Lăm dôm năr wă đĭ sơnăm, đei bơngai mơn ‘bôh lăp đon yua kơ dôm tơdrong kĕ jei gơh đei, mă lei kŭm đei bơngai hmach kơplah ‘bôh kơdih ưh tim mă yua trŏ khei năr păng jơnăr lăm sơnăm hlôi. Mă lu bơ̆n jơ̆ bu, oei tơ yơ, dah dơ̆ng ‘bơ̆t anăp kơnao sơnăm ‘nao, athei tơchĕng gah dôm tơdrong kơnhăm kăl kơ dan hơmet wă kơ đei mĭnh sơnăm ‘nao ‘lơ̆ng hloh, păng ăn tơpă tơdrong hlôi mơn đei tơdrong chông anhăk đơ̆ng Kră Yang lăm dôm tơdrong lăm chăl arih.

Năr ‘nâu, ‘năr 30/12/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Candy Arrington kơ̆l ‘bai ĐƠ̆NG BLŬNG A HĂM KRĂ YANG.

“Na inh tơl iĕm thoi âu: Mă tôm tơdrong bơ̆n sŏng sa nhă đak, mă tôm tơdrong bơ̆n jang pơm tơdrong kiơ, bơ̆n athei băt pơư pơang anăn ‘Bok Kei-Dei lăm tôm tơdrong ‘noh.” (I Kôrintô 10:31)

Đĭ đăng lu bơ̆n đei chang gô Nôel hăm tơdrong hiôk chơt păng ‘nă hal. Mă lei lăp mĭnh giĕng đơ̆ng rŏng, sơnăm ‘nao đei truh hrĕnh tĕnh. Thoi noh buăl gô mơ̆t lăm sơnăm ‘nao thoi yơ? Buăl hăm chang gô dôm kơ jơ năr păng đơ̆ng blŭng a, dah oei ‘maih wă oei dơ̆ng lăm tơdrong juăt đơ̆ng sơnăm so?

Mă ‘maih wă dah ưh, jơ năr oei ba lu bơ̆n yak năm tơ anăp. Sơnăm ‘nao pơih thoi minh blŭng a. Thoi noh yua kơ kiơ lu bơ̆n ưh kơ yua iŏk tơdrong ‘noh wă dan ăn dôm tơdrong kơnhăm kơ kơdih kâu? Dah proh hơmet tơdrong jang, athei yak hlôi đơ̆ng anih hiôk ‘lơ̆ng đơ̆ng kơdih hloi. Mă lei, kŭm ‘nĕ kơ hiơt khan dôm tơdrong kơnhăm lu bơ̆n wă lăng jơ̆ wă pôk pơ-ư Kră Yang.

Tơdrong kơnhăm blŭng a lu bơ̆n kăl kơ dan hơmet trŏ jơ̆ tơdrong kơnhăm bơhngol. Tơdrong wơ̆ pran bơhngol ưh đei truh hmă đĕch; buăl athei ‘măn jơ năr păng adrin wă “pơih dơ̆ng” chăl arih bơhngol bơ̆n. Athei pơtơm blŭng a hăm tơdrong đŏk đĭ Sơ̆p Hla Bơar ‘Bok Kei-Dei.

Hơbŏ lăng buăl đơ̆ng đei pơm tơdrong ‘nâu adrol ki, mă lei athei pơlong mĭnh wơ̆t dơ̆ng, yua kơ Nơ̆r đơ̆ng ‘Bok Kei-Dei ling lang ‘nao plơ̆ng. Sư gô tơ’bôh kơ buăl dôm kơ tơdrong tơpă mă rŏ lăng adrol ki buăl ưh tim mă băt kơnăl. Buăl kŭm gơh rơih iŏk mĭnh tơdrong proh hơmet đŏk Nơ̆r ‘Bok Kei-Dei lăm mĭnh sơnăm wă bơwei tơdrong juăt ‘nâu. Đơ̆ng noh, athei hơdai mĭnh lăm hŏk pơhrăm Nơ̆r ‘Bok Kei-Dei đei hơmet tơ Hnam Akŭm dah lăm khŭl Bơngai Lui jum dăr buăl. Păng tuch luch, wă kơ wơ̆ pran gah bơhngol, athei ‘măn jơnăr wă tơnăp ră roi gah Kră Yang Yêsu hăm tơdrong pran kơtang păng ưh kơ hli tơrơ.

