Lăm tơdrong arih rim năr, lu bơ̆n ‘bônh kơ tơ’bơ̆p lu bơngai đei tơdrong arih anat anot. Rŏ lăng noh jơ̆ bơngai kră, minh ‘nu bơngai hơ’lơ̆p kơ’bah, dah ‘nhŏng mŏ oh lăm Hnam Akŭm mă buăl juăt lu bơ̆n băt đei tơdrong jĭ jăn. Kơplah tơ’bơ̆p tơdrong arih thoi noh, Kră Yang wă kơ lu bơ̆n pơm thoi yơ?

Năr ‘nâu, ‘năr 05/02/2026, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih D. Leon Pippin kơ̆l ‘bai JƠHNGƠ̆M ‘BRƠ̆K MƠNAT

“Tơpo hơtuch đei minh ‘nu bơngai dêh đe Samri kư̆m năm truh tơ noh. Sư ‘bôh bơngai noh na sư đei đon ‘brơ̆k mơnat. Sư thar pik đak pơgang ‘bơ̆t rơka jĭ păng pơ̆n hloi jĭ noh, klaih kơ noh atŏk sư kơpal kơdŭ aseh sư kơdih, chơ ba sư tơ hnam tơmoi tep wă tơgŭm wei-lăng sư tơ noh.” (Luka 10:33-34)

Lăm minh pơge noh, kơplah oei wơ̆r gre năm jang, inh lăng ‘bôh minh ‘nu bơngai drŏnglo suai kơ tơdrô oei yak năm we wo tơ ter trong. Pă ‘biơ̆ đĕch inh đei tơlĕch nơ̆r pơma: “Bơnê kơ Kră Yang yua kơ kon huay kơ thoi bơngai drŏnglo noh.”

Mă lei prăt năr kơ năr noh, inh pă đei kơ nhăm kơ tơdrong jang. Rŭp bơngai drŏnglo noh ling lang tơ‘bôh lăm đon tơchĕng inh. Inh tơchĕng: “Trŏ kơ inh dơ̆ng ‘mơ̆i na tơgŭm sư brŏk tơ hnam? Lăp minh ‘bar phŭt đĕch khăn yua kơ kiơ inh ưh kơ pơm kih?”

Inh mơn kơdih inh đei tơ’blŏk. Truh tơ ‘năr dơ̆ng inh kư̆m pă đei lŭ sŏng sa. Inh krao khan apinh Kră Yang tơgŭm inh huay kơ đei jơhngơ̆m thoi bơngai Pharisi đei tơdrong noh lei lăi thoi lăm tơdrong pơtih gia đơ̆ng Yang Yêsu:

“’Bar ‘nu bơngai năm tơ hnam akŭm ‘Bok Kei-Dei tơm wă krao khan. Minh ‘nu ‘nei bơngai Pharisi, minh ‘nu dơ̆ng bơngai chă iŏk jên thuê̆. Na ‘bok bơngai Pharisi ei dơ̆ng dơ’nhơ̆ng ngoi tơ plĕnh krao khan lăm to khan: ‘Ơ ‘Bok Kei-Dei, inh bơnê kơ Ih yua kơ inh ưh kơ sĭ bơngai thoi đe nai ôh. Inh ưh kơ sĭ bơngai ưh kơ tơpăt, chă pơgâm sa đe ôh. Inh ưh kơ ngôi kư̆ kă ôh. Inh kư̆m ưh kơ sĭ thoi lĕ bơngai chă iŏk jên thuê̆ ‘noh ôh.” (Luka 18:10-11).

Kơ sơ̆ năr noh, đơ̆ng rŏng kơ đang kơ jang, inh wơ̆r gre brŏk tơ hnam. Lăm trong yak năm, inh năm truh tơ anih bơngai drŏnglo noh hei. Lăm đon tơchĕng inh oei ‘bôh bơngai drŏnglo pơmat tat noh. Inh tơ oei ‘bơ̆t doh, măt inh lăng tơchĕng ‘bôh sư pơ̆k, kơchai tơdrô huŏng tơ ala, na grŏl tơ trong, tơdrô tơsĭ tơ trong. Tơchĕng đĕch mă inh chhŭr nuih tơpă. Kơplah noh, inh ‘maih pơma dơnuh hăm Kră Yang đĕch: “Kơkuh kơ Kră Yang, hơpơi kơ tơdrong ‘nâu huay pă đei đơ̆ng lăm đon tơchĕng kon.”

