Buăl oei arih chăl arih kiơ̆ Kră Yang thoi yơ? Kơplah pơ̆k huŏng, buăl ngăl đei pơm tơ’bôh thoi yơ? Mĭnh tơdrong tơpă jơ̆ lu bơ̆n ngăl đei pơtă kơ tơdrong, anih jum dăr dah bơngai nai, tŏ sĕt bơngai đĕch drơ̆ng khan kơdih kâu đei rơdu păng ưh kơ bơngơ̆t kơ tơdrong roi tơbăt đơ̆ng Yang Bơhgol ‘Lơ̆ng. Tơdrong ‘noh tơ’bôh tơdrong juăt arih gơnang kơdih tơplih kơ arih kiơ̆ kơ Yang Bơhngol ‘Lơ̆ng.

Năr ‘nâu, ‘năr 06/02/2026, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Jeff Markins kơ̆l ‘bai ARIH GƠNANG KƠDIH DAH ARIH KIƠ̆ YANG BƠHNGOL ‘LƠ̆NG?

“Lu bơngai mă gơnang kơ akâu sư kơdih, lu sư adrin adran hăm akâu sư kơdih. Lu bơngai gơnang kơ Yang Bơhngol ‘Lơ̆ng, lu sư gô mơ̆ng kơ Yang Bơhngol ‘Lơ̆ng.” (Rôm 8:5)

Brei mơsơ̆ inh đei jơ tơ’bơ̆p dơ̆ng mĭnh ‘nu buăl păng lu nhôn đei hơ oei pơma dơnuh hơdai. Lăm kơplah pơma dơnuh, măr nhi đei pơrơ̆ng tơ’blŏk gah dôm tơdrong juăt so ưh kơ ‘lơ̆ng. Buăl inh roi gah mĭnh ‘nu bơngai mă sư băt đei pơm yoch pơm pơyô kư̆ kă. Tơdrong đei sơ’ngon ‘noh jơ̆, tơplih kơ đei ‘bôh mơlâu, bơngai noh ngăl roi gah dôm tơdrong yoch glăi ‘noh hăm muh măt ‘nă hal, na pơtôch hăm mĭnh nơ̆r: “Drŏnglo thoi noh nei, băt liơ gơh!”

Kŭm lei lăi thoi noh, tơplih kơ wơ̆ ‘lŏ păng arih đei hiơ̆k bơngơ̆t, lơ bơngai đei tơchĕng khan kơdih gơh pơm đĭ đăng tôm tơdrong kiơ, hăm nơ̆r juăt kơ pơma “Inh jơ̆ thoi noh!” Mă lei Nơ̆r Kră Yang bơtho hơđăl tơpă khan đei tơdrong trŏ păng đei tơdrong glăi. Lu bơ̆n ưh kơ gơh arih kiơ̆ kơ wă na hơpơi kơ bơngai nai pơyom kơ bơ̆n thoi dôm lu bơngai trŏ kơ gơnang. ‘Bok Kei-Dei băt hơđăl jơhngơ̆m lu bơ̆n, păng bơ̆jang đơ̆ng lu bơ̆n đei tơ’bôh lu bơ̆n jơ̆ kon bơngai thoi yơ.

Lu bơ̆n ưh kơ gơh yua nơ̆r pơma “kon bơngai jơ̆ thoi noh” wă pơm yoch pơm pơyô kư̆ kă, pơm wăn ‘bai, sa tơmam mơ̆ng kơ wă, lăng tơdrong ‘mê̆ ‘mach, dah yua tơmam jên pơhuach ưh kơ trŏ. Đĭ đăng dôm tơdrong ‘noh ưh kơ đei pơma tơ’bôh mĭnh chăl arih rơngei, na lăp tơ’bôh bơngai noh ưh kơ đei tơdrong wơ̆ ‘lŏ păng ưh đei bơngơ̆t kơ chăl arih kơdih. ‘Bok Pôl đei pơma khan: “Lu bơngai mă gơnang kơ akâu sư kơdih, lu sư adrin adran hăm akâu sư kơdih. Lu bơngai gơnang kơ Yang Bơhngol ‘Lơ̆ng, lu sư gô mơ̆ng kơ Yang Bơhngol ‘Lơ̆ng.” (Rôm 8:5)

Tơdrong kon bơngai đei dôm tơdrong ‘maih wă, hưch hanh dah rơhing jơ̆ tơdrong hmă đĕch. Tơdrong ‘bơ̆t anih jơ̆ lu bơ̆n ăn tơdrong kiơ chông anhăk chăl arih bơ̆n. ‘Bok Pôl pơma khan kon bơngai đei ‘bar tơdrong rơih iŏk arih: arih gơnang kơ kơdih dah arih kiơ̆ kơ Yang Bơhngol ‘Lơ̆ng. Bơngai arih kiơ̆ kơdih wă kơ jơhngơ̆m mơn, tơdrong juăt hưch wă kơdih kâu pơgơ̆r; na bơngai arih kiơ̆ Yang Bơhngol ‘Lơ̆ng ăn kơ Tơdrong Tơpă đơ̆ng Kră Yang bơtho tơdrong tơchĕng păng pơm tơ’bôh đơ̆ng bơ̆n.

