‘Bok Kei-Dei jơ̆ Tơ’ngla tih hloh kơ đĭ đăng, hloh kơ hlôh băt kon bơngai. Kơplah pơma khan Tơ’ngla tih hloh kơ đĭ đăng, lu bơ̆n drơ̆ng khan kơdih bơ̆n ưh kơ hlôh tôm kơ Sư. Mă khan ưh kơ hlôh tôm kơ Sư, sĭt lu bơ̆n hlôh kơ sư ‘mêm kơ lu bơ̆n păng đei tơdă ăn tơdrong arih ‘lơ̆ng kơ lu bơ̆n, mă kơplah lu bơ̆n ưh tam mă hlôh tôm tơdrong Sư oei bơ̆jang.

Năr ‘nâu, ‘năr 07/02/2026,tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Peter Lundell kơ̆l ‘bai TƠ’NGLA TIH HLOH KƠ ĐĬ ĐĂNG.

Plĕnh kơjung hloh kơ teh dang yơ, na trong Inh kơjung hloh kơ trong lu iĕm păng. Đon tơchĕng Inh kơjung hloh kơ đon tơchĕng lu iĕm kư̆m dang noh.” (Êsai 55:8-9)

Inh oei dơ̆ng ‘bơ̆t gơng ‘Măng Maih tơ San Francisco, teh đak Mi. ‘Bơt anăp inh đei kơ pơjing gơng tih dêh. Lăng ‘bôh tơdrong ‘lơ̆ng noh, jơhngơ̆m inh tơchĕng ‘blŏk kơ ‘Bok Kei-Dei, jơ̆ Tơ’ngla tih hloh kơ đĭ đăng.

Gơng âu tơ’blŏk kơ inh Nơ̆r Kră Yang lăm Êsai 55:8-9: Kră Yang khan: “Đon tơchĕng Inh phara kơ đon tơchĕng lu iĕm, trong lu iĕm phara kơ trong Inh.” Plĕnh kơjung hloh kơ teh dang yơ, na trong Inh kơjung hloh kơ trong lu iĕm păng. Đon tơchĕng Inh kơjung hloh kơ đon tơchĕng lu iĕm kư̆m dang noh.” (Êsai 55:8-9)

Gơng ‘Măng Maih đei tơ iung pơjăng hăm ‘bar tŏ jrăng tih. Đơ̆ng kơpal jrăng đei tơlei hăm mam tih chô̆ bơwei kơjăp gơng noh. Tơdrong pha ra ‘biơ̆ noh minh dăng tơlei mam noh ưh kơ minh dăng tih hloi đĕch, mă đơ̆ng lơ tơlei mam iĕ kơsĕnh jing minh. Kơlih kơ đơ̆ng kơsĕnh đơ̆ng lơ tơlei iĕ noh na jing kơjăp tưk tơiung gơng noh.

‘Bôh thoi noh pơm kơ inh tơchĕng kơ lu bơ̆n hlôh kơ ‘Bok Kei-Dei. Pơhrăm wă kơ hlôh kơ gah Sư ưh kơ ‘bônh ôh, đei lơ tơdrong tơnat, đei lơ tơdrong pơhrăm gah yang ưh kơ đei hlôh. Đei bơngai lui hlôh kơ ‘Bok Kei-Dei tơnat dêh truh tơ hiơt kơ Yang Yêsu đei tơ’bôh Yang ‘Bă hơdai păng ‘bônh kơ hlôh hloh. Tơplơ̆ dơ̆ng, đei bơngai lăng hmă dêh kơ gah tơdrong pơhrăm gah Kră Yang, na jing tơhiong lê̆ gah tơdrong jrŭ să păng ‘lơ̆ng rŏ pơhrăm gah yang păng gah đon lui.

Mă lei, mă khan pơhrăm gah yang tơnat pat dang yơ, mă lei tuch luch pơtôch hăm tơdrong ‘lơ̆ng tơpăt ‘bônh kơ hlôh đĕch. ‘Bok Karl Barth hlôh wao pơhrăm gah yang, na đei jet sư gah hlôh wao gah yang, na sư đei tơl thoi âu: “Kră Yang ‘mêm kơ inh, jơhngơ̆m inh hiôk chơt. To sơ̆p hla bơar ‘Bok Kei-Dei đei tơ’bôh ăn.”
Tơdrong tơnat noh lăm tơdrong lăng hmă đĕch. Tơdrong adrin wă kơ hlôh kơ ‘Bok Kei-Dei (tơdrong lu bơ̆n ngăl khan gah yang) kư̆m đei tơnat, kư̆m ‘bônh kơ hlôh. Kư̆m nhen thoi hlôh kơ pơjing kơ măi gre kư̆m ưh kơ ‘bônh, mă lei ‘bônh đĕch kơplah tôt ‘long khoă pơđôh gre noh.

