Dôm kơ jơ phŭt sơnăm so hlôi bơih, păng ‘bơ̆t anăp lu bơ̆n jơ̆ năr blŭng a sơnăm ‘nao. Sơnăm ‘nao ling lang đei pơtơm ‘blŭng a lăm tơdrong ‘nao, gô đei tơdrong pơjing plơ̆ng, mă kư̆m đei tơdrong anat anot păng pơlong lăng. Mă lei, jơ̆ bơngai lui kơ Kră Yang, lu bơ̆n ưh kơ kăl kơ yak năm lăm sơnăm ‘nao hăm tơdrong hiơ̆k bơngơ̆t dah ưh kơ hơđơ̆ng, yua kơ lu bơ̆n băt Tơ’ngla lu bơ̆n oei kơkuh noh jơ̆ oei pơgơ̆r tôm tơdrong.

Năr ‘nâu, ‘năr 01/01/2026, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Leah Adam kơ̆l ‘bai SƠNĂM ‘NAO LĂM TƠPANG TI ‘BOK KEI-DEI.

“Inh gô pơư pơang anăn Kră Yang ‘Bok Kei-Dei mă arih ling-lang, dêh char Sư oei đei đơ̆ng chăl âu truh tơ chăl nai.” (Đaniel 4:34b)

Tơdah buăl jơ̆ bơngai chơchă tơdrong đei roi tơbăt, rŏ lăng buăl ‘bôh lăm teh đak lu bơ̆n oei arih đei tơdrong truh tơsŭl tơwŏk: kiak hơbŭt, đak lơ̆p, tơblah wang, hnam dơ nŏ ưh kơ rơnŭk, mŭk tơmam hiong răm, … hăm đei lơ tơdrong truh nai. Dôm kơ tơdrong kơnê̆ truh ling lang, truh tơ lu bơ̆n jet kơdih hăm đei bơngai bu wei lăng teh đak ‘nâu ưh.

Jơ̆ bơngai lui kơ Kră Yang, lu bơ̆n lui ngeh oei đei minh ‘nu Tơngla pơgơ̆r tôm tơdrong- Sư jơ̆ El Elyon, ‘Bok Kei-Dei Tih hloh kơ đĭ đăng. “El Elyon jơ̆ kư̆m anăn ‘Bok Kei-Dei đei chih lăm sơ̆p hla bơar ‘Bok Kei-Dei Tih hloh kơ đĭ đăng. Ưh kơ đei yang ayơ, dah tơmam kiơ đei pran kơtang wă pơting hăm Sư. Sơ̆p hla bơar ‘Bok Kei-Dei đei pơma ‘bơm anăn tih tin ‘nâu lơ wơ̆t:

‘Bơ̆t mă blŭng a, krao anăn El Elyon đei ‘bôh lăm sơ̆p hla bơar ‘Bok Kei-Dei ‘Blŭng a 14, đei roi hơ’mon gah Lot, mon ‘bok Abram, đe rôp kơplah tơblah hăm pơtao dêh Canaan. Abram drơ̆ng năm dŏng iŏk Lot păng kĕ jei Sư. Kơplah noh, Mêlkisêdek jơ̆ pơtao Salem, kư̆m jơ̆ ‘bok soi kơ ‘Bok Kei-Dei, sơng iŏk Abram păng ‘bĕng hăm tơdrô. Phara kơ pơtao kơkuh kơ rup yang dêh Canaan, na pơtao Mêlkisêdek yua anăn ‘Bok Kei-Dei Tih hloh akat pŭn hiôk ăn kơ Abram thoi âu: “Apinh Kră Yang ‘Bok Kei-Dei mă tih hloh, Kră Yang Tơ’ngla pơjing plĕnh teh, ăn tơdrong pŭn hiôk kơ Abram! Trŏ kơ bơnê kơkuh tơpă kơ Kră Yang ‘Bok Kei-Dei tih hloh đei jao boih lu ayăt tơ lăm ti ih. Đơ̆ng noh Abram iŏk minh lăm mơjĭt đơ̆ng dôm tơmam mă sư iŏk đơ̆ng lu ayăt na pơyơ̆r ăn kơ pơtao noh.” ( trong19-20). Đơ̆ng nơ̆r akat pŭn hiôk ‘nâu, Mêlkisêdek đei pơma pơsĭt khan Abram kĕ jei noh ưh kơ đơ̆ng jơhngơ̆m pran kon bơngai, mă đơ̆ng tơdrong mơsêh mơ yang đơ̆ng El Elyon – ‘Bok Kei-Dei Tih hloh.

