Lăm tôm tơ tơdrong jang, lu bơ̆n athei pơjuăt ling lang wă kơ wơ̆ ‘lŏ păng đei tôm tơdrong keh đang. Đon lui kư̆m thoi noh: wah kơ wơ̆ ‘lŏ athei hlôi kơ đơ̆ng tơdrong pơlong lăng. Kră Yang ăn kơ lu bơ̆n ‘bai “pơjuăt tơnat” wă pơjuăt đon lui kơjăp. Na kơplah lăm tơdrong arih rŏ kơ pă kĕ bơih, lu bơ̆n ‘bôh Sư oei chông anhăk lu bơ̆n đơ̆ng rim yak năm, nhen thoi buăl juăt hơdai yak ling lang năm tưk tơiung lu bơ̆n dơ̆ng kơjăp.

Năr ‘nâu, ‘năr 03/02/2026, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Abigail Shaffer kơ̆l ‘bai TƠDRONG JANG ĐON LUI.

“Yua kơ iĕm băt boih, tơ̆ng bơ̆n đei lơ tơdrong gleh, tơdrong gleh noh wă pơlong lăng tơdrong lui bơ̆n, kư̆m bưh mơ̆n, wă kơ bơ̆n lui kơjăp.  Păng bơ̆n athei adrin lui kơjăp khŏm khŏm wă kơ bơ̆n jing bơngai tơpăt huay kơ’bah tơdrong kiơ.” (Yakơ 1:3-4)

Inh hơdai soang ‘balê đơ̆ng oei ‘lơ̆p. đơ̆ng oei hơ’lơ̆p, inh hơpơi wă kơjing minh ‘nu bơngai rơgei gah soang ‘balê. Truh tơdang ei, kơplah ‘lŏ bơih, inh pơtrơp pơjuăt păng oei hưch wă kơ soang ‘nâu nhen thoi blŭng a sơ̆. Đei ‘bôh ‘lơ̆ng rŏ phara, rơgoh dêh lăm soang ‘balê, păng yua kơ tơdrong noh ling lang dui ba inh năm tơ Tơ’ngla Pơjing. Rim kơ pơpơ̆ akâu, inh mơn kơ đei đơ̆ng Kră Yang ăn kơ inh.

Lơ wơ̆t kơplah pơjuăt akâu, inh mơn kơ minh tơdrong ngeh kơ ‘bônh đĕch mă kăl dêh, noh jơ̆ wă kơ soang ‘lơ̆ng, bơngai soang athei đei akâu rơmoăn. Păng ưh kơ đei pơm thoi yơ wă kơ akâu rơmoăn, lĭng lŭng thoi noh dah ưh kơ pơ̆n wă kơ dui akâu tŏ sĕt dơ̆ng, hloh kơ bơ̆n hmă đei hiôk, truh tơ mơn kơ jĭ, đơ̆ng dôm lu pơpơ̆ akâu đơ̆ng ‘bônh truh tơ tơnat, tôm tơdrong kăl kơ đei jơhngơ̆m adrin wă kơ đei gơh hloh.

Lăm trong yak năm kiơ̆ Kră Yang kư̆m thoi noh. Lu bơ̆n ngăl tơchĕng, hơpơi wă păng tơdrong proh kơdih noh ‘lơ̆ng hloh. Mă lei kơplah pơ̆n lĕch đơ̆ng anih kơjăp, pơ̆n pơjao kơ Kră Yang, lu bơ̆n ‘bôh tơdrong tơdă đơ̆ng Sư tih dêh păng ‘lơ̆ng hloh kơ tơdrong lu bơ̆n tơchĕng. Đon lui ưh kơ đei wơ̆ ‘lŏ tơdah lu bơ̆n dơ̆ng kơtă anih.

Kơplah đe lăng soang ‘balê, lu sư ‘bôh jơ̆ng ti akâu pơpơ̆ ‘lơ̆ng dêh. Tŏ sĕt đĕch bơngai băt adrol kơ noh jơ̆ đei jơ năr pơmat. Đei jơ pơjuăt, kơplah plôh chơkhŏ arăng đĭ, inh jĭ truh tơ jet kơdih: jĭ lâu hăm trŏ ưh? Mă lei nơ̆r tơl ling lang khan “trŏ!” “No pain, no gain” dah “Ŭnh pơlong lăng maih”. Yua kơ dôm kơ đei apah, dôm lu tơdrong ‘lơ̆ng păng kơjăp lăm teh đak ‘nâu kăl kơ đơ̆ng đei jơhngơ̆m chơ̆n păng adrin.

