng hloh păng tơpă tơpăt hloh kơ hơri ư ang kơ Kră Yang hăm nơ̆r Hơriso. Na tơm đơ̆ng tơdrong noh, pơm kơ jơhngơ̆m đei pơtŏ ming, jơhngơ̆m đei ‘nhao hơmet đơ̆ng mơlâu, na pơih ‘măng ‘mŏk ba buăl jê̆ tơ tơdrong hơdah pơlei ‘lơ̆ng. Kơplah hơri, jơhngơ̆m buăl hiôk chơt lăm Kră Yang, dôm kơ hơpơi ‘lơ̆ng rơgoh đei râu tơiung, buăl hŏk iŏk dôm tơdrong gô mơ̆ng kơ đơ̆ng Kră Yang, na Kră Yang lăp đon gô tuh ăn tơdrong pŭn hiôk ăn kơ buăl. Dôm kơ lu nơ̆r hơri noh soh chhông ŭnh ‘lơ̆ng rơgoh lăm bơhngol, pơm kơ jơhngơ̆m buăl jing anih soi sĭt ‘lơ̆ng rơgoh, pơm kơ nơ̆r krao khan buăl jing ‘bâu phu ‘băt ‘ngam pơyơ̆r kơ Kră Yang.”

Lăm kơplah 3000 sơnăm, bơngai lui kơ Kră Yang đei krao khan păng hơri nơ̆r Hơriso ‘nâu. Lu sư hơri đĭ kơ150 chăl lăm Hơriso juăt kơ ‘bar khei dah hơtŭch ‘biơ̆. Dôm kơ lu tơdrong hơ iă noh na rai đunh rai hiơt lăm chăl hrei âu.

Athei pơlong pơm thoi âu. Athei krao khan hăm nơ̆r Hơriso. Athei pơyơ̆r nơ̆r hơri kơ Kră Yang! Buăl gô mơn ‘bôh tơdrong krao khan buăl rai pran hloh. Buăl gô mơn kơ tơdrong tơ’bưh hăm Yang Yêsu rai jê̆ hloh, yua kơ Sư đei lăm rim kơ chăl lăm nơ̆r Hơriso – đơ̆ng lu ‘bok khan lê̆ hơdrol pơma roi kơ gah Sư, đơ̆ng dôm kơ lu tơdrong Sư đei mơn jing kon bơngai mă Sư đei mơn bơih, păng đơ̆ng tơdrong ‘lơ̆ng tơpăt tôm tơdrong đơ̆ng Sư.

Apĭnh đĭ đăng krao khan hơdai: Kơkuh kơ Kră Yang mă ‘mêm, apinh tơgŭm kon huay kơ pơyơ̆r kơ Ih nơ̆r hơri đơ̆ng nơ̆r ‘bơ̆r đĕch, mă tơpă tơpăt đơ̆ng lăm jơhngơ̆m kon. Mă khan nơ̆r hơri kon ưh kơ trŏ kơ nhip, dah tơtơ̆, apinh Kră Yang oei hiôk sơng iŏk nhen thoi tơmam lơ̆ng Ih lăp đon. Apinh bơtho kon băt gơh hơri ư ang kơ Ih rim tơ anih, păng băt kơ Ih oei hơdai đơ̆ng rim kơ tơdrong kon pơm ‘lơ̆ng tơ kơpal teh âu. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, ‘nĕ ăn jơhngơ̆m hli tơrơ dah mơn kơ mơlâu pơm kơ buăl thĕng hreh, ưh kơ pơ̆n pơyơ̆r kơ Kră Yang nơ̆r hơri. Kră Yang ưh kơ lăng lu nơ̆r hơri hăm hơri djăl dah la bua hiôk, mă sư lăng nơ̆r hơri đơ̆ng lăm jơhngơ̆m. Athei pơlong hơri nơ̆r Hơriso, hơri tơpă đơ̆ng lăm jơhngơ̆m pơyơ̆r bơnê kơ Kră Yang. Dôm kơ lu bua noh gô jing tơmam gĭt đei ‘bâu phu pơyơ̆r kơ ‘Bă ‘Bok Kei-Dei, Sư lăp đon dêh.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.