Inh ưh kơ đei dơ̆ng tơ gŭm sư yua kơ hli kơ bơngai nai lăng ‘bôh na tơchĕng ưh kơ ‘lơ̆ng kơ inh. Inh mơlâu kơplah tơchĕng inh nhen thoi ‘bok soi păng bơngai Lêwi lăm tơdrong hơ’mon kơ bơngai Samri ‘lơ̆ng tơpăt, kơplah lu sư năm ‘bôh bơngai pơ̆k mă lei wer weh. Yang Yêsu khan thoi âu: “Đei minh ‘nu bơngai Juđê yak đơ̆ng Pơlei Jêrusalem wă năm tơ Pơlei Jêrikô. Kơplah sư năm rok trong sư tơ’bơ̆p lu bơngai răp tơgar. Na lu bơngai răp tơgar ei tơgar iŏk jên tơmam hơbĕn ao sư đĭ păng teh sư rơka jĭ jơ̆p-jang kơ akâu. Klaih kơ noh lu bơngai noh kơdâu weh achăng kơdrô̆ sư lôch mol ‘bơ̆t noh. Đơ̆ng rŏng ‘biơ̆ kơ noh đei minh ‘nu ‘bok soi Juđê năm rok trong noh ‘bôh sư ră, mă-lei sư năm yoh đĕch. Đơ̆ng rŏng kơ noh dơ̆ng đei minh ‘nu bơngai Juđê khŭl đe Lêwi mă jang tơ hnam akŭm ‘Bok Kei-Dei tơm, sư kư̆m năm rok trong noh mơ̆n ‘bôh sư ră, sư kư̆m năm yoh đĕch. Tơpo hơtuch đei minh ‘nu bơngai dêh đe Samri kư̆m năm truh tơ noh. Sư ‘bôh bơngai noh na sư đei đon ‘brơ̆k mơnat. Sư thar pik đak pơgang ‘bơ̆t rơka jĭ păng pơ̆n hloi jĭ noh, klaih kơ noh atŏk sư kơpal kơdŭ aseh sư kơdih, chơ ba sư tơ hnam tơmoi tep wă tơgŭm wei-lăng sư tơ noh. Truh pơgê dơning sư ăn kơ tơ’ngla hnam tơmoi noh ‘bar hlak jên hu păng pơkă khan: ‘Ih wei-lăng bơngai jĭ âu hŏ. Dah jên âu ưh kơ mah lei gô inh wih tơ âu dơning dơmônh inh gô ăn pơthim kơ ih dơ̆ng mă tôm.’ ” (Luka 10:30-35)

Lăm tơdrong pơtih gia Yang Yêsu đei tơpêng ‘nu bơngai yak năm tơ trong đơ̆ng Jêrusalem năm tơ Jêrikô, noh jơ̆ ‘bok soi, bơngai Lêwi păng bơngai Samri. Trong noh đe ang kơ ling lang đei tơtông. ‘Bok soi hăm bơngai Lêwi lăng thoi bơngai kăl dêh păng arih ‘lơ̆ng kiơ̆ kơ tơdrong arih bơngai Isơrael, mă lei sư achăng lê̆ kon pơlei sư. Rŏ lăng sư đei lơ tơdrong na ưh kơ dơ̆ng. Rŏ lăng lu sư tơchĕng: “Trong ‘nâu hli krê dêh! Inh kăl kơ yak mă tĕnh!”, “ Dah bơngai ‘nâu sư pơm đĕch wă tơtông na gô thoi yơ?”, “ Rŏ lăng gô đei bu noh năm tơgŭm sư mơ̆n!”…

Lăm tơdrong ngăl juăt kơ tơchĕng, lu bơ̆n ngăl khan lu bơngai kiơ̆ tơdrong lui noh jơ̆ bơngai blŭng a gô năm tơgŭm. Mă lei bơngai Samri noh jơ̆ bơngai Isơrael ngăl pơdê lăng nhen thoi ayăt dih băl, mă đei năm tơgŭm. Bơngai Samri đei “jơhngơ̆m ‘brơ̆k mơnat” kơ bơngai pơ̆k, đei jơhngơ̆m dŏng tơgŭm ưh kơ kăl kơ jên tơmam dah tơchĕng kơ hiong jơ năr.

