Nyob rau hauv lub neej txhua hnub, peb yooj yim ntsib cov neeg uas tab tom tiv kev txomnyem. Tej zaug yog ib tug neeg laus tsis muaj chaw nyob, ib tug menyuam muaj tsis txaus, lossis ib tug kwv tij twg hauv Pawg Ntseeg uas peb paub tab tom muaj mob. Thaum ntsib tej lub caijnyoog zoo li ntawd, Vajtswv xav kom peb coj tus cwjpwm zoo li cas?

Hnub no, yog hnub 05/02/2026, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia D. Leon Pippin dhau ntawm Zaj kawm LUB SIAB KHUVLEEJ.

“Tiamsis muaj ib tug neeg Xamalis taug kev tuaj txog ntawd, thaum nws porn tus uas tubsab ntaus, nws hlub tus ntawd heev. Nws txav zog mus xyuas, nws muab roj thiab muab cawv txiv hmab hliv rau tus mob ntawd tej qhov txhab thiab muab ntaub qhwv; nws tsaws tus mob ntawd caij nws tus neesluav, nws coj tus mob mus pw tom ib lub tsev so, thiab tu tus mob ntawd” (Lukas 10:33-34).

Muaj ib taig kis thaum sawv ntxov, thaum tab tom tsav tsheb mus rau ntawm chaw ua haujlwm, kuv ntsia pom muaj ib tug txiv neej qaug caw ntawm ntus kev. Tib pliag xwb ces kuv twb yuav luag hais tias: “Ua Vajtswv tsaug vim kuv tsis zoo li tus txiv neej ntawd.”

Tiamsis tas nrho hnub ntawd, kuv ua tsis tau haujlwm li. Daim duab tus txiv neej no pheej tig mus tig los hauv kuv lub hlwb. Kuv xav: “Kom yog mas yuav tau nres pab yawg mus tsev thiaj yog? Tsuas yog ob peb feeb xwb mas, vim li cas yus ho tsis ua li ntawd?”

Kuv hnov cuag li raug ceeb toom. Txog qhov uas noj tsis lo pluas su. Kuv thov Vajtswv pab kuv kom kuv txhob coj tus cwjpwm zoo li cov neeg Falixais, vim kuv pom tias kuv thiab cov neeg Falixais ntawd muaj yam dabtsi twg ntawd muaj ntsis zoo thooj ib yam nyob hauv zaj xwm txheej uas Tswv Yexus hais txog:

“Muaj ib zaug ob tug txivneej mus thov Vajtswv hauv lub Tuamtsev: ib tug yog tus Falixais thiab ib tug yog tus sau se.”Tus Falixais sawv ntsug thiab nws thov hais tias, Vajtswv, kuv ua koj tsaug, kuv zoo tsis thooj li lwm tus, kuv tsis ua neeg siab hlob, kuv yog neeg ncaj ncees, kuv tsis zes luag tej pojniam thiab kuv tsis zoo li tus sau se ntawd” (Lukas 18:10-11).

Tav su hnub ntawd, thaum ua haujlwm tas, kuv tsav tsheb los tsev. Ntau ntu kev, kuv khiav ncaj nraim rau ntawm thaj chaw uas tus neeg qaug cawv taig kis sawv thiab nres tshiab. Hauv kuv lub hlwb yeej tseem tshwm rawv daim duab uas tus txiv neej txomnyem ntawd. Kuv zaum ntawd, ob lub qhov muag saib tsis muaj kev cia siab thiab xav txog qhov uas tus yawg no ntog, tsaib cawv poob ntawm tes, tawg ntawm kev, cawv ntws lug puv kev tas. Tsuas xav txog xwb kuv lub siab mob heev. Thaum ntawd yog kuv hais rau Vajtswv tias: “Tus Tswv, kheev lam daim duab no cia li ploj ntawm kuv lub hlwb mus.”

Kuv tau tsis nres pab yawg ntshai tsam lwm tus ntsia pom thiab kuv yuav raug lawv nkag siab yuam kev. Kuv txaj muag thaum xav tias yus zoo li ib tug pov thawj hlob thiab tus neeg Levis nyob hauv zaj xwm hais txog tus neeg Xamalis siab zoo, thaum lawv mus pom tus neeg raug tub sab ntaus puav leej zam kev. Tswv Yexus tham tias: “Muaj ib tug txivneej taug kev ntawm lub nroog Yeluxalees mus rau nram lub nroog Yelikaus, thaum nws mus txog ib tog kev, txawm muaj ib pab tubsab muab nws ris tsho lwg tas thiab muab nws ntaus yuav luag tuag tso rau ntawm kev. Ces muaj ib tug povthawj taug txojkev ntawd tuaj; thaum nws pom tus ntawd, nws txawm lug kev dub muag txig mus lawm. Tom qab ntawd muaj ib tug Levis taug kev tuaj txog ntawd thiab, nws mus ntsia tus ntawd ib plia, nws txawm lug kev dub muag txig mus lawm thiab. Tiamsis muaj ib tug neeg Xamalis taug kev tuaj txog ntawd, thaum nws porn tus uas tubsab ntaus, nws hlub tus ntawd heev. Nws txav zog mus xyuas, nws muab roj thiab muab cawv txiv hmab hliv rau tus mob ntawd tej qhov txhab thiab muab ntaub qhwv; nws tsaws tus mob ntawd caij nws tus neesluav, nws coj tus mob mus pw tom ib lub tsev so, thiab tu tus mob ntawd. Thaum kaj ntug tus neeg Xamalis muab tau ob lub nyiaj rau tus tswv tsev ntawd thiab hais tias, ‘Thov koj pab tu tus neeg mob no, yog koj siv tshaj ob lub nyiaj no, thaum kuv rov qab los, kuv mam li ntxiv rau koj” (Lukas 10:30-35).

