Lub neej tsis yog thaum twg twb zoo. Muaj tej lub sijhawm tib neeg yuav tau ntsib tej kab mob kev ntseeg, kev puas tshuaj, thiab kev ntshai nws siab tshaj peb lub zog. Thaum teeb meem vij puas ncig, peb yuav tau nco ntsoov tias Vajtswv yeej nyob ntawd; Nws ua twjywm ua haujlwm, hloov tej kev mob siab dhau los ua qhov chaw hlav cag rau peb txoj kev ntseeg, txoj kev cia siab thiab txojsia tshiab. Tej kev mob saib cuag li tsis muaj dabtsi dhau los ua daim duab kev ntseeg rhau cag thiab txi txiv, thiab ntau tshaj qhov no, yog kom peb kawm tau txoj kev muab tso plhuav rau ntawm Vajtswv, tus uas niaj hnub ua haujlwm thaum uas tib neeg qhov muag ntsia tsis pom.

Hnub no, yog hnub 04/02/2026, (Yog hnub uas ntiajteb tiv kev mob qog siab ntsws (World Cancer Day), Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia dhau ntawm Zaj kawm TXI TXIV HAUV KEV TXOMNYEM.

“Kuv yuav ua tus coj nej kev mus ibtxhis thiab pub txhua yam zoo rau nej kom txaus nej siab. Kuv yuav pub nej muaj zog thiab noj qab nyob zoo. Nej yuav zoo ib yam li lub vaj uas muaj dej ywg tsis tseg thiab ib yam li tus dej uas ntws tsis paub nqhuab li” (Yaxayas 58:11).

Hnov xov tias koj rov qab mus tom tsev tshuaj lawm, kuv tuaj saib koj. Tomqab lub qhov rooj qhib, kuv pom nws tab tom khoom rau ntawm nws tus txiv lub xub pwg, ua pa loj loj, cov plaub muag zawmkk9/ nrees vim mob heev. Zaum no nws rov qab tuaj rau ntawm chav Ung Bướu hauv tsev tshuaj vim ua tsis taus pa thiab noos los ntshav.

Kuv txav kiag mus tuav nws tes, nws maj mam luag rau kuv:

“Zaum ntawm no tos niam laus ib pliag, kuv mus ntsib tus yawm laus ntawd ib pliag tso. Yawg tab tom ua pa loj loj, tiamsis yeej tseem nco ntsoov, lawv yuav coj nws rov qab mus tsev rau taig kis no. kuv xav thov Vajtswv rau yawg.”

Tus txiv thiaj tsa nws sawv, maj mam luag ceg mus rau lub txaj sab tiv, nws cia li zaum kiag thiab hais txog Tswv Yexus rau yawg paub. Nws kuj ua pa nyuaj, tiamsis txhua lo lus, yeej tseem hais tau meej. Nyob deb deb, kuv tsuas pom yawg ncaws ncaws hau tas qi muag thaum nws thov Vajtswv pub rau yawg. Tas nws rov qab los, thov txim vim cia kuv tos ntev lawm, nws hais tias: “Yog tsis hais qhia rau yawg paub, nws ntshai tsam tsis muaj sijhawm lawm, nws ntshai tsam yawg tuag yawg tsis tau txais kev cawmdim, nws xav kom yawg txais yuav Tswv Yexus ntawm yawg tus kheej ua ntej uas yawg tuag.”

Cuag li tej uas nws hnoos los ntshav thiab ua pa nyuaj nyuaj ntawd tsis ua rau nws hnov qab Vajtswv txoj kev hlub tseg rau nws. Tsis tas li xwb, nyob rau txhua lub sijhawm Vajtswv pub, nws yeej qhia txog Vajtswv txoj kev cawmdim. Ntawm coob tug, mob qog (ung thư) yog lub cim xaus rau ntawm txoj kev cia siab. Tiamsis ntawm tus niam laus ntawd tus kheej, lub sijhawm uas nws paub tias nws raug tus mob ntawd ho yog lub sijhawm uas Vajtswv siv los cob nws txoj kev ntseeg, kom nws tau saj Vajtswv tob dua.

“Kuv yuav ua tus coj nej kev mus ibtxhis thiab pub txhua yam zoo rau nej kom txaus nej siab. Kuv yuav pub nej muaj zog thiab noj qab nyob zoo. Nej yuav zoo ib yam li lub vaj uas muaj dej ywg tsis tseg thiab ib yam li tus dej uas ntws tsis paub nqhuab li” (Yaxayas 58:11). Nws yeej tseem hais txog nqe Vajluskub no txhua zaug uas sib tham txog tej haujlwm Vajtswv txhais tes ua pub rau nws thaum ntsib lub sijhawm tsis zoo.