Hơdai hăm tơdrong kơnhăm wơ̆ pran bơhngol, lu bơ̆n kŭm kăl kơ dan tơdrong kơnhăm kơ tơdrong wơ̆ pran gah đon hơgei. Tơdrong Pơđơ̆k 1:5 chih: “Bơngai gơh hơgei gô mơ̆ng păng rai hŏk pơhrăm, Bơngai hlôh wao gô đei iŏk tơdrong bơtho tơ’bôh.” Yua kơ thoi noh, ‘lơ̆ng dêh tơpă dah lu bơ̆n pơlong lăng kơdih kâu hŏk pơhrăm dah pơm tơdrong kiơ noh ‘nao plơ̆ng. Pơtih gia, buăl gơh rơih mĭnh kơ̆l ‘bai wă lăng hơlen păng chih hơmet dôm tơdrong kiơ kơdih đei hŏk iŏk. Buăl kŭm gơh chih tơmơ̆t măt lăm tơdrong pơhrăm dah hŏk thim mĭnh nơ̆r pơma mă kơdih hơiă.

‘Ngoaih kơ noh, tơdrong kơnhăm gah mơn đei lăm jơhngơ̆m păng dôm tơdrong pơgơ̆p kŭm gĭt kăl dêh. Lơ wơ̆t lu bơ̆n weh wer dôm tơdrong mơn lăm jơhngơ̆m ưh kơ ‘lơ̆ng dah ưh kơ ‘maih tơ’blŏk truh dôm tơdrong pơgơ̆p hơdai pơchah, mă lei Nơ̆r Kră Yang bơtho khan: “Lu bơ̆n âu boih ‘Bok Kei-Dei ‘mêm mơnat, na rơih iŏk bơ̆n, wă kơ bơ̆n jing kon Sư; na bơ̆n athei băt ‘mêm mơnat kơ đe lei-lăi, pơm ‘lơ̆ng kơ đe thoi lu bơngai gơh găt. Mă tơduă buăl bơ̆n bơngai lui pơm ưh kơ lăp hăm bơ̆n, bơ̆n hơhrĕng đĕch ‘nĕ kơ jô̆ yo. Kră Yang Yêsu ưh pă jô̆ yo kơ bơ̆n boih, na bơ̆n kư̆m lei-lăi ‘nĕ kơ jô̆ yo kơ buăl bơ̆n.” (Kôlôsê 3:12-13). Jơ̆ bơngai đei Kră Yang mơnat ăn, lu bơ̆n kŭm kăl kơ tơ’bôh tơdrong juăt arih ‘mêm mơnat păng huay kơ jô̆ yo băl. Sơnăm ‘nao ‘nâu, athei pơdrơ̆ng huay kơ jô̆ yo kơ dôm bơngai bu đei pơm kơ buăl ơh sơ’ngon. Dah pơm thoi noh, buăl gô đei klaih hlôi đơ̆ng tơdrong blĕk klai păng ưh pă arih lăm tơdrong sơ’ngon blĕk bơih. Na kŭm, athei pơhrăm pơjuăt tơdrong kĕ chơ̆n, hloh ‘noh jơ̆ lăm dôm tơdrong ‘bônh pơm kơ buăl hiong tơdrong kĕ ĕnh. Đĭ đăng lu bơ̆n athei hơpơi wă kơdih jơ̆ dôm bơngai “hrŭk iŏk jơhngơ̆m ‘mêm mơnat” păng pơm tơ’bôh dih băl hăm tơdrong mơnat.
Păng tuch luch, lu bơ̆n kăl kơ dan tơdrong kơnhăm gah akâu jăn. Lu bơ̆n athei pơyom păng bơwei akâu jăn kơdih, yua kơ ‘noh jơ̆ hnam kơ Kră Yang. Nơ̆r ‘Bok Kei-Dei chih: “Akâu bơ̆n jing hnam Yang Bơhngol ‘Lơ̆ng đơ̆ng ‘Bok Kei-Dei ăn Sư oei lăm akâu bơ̆n. Na akâu bơ̆n ưh pă jing thoi lĕ tơmam bơ̆n ôh, dang jing tơmam ‘Bok Kei-Dei boih, yua kơ ‘Bok Kei-Dei huai iŏk bơ̆n păng tơmam gĭt Sư tơpă. Thoi noh na bơ̆n dah pơyơ̆r bĕ akâu bơ̆n kơ Sư wă pơư pơang anăn Sư.” (I Kôrintô 6:19-20). Lu bơ̆n gơh bơwei akâu jăn hăm tơdrong pơjuăt akâu jăn hăm trong kiơ̆ tơdrong juăt, sơngah dôm tơmam sa lăng nhen ‘ngam mă lei ưh kơ ‘lơ̆ng kơ akâu jăn. Athei lăng tơmam sa jơ̆ tơdrong ba ăn wă wei rong akâu jăn, ưh kơ sĭ lăp ăn kơ ‘maih sa wă. Buăl kŭm gơh hơmet tơdrong proh hơmet pơhrăm pơjuăt kơ lăm hnam dơnŏ, păng bơwei jơhngơ̆m pran păng hơdai dih băl.

