Nyob rau seem haujlwm twg, peb kuj yuav tau xyaum tsis tseg thiaj yuav loj hlob thiab ua tau kom tiav zoo. Kev ntseeg kuj ib yam li ntawd: xav kom loj hlob thiaj kov yeej kev sim siab. Vajtswv muab tej “haujlwm nyuaj” los rua peb xyaum peb txoj kev ntseeg kom ua siab ntev, ruaj khov. Thiab kuj yog nyob rau lub sijhawm ntawd, peb thiaj pom meej tias Vajtswv tab tom coj yus ib kaujruam zuj zus, zoo li ib tug phooj ywg nrog mus ua ke zoo siab hlo pab kom peb sawv khov kho.

Hnub no, yog hnub 03/02/2026, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Abigail Shaffer dhau ntawm Zaj kawm QHOV ZOO NTAWM KEV NTSEEG.

“Rau qhov nej twb paub lawm hais tias yog nej ua siab ntev nyiaj tej kev nyuaj siab, ces tej ntawd yuav ua rau nej muab siab rau ntseeg ntxiv. Tiamsis nej yuav tsum ua siab ntev mus li tsis txhob tso tseg, nej thiaj yuav ua tau neeg zoo kawg nkaus, tsis muaj ib qho uas lwm tus yuav thuam tau.” (Yakaunpaus 1:3-4)

Kuv ib txwm kawm txoj kev seev cev ba-lê puag thaum me me los. Thaum uas tseem yog ib tug menyuam ntxhais, kuv twb npau suav kom dhau los ua ib tug txawj seev cev ba-lê. Txog thaum no, thaum twb hlob tiav lawm, kuv yeej tseem xyaum thiab nyiam txoj kev no li puag thaum pib. Muaj ib qhov kev zoo nkauj txawv, dawbhuv nyob hauv txoj kev seev cev ba-lê, thiab qhov no rub tau kuv lub siab los mus nyob ze tus uas tsim ib puas tsav yam los. Cuag li nyob rau hauv txoj kev ntawd, kuv pom lub ntsiab lus uas Vajtswv hais rau kuv.

Ntau zaug thaum uas xyaum kom tej leeg muag, kuv pom muaj ib yam zoo li yooj yim tiamsis ho tseem ceeb heev, ntawd yog seev cev kom zoo, tus mus seev cev nws yuav tsum yog tus uas muag muag. Thiab yeej tsis muaj ib txoj kev twg pab kom ua tau muag muag li ntawd, yog tsis kam xyaum kom tej leeg muag muag, ntau tshaj qhov uas yus yuav ua tau, ntau zaug yuav tau tiv kev mob. Los ntawm tej yam me me txog rau tej zaug uas yuav dhia nyuaj, puav leej yuam kom yuav tau ua kom tau zoo tshaj.

Hauv txoj kev nrog tus Tswv mus kuj ib yam li ntawd. Peb pheej xav tias tej kev xav, kev npau suav thiab homphiaj yog zoo. Tiamsis tsuas yog thaum peb kam tawm ntawm qhov chaw tso siab, kam muab tso rau Vajtswv, peb thiaj pom Vajtswv lub homphiaj dav thiab zoo dua tej uas peb xav. Kev ntseeg yuav tsis loj yog tias peb sawv nres nroos ib qhov xwb.

Thaum lawv saib txoj kev seev cev raws li ba-lê, lawv tsuas pom lub cev muag thiab sib sib xwb. Lawv tsis paub tias tom qab ntawd yog ib txoj kev xyaum nyuaj heev. Txhua zaug xyaum, thaum muab nkawm khau hle, kuv hnov mob heev txog qhov uas cim civ nug tias: tsis paub puas tsimnyog? Tiamsis lo lus teb yeej hais tias “muaj!” lossis “hluav taws sim kub, kev txomnyem sim zog.” Los ntawm tej uas peb ua tau, tej yam zoo thiab ruaj khov no puav leej yuam kom yuav tau ua siab ntev thiab siv zog.