Phau II Vajntxwv tshooj 5 hais txog ib tug ntxhais qhev tsis muaj suab npe nyob rau lub caijnyoog tshwj xeeb. Tus ntxhais no ua neej nyob rau lub sijhawm uas cov Yixalayees thiab cov neeg Xilias tab tom ua tsov rog. Kev tsov rog ntawm ciam teb tshwmsim ntau zaug, tej pej xeem raug ntes mus ua qhev, nws yog ib tug ntxhais raug ntes mus ua qhev los ntawm txoj kev ua tsov rog. Ntawm nws lub tebchaws Yixalayees, nws ua neej nyob rau txoj kev tsis muaj kev ywj pheej thaum uas kev tsov kev rog nyob txhua qhov, lub tebchaws tsis tiaj tus, kev tshaib nqhis tshwm tuaj. Muaj ib hnub, nws raug cov tub rog Xilias ntes mus, nws nyob deb tsev neeg, lawv ua tus swb thiab nrug deb daim av uas ib txwm nyob mus ua qhev rau yus tus yeebncuab, Na-amas.

“Na-amas uas yog cov Xilias tus thawj tubrog uas muaj meejmom siab thiab vajntxwv hwm heev. Tus Tswv pub cov Xilias ntaus yeej rog, vim muaj Na-amas. Nws yog ib tug thawj tubrog uas txawj tua rog thiab siab tawv heev, tiamsis nws mob ruas” (II Vajntxwv 5:1). Thaum uas paub tias Na-amas tab tom raug tus mob ruas, ib tug mob uas lub ntiajteb suav tias kho tsis tau rau lub sijhawm ntawd, tus ntxhais no tau ua haujlwm los ntawm lub siab mos muag nrog nws txoj kev ntseeg. Nws hais qhia rau tus tswv paub tias: “Muaj ib hnub tus ntxhais ntawd hais rau Na-amas tus pojniam hais tias, “Kuv xav kom kuv tus tswv mus cuag tus cev Vajtswv lus uas nyob nram tebchaws Xamalis! Tus cev Vajtswv lus ntawd yuav kho tau Na-amas tus mob ruas zoo” (II Vajntxwv 5:3).

Txawm yog raug ntes mus ua qhev, nyob deb tsev neeg, tsis muaj kev ywj pheej, los nws yeej tsis ua tug tsis quav ntsej txog tus neeg uas tau ntes nws mus tus mob. Tsis tas li xwb, nws yeej xav kom Na-amas tus mob tau kho zoo, tshaj qhov ntawd, nws tseem xav coj yawg mus ntsib Vajtswv. Puas yog tus ntxhais qhev no nws ua ib lub neej ncaj ncees thiab tsimnyog ntseeg siab nyob rau hauv Na-amas tsev, txog qhov uas pog cov lus tim khawv kuj muaj hwjchim, qhib ib txoj kev pab kho zoo rau ib tug thawj tub rog muaj hwjchim li ntawd?

“Thaum N a-amas hnov li ntawd, nws txawm mus cuag vajntxwv thiab hais rau vajntxwv raws li tus ntxhais ntawd qhia” (II Vajntxwv 5:4).

Tsimnyog muab los xav thaum uas ib tug neeg zoo li Na-amas ho kam mloog ib tug ntxhais qhev neeg Yixalayees tej lus taw kev, tus ntxhais qhev ua haujlwm rau yawg pojniam. Thiab txij ntawd los, Na-amas txoj kev tau kho zoo pib. Yawg sawv kev tuaj rau Xamalis ntsib tus cev lus Elises. Nyob ntawd, yawg tus mob tau kho zoo ntawm coob tug qhov muag pom.

Vajluskub yeej tsis hais dabtsi ntxiv txog tus ntxhais no lub neej tomqab qhov xwm txheej ntawd lawm. Peb tsis paub nws puas tau tso rov qab, lossis puas tau rov los nrog tsev neeg, tsis paub, lossis puas txais tau ib qhov khoom plig twg. Tiamsis peb paub tias “Na-amas thiab nws cov tubtxib rov los cuag Elisas thiab hais tias, “Nimno kuv paub hais tias tsis muaj dua lwm tus vajtswv, tsuas yog cov Yixalayees tus Vajtswv xwb; yog li ntawd, thov koj cia li txais tej khoom uas kuv coj tuaj pub koj no” (II Vajntxwv 5:15). Tas Na-amas hais ntxiv rau Elises tias: “Na-amas hais tias, “Yog koj tsis kam yuav kuv tej khoom pub no li, thov cia kuv khawb av kom txaus ob tug nees zag thauj mus tsev, l txij hnub no mus kuv yuav tsis muab khoom lossis tua tsiaj hlawv fij rau lwm tus vajtswv li, tsuas fij rau tus Tswv tib leej xwb.” (II Vajntxwv 5:17).

