Đei lu bơ̆n mơn ‘bôh kơdih ưh kơ đei ‘măn jơ wă hŏk pơhrăm nơ̆r ‘Bok Kei-Dei, dah mơn gleh lap kơplah yak năm hăm Kră Yang. Kư̆m đei lu bơ̆n tam mă mơn hlôh băt kơ Kră Yang tơpă. Dôm lu tơdrong lu bơ̆n băt gah Kră Yang noh oei đơng đĕch ‘bônh kơ hiơt hiong. Na rŏ lăng, tơm rơh kơ tôm tơdrong noh jơ̆ jơhngơ̆m lu bơ̆n tơhiong lê̆ tơdrong ‘mêm ăn kơ Kră Yang păng rơhing ‘maih wă băt kơ Sư lơ hloh. Mă lei, lăm Yang Yêsu Krist, lu bơ̆n oei ling lang đei jơ năr wă wih brŏk tơ Sư.

Năr ‘nâu, ‘năr 01/02/2026, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Paul Dailey kơ̆l ‘bai MƠN BĂT KƠ YANG YÊSU KRIST KĂL HLOH KƠ ĐI ĐĂNG.

“Mă tơdrong kiơ đe khan yua, inh lăng ưh pă yua boih, yua kơ dôm tơdrong inh sơđơ̆ng kơ Yŏng inh Yêsu Krist kăl hloh kơ đĭ-đăng tơdrong noh. Inh hăt kơ kiơ̆ Sư lê̆ đĭ dôm tơdrong akâu inh sơđơ̆ng thoi lĕ kơ hla đuih đăm, wă kơ inh gơh sơng iŏk Yêsu Krist.” (Philip 3:8)

“Mă tơdrong kiơ đe khan yua, inh lăng ưh pă yua boih, yua kơ dôm tơdrong inh sơđơ̆ng kơ Yŏng inh Yêsu Krist kăl hloh kơ đĭ-đăng tơdrong noh. Inh hăt kơ kiơ̆ Sư lê̆ đĭ dôm tơdrong akâu inh sơđơ̆ng thoi lĕ kơ hla đuih đăm, wă kơ inh gơh sơng iŏk Yêsu Krist. Ơ lu ‘nhŏng oh, inh băt boih inh pơm ưh tam mă tôm dôm tơdrong ‘noh; na inh ưh pă tơchĕng bơih dôm tơdrong so, inh tơchĕng kơ tơdrong jang inh tơ anăp đĕch. Inh wă adrin thoi lu bơngai kơdâu pơjei adrin kơdâu tôch kơ anih đêl đe pơkă, wă kơ inh gơh iŏk dôm tơdrong ‘Bok Kei-Dei apah inh. Ning-mônh ‘Bok Kei-Dei gô krao inh iŏk dôm tơdrong Sư apah inh tơ plĕnh ti yua kơ Yêsu Krist lôch tang inh. Thoi noh na inh adrin kơdâu truh tơ anih đêl Sư pơkă, wă kơ inh gơh iŏk dôm tơdrong Sư apah ei.” (Philip 3:8, 13-14)

Jơ̆ Bơngai lui kơ ‘Bok Kei-Dei, rŏ lăng buăl kư̆m đei đŏk nơ̆r ‘Bok Kei-Dei ‘nâu. Tơdah buăl jơ̆ minh ‘nu bơngai ‘mêm kơ Yang Yêsu na nơ̆r ‘nâu đei râu tơiung lăm jơhngơ̆m buăl tơdrong kiơ noh. Inh ưh kơ băt buăl noh bu, Hnam Akŭm ayơ, rŏ lăng kơplah buăl đŏk nơ̆r ‘nâu, buăl gô ‘maih wă pơma hăm Kră Yang thoi âu: “Kơkuh kơ Kră Yang, noh jơ̆ tơdrong kon ‘maih wă!”

Mă lei đơ̆ng blŭng a đŏk nơ̆r ‘Bok Kei-Dei ‘nâu truh tơdang ei, hăm đei tơdrong kiơ tơplih ưh? Rŏ lăng lu bơ̆n lăng lăng “tơdrong mơn băt kơ Yang Yêsu Krist noh jơ̆ kăl hloh” thoi kơ ‘bok Pôl pơma ưh? Athei jet kơdih akâu: yua kơ kiơ rup Yang Yêsu rai đunh rai pă đei lăm tơdrong arih lu bơ̆n? Mă tơpă, lăm jơhngơ̆m, buăl đei bơih nơ̆r tơl.

Wă kơ mơn băt kơ Kră Yang păng pơjao tơdrong arih ăn kơ Sư, ‘bok Pôl pơma: “Inh băt kơ bơ̆jang đĕch…” wă khan sư kơnhăm minh Kră Yang đĕch, ưh kơ ăn tơdrong kiơ pơgăn lê̆. Mă lei lăm tơdrong arih rim năr lu bơ̆n ưh kơ thoi noh. Teh đak ‘nâu păng Sa-tan ling lang chă tôm tơdrong wă pơm kơ lu bơ̆n lăng “minh tơdrong” kăl hloh. Rim năr đei hlôi hloh, lu bơ̆n druh kiơ̆ dôm lu tơdrong mă bơ̆n kơnhăm. Đon lui kơjăp thoi kơ blŭng a kơ Kră Yang rai đunh rai rơdu. Lu bơ̆n chĕp ba tơdrong arih gleh lap, ưh kơ đei yua kiơ. Na lu bơ̆n mơn ‘bôh kơdih tơhiong lê̆ tơdrong gĭt kăl mă Kră Yang ăn.

