Koj tab tom ua lub neej ntseeg Vajtswv zoo li cas? Thaum koj ntog, koj pheej coj zoo li cas? Ib qhov tseeb yog peb pheej xav liam txim rau lub sijhawm, rau qhov chaw lossis lwm tus, muaj tsawg tus kam lees tias vim yus qaug zog, tsis quav ntsej Vaj Ntsujplig cov lus ceeb toom. Qhov no nthuav tawm txoj kev ua neej raws li sab nqaij tawv pauv qhov uas ua neej raws li Vaj Ntsujplig.

Hnub no, yog hnub 06/02/2026, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Jeff Markins dhau ntawm Zaj kawm UA NEEJ RAWSLI SAB NQAIJTAWV LOSSIS UA NEEJ RAWSLI NTSUJPLIG.

“Cov uas ua lub neej rawsli sab nqaijtawv, cov ntawd yeej xavntsoov rau tej uas sab nqaijtawv ntshaw. Tiamsis cov uas ua lub neej rawsli Vaj Ntsujplig, cov ntawd yeej xavntsoov rau tej uas Vaj Ntsujplig lub siab ntshaw.” (Loos 8:5).

Tsis ntev no kuv muaj sijhawm ntsib ib tug phooj ywg thiab wb zaum sib tham ua ke. Thaum sib tham, wb cia li tham txog tej cwjpwm phem yav dhau los. Kuv tus phooj ywg tham txog ib tug neeg uas nws paub tau ua txhaum kev nkauj nraug. Yam txaus nyuaj siab yog pauv qhov uas hnov txaj muag, tus neeg no ho tham txog qhov ua yuam kev ntawd yam txaus siab heev thiab xaus los ntawm ib lo lus tias: “Txiv neej ces yeej yog li no, yuav paub ua li cas na!”

Kuj zoo ib yam li ntawd, pauv qhov uas loj hlob thiab ua neej kom paub ris lub nra, ntau tus xav tias yus muaj cai ua txhua yam, los ntawm lo lus hais tias “Kuv yeej ib txwm coj li os!” tiamsis Vajtswv txojlus qhia meej meej tias muaj yam yog thiab muaj yam tsis yog. Peb yuav ua neej tsis tswj tus kheej tas tseem xav kom luag lwm tus hwm yus ib yam li cov neeg uas txaus ntseeg. Vajtswv paub zoo peb lub siab, thiab peb tej haujlwm hais tawm tag nrho peb tus neeg zoo li cas.
Peb yuav siv tsis tau lo lus “kuv tus neeg ces yeej yog li no” los ua txhaum kev nkauj nraug, los twv txiaj, noj tsis txuag tus kheej, saib tej xov xwm qias neeg, lossis siv nyiaj tsis txuag. Tag nrho tej no tsis yog hais txog ib lub neej ywj pheej, tsuas ua rau peb tsis loj hlob txaus thiab tsis ris yus lub nra xwb. Paulus hais tias: “Cov uas ua lub neej rawsli sab nqaijtawv, cov ntawd yeej xavntsoov rau tej uas sab nqaijtawv ntshaw. Tiamsis cov uas ua lub neej rawsli Vaj Ntsujplig, cov ntawd yeej xavntsoov rau tej uas Vaj Ntsujplig lub siab ntshaw.” (Loos 8:5).

Qhov uas tib neeg muaj tej yam uas yus nyiam, yus ntshaw lossis yus xav tau puav leej yog yam uas ib txwm muaj. Teeb meem yog peb cia yam twg tswj yus lub neej xwb.

Paulus hais tias tib neeg muaj ob txoj kev xaiv: xaiv ua neej li sab nqaij tawv lossis ua raws li Vaj Ntsujplig. Tus neeg ua raws sab nqaij tawv cia tej kev xav, tus cwjpwm thiab tej kev ntshaw ntawm tus kheej tswj; tshuav tus neeg ua raws li Vaj Ntsujplig cia Vajtswv qhov tseeb ua tus coj yus txoj kev xav thiab yus tes haujlwm.
Thaum uas ib tug neeg hais tias “kuv ib txwm zoo li no” los hais daws yus qhov kev txhaum, tseeb tiag yog lawv tab tom xaiv ua neej raws sab nqaij tawv. Tus neeg no cia txoj kev xav thiab tus kheej txoj kev ntshaw muab tso siab dua txoj kev dawbhuv thiab mloog Vajtswv lus. Tshuav tus neeg ua raws li Vaj Ntsujplig tsis txhais tias yog peb yuav tau yuam tus kheej hauv txojcai lossis tsis muaj kev ywj pheej. Vajtswv tso cai rau peb nrhiav lub ntiajteb ntawm tus kheej, tiamsis peb cheem tsum Vajtswv tej lus ua tus tshim ntsuas rau peb lub neej.

Vam khom Vajtswv tej lus, peb thiaj ceev tau peb tus kheej kom dawbhuv thiab tswj tau peb, kom peb lub neej tau txais kev zoo siab thiab kev ywj pheej tiag. Kev zoo siab tsis raws li Vajtswv lub siab nyiam coj peb mus txog rau qhov tsis muaj dabtsi thiab ua txhaum, tiamsis kev zoo siab hauv Vajtswv ua rau peb muaj kev zoo siab thiab kev txaus siab.

Yog li, loj hlob yog thaum peb paub muab peb tej kev ntshaw thiab tej yam yus nyiam tso rau Vajtswv ua tus coj. Peb tsis hais tias “kuv ib txwm zoo li no” los hais daws peb qhov haujlwm ua yuam kev. Tiamsis peb paub tias yus yuav tau hloov pauv txhua hnub kom zoo li Yexus Khetos.

Thov caw nrog kuv peb thov Vajtswv ua ke: Kuv tus Vajtswv, thov koj hlub tshua zam txim rau kuv vim muaj ntau zaug kuv qaug zog thiab siv zog hais daws rau kuv tej kev txhaum. Thov cawm kuv dim ntawm tej kev ntshaw ntawm qhov muag, sab nqaij tawv lossis kev khav theeb hauv lub neej no, yog tej yam uas tsis haum Vajtswv siab. Thov Vajtswv pab kom kuv paub txo hwjchim, lees txim thiab ua neej raws li Vaj Ntsujplig ua tus coj. Thov pub kom kuv zais Vajtswv tej lus hauv siab, kom Vajtswv tej lus coj kuv txhua lo lus hais, txhua qhov kev xav thiab haujlwm. Thov kom Vaj Ntsujplig coj kuv hauv lub neej dawbhuv, mloog Vajtswv lus. Kuv thov hauv Tswv Yexus Khetos lub npe, Amees.

Cov kwv tij cia li los cuag Vajtswv ntawm lub siab txo hwjchim thiab lees txim, thov Vajtswv zam txim hloov pauv thiab pab kom koj mus raws li Vaj Ntsujplig ua tus coj. Zam kom deb tej yam uas ua rau koj “ua neej raws li sab nqaij tawv”. Vam khom Vajtswv lub zog kom koj kov yeej tej kev ntxeev ntxias thiab nrhiav tau kev zoo siab hauv tej yam uas haum Vajtswv siab. Thov kom hnuv no, peb txhua tus yuav cog lus, mus nrog Vaj Ntsujplig ua tus coj kev, thiab peb lub neej yuav saj tau koob hmoov hauv txoj kev mloog lus.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.