Rŏ lăng lu bơ̆n ngăl hiơt kơ tơdrong ‘nâu, mă lei tơpă Kră Yang oei thĕng hreh bơ̆jang lăm chăl arih rim ‘nu bơngai. Đơ̆ng kơplah đei pơjing đơ̆ng ‘mui teh dĭng truh kơ rim kơnao wơ̆ ‘lŏ năr ‘nâu, Sư ling lang kĕ chơ̆n hơmet lu bơ̆n thoi mĭnh ‘nu bơngai pơm gơh hơgei hơmet tơmam sư kơdih. Lăm rim kơ rok trong lu bơ̆n yak năm, tơpang ti ‘mêm mơnat đơ̆ng Sư oei bơ̆jang ling lang, wă kơ lu bơ̆n gơh tơ̆l truh tơ rup ‘lơ̆ng mă Sư đei hơmet ăn adrol bơih đơ̆ng blŭng a.

Năr ‘nâu, ‘năr 02/02/2026, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Missey Butler kơ̆l ‘bai ĐEI PƠJING HĂM TƠPANG TI KRĂ YANG.

“Inh bơnê kơ Ih, yua kơ Ih đei pơjing inh hlĭch chrơp tơpă. Tơdrong jang Ih hlĭch chrơp mă jơhngơ̆m inh băt nhen tơpă.” (Hơriso 139:14)

Đei mĭnh tơdrong juăt kơ pai tơmam sa “kiơ̆ kơ adrĕch adrŭng pơsư̆ ăn” đei gĭt dêh mă inh wă klah song hăm buăl. ‘Nâu jơ̆ tơmam pai sa đei ăn kơ inh đơ̆ng mĭnh ‘nu bơngai thây bơtho mă inh ‘mêm dêh păng đei jơ hơdai lơ sơnăm. Mă lei adrol hloh, inh ‘maih roi kơ buăl mơ̆ng gah mĭnh tơdrong hlôi đei tơ’bơ̆p hơ iă ‘nao brei mơsơ̆.

Năr ei, kơplah oei kĕ chơ̆n dơ̆ng gô lăm mĭnh anih tĭnh jên răt tơmam đei kơjung, măt inh đei dơ̆ng ‘bơ̆t tơpu hla ar rup tơmam sa. Inh thar đei pơhlŭ hăm dôm kơ ‘bĕng kuy đei pơgong proh pơ’lơ̆ng, lăng ‘lơ̆ng păng đei tơdrong gơh hơgei.

Na thar, lăm inh đei iung mĭnh tơdrong ‘maih pai tơmam sa pran dêh. Jơhngơ̆m lăm inh đei ‘bĕnh blai: “Inh kŭm gơh pơm ưh! Hơbŏ ưh kơ đei anat thoi noh! Hnam dơnŏ ‘bôh na tơpă gô hlĭch chrơp dêh…!”

Mă lei lăm kơplah noh, đon tơchĕng đei pơma- păng inh tơpă băt bơnê yua kơ tơdrong ‘noh. Nơ̆r pơma juăt noh đei dŏng inh ưh kơ băt dôm yơ wơ̆t. Sư thoi pơma khan: “Lê̆ ah, hnam dơnŏ inh ưh kơ trŏ hnam dơnŏ ‘lơ̆ng tôm thoi rup tơpu hla ar noh. Păng trŏ thoi noh, kơdih ưh kơ đei tôm jơnăr hăm jên tơmam wă druh kiơ̆ tơdrong hơpơi wă ‘nao wă đei ‘noh ôh. Dan hla ar tơ ala đĕch. Gơ̆p dan sư ‘bơ̆t doh trŏ jơ̆ wă pơm kơ bơ̆n mơn ‘bôh ‘nă hal thoi noh bơih!”

Ôi! Inh kŭm ưh tim mă yak hlôi đơ̆ng anih tĭnh jên na đei ‘bôh gleh lap bơih!

Brŏk truh tơ hnam, inh pơdrơ̆ng chă pơih dôm sơ̆p hla bơar pai tơmam sa so. Lu sư kŭm ưh kơ đei ‘lơ̆ng rŏ thoi kơdôm sơ̆p hla ar inh ‘nao wă lăng ‘bôh hei. Đei sơ̆p inh kŭm đei pơ‘lơ̆ng pleh rim kơ hlak đei tơklep băl yua kơ đơ̆ng rim wơ̆t lŭk ‘bôt pơm tơmam sa adrol ki.