Mă lei, tơdrong noh ưh kơ sĭ lu bơ̆n pă đei hơmĕng bơih. Yang Yêsu jơ̆ tơm kơrup lu bơ̆n pơm kiơ̆ lăm tơdrong arih, păng Sư kư̆m jơ̆ Tơ’ngla gô pơm kơ rup noh jing keh đang kiơ̆ kơ thoi Sư wă. Hăm kon bơngai tơdrong noh ưh kơ đei wă gơh pơm, mă hăm ‘Bok Kei-Dei tôm tơdrong noh gô jing ngăl. Kră Yang gô pơpôi dôm tơdrong pơchah pơchek lăm tơdrong arih buăl păng yua tơdrong noh gô jing ư ang kơ Sư.

Nhen thoi buăl, inh kư̆m oei yak năm lăm trong ‘nâu. Đei năr inh mơn ‘bôh kơdih inh tơhiong lê̆ tơdrong ‘mêm blŭng a kơ Yang Yêsu, tơhiong lê̆ tơdrong rơhing wă băt kơ Sư jrŭ hloh. Păng wă kơ kĕ hlôi đơ̆ng dôm lu tơdrong noh ưh kơ ‘bônh ôh. Mă lei đơ̆ng rim năr, kơplah inh tơ jur jơhngơ̆m chă Kră Yang, tơdrong ‘mêm ăn kơ Sư đei dơ̆ng thoi ŭnh soh chhông lăm jơhngơ̆m inh. Noh jơ̆ tơdrong tơblah tơpă đơ̆ng lăm jơhngơ̆m đon, wă kơ pơm liơ kơ nhăm kơ “minh tơdrong” kăl hloh. Mă lei ‘Bok Kei-Dei ‘lơ̆ng tơpăt. Rim wơ̆t inh achăng lê̆ tơdrong kiơ noh mă inh pơ-ư pơ-ang, inh rai hlôh băt kơ Kră Yang lơ hloh. Yua kơ đơ̆ng Kră Yang ‘mêm, tơdrong arih inh ‘net ‘net Sư pơklaih păng jing tơmam ‘lơ̆ng lăm măt Sư.
Inh wă pơlung buăl lăm năr ‘nâu. Mă khan buăl đei tơdrong arih thoi yơ, tơdah buăl đŏk lăm hla bơar Philip ‘nâu, gô râu tơiung jơhngơ̆m buăl: “Kơkuh kơ Kră Yang, noh jơ̆ tơm kơ tơdrong hơpơi wă”, tơdrong noh wă khan buăl oei đei jơ năr Kră Yang gô tơplih jing ‘nao. Athei apinh Sư bơ̆jang lăm chăl arih buăl păng pơm minh tơdrong kiơ noh plơ̆ng ‘nao lăm trong yak năm buăl. Đơ̆ng rim năr, đơ̆ng tŏ sĕt, truh tơ dĭng dang yơ đei Yang Yêsu Krist lăm chăl arih lu bơ̆n.

Apĭnh đĭ đăng krao khan hơdai: Kơkuh kơ Kră Yang ‘mă ‘mêm kơ kon! Kơplah kon rơdu tơrăn păng ataih đơ̆ng Ih, apinh Ih chông anhăk păng tơgŭm kon kĕ hlôi, wă kơ kon đei jơhngơ̆m pran ăn kơ Ih. Apinh tơgŭm kon huay kơ lăng lăm teh đak ‘nâu gĭt hloh kơ đĭ đăng, mă lei ăn kơ chăl arih kon ling lang hơpơi wă băt kơ Ih păng arih lăm Ih rim năr. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, mơn băt kơ Yang Yêsu Krist noh jơ̆ tơdrong gĭt kăl hloh hăm rim ‘nu lu bơ̆n năr ‘nâu ưh? Dah tơdrong nai oei kăl hloh mă ưh kơ tơdrong mơn băt kơ Kră Yang pơgơ̆r lăm đon tơchĕng, jơhngơ̆m, dan hơdrol hloh lăm chăl arih lu bơ̆n? đei tơdrong kiơ pơm kơ lu bơ̆n tơhiong lê̆ rơhing kơ tơdrong arih ăn kơ Kră Yang păng mơn băt kơ Sư jrŭ să hloh? Hăm trŏ kơ noh jơ̆ tơdrong yoch, tơdrong hrăt hrot dah gleh lap lăm tơdrong arih rim năr? Athei tơpăt năm ‘bơ̆t anăp Kră Yang păng apinh Sư dôm lu tơdrong kiơ pơm kơ jơhngơ̆m lu bơ̆n rơdu, păng apinh Sư soh ming ŭnh lăm jơhngơ̆m lu bơ̆n, ŭnh ‘mêm kơ Sư lăm năr ‘nâu păng dôm kơ năr tơ anăp lăm trong yak năm lăm chăl arih truh tơ năr lu bơ̆n tơ ‘bơ̆p Yang Yêsu.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.