Dah mĭnh ‘nu bơngai pơma “inh jơ̆ thoi noh” wă pơma pơdŏng kơ tơdrong yoch, tơpă jơ̆ lu sư oei rơih arih gơnang kơdih. Bơngai noh ‘bônh dêh dan jơhngơ̆m mơn păng hưch wă kơdih kơjung hloh kơ tơdrong rơgoh păng chu yom kơ Kră Yang. Tơplơ̆ dơ̆ng, arih kiơ̆ Yang Bơhngol ‘Lơ̆ng ưh kơ trŏ jơ̆ lu bơ̆n athei pơgŏ kơdih lăm tơdrong juăt dah đei hiong tơdrong rơngei. ‘Bok Kei-Dei ăn kơ lu bơ̆n chơ chă wă kơ băt gah teh đak truh kơ kơdih akâu jăn bơ̆n, mă lei kăl kơ Nơ̆r Kră Yang pơm tơmam chông tơ’bôh kơ chăl arih bơ̆n.

Yua kơ đơ̆ng Nơ̆r ‘Bok Kei-Dei, lu bơ̆n gơh bơwei kơdih lăm tơdrong ‘lơ̆ng rơgoh păng gơh gơ̆t, na wă kơ chăl arih lu bơ̆n gơh sơng iŏk tơdrong hiôk chơt păng tơdrong rơngei tơpă. Tơdrong hiôk chơt ưh kơ kiơ̆ Kră Yang lăp đon gô ba ăn tơdrong rơhông păng tơdrong yoch, mă lei tơdrong hiôk chơt lăm Kră Yang ba ăn tơdrong hiôk hian păng jơhngơ̆m hiôk.

Thoi noh, wơ̆ ‘lŏ jơ̆ kơplah lu bơ̆n băt dan dôm tơdrong hơpơi wă păng tơdrong ‘maih wă đơ̆ng kơdih lăm tơdrong bơtho tơ’bôh đơ̆ng Kră Yang. Lu bơ̆n ưh kơ pơma “inh jơ̆ thoi noh” wă pơdŏng kơ tơdrong bơ̆n pơm, mă lei lu bơ̆n băt kơdih kăl kơ gơh tơplih rim năr wă kơ lei lăi rup đơ̆ng ‘Bok Krist.

Apĭnh đĭ đăng krao khan hơdai: Kơkuh kơ Kră Yang, apinh Kră Yang mơnat ăn huay kơ jô̆ yo kơ kon yua kơ lơ wơ̆t kơplah kon rơdu păng adrin pơma pơdŏng kơ tơdrong yoch kơdih. Apinh dŏng pơklaih kon lĕch hlôi đơ̆ng kơdôm tơdrong hưch hanh đơ̆ng măt, hưch hanh đơ̆ng sĕch akar, dah tơdrong pơang đơ̆ng chăl arih ‘nâu, jơ̆ dôm tơdrong Kră Yang ưh kơ lăp đon. Apinh Kră Yang tơgŭm kon băt tơjur kơdih, tơbral păng arih kiơ̆ tơdrong bơtho tơ’bôh đơ̆ng Yang Bơhngol ‘Lơ̆ng. Apinh ăn kơ kon răk Nơ̆r Kră Yang lăm jơhngơ̆m kon, ăn kơ Nơ̆r Ih bơtho tơ’bôh kon lăm rim kơ nơ̆r pơma, rim kơ tơdrong tơchĕng păng bơ̆jang. Hơpơi kơ Yang Bơhngol ‘Lơ̆ng chông anhăk kon lăm tơdrong juăt arih ‘lơ̆ng rơgoh, chu yom Kră Yang ling lang. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, athei năm hăm Kră Yang lăm jơhngơ̆m chu iŏk đon ala păng tơbral, apinh Sư huay kơ jô̆ yo, tơplih ‘nao păng tơgŭm buăl yak kiơ̆ tơdrong chông anhăk đơ̆ng Yang Bơhngol ‘Lơ̆ng. Athei weh ataih đơ̆ng dôm anih ‘bônh kơ pơm kơ buăl “arih kiơ̆ kơdih”. Athei gơnang kơ jơhngơ̆m pran Kră Yang ăn kơ buăl gơh kĕ jei hloh tơdrong pơhlŭ păng chơ chă tơdrong hiôk chơt lăm dôm tơdrong Sư lăp đon. Hơpơi kơ năr ‘nâu, rim ‘nu lu bơ̆n gô pơkă hơpơi, yak kiơ̆ tơdrong bơtho tơ ‘bôh đơ̆ng Yang Bơhngol ‘Lơ̆ng, păng chăl arih lu bơ̆n gô hlôi mơn đei pŭn hiôk lăm tơdrong kơdih chu yom nơ̆r.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.