Cia txoj kev txaj muag thaum raug ua qhev dhau mus, tus ntxhais no paub tias yuav tau hais lus kom Na-amas paub txog Vajtswv lub hwjchim tau kho zoo, tus Vajtswv uas nws pehawm, dhau ntawm tus cevlus Elises nyob hauv Xamalis. Tsuas yog tus ntxhais qhev ib lo lus hais yooj yim xwb, tiamsis nyob hauv nthuav tawm meej heev txog txoj kev ntseeg Vajtswv, kev totaub txog Vajtswv lub hwjchim, thiab tseem muaj lub siab hlub tshua tsis chim. Yam dabtsi tau ua rau tus ntxhais no kam hais lus thiab qhia txoj kev kho mob rau Na-amas? Tej zaug, thaum nws ntsia pom yawg tiv tus mob thiab txoj kev tuag tab tom los ze zuj zus, hauv tus ntxhais no lub siab muaj ib lo lus tshoov muaj zog heev yuav tau hais tawm: yuav tau hais, kom yawg tsis raug ntsib txoj kev tuag; yuav tau hais, kom Vajtswv lub hwjchim tau nthuav tawm.

Rov qab los rau kuv tus niam laus qhov teeb meem. Rau xyoo nws raug tus mob qog (ung thư). Muaj ntau zaug nws mus rau hauv tsev tshuaj, plaub zeeg tas, ob txhais taw mob, lub zog tsuag zuj zus vim tus mob no pib huam tuaj. Tiamsis, thaum Vajtswv ntxiv zog, nws rov qab ua tim khawv txog tej haujlwm uas Vajtswv tau ua thiab tab tom ua nyob hauv nws lub neej. Nws raug tsev neeg tsim txom, raug thuam tias tus mob no yog ib feem ntawm qhov uas nws ntseeg tsis yog chaw. Tiamsis ntawm tus niam laus no tus kheej, yog lub sijhawm uas Vajtswv pub rau nws muaj sijhawm los ua tim khawv rau tsev neeg. Nws ua siab ntev mus nrog kev ntseeg, txawm paub tias txoj kev no yeej tsis yooj yim. Lub qog yim hnub huam loj, tiamsis Txojmoo Zoo yeej tseem tau qhia ntxiv. Raug mob ntawm lub cev tiamsis Vajtswv txoj kev kaj siab tswj nrees hauv tus ntsujplig. Nyob rau lub sijhawm tsis zoo li ntawd, tus niam laus no lub neej sab ntsujplig yim tawg paj txi txiv.

Ua li koj lub sijhawm tsis zoo yog dabtsi? koj tab tom ntsib lub caijnyoog ntawd li cas? Cia li xaiv nrog Vajtswv mus nyob rau hauv lub caijnyoog. Kuj yog lub sijhawm ntawd, koj yuav nrhiav tau lub ntsiab tiag rau yus lub neej thiab tawg paj txi txiv rau Vajtswv lub npe.

Thov caw nrog kuv peb thov Vajtswv ua ke: Leej Txiv, koj paub zoo tej mob hauv kuv lub cev, tej nra nyhav ntawm lub siab thiab tej lub caijnyoog tsis zoo uas kuv tab tom ntsib. Muaj ntau zaug, kuv tsis muaj zog, qaug zog thiab hnov cuag li tsis muaj zog mus ntxiv. Thov qhia rau kuv paub cia siab rau Koj, txawm yog thaum uas kuv tsis tau nkag siab tias vim li cas, thiab paub ua tim khawv txog koj txoj kev hlub, kev cawmdim rau txhua lub caijnyoog. Kuv thov hauv Tswv Yexus Khetos lub npe, Amees.

Cov kwv tij, koj puas tab tom ntsib lub caijnyoog tsis zoo twg hauv yus lub neej? Tej zaug ntawd yog kab mob kev nkeeg, kev puas tshuaj, lossis lub nra nyhav hauv tsev neeg, lossis tej kev tws kev uas tsis paub qhia leej twg. Nyob hauv tej no, thov txhob xav tias Vajtswv twb txav deb koj lawm. Nyob rau lub sijhawm tsis zoo ntawd, Vajtswv tab tom nyob ze, hnov koj txoj kev ua pa, thiab nkag siab txhua qhov mob uas npog cia.

Yog tias hnub no koj tsis tau pom kev tawm, thov tuav Vajtswv txhais tes, muab cob rau Vajtswv txog tej yam uas koj tsis muaj zog tuav cia. Tas koj yuav pom tias, txawm yog lub caijnyoog tsis tau hloov pauv los, lub siab twb hloov dua tshiab lawm. Thiab nyob rau qhov chaw uas hnov cuag li tsis muaj zog ntawd, Vajtswv yuav siv koj lub neej los ua rau kom muaj kev cia siab, tau kho zoo thiab Vajtswv txoj kev hlub mus pub rau lwm tus.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.