Năr ‘nâu jơ̆ năr tuch luch kơ sơnăm 2025, păng pă đunh bơih, lăm teh đak gô hơdai jô̆ đơ̆ng kơ rim jơ wă yak năm tơ sơnăm ‘nao sơnăm 2026. Sơnăm so wă hlôi bơih, lăm jơhngơ̆m lu bơ̆n đei ‘blŏk rơ nguơ̆. Lăm sơnăm đei hlôi bơih, rŏ lăng lu bơ̆n đei lơ tơdrong pơlong lăng, anat anot, jơ̆ng lu bơ̆n kư̆m đei tơsĕr pơ̆k kơ lăm trong yak năm lăm chăl arih ‘nâu. Lei kơplah wă yak năm lăm sơnăm ‘nao? Anat anot păng tơdrong pơlong oei đei tơ noh, lu bơ̆n kăl kơ mơn băt tơdrong kiơ wă yak năm kơjăp lăm dôm kơ năr tơ anăp?

Năr ‘nâu, ‘năr 31/12/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Anne Ferrell Tata kơ̆l ‘bai YAK KƠJĂP LĂM SƠNĂM ‘NAO.

“Thoi noh na iĕm athei ăn kơ Sư pơgơ̆r iĕm, hăm adrin pơm ‘lơ̆ng thoi Sư wă, noh kăl hloh kơ dôm tơdrong nai; pơm thoi noh na Sư gô ăn kơ iĕm tôm tơmam iĕm kăl yua.” (Mathiơ 6:33)

Đei lăm bơyan Nôel ‘nâu, rŏ lăng lu bơ̆n đei tơ’blŏk gah nơ̆r ‘Bok Kei-Dei lăm Mathiơ 1:23: “Đei minh ‘nu adruh gô anăp wă tơpŭ kon drŏ-nglo, Đe anăn kon Sư noh Êmanuel,” Êmanuel wă khan: ‘Bok Kei-Dei oei hơdai hăm bơ̆n.” Mathiơ đei chih iŏk đơ̆ng nơ̆r ‘bok khan lê̆ adrol Êsai đơ̆ng dôm hrĕng sơnăm hơdrol gah tơdrong wă tơpŭ kơ Yang Yêsu, kư̆m tơm kơ anăn Sư noh jơ̆ Êmanuel, wă khan “’Bok Kei-Dei oei hơdai hăm bơ̆n”. Nơ̆r ‘Bok Kei-Dei ưh kơ sĭ đŏk kơplah bơyan Nôel đĕch, mă dôm kơ lu bơ̆n đei yak năm lăm sơnăm ‘nao, jơhngơ̆m lu bơ̆n đei chơt hiôk păng chang hơmĕng, yua kơ lu bơ̆n băt tơpă minh tơdrong ưh kơ đei layơ tơplih, noh jơ̆ “’Bok Kei-Dei oei hơdai hăm bơ̆n”. Sĭt tơpă, Kră Yang oei hơdai lu bơ̆n lăm minh sơnăm hlôi bơih, lu bơ̆n lui ngeh Sư gô oei hơdai lu bơ̆n lăm sơnăm ‘nao ‘nâu.

Brei mơsơ̆ ‘nâu, đei tơ’blŏk kơ inh gah tơdrong tơpă tơpăt ‘nâu, tơdrong jang inh gô đei tơplih lăm sơnăm ‘nao ‘nâu. rŏ lăng inh gô đei bơngai bơwei tơdrong jang plơ̆ng hăm dôm lu tơdrong pơlong lăng păng tơdrong bơ̆jang ‘nao. Na blŭng a inh đei hiơ̆k bơngơ̆t păng kư̆m đei tŏ sĕt bơ̆l hăl, yua kơ đei dôm lu tơdrong jang plơ̆ng ‘nao păng hlĭch hlăch. Dôm kơ lu nơ̆r jet “ tơdah” đei lăm đon tơchĕng inh: “Tơdah inh bơ̆jang ưh kơ lơ̆ng na gô thoi yơ? Tơdah inh bơ̆jang ưh kơ thoi kơ đe wă na gô lơ liơ?” Inh băt kơ tơ chĕng thoi noh ưh kơ đei yua kiơ, pơm kơ inh rai ưh kơ ngeh kơ kơdih đĕch.

Bu bu lăm lu bơ̆n kư̆m đêl đei tơ’bơ̆p tơdrong hiơ̆k bơngơ̆t. Kră Yang băt kơ lu bơ̆n ưh kơ gơh yak năm kơdih, Sư wă kơ lu bơ̆n yak hơdai hăm Sư rim năr. Yua kơ thoi noh, Kră Yang Yêsu tơ’blŏk kơ lu bơ̆n lăm Mathiơ 6;34 thoi âu “…iĕm ‘nĕ pă tơchĕng minh tơdrong kiơ kiơ. Năr dơning măk ai kơ năr dơning…” Adrol kơ pơma nơ̆r ‘nâu, Sư tơbăt ăn kơ lu bơ̆n ‘Bă tơ kơpal plĕnh ti băt kơ dôm lu tơdrong bơ̆n kăl. Sư pơma khan: ‘Bă bơ̆n tơ plĕnh ti kư̆m băt boih dôm tơdrong lu iĕm kăl yua, Sư gô tơgŭm iĕm tơpă. (trong 32). Tơplih kơ hiơ̆k bơngơ̆t kơ năr dơning, Yang Yêsu athei lu bơ̆n chă dêh char ‘Bok Kei-Dei hơdrol hloh: “Thoi noh na iĕm athei ăn kơ Sư pơgơ̆r iĕm, hăm adrin pơm ‘lơ̆ng thoi Sư wă, noh kăl hloh kơ dôm tơdrong nai; pơm thoi noh na Sư gô ăn kơ iĕm tôm tơmam iĕm kăl yua.” ( trong 33)

