Tus neeg nrog Vajtswv mus yeej tsis yog tus uas yuav tsis ntsib tej kev txomnyem thiab sim siab. Yog Vajtswv tso cai rau kev txomnyem tshwm tuaj, ces Vajtswv muaj homphiaj rau peb dhau ntawm tej kev sim siab ntawd. Tej zaug Vajtswv xav cob peb kom dhau los muaj zog dua. Txawm yog ua neej nyob rau tej nthwv cua daj cua dub txaus ntshai los yam uas peb cheem tsum ua thiab paub tias Vajtswv nrog nraim, peb tso siab plhuav tau rau nws.

Hnub no, yog hnub 08/02/2026, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Eddie Jones dhau ntawm Zaj kawm CIA LI TSO SIAB!

“Tamsim ntawd Yexus hais rau lawv hais tias, “Nej tsis txhob poob siab! Yog kuv ntag, tsis txhob ntshai!” (Mathais 14:27).

Ob peb hlis dhau los kuv muaj sijhawm sawv ntawm ib tug tub txawg ntseeg Vajtswv sau ntaub ntawv nto npe heev yog Bruce Wilkinson ntawm ib lub rooj sab laj, thaum uas yawg tab tom tos yuav sawv mus saum sam thiaj. Thaum ntawd, wb ob leeg puav leej nyob twj ywm, tiamsis thaum ntsiag to li ntawd, kuv pom muaj ib yam zoo thooj ntawm wb. Ntawd yog wb puav leej hnov Vajtswv lub suab, tas puav leej koom them tus nqi kom mus raws lub suab hu ntawd, dhau ntawm tej kev sim siab thiab kev puas tshuaj.

Thaum uas Bruce nce mus saum sam thiaj, yawg tham txog thawj phau ntawv uas yawg sau tau muab luam tawm nws puas tshuaj tom qab muag tawm ob peb phau. Qhov kev puas tshuaj no ua rau yawg ntseeg tias yuav tsis muaj hnub luam dua lwm phau ntxiv. Tiamsis, ib lub sijhawm tom qab, ua xyem xyav, yawg rov qab pib qhov haujlwm no. Xyoo 1978, yawg luam phau “Daily Walk”, txij ntawd los dhau los ua qhov haujlwm “Mus dhau Vajluskub- Walk thru the Bible.” Bruce hais tias yog thawj phau luam tawm tau zoo, ces yooj yim rau yawg xav tias tej ntawd yog los ntawm nws lub peev xwm los. Tiamsis twb yog qhov kev puas tshuaj ntawd pab rau yawg pom tias Vajtswv thiaj yog tus tsimnyog txais txhua lub koob meej, tsis yog yawg tus kheej.

Thaum hnov yawg ua tim khawv li ntawd, kuv kuj pom kuv nyob rau ib qhov twg hauv yawg zaj xwm. Kuv kuj poob nyiaj txiag ntau rau tej phau ntawv luam tawm thiab poob nyiaj ntau heev. Kuv ntseeg tias kuv ua yog li Vajtswv lub siab nyiam, tiamsis qhov tseeb tiag kuv poob mus ua tus neeg luab nuj nqi thiab ua xyem xyav. Lub sijhawm li ntawd, kuv xav tias yog kuv mloog Vajtswv lus, vim li cas kuv ho puas tshuaj? Yog qhov no los ntawm Vajtswv los, vim li cas ho ua tsis tau?
Thaum uas peb mus yog li Vajtswv lub homphiaj, ces ntseeg tias peb yuav txais tau nqi zog thaum txog Vajtswv lub sijhawm. Tiamsis qhov no tsis muaj lub ntsiab tias peb yuav tsis puas tshuaj lossis ntog. Muaj tej ntu peb yuav tau nyob hauv “moj sab qhua”. Ntu “moj sab qhua” yog cheem tsum tau Vajtswv siv los npaj rau peb tej yam loj dua. Dhau ntawm tej kev sim siab, kev ntseeg tau cob, kom peb dhau los ua tus tub txib zoo thiab ncaj ncees, ua tau tej haujlwm loj pub rau Vajtswv. Tej kev sim siab hauv “moj sab qhua” yuam kom peb ntseeg siab rau Vajtswv txawm yog tej lub sijhawm uas peb ntseeg tsis tau.