Pơtrơp dơ̆ng, lăm sơ̆p hla bơar bơ ar Đaniel, lu bơ̆n ‘bôh pơtao Nebukatnessar đei tơ’bơ̆p hăm ‘Bok Kei-Dei Tih hloh. Nebukatnessar jơ̆ minh ‘nu pơtao pơ ang, hiôk kơ sư đei gơh pơgơ̆r păng đei gơh pơm lơ tơdrong. Yua kơ thoi noh, ‘Bok Kei-Dei đei bơtho hơmet sư wă kơ sư mơn ‘bôh Tơ’ngla Tih hloh kơ sư. lăm tơpơh sơnăm, pơtao Nebukatnessar đei puh tơweh đơ̆ng kon bơngai, arih nhen thoi sem brem tơbri, sa ‘nhĕt nhen thoi rơmo, akâu hơ iuh ‘bĕnh kơ tŭk gom, sŏk kơjung nhen thoi sem grơ̆, tơngiơh jơ̆ng hăm ti kơjung nhen thoi tơngiơh sem bri. ‘Nâu jơ̆ khei năr wă kơ pơtao Nebukatnessar mơn băt kơ iŏk jơhngơ̆m đon ala, brĕng mơn hlôh kơ sư jơ̆ tơmam ‘bơ̆t anăp Tơ’ngla Tih hloh. Kơplah khei năr noh tôch bơih, pơtao pơma thoi âu: “Dĭng truh tôch kơ năr đêl pơkă, inh âu, Nebukatnessar inh ngoi muh măt tơ plĕnh, tơdrong hơgei đei dơ̆ng tơ inh păng inh pơư pơang anăn Kră Yang ‘Bok Kei-Dei Tih hloh. Inh gô pơư pơang anăn Kră Yang ‘Bok Kei-Dei mă arih ling-lang, dêh char Sư oei đei đơ̆ng chăl âu truh tơ chăl nai.” (Đaniel 4:34)
Bơngai chih Kay Arthur đei chih gah anăn ‘lơ̆ng rŏ ‘nâu đơ̆ng ‘Bok Kei-Dei thoi âu: “… Tơdah ‘Bok Kei-Dei ưh kơ đei pơgơ̆r, tơdah tôm tơdrong ưh kơ đei pơgơ̆r đơ̆ng Sư, na Sư jơ̆ ưh kơ Tơ’ngla Tih hloh. Păng kơplah noh, buăl hăm inh jơ̆ băt kơ pơjao tơdrong arih ăn kơ tơdrong ưh kơ đei yua kiơ, dah gô mơ̆ng kơ kon bơngai đĕch mă kư̆m truh tơ gô mơ̆ng kơ yang kơnê̆.”