Inh ‘bôh tơpu hla ar đei dôm trong đêl ‘bơm kaphê- tơ’bôh đơ̆ng kơdôm măng kral pai sa rim kơ bơyan phĕt ‘blŏk hơdơ̆r. Mă khan hla ar ưh pă đei ‘lơ̆ng, inh oei hơdrin chă lăng đei tơdrong pơtho pai sa ‘nao plơ̆ng hloh ưh. Păng đei hlĭch tơpă, ‘bơ̆t mum jrŭ kơtuh tah gŏ, inh chă ‘bôh sơ̆p hla ar pai sa kiơ̆ kơ adrĕch adrŭng pơsư̆ ăn đơ̆ng hnam dơnŏ. Inh hiĕk kơplah pơ’lơ̆ng chĕp tơjur, mĭnh pah ti chĕp dôm lu hlak chih bơtho tơ rak ‘brak huŏng tơ ala. Lăng tơpu sơ̆p hla ar so sĕnh, so hyah ‘noh, inh thar mơn ‘bôh sư lei lăi thoi mĭnh ‘nu bơngai buăl đunh sơnăm.
Lăm noh đei lơ tơdrong ‘blŏk đêl gah dôm jơ hơdai sŏng sa hăm hnam dơnŏ tăp dăr kơ’bang. ‘Blŏk đơ̆ng gah dôm tơmam sa ‘lơ̆ng đei pơm hăm tơpang ti ‘bĕnh tơdrong ‘mêm đơ̆ng mĕ păng yă. Kơplah pơih hlak, sơ̆p hla ar dơ̆ng ‘bơ̆t tơdrong bơtho pơm ‘bĕng kuy sĭk juăt dêh. Kơplah đŏk pơhiơ̆ tơdrong bơtho pai ‘noh, inh pơma kơdih: “A, trŏ bơih…tơmam sa ‘nâu sơ̆ tơpă kơplah ayơ kŭm sa ‘ngam.” Mă lei kơplah đŏk pơthim mĭnh wơ̆t dơ̆ng, inh thar ‘bôh đei tơdrong kiơ noh đei gĭt jrŭ. Minh pôm rup gah bơhngol blư thar ‘bôh lăm đon tơchĕng inh.

Inh thar ‘bôh khan lu bơ̆n jơ̆ dôm tơmam đơ̆ng ‘Bok Kei-Dei, kŭm lei lăi thoi dôm kơ tơmam blŭng a lăm “pơnhan lŭk ‘bôt” đơ̆ng Sư.

“Yua kơ Ih pơjing boih tơ lăm akâu inh. Păng pơjing boih inh tơ lăm klak mĕ inh.” (Hơriso 139:13)

Lu bơ̆n đei “rŏl” yua đơ̆ng ‘long rŏl ‘bôt đơ̆ng ‘Bok Kei-Dei kơpal hơnơ̆l ‘bĕnh kơ ‘bôt- đei hơmet yua đơ̆ng kơdih Tơ’ngla Pơjing.

“Kră Yang ‘Bok Kei-Dei iŏk ‘mui teh man kon bơngai …..” (Blŭng A 2:7)

Na ‘Bok Kei-Dei yua “không ‘bĕng” rup bơngai drŏnglo hăm bơngai drŏkăn đơ̆ng Sư, kơtĭt tơ ala mă kơjăp kơpal ‘bôt rơmuăn.

“Kră Yang ‘Bok Kei-Dei khan thoi âu: “Bĕ lu bơ̆n pơjing kon bơngai hơbŏ thoi bơ̆n, nhen thoi bơ̆n.” (Blŭng A 1:26)

Đơ̆ng rŏng kơ noh, lu bơ̆n jơ̆ ‘bôt ‘bĕng đei dan lăm bơng păng tơ mơ̆t lăm “tơmam ŭnh ‘buh” đei pơm tơtŏ bơih.

“’Nâu, Inh hling iĕm rơgoh bơih, mă-lei ưh kơ trŏ thoi hling hu; Inh pơlong lăng iĕm lăm ŭnh tơdrong pơmat-tat.” (Êsai 48:10)

Pơtrơp, lu bơ̆n đei tơlĕch hlôi đơ̆ng tơmam ‘buh păng dan tơ bơng wă kơ ngach, wă kơ gơh pơdơh păng dơ̆ng ‘bơ̆t anăp kơplah Kră Yang pơthim lăm dôm kơ rup pơkeh tuch luch.

Păng kơplah dôm kơ kơnao đei keh ‘lơ̆ng, ‘Bok Kei-Dei kơ nhăm pơ’lơ̆ng kơ lu bơ̆n hăm kơdih tơpang ti ‘mêm mơnat đơ̆ng Sư.