Nyob hauv Tswv Yexus zaj xwm, peb tug neeg uas tshwm ntsej muag ntawm txoj kev hauv Yeluxalees mus rau Yelikaus yog, tus pov thawj hlob, tus Levis thiab tus neeg Xamalis. Txoj kev ntawd ib txwm nto npe phom sij heev txog qhov uas muaj tub sab txhav neeg. Tus pov thawj hlob thiab tus Levis yog ob tug tau suav tias tseem ceeb thiab coj zoo nyob rau hauv cov neeg Yudais, tiamsis nkawd ho tso nkawd tus neeg tsis quav ntsej. Tej zaug nkawd muaj ntau yam ua rau nkawd nres tsis tau. Tej zaug nkawd kuj xav tias: “Txua kev no phom sij heev! Kuv yuav tau mus tsuag tsuag!”, “Tsam tus neeg no tsuas yog lam ua txuj ua neeg raug txhav xwb?”. “Tej zaug yeej yuav muaj ib tug twg tuaj pab nws xwb!”….

Nyob hauv txoj kev xav, peb xav tias cov neeg uas lawv ntseeg ib txoj kev ntseeg twg ces lawv yuav yog thawj tug nqes tes pab. Tiamsis tus neeg Xamalis yog xeem neeg uas cov Yudais ib txwm ntxub thiab suav li yog lawv tus yeebncuab ho yog tus cev tes pab. Tus neeg Xamalis siab zoo “muaj lub siab hlub tshua” pub rau tus neeg ntsib teeb meem, zoo siab hlo pab, tsis yog nyiaj txiag lossis dag zog tib si.

Lub siab hlub tshua tsis yog nres ntawm tej kev xav lossis lo lus hais xwb, tiamsis yuav tau muaj haujlwm nrog. Tus neeg Xamalis no txav mus ze zog, muab tej qhov txhab qhwv thiab tso rau saum nws tus nees, coj mus rau ntawm tsev so, them nyiaj ntiav neeg tu tseem cog lus yuav rov qab los saib.

Nyob hauv Tswv Yexus zaj lus piv txwv, tus neeg raug teeb meem txog qhov uas “tshuav siav lawm xwb”. Tshuav kuv zaj xwm txheej, tus txiv neej uas qaug cawv ntawd, raug cawv ua rau nws txomnyem txog qhov uas tsis paub qhov twg yog lawm. Kuv ua poob lub sijhawm zoo nthuav tawm lub siab hlub tshua thiab Tswv Yexus daim duab pub rau tus neeg tag kev cia siab thiab cheem tsum kev pab.
Kuv cim civ hais daws kuv zaj tias yus tsis khoom thiab tseem tshuav ntau txoj haujlwm yuav ua. Tiamsis hauv kuv lub siab, kuv paub tias yus tsis muaj lub siab hlub tshua thiab tsis quav ntsej txog lwm tus. Zaum hauv tsheb, kuv tsuas hais rau Vajtswv tias: “Tus Tswv, thov koj zam txim rau kuv”.

Tas kuv cim civ cog lus rau tus kheej tias yog muaj ib hnub twg kuv ntsib ib tug neeg tab tom cheem tsum kev pab, kuv yuav nres thiab ua yam uas kuv ua tau, ib yam li tus neeg Xamalis siab zoo tau “muaj lub siab hlub tshua”. “Muab qhwv” thiab coj mus rau ntawm tsev so. Rau qhov yog tsis muaj Vajtswv lub siab hlub tshua, kuv kuj zoo li tus txiv neej uas raug muab tso pov tseg ntawd thiab xwb.

Thov caw nrog kuv peb thov Vajtswv ua ke: Kuv tus Vajtswv, thov pub kom kuv muaj lub siab nthiav dav paub hlub thiab tshua txog tej neeg ib ncig. Thov Vajtswv pab kom kuv tsis ua xyem xyav rau ntawm lawv tej kev cheem tsum, tiamsis zoo siab hlo pab los ntawm tag nrho tej uas Vajtswv pub kuv. Thov kom Vajtswv txoj kev hlub thiab tshua phwj yaws hauv kuv txog qhov uas ntws lug rau sawv tej neeg uas Vajtswv tso ib ncig kuv. Kuv thov hauv Tswv Yexus Khetos lub npe, Amees.

Cov kwv tij txhua tus, ib ncig ntawm peb muaj ntau tus neeg tab tom cheem tsum kev pab, muaj tej tus tab tom muaj mob, muaj tus ntsib kev txomnyem nyiaj txiag, kuj muaj tus qaug zog zis sab ntsujplig. Yog koj tsis muaj sijhawm ntsib cov neeg zoo li ntawd, Vajtswv xav kom koj txhob kaw koj lub qhov rooj siab ruaj ruaj, tiamsis nthuav tawm Vajtswv daim duab thiab Vajtswv txoj kev hlub rau lawv los ntawm ib qhov haujlwm twg, tej zaug yog ib lo lus nug mooo, ib me ntsis sijhawm, lossis pab ib qhov nyiaj raws li koj pab tau. Rau qhov Vajtswv thiaj yog tus xub hlub peb ua ntej, yog li peb kuj yuav tau nthuav tawm yam ntawd rau tej neeg ib ncig peb.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.