Kon bơngai lu bơ̆n ngăl tơchĕng tơ tơdrong juăt kơ đei: ‘maih wă bơwei tôm tơdrong jum dăr kơ bơ̆n. Lu bơ̆n ‘maih wă bơwei tơdrong arih hrĕp hreh, kơjăp, ưh kơ đei kiơ hloh kơ hơpơi wă. Lu bơ̆n adrin chĕp kơ jăp đơ̆ng dôm lu tơdrong, lui ngeh tơdah bơ̆n bơwei ‘lơ̆ng, tôm tơdrong gô jing ‘lơ̆ng. Na dôm tơdrong noh truh ưh kơ thoi bơ̆n wă, hli tơrơ. Lu bơ̆n mơn ‘bôh ưh kơ gơh pơm tơm kơ tôm tơdrong. Lei pơm liơ wă kơ chă ‘bôh rơnŭk rơnua? Kơplah lu bơ̆n ‘blŏk kơ Kră Yang gô wơh linh jang ‘lơ̆ng Sư gô bơwei lu bơ̆n kư̆m hăm lu bơngai mă lu bơ̆n ‘mêm.

Năr ‘nâu, ‘năr 31/01/2026, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih kơ̆l ‘bai LINH JANG ‘LƠ̆NG WĂR TĂP DĂR

“Linh jang Kră Yang war tăp dăr kơ lu đe bu mă hli yom kơ Sư. Păng dŏng pơklaih lu sư.” (Hơriso 34:7)

Noh jơ̆ tơdrong roi hơ’mon kơ minh ‘nu bơngai mĕ layơ ‘mêm bơwei kon, ưh kơ đei layơ achăng lê̆. Na đei minh năr noh, ‘bar ‘nu măr sư pơma pơjah tơhil băl. Dôm tơdrong pơm kơ mĕ sư ưh kơ đei chơ̆n jơhngơ̆m hơch iŏk chơkhŏ teh kon sư ‘bơ̆t jơ̆ng.

Kơplah jơhngơ̆m blĕk, bơngai hơ’lơ̆p 13 sơnăm rơih iŏk weh lĕch đơ̆ng hnam sư. Sư kơ trơ̆m jơ̆ng, na ôr pơma dôm kơ lu nơ̆r kơnê̆, dôm lu nơ̆r pơm kơ mĕ sư chhŭr nuih. Mĕ sư răp gô kon brŏk, mă lei kon sư kư̆ kơ năm tơ anăp tơ gah hnam ‘bă sư – yua kơ mĕ ‘bă sư ưh pă arih hơdai bơih.

Kơplah kon drŏnglo sư pă đei ‘bôh brŏk, hiơ̆k bơngơ̆t rai dêh lăm jơhngơ̆m mĕ sư. Sư hăt hot krao buăl kon drŏnglo sư, na krao lu bơngai buăl juăt nai athei krao khan tơgŭm. Kơplah noh sư ưh pă băt ‘Bok Kei-Dei oei tơgŭm kiơ̆ kơ thoi Sư mă duch âu ưh kơ băt.

Tơ trong yak năm tơ gre buit, minh ‘nu bơngai drŏnglo hlĭch năm jê̆ kon drŏnglo sư, chro ti ăn kơ sư hla bơar iĕ. Kon sư chĕp pơyom đĕch na tah tơ lăm kơdŭng, ưh kơ wă lăng noh kiơ.

Truh tơ anih, sư apinh jên ‘bar ‘nu bơngai hlĭch. Minh ‘nu đei jơhngơ̆m blĕk păng pơma kư̆ kă, na bơngai mă ‘bar đei jơhngơ̆m hiôk păng ăn kơ sư minh ‘bar hlak jên. Đơ̆ng noh sư tŏk tơ gre buit păng năm tơpăt tơ hnam ‘bă sư. Adrol kơ noh bơngai hơ’lơ̆p ‘nâu tam mă đei layơ tŏk tơ gre minh adrô̆ sư!

Minh giĕng đei hlôi hloh, jơhngơ̆m blĕk ‘bar ‘nu mĕ kon sư rai ngach bơih. Hơ’lơ̆p noh tơ oĕi ‘bơ̆t cheng mĕ sư, kư̆m pơih sơ̆p hla bơar ‘Bok Kei-Dei đŏk. Măr sư đŏk truh tơ Rôm 8:16, pơma gah Yang Bơhngol ‘Lơ̆ng ling lang oei hơdai păng oei bơ̆jang. Ryan kŭp kơ̆l drơ̆ng, na roi tơdrong hlôi đei mơn tơdrong noh. Sư băt kơ mĕ sư gô ‘bôh chrêu thoi yơ kơplah băt kơ sư năm tơ rok trong na kơdih sư tŏk tơgre buit noh.

“Mĕ, năr noh lăng kon rŏ dêh, bu bu ‘bôh ưh kơ pơ̆n wă tơ iung jơhngơ̆m hăm kon” – Ryan hiôk roi kơ mĕ sư. Mĕ sư pơ’lơ̆ng lăng pơnhen tơsư.