Na thoi noh, yak năm lăm sơnăm ‘nao, lu bơ̆n hăm oei đei arih lăm tơdrong mơn băt kơ ‘Bok Kei-Dei Tih hloh ưh? Mă khan teh đak đei lơ tơdrong tơsŭl tơwŏk păng ưh pă hơđơ̆ng, mă lei Sư oei pơgơ̆r, tôm tơdrong đei noh đơ̆ng Sư ngăl. Kơplah mơn băt tơdrong ‘nâu, lu bơ̆n hŏk pơhrăm gah arih chu iŏk đon ala, pơyơ̆r dôm lu tơdrong proh hơmet, dan hơmet tơdrong hơpơi wă, kư̆m hăm dôm tơdrong hiơ̆k bơngơ̆t lăm tơpang ti Kră Yang. Lu bơ̆n hlôh tôm lu tơdrong bơ̆n đei noh đơ̆ng tơpang ti Kră Yang Tih hloh, mă ưh kơ đơ̆ng jơhngơ̆m pran lu bơ̆n. Pơtao Nebukatnessar noh sơ̆ ưh kơ mơn băt tơdrong ‘nâu. Đei hlôi mơn tơdrong bơtho pơjĭ đơ̆ng Kră Yang đĕch, na sư drơ̆ng iŏk dôm lu tơdrong sư đei: đơ̆ng dêh char, hnam, anih pơtao truh tơ tơblah kĕ jei,… tôm tơmam jơ̆ “ưh kơ đei yua kiơ” tơ dah ưh kơ đei đơ̆ng Kră Yang Tih hloh ăn. Kư̆m thoi noh, tơdrong hli yom kơ ‘Bok Kei-Dei đei đơ̆ng băt kơ bơ̆n noh bu, păng tơdrong tih tin Sư noh thoi yơ. Lu bơ̆n hơdai hăm bơngai chih Hơriso 47:1-2 na ư ang kơ Kră Yang: “Ơ kon pơlei pơla, tap ti bĕ, iŏk nơ̆r jei tih na jreo chhôk kơ Kră Yang ‘Bok Kei-Dei. Yua kơ Kră Yang Tih Hloh, trŏ kơ hli yom. Sư jơ̆ pơtao Tih Hloh kơpal teh đak âu.”

Apĭnh đĭ đăng krao khan hơdai: Kơkuh kơ ‘Bok Kei-Dei Tih hloh! Lăm năr ‘blŭng a sơnăm ‘nao 2026 ‘nâu, jơhngơ̆m kon pơyơ̆r kơ Ih nơ̆r bơnê yua băt kơ Ih oei pơgơ̆r tôm tơdrong. Hơpơi kơ jơhngơ̆m kon huay kơ tơtơ̆ păng hli tơrơ kơ dôm lu tơdrong arih tơ anăp, mă kư̆ kơ đei đon lui kơjăp kơ tơdrong pơgơ̆r pran kơtang khŏm khŏm đơ̆ng Ih. Apinh Ih bơtho ăn kơ kon pơhrăm đei tơdrong arih iŏk jơhngơ̆m đon ala păng hli yom kơ Ih lăm khĕi năr kơđeh kơpal teh đak ‘nâu, păng arih ‘lơ̆ng trŏ kơ kon Kră Yang Tih hloh. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, lu bơ̆n ưh kơ băt tơdrong kiơ gô truh tơ lu bơ̆n sơnăm ‘nâu, mă lei lu bơ̆n đei jơhngơ̆m hiôk hơđơ̆ng kơplah bơ̆n băt Tơ’ngla Tih hloh oei hnhoi lăng păng wei rong bơ̆n. Lăm jơ phŭt blŭng a sơnăm ‘nao, athei pơyơ̆r kơ Kră Yang dôm lu nơ̆r krao khan apinh Sư pơgơ̆r păng yak năm hơdai hăm buăl tơ anăp, păng apinh Sư tuh ăn tơdrong pŭn hiôk kơ teh đak, ăn kơ dêh char Viêt Nam, Hnam Akŭm, păng hnam dơnŏ buăl. ‘Nâu jơ̆ jơ trŏ kơ buăl lăng ming tơdrong arih kơdih. Athei chih dôm kơ lu tơdrong kiơ buăl kăl kơ tơplih dah tŭk lê̆ wă kơ arih trŏ kơ bơngai kon Kră Yang Tih hloh.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.