Jơhngơ̆m ‘mêm mơnat ưh kơ đơ̆ng mơn ‘brơ̆k dah nơ̆r pơma đĕch, mă hăm đơ̆ng tơdrong pơm hloi. Bơngai Samri năm jê̆, pơ̆n chô̆ jĭ rơka, hiŏng bơngai jĭ hao tơ kơpal aseh, ba truh tơ anih tơmoi ‘bĭch, ăn jên ming hơmet bơwei, păng pơkă gô wơ̆t dơ̆ng.

Lăm tơdrong pơtih gia Yang Yêsu, bơngai noh đe teh truh tơ “lôch mol”. Na lăm tơdrong hơ’mon inh, bơngai drŏnglo noh pơm kơ sư pơmat tat truh tơ pă băt kiơ. Inh tơhiong lê̆ wă tơ ‘bôh tơdrong ‘mêm păng rup Yang Yêsu ăn kơ bơngai oei ơh sơ’ngon păng kăl kơ wă tơgŭm.

Inh dŏng kơdih inh khan inh hrăt hrot dêh păng đei lơ tơdrong oei wă bơ̆jang. Mă lei lăm jơhngơ̆m inh, inh ưh kơ đei tơdrong ‘mêm mơnat păng hiơ̆k kơ bơngai nai. Tơ oei tơ lăm gre, inh pơma hăm Kră Yang: “Kơkuh kơ Kră Yang, apinh mơnat kơ kon.”

Na inh đei pơdrơ̆ng kơdih inh thoi âu tơdah minh năr ayơ noh inh đei tơ’bơ̆p minh ‘nu bơngai kăl kơ tơgŭm, inh gô dơ̆ng ‘mơ̆i păng pơm minh tơdrong kiơ noh, nhen thoi bơngai Samri ‘lơ̆ng tơpăt “jơhngơ̆m ‘brơ̆k mơnat”, “pơ̆n chô̆ hơmet” păng năm ba bơngai jĭ năm ‘bĭch tơ “hnam tơmoi tep” bơwei rong. Yua kơ dah ưh kơđei jơhngơ̆m ‘mêm mơnat đơ̆ng Kră Yang, inh kư̆m nhen thoi bơngai drŏnglo mă achăng lê̆ ter trong noh.

Apĭnh đĭ đăng krao khan hơdai: Kơkuh kơ Kră Yang mă ‘mêm, apinh Kră Yang ăn kơ kon đei jơhngơ̆m hơlăng wă kơ băt ‘mêm mơnat kơ bơngai jum dăr kơ kon. Apinh Kră Yang tơgŭm kon huay kơ pơ‘lŏ kơ đei bơngai kăl wă kơ kon, đei jơhngơ̆m tơgŭm hăm đĭ dôm lu tơdrong Kră Yang ăn kơ kon. Apinh tơdrong ‘mêm mơnat đơ̆ng Kră Yang ăn ‘bĕnh blai kơ rim ‘nu bơngai jum dăr kơ kon. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, jum dăr kơ lu bơ̆n đei lơ bơngai kăl kơ wă tơgŭm tưk tơ iung, đei lu bơngai jĭ jăn, đei bơngai anat anot kơ jên tơmam, kư̆m đei bơngai rơdu đơ̆ng lăm bơhngol. Tơdah buăl đei tơ’bơ̆p ‘nhŏng mŏ oh thoi noh, Kră Yang ưh kơ wă kơ buăl tang kơjăp lê̆ jơhngơ̆m, na athei tơ’bôh tơdrong ‘mêm mơnat Kră Yang ăn kơ lu sư hăm tơdrong bơ̆jang, kư̆m hăm tơdrong năm ngôi hơpong, ‘măn tŏ sĕt jơ năr, dah tơgŭm jên tơmam kiơ̆ kơ buăl đei. Yua kơ Kră Yang ‘mêm kơ lu bơ̆n hơdrol, na lu bơ̆n athei tơ’bôh tơdrong noh ăn kơ lu bơngai jum dăr kơ bơ̆n.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.