Kuv twb poob ib qhov nyiaj loj heev rau txoj kev luam ntawv thiab hais rau lub siab tias yuav tsis ua qhov haujlwm no dua ib zaug ntxiv. Tiamsis peb caug xyoo tom qab, kuv yeej tseem tab tom luam ntawv txog cov ntseeg Vajtswv cov ntawv.
Tomqab lub rooj sab laj xaus, kuv muaj sijhawm mus nce roob. Thaum sawv saum roob thiab ntsia rau hauv, kuv pom tej toj roob qhuav nkig nkhuav. Cua txias zias tshuab muaj zog heev yam li xav thawb kuv mus rau ntawm ntus. Lub sijhawm ntawd kuv nco txog tib neeg qhov kev ntshai: ntshai tsam puas tshuaj, ntshai tsam poob qab, ntshai txhua yam xaus. Peb ib txwm muaj kev npau suav, tiamsis thaum kawg ho tsis muaj dabtsi vim peb ntshai. Bruce tau hais tias: “Pawg Ntseeg qhov teeb meem yog muaj ntau tus ntseeg ntshai tsam puas tshuaj. Tiamsis, pauv qhov uas ntshai tsam poob lawm, Vajtswv ho xav kom peb dhau los muaj zog thiab muaj lub siab tawv.”

Vajluskub hais tias thaum cov thwjtim lawv tab tom nyob ntawm hiav txwv, lub nkoj raug cua ntaus vim mus tsis nrog cua, ces Tswv Yexus mus kotaw tuaj cuag lawv. Cov thwjtim lawv ntshai, xav tias lawv pom dab. Tiamsis Tswv Yexus hais rau lawv tias: “Nej tsis txhob poob siab, yog kuv, txhob ntshai!” (Mathais 14:27).

Nyob hauv nthwv cua ntawd, Tswv Yexus yeej nrog cov thwjtim nyob ua ke, txawm yog thaum lawv tab tom ntshai, thaum lawv tsis pom ntug sab tid, thaum lawv nkag siab yuam kev txog Vajtswv. Niaj hnub nim no peb tab tom nrog tus Tswv mus, tiamsis qhov no tsis muaj lub ntsiab tias peb yuav tsis ntsib cua daj cua dub. Tiamsis peb yeej hnov muaj kev kaj siab vim muaj ib tug nws tshwm ntsej muag ntawd thiab hais tias: “Txhob poob siab!” rau peb txhua lub sijhawm.

Vajtswv hais rau peb tias “txhob poob siab” txawm yog thaum peb tsis tau pom tus ntug sab tid, thaum tsis paub tias taig kis yuav xaus li cas, tiamsis Vajtswv tej lus txaus rau peb mus ntxiv, nquam nkoj thiab ntseeg siab rau Nws.

Thov caw nrog kuv peb thov Vajtswv ua ke: Tus Tswv uas muaj kev hlub, nyob hauv tej kev puas tshuaj ua rau txhawj ntshai, lossis nyob ntawm tej nthwv cua daj cua dub hauv lub neej, thov Vajtswv pab kom kuv paub tias Koj yeej nyob rawv ntawm kuv ib sab. Thov koj lo lus hais tias “Tsis txhob poob siab!” txhawb kuv tus ntsujplig, tshem tej nthwv cua uas yog kev txhawj, ua xyem xyav thiab tsis ntseeg siab mus. Thov Vajtswv pub rau kuv muaj lub siab tawv mus raws li koj lub suab hu. Thov pub kom kuv lub qhov muag ntsia pom tej kev txomnyem ib ncig kuv, lossis tig mus rau lub neej tom ntej uas tsis paub yuav mus qhov twg, kuv yuav saib ntsoov Koj thiab nrhiav kev tso siab hauv Koj. Kuv thov hauv Tswv Yexus Khetos lub npe, Amees.

Cov kwv tij muaj nthwv cua twg, muaj qhov kev ua