Păng tuch luch, Kră Yang dan lu bơ̆n tŏk bŏk tơpôl bơngai, wă kơ chăl arih lu bơ̆n jing ‘bâu phu rơngơp păng pŭn hiôk kơ bơngai nai. Lu bơ̆n chĕp ba “tơmam ‘bâu phu, mĭnh tơmam soi đei ‘Bok kei-Dei sơng iŏk păng lăp đon.” (Philip 4:18), jơ̆ dôm kơ “kơthơ arih” kơ dôm lu bơngai jum dăr kŭm iŏk đŏk.

Dah klơ̆p sơ̆p hla ar pai tơmam sa dơ̆ng păng dan kơpal hơtuh, inh đei bơnê kơ Bơngai Buăl “bơngai pai tơm” hơiă đơ̆ng kơdih yua kơ đei klah song đei juăt kơpai tơmam sa gĭt kăl khŏm khŏm ‘noh. Sư bơtho inh khan dôm “tơmam wă pai” kăl yua kơ chăl arih inh đei gơh hơmet lê̆ bơih. Đĭ đăng đei chih lăm “hla ar Bơtho” đơ̆ng Sư- trŏ kơ Sơ̆p Hla Bơar ‘Bok Kei-Dei- sơ̆p hla ar oei ling lang dơ̆ng ‘bơ̆t anih blŭng a đei tĕch lơ hloh đơ̆ng dôm kơ chăl ‘nâu.

Inh plôh che tơ̆n kơtơh na hơ oei tơ ala kơ’bang hnam gŏ, ti dônh iŏk mĭnh pôm ‘bĕng kuy oei tơtŏ. Đei kơkă sa, inh đei băt kơnăl khan rŏ lăng đơ̆ng âu kơdih gô ưh pă lăng mĭnh pôm ‘bĕng kuy kiơ̆ thoi hmă đĕch thoi so bơih. Kơplah pĭt ŭnh hnam gŏ păng yak tơ kơnao kung wă mơ̆t lăm anih tep, inh mơn đei nơ̆r Yang Bơhngol ‘Lơ̆ng mơ mơnh lăm jơhngơ̆m inh:

“Inh bơnê kơ Ih, yua kơ Ih đei pơjing inh hlĭch chrơp tơpă. Tơdrong jang Ih hlĭch chrơp mă jơhngơ̆m inh băt nhen tơpă.” (Hơriso 139:14)

Apĭnh đĭ đăng krao khan hơdai: Kơkuh kơ Kră Yang jơ̆ Tơ’ngla Pơjing ‘bĕnh tơdrong ‘mêm mơnat, bơnê kơ Ih yua kơ kon đei Ih pơ’lơ̆ng man pơjing kiơ̆ kơ tơdrong kơnhăm ‘lơ̆ng rŏ đơ̆ng Ih. Apinh ăn kơ kon mơn băt khan dôm “tơmam” Ih dan lăm chăl arih kon đei oei lăm tơdrong proh hơmet ‘lơ̆ng tôm đơ̆ng Ih, mă khan jơ̆ ‘lơ̆ng ‘ngam dah pơlong pơjuăt ơh sơ’ngon. Hơpơi kơ chăl arih kon ling lang pơchrang ‘bâu phu Kră Yang lăp đon, jing pŭn hiôk kơ dôm bơngai tăp dăr kon. Kon apinh pơyơ̆r tôm tơdrong lăm tơpang ti gơh hơgei đơ̆ng Ih, apinh Ih pơtrơp pơkeh tơdrong jang ‘lơ̆ng rŏ mă Ih đei pơih ăn lăm kon. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, Kră Yang oei kĕ chơ̆n ‘bơ̆ hơmet chăl arih đơ̆ng rim ‘nu lu bơ̆n, kiơ̆ kơ jơ năr ‘lơ̆ng tôm păng ‘lơ̆ng tơpăt đơ̆ng Sư. Dah lăng đêl, lu bơ̆n gô mơn ‘bôh khan tôm tơdrong Kră Yang bơ̆jang lăm chăl arih kơdih đei kơnhăm ngăl, wă kơ lu bơ̆n jing tôm mah hloh hăm ‘bâu phu rơngơp, păng tơ’bôh hơđăl rup đơ̆ng Sư lăm teh đak ‘nâu. Hơpơi kơ lu bơ̆n yak năm rim năr hăm jơhngơ̆m băt bơnê, lui gơnang păng hiôk chơt, yua kơ lu bơ̆n đei pơjing đơ̆ng ti ‘bĕnh ‘mêm mơnat đơ̆ng ‘Bok Kei-Dei.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih:

[email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.