Nơ̆r ‘Bok Kei-Dei kư̆m bơtho lu bơ̆n thoi noh. Yakơ 1:3 pơma thoi âu đon lui đei pơlong lăng, jơhngơ̆m chơ̆n gô đei wơ̆ ‘lŏ. Tơdah tơdrong arih kiơ̆ Kră Yang ‘bônh ngăl đĕch, lei dah đei tơdrong pơlong lăng iĕ đĕch lu bơ̆n ‘bônh kơ pơ̆k huŏng. Kră Yang yua iŏk tơdrong truh wă pơjuăt pơhngol lu bơ̆n, nhen thoi soang ‘balê dui akâu jăn noh. Mă khan jĭ, mă lei kăl dêh. Mă khan anat anot, na gô đơ̆ng noh gô đei yua.

Inh ngăl pơma hơnul thoi âu ‘balê jơ̆ “soang gah đon lui”. Yua kơ bơngai soang ưh kơ gan đei soang minh adrô̆. Lu nhôn lui ngeh kơ buăl soang hơdai, lui ngeh kơ khŭl wă bơwei nhip. Tơdah ưh kơ lui ngeh dih băl, ‘bai soang noh gô ưh kơ tơproh păng gô tơsŭl. Tơdah đei tơdrong truh, buăl gô ưh kơ đei bu wă tơgŭm.
Đon lui kơ Kră Yang kư̆m thoi noh. Lu bơ̆n đei krao iŏk athei gơnang kơ Sư, Tơ’ngla chông anhăk rim trong yak năm lu bơ̆n. Kư̆m đei, lu bơ̆n lăng trong yak năm kiơ̆ Kră Yang nhen thoi năm minh adrô̆: adrin kơdih, hiơ̆k kơdih păng tơblah hăm tôm tơdrong. Mă tơpă, Kră Yang tam mă đei wă kơ lu bơ̆n adrin kơdih.

Păng lăng ming tơrŏng, inh lăng tơdrong arih kiơ̆ Kră Yang nhen thoi “soang lăm đon lui”. Kư̆m đei chăl lăp ai, đei chăl tơtăm dêh, đei dôm lu “pơplŏng” pơm kơ inh hli ưh kơ băt wă dơ̆ng thoi yơ. Mă kư̆m đei chăl hơ iă dêh, kơplah inh mơn rơđah Kră Yang tưk tơiung, chông anhăk inh. Tơm kơ đơ̆ng hơdai noh đơ̆ng Kră Yang pơm kơ trong yak năm ‘nâu jing ‘lơ̆ng rŏ, hloh kơ soang ‘balê.

Apĭnh đĭ đăng krao khan hơdai: Kră Yang ơi! Kon bơnê kơ Ih yua kơ Ih ling oei hơdai kon lăm rim trong kon yak năm, mă kơplah hiôk ‘lơ̆ng kư̆m mă đei tơdrong pơlong lăng. Apinh bơtho kon băt kơ chơ̆n jơhngơ̆m păng chu yom thoi bơngai soang adrin pơjuăt, wă kơ đon lui kon rơih iŏk tơdrong trŏ păng wơ̆ ‘lŏ kiơ̆ thoi Ih lăp đon. Kơplah kon mơn kơ gleh lap dah bơ̆l hăl, apinh tơ’blŏk kơ kon Ih oei oei hơdai, tưk tơ iung păng bơtho kon rim kơ yak năm. Hơpơi kơ chăl arih kon jing bơngai soang ‘lơ̆ng lăm đon lui, pơdah tơdrong ư -ang kơ Ih! Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, đon lui rim ‘nu lu bơ̆n kơ Kră Yang hăm trŏ kơ thoi soang ‘lơ̆ng rŏ, hơ iă mă Kră Yang đei chhơ̆ bơih ưh, rim kơ trong yak năm, rim kơ yak pơplŏng, rim tơdrong pơm dah dui jơhngơ̆m tai hơdrol kơ wă soang noh ba lu bơ̆n jê̆ Tơ’ngla pơjing bơwei tơdrong arih lu bơ̆n ưh? Đon lui rim ‘nu lu bơ̆n hăm đei pơjuăt rim năr, đơ̆ng rim kơ trong năm wơ̆ ‘lŏ lăm Kră Yang ưh? Păng rim ‘nu, lu bơngai jum dăr kơ lu bơ̆n hăm đei ‘bôh “soang” ‘lơ̆ng lăm đon lui kơ Kră Yang đơ̆ng rim ‘nu lu bơ̆n dah ưh?

Năr ‘nâu, rim ‘nu lu bơ̆n athei tơpăt tơl dôm lu nơ̆r jet ‘nâu, păng năm tơ Kră Yang păng gơnang kơ Sư, Tơ’ngla gô tưk tơ iung lu bơ̆n lăm trong yak năm hăm đon lui kơ Kră Yang, lăm trong yak năm “ tŏk tơ kơjung hloh”, jrŭ să hloh, lăp đon hloh.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.