Vajluskub kuj qhia peb ib yam li ntawd. Yakaunpaus 1:3 hais tias thaum kev ntseeg tau sim lawm, kev ua siab ntev thiaj muaj sijhawm loj hlob. Yog lub neej nrog tus Tswv mus thaum twg twb yooj yim ces tsuas yog ib qhov kev sim siab me me xwb kuj ua rau peb lov lawm. Vajtswv siv tej kev txomnyem los cob peb sab ntsujplig, zoo li kev seev cev ba-lê ua rau kom peb lub cev muag. Txawm yog mob los qhov no nws cheem tsum. Txawm yog mob me ntsis los nws cheem tsum. Txawm yog nyuaj los, ntawd thiaj yog yam ua kom muaj nqis.

Kuv pheej hais ua si tias ba-lê yog ib txoj kev seev cev ntawm txoj kev ntseeg. Rau qhov cov uas seev cev lawv tsis tshua seev cev ib leeg. Peb yuav tau ntseeg tus uas nrog peb seev cev ua ke, tswj kom haum. Yog ib leeg tsis ntseeg ib leeg, thaum seev cev yuav tsis zoo. Thiab yog muaj teeb meem tshwm tuaj, koj yuav tsis muaj neeg pab.

Kev ntseeg hauv Vajtswv kuj zoo ib yam li ntawd. Peb raug caw los vam khom rau Vajtswv, tus uas coj peb txhua kaujruam mus. Tiamsis ntau zaug, peb ho saib txoj kev nrog Vajtswv mus zoo li qhov uas yus mus ib leeg: cim civ ris, cim civ npaj txhua yam sib txuam ntxaws ua ke. Tshuav qhov tseeb tiag, Vajtswv yeej tsis tau xav kom peb siv zog ib leeg.

Thiab thaum tig rov qab mus saib, kuv pom lub neej nrog Vajtswv mus kuj zoo ib yam. li ntawd . Muaj tej ntu nws maj ma, muaj tej lub sijhawm yuav kub heev, muaj tej zaug yuav tau dhia siab ua rau kuv ntshai tsis paub yuav tiag taw hauv pem teb li cas. Tiamsis kuj muaj tej lub sijhawm zoo, thaum kuv pom tias Vajtswv tab tom pab, coj kuv kev. Twb yog Vajtswv txoj kev nrog nraim ntawd thiaj yog yam ua rau txoj kev no dhau los zoo nkauj thiab siab tshaj txoj kev seev cev ba-lê.

Thov caw nrog kuv peb thov Vajtswv ua ke: Tus Tswv! Kuv ua koj tsaug vim koj nrog nraim kuv rau txhua txoj kev, txawm yog tej lub zoo sijhawm thiab muaj kev sim siab tib si. Thov qhia kom kuv paub ua siab ntev thiab sib pab zoo li cov seev cev lawv ua siab ntev xyaum, kom kuv txoj kev ntseeg yim hnub yim khov thiab loj hlob raws li Vajtswv lub siab nyiam. Thaum kuv hnov qaug zog lossis nkees, thov ntuas kuv tias Vajtswv nyob ntawm kuv ib sab, pab thiab coj kuv txhua kaujruam. Thov kom kuv lub neej dhau los ua ib txoj kev seev cev zoo rau txoj kev ntseeg, nthuav tawm Vajtswv lub tshwjchim! Kuv thov hauv Tswv Yexus Khetos lub npe, Amees.

Cov kwv tij txhua tus, peb txhua tus txoj kev ntseeg puas yog zoo li ib txoj kev seev cev zoo, nthuav tawm yam zoo uas Vajtswv tau muab kos cia? Txhua kaujruam, txhua zaug muab dhia, txhua qhov haujlwm lossis ua pa tob tob rau txhua zaug uas yuav dhia tej kaujruam nyuaj ntawd coj peb los mus nyob ze Vajtswv dua yog tus uas tsim ib puas tsav yam niaj hnub tu, tiv thaiv peb? Peb txoj kev ntseeg puas tab tom tau xyaum txxhua hnub, dhau ntawm txhua txoj kev kom loj hlob dua nyob hauv Vajtswv? Thiab tej neeg ib ncig peb puas ntsia pom qhov zoo hauv txoj kev ntseeg Vajtswv dhau ntawm peb lub neej.

Hnub no peb nyias yuav tau ncaj ncees teb lo lus nug no, thiab khiav los mus vam khom Vajtswv, tus uas zoo siab hlo pab peb txhua tus hauv txoj kev nrog tus Tswv mus, ib txoj kev mus rau ntawm qhov siab dua, tob dua thiab txaus siab dua.
Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.