Sĭt tơpă, chă dêh char ‘Bok Kei-Dei noh jơ̆ tơm blŭng a lăm chăl arih lu bơ̆n. Lu bơ̆n huay kơ drin hiơ̆k dêh kơ tôm tơmam đơ̆ng kơdih, yua kơ ‘Bă lu bơ̆n tơ kơpal plĕnh ti băt tôm tơdrong lu bơ̆n kăl wă.

Kơplah lăng hlôi đêl trong yak năm, Kră Yang tơ ‘blok kơ inh thoi âu, hăm đei layơ Kră Yang pơm kơ inh sơ’ngon ưh? Hăm đei layơ Sư achăng lê̆ inh lăm tơdrong jang ưh? Tơdah dôm lu tơdrong tơplih, lei Sư hăm oei hơdai inh ưh? Mă lăm tơdrong hiôk ‘lơ̆ng, dah đei tơdrong pơlong lăng, dah đak dơsĭ hơđơ̆ng dah đei kial hơbŭt, na Kră Yang oei tơnoh hơdai hăm inh lăm rim trong yak năm.

Jơ ‘nâu, kơplah dơ̆ng ‘bơ̆t trong sơlah ‘nao păng lăng hlôi đêl trong yak năm, đei pơlung jơhngơ̆m inh hiôk dêh tơpă. Inh gô tơ’bơ̆p sơnăm ‘nao hăm tơdrong ‘nă hal păng chơt hiôk, yua kơ băt Kră Yang oei hơdai inh, rim năr chông anhăk păng bơtho tơ’bôh kơ inh. Nơ̆r Kră Yang pơma khan:“Dơ̆ng bĕ tơ rok trong na răp lăng; Chă jet trong so, trong ayơ ‘lơ̆ng yak kiơ̆ bĕ trong noh, Na chă ăn kơ bơhngol lu iĕm pơdơh hiôk.” Mă-lei lu sư khan: “Lu nhôn ưh kơ yak kiơ̆ ôh trong noh.” (Jêrêmi 6:16)

Kơplah pơtơm yak năm lăm sơnăm ‘nao, lu bơ̆n ‘nĕ kơ hiơt “Chă jet trong so, trong ayơ ‘lơ̆ng yak kiơ̆ bĕ trong noh” păng hơdai yak năm lăm trong pŭn hiôk noh. Nĕ kơ hiơ̆k bơngơ̆t kơ năr dơning, adrol hloh athei chă dêh char ‘Bok Kei-Dei. Athei chơt hiôk, yua kơ “ ‘Bok Kei-Dei oei hơdai lu bơ̆n!”

Apĭnh đĭ đăng krao khan hơdai: Kơkuh kơ Kră Yang ‘mă ‘mêm, jơ̆ Tơ’ngla ‘mêm mơnat păng oei hơdai kon lăm minh sơnăm ‘nâu. Wă yak năm lăm sơnăm ‘nao, kon lui ngeh Ih oei wei lăng păng tuh ăn tơdrong pŭn hiôk ăn kơ kon. Apinh bơtho kon băt kơ iŏk jơhngơ̆m đon ala dan tơdrong arih kon ăn kơ Ih chông anhăk păng pơgơ̆r, mă khan lăm năr chơt hiôk dah anat anot, kon oei lui gơnang păng pơjao tôm tơdrong ăn kơ Ih pơgơ̆r. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, lăm năr tuch luch sơnăm 2025 ‘nâu, lu bơ̆n athei ‘măn jơ tơchĕng pơwao păng bơnê kơ dôm tơdrong ‘Bok Kei-Dei đei pơm ăn kơ lu bơ̆n lăm sơnăm ‘nâu; na kư̆m, hơđơ̆ng yak năm yua kơ buăl đei nơ̆r tơtă yak năm hơdai păng Sư. Mă khan sơnăm 2025 đei tơdrong chơt hiôk dah sơ’ngon, kĕ jei dah hiong răm, ‘nĕ hiơt kơ Kră Yang oei ‘mêm mơnat păng oei hnhoi wei lăng lu bơ̆n. Lăm tơdrong arih phara ‘nâu, apinh bơngai mơ̆ng hơdai Tơdrong tơdă Krao khan Rim năr pơyơ̆r kơ Kră Yang nơ̆r bơnê păng ư ang kơ Sư yua kơ tơdrong ‘mêm Sư đei ling lang lăm chăl arih lu bơ̆n.
Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih:

[email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.