“Kơplah kon sư năm truh tơhnam ‘bă, kon ‘blŏk kơ hơ hla bơar iĕ noh. Kon iŏk đơ̆ng kơ dŭng, pơih hla bơar na hiĕk rơ̆n. ‘Bă kon kơ tơ̆ng nơ̆r hiĕk kon na kơdâu tơ kon, jet kon: ‘Kiơ noh? Đei tơdrong kiơ kon hiôk chơt dêh noh?’”

“Kon roi kơ ‘bă mơ̆ng. Hla bơar mă ma noh ăn kơ kon đei chih thoi âu: “Ưh kơ đei Yêsu Krist, kon ưh kơ gơh pơm minh tơdrong kiơ.”

“Đơ̆ng noh ‘bă sư jet dơ̆ng: ‘Kon hăm roi kơ ‘bok noh kon lui kơ Kră Yang ưh?’ Hlĭch dêh mĕ ă, yua kơ ‘bă ưh tam mă đei pơma ‘bơm đon lui kon đơ̆ng ki sơ̆.”
Hơ‘lơ̆p noh đei iŏk hla bơar kơplah mĕ sư sơ’ngon oei krao khan hăm lơ bơngai, mơn kơdih sư ưh pă băt pơm thoi yơ. Kơplah đơ̆ng sư krao apinh Kră Yang bơngai drŏnglo noh năm jê̆ kon drŏnglo sư. Duch noh lui ngeh noh jơ̆ linh jang ‘lơ̆ng. “Đĭ-đăng kơ lu linh jang, ‘Bok Kei-Dei wơh lu sư jur chă tơgŭm lu kon bơngai mă Sư pơklaih ăn oei hơdai hăm Sư ning-mônh.” (Hêbrơ 1:14)

Đơ̆ng lăp minh hlak hla bơar iĕ đei chơ̆p, đei pơjao đơ̆ng bơngai hlĭch, mă đei tơiung đon lui duch noh hrĕng wơ̆t – hăm đon lui kon drŏnglo duch noh dai. Jơ ‘nâu, duch noh hlôh rim wơ̆t kon drŏnglo ataih đơ̆ng sư, na ‘Bok Kei-Dei oei oei hơdai păng bơwei kon sư. Duch noh hlôh kơ tơdrong noh ưh kơ đơ̆ng đon tơchĕng đĕch, mă đơ̆ng lăm jơhngơ̆m.

Tơdrong hiôk hian hloh kơ tơdrong hlôh băt đơ̆ng duch noh, na kư̆m truh tơ kon drŏnglo sư dai mơ̆n. Tơdrong hơ’mon ‘nâu tơ ‘blŏk kơ duch noh, păng lu bơ̆n:

“Bơngai bu gơnang kơ akâu sư kơdih, bơngai noh sư ưh kơ gơh pơm kiơ̆ thoi ‘Bok Kei-Dei wă.” (Rôm 8:8)

Apĭnh đĭ đăng krao khan hơdai: Kơkuh kơ Kră Yang, đei lơwơ̆t kon adrin bơwei tôm tơdrong lăm tơpang ti kon, tơchĕng kơdih khan tơdah bơwei ‘lơ̆ng na tơdrong arih gô đei rơnŭk rơnua. Mă lei kon hiơt tơm kơ đơ̆ng Ih noh jơ̆ Tơ’ngla bơwei kon lăm tôm tơdrong. Apinh huay kơ jô̆ yo kơ kon đei hiơ̆k bơngơ̆t dêh, lơ wơ̆t kon ‘maih wă pơm kiơ̆ kơ kơdih mă hiơt kơ chă Ih. Apinh tơgŭm kon pơhrăm iŏk achăng lê̆ kiơ̆ kơ kơdih, pơjao tôm tơdrong arih ăn kơ Ih. Apinh tơgŭm kon băt dôm lu anih kon ưh kơ đei truh, dôm lu tơdrong kon ưh kơ gơh bơwei kơdih, Ih oei hơdai, bơwei, chông anhăk păng ‘mêm mơnat kơ kon. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, kơplah dôm tơdrong nhen thoi pă gơh wă bơwei, Kră Yang oei chĕp tơdrong pơgơ̆r đĕch. Kră Yang ưh kơ achăng lu bơ̆n lăm tơdrong hli tơrơ, pă băt pơm thoi yơ. Kră Yang oei bơwei păng bơ̆jang yua kơ lu bơ̆n, hăm tơdrong mơsêh mơyang hloh kơ lu bơ̆n tơchĕng. Kơplah lu bơ̆n băt kơ achăng lê̆ păng pơdơh kơ bơwei tôm tơdrong kiơ̆ kơ kơdih, lu bơ̆n gô ‘bôh hlich chrơp đơ̆ng Kră Yang đơ̆ng dôm lu tơdrong arih kơdih, mă đơ̆ng lăm anih lăng nhen thoi sơ’ngon dêh.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.