Lăm lu năr đei tŭk, măt lu bơ̆n lăng ưh kơ đei ‘bôh tơ kơnhŏng jrăng gơng, păng rup noh nhen ưh kơ tơpă. Mă lei hăm rơbâu ‘nu bơngai yak năm tơ anih ‘nâu rim năr, gơng noh lăng huay pă khan ưh kơ tơpă bơih, mă noh jơ̆ đei tơpă. Mă khan lăng ưh kơ rơđah, mă lei lu bơ̆n oei băt thoi âu, dôm lu jrăng oei tơ noh, yua kơ tơdah ưh kơ đei lu jrăng noh, na gơng noh gô păk.

Kư̆m thoi noh, lăm tơdrong arih, đei lơ wơ̆t lu bơ̆n tơ’bơ̆p tơdrong pơlong lăng păng anat anot. Lăm kơplah noh, lu bơ̆n đei jet Kră Yang nơ̆r “yua kơ kiơ” đơ̆ng lăm minh tơdrong kiơ noh, lu bơ̆n kư̆m đei hlôh, yua kơ Kră Yang đei tơ’bôh tơdrong tơpă tơpăt lăm sơ̆p hla bơar ‘Bok Kei-Dei, dah ăn kơ bơ̆n hlôi mơn băt lăm tơdrong arih. Mă lei lu bơ̆n ‘maih wă hlôh jrŭ să hloh dơ̆ng, lu bơ̆n hlôh tơdrong noh hloh kơ đon hlôh wao kon bơngai. Yua kơ Đon tơchĕng ‘Bok Kei-Dei kơjung hloh kơ đon tơchĕng lu bơ̆n, na trong Sư kơjung hloh kơ trong lu bơ̆n.

Nhen thoi lu jrăng gơng păng tơlei mam kơplah tŭk gom lu bơ̆n lăng ưh kơ ‘bôh, đei lơ tơdrong gah ‘Bok Kei-Dei mă lu bơ̆n ưh kơ đei lăng ‘bôh hăm măt dah hlôh wao đĭ. Mă lei, tơdrong lu bơ̆n ưh kơ hlôh tôm noh ưh kơ sĭ khan ‘Bok Kei-Dei ưh kơ đei ôh. Kră Yang oei oei hơdai, yua kơ kon bơngai ưh kơ hlôh tôm kơ Sư. Thoi nơ̆r ‘Bok Kei-Dei đei chih: Dôm tơdrong hlơp Kră Yang ‘Bok Kei-Dei lu bơ̆n đĕch băt…” (Bơtho Khôi Juăt 29:29a)

Apĭnh đĭ đăng krao khan hơdai: Kơkuh kơ ‘Bok Kei-Dei, Tơ’ngla tih hloh. Apinh ăn kơ jơhngơ̆m kon huay kơ đei layơ hiơt kơ Ih pơgơ̆r lăm tôm tơdrong, lăm tơdrong tih hloh, mă đơ̆ng rim tơdrong iĕ lăm tơdrong arih kon. Yua kơ đơ̆ng noh, apinh bơtho kon băt kơ lui gơnang păng pơjao trong yak năm lăm tơpang ti Ih ling lang. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, trong păng tơdrong tơchĕng ‘Bok Kei-Dei ling lang kơjung hloh kơ trong păng đon tơchĕng lu bơ̆n. Mă khan lu bơ̆n ưh kơ đei hlôh wao tôm tơdrong Sư, mă lei lu bơ̆n băt hơđăl Sư oei ‘mêm mơnat kơ lu bơ̆n, lăm tơdrong chơt hiôk mă lăm tơdrong pơlong lăng păng tơdrong anat anot. Yua kơ thoi noh, rŏ lăng kơplah ‘nâu buăl tam mă hlôh băt tơdrong kiơ đei truh, athei dan jơhngơ̆m chang hơmĕng tơdrong arih buăl ăn kơ Kră Yang, lui ngeh đơ̆ng rŏng kơ hơmơ̆l găm păng tŭk gom lăm chăl arih, lu bơ̆n gô anet anet mơn ‘bôh tơdrong ‘maih wă păng tơdrong tơdă ‘lơ̆ng đơ̆ng Kră Yang ăn kơ chăl arih bơ̆n.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.