Dôm tơdrong kơ nhăm tơ kơpal lăp jơ̆ dôm tơdrong tơ’bôh kơ lu bơ̆n gơh tơ’blŏk kơ kơdih kâu lăm sơnăm ‘nao. Tơm kơ tơdrong dan tơdrong kơnhăm ưh kơ trŏ jơ̆ wă đei bơngai nai pơ ư, mơdrŏng dah kĕ jei, mă jơ̆ wă ư ang kơ ‘Bok Kei-Dei. Yua kơ thoi noh, Kră Yang trŏ jơ̆ tơm lăm dôm tơdrong proh hơmet păng kơnhăm. Tơdrong Pơđơ̆k 16:3 chih: “ Jao bĕ dôm tơdrong jang ih kơ Kră Yang; Na đĭ tơdrong ih wă chă gô đei.” Mă lu bơ̆n đei dan hơmet lơ tơdrong kơnhăm, mă lei athei lăng hơlen dơ̆ng dôm tơdrong kơnhăm ‘noh hăm tơpă tơgŭm lu bơ̆n wơ̆ pran gah bơhngol ưh? Đei tơgŭm lu bơ̆n arih ‘lơ̆ng rơgoh hloh ưh? Hăm đei tơgŭm lu bơ̆n wơ̆ pran lăm tơdrong bơwih bơwăn ưh? Hăm đei tơgŭm lu bơ̆n yua trŏ jơnăr, tơdrong gơh hơgei, mŭk tơmam Kră Yang ăn ưh? Athei mơ̆ng kơtơ̆ng nơ̆r tơ’blŏk đơ̆ng ‘bok Pôl: “Na inh tơl iĕm thoi âu: Mă tôm tơdrong bơ̆n sŏng sa nhă đak, mă tôm tơdrong bơ̆n jang pơm tơdrong kiơ, bơ̆n athei băt pơư pơang anăn ‘Bok Kei-Dei lăm tôm tơdrong ‘noh.” (I Kôrintô 10:31)

Apĭnh đĭ đăng krao khan hơdai: Kơkuh kơ Kră Yang, bơnê kơ Ih yua kơ đei bơwei kon lăm đĭ mĭnh sơnăm hlôi. Dang ei, dah dơ̆ng ‘bơ̆t anăp kơnao sơnăm ‘nao, kon drơ̆ng đei dôm tơdrong rơdu tơrăn, ưh kơ tôm mah păng pơhiơ̆ đơ̆ng kơdih. Kon băt kơdih kăl kơ tơdrong bơtho tơ’bôh đơ̆ng Ih lăm rim tơdrong kơnhăm păng pơdrơ̆ng đơ̆ng kon. Apĭnh tơgŭm kon băt pơjao dôm tơdrong jang lăm tơpang ti Ih, wă kơ rim tơdrong tơchĕng, tơdrong jang kon đei pôk pơ ư Ih. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, athei pơtơm dan proh hơmet kơ kơdih kâu lăm sơnăm ‘nao wă truh. Đei tơdrong ayơ buăl hơpơi Kră Yang tơplih kơdih? Dôm tơdrong jang ayơ buăl oei pơ hiơ̆, ưh tim mă yua iŏk jơ năr păng tơdrong gơh hơgei Kră Yang ‘măn ăn? Athei chih hơmet hơđăl dôm tơdrong ‘noh păng pơtơm blŭng a hăm Kră Yang. Kơdih Sư gô jơ̆ Tơ’ngla bơtho tơ’bôh kơ buăl dah buăl băt gơnang păng pơjao đĭ chăl arih bơ̆n lăm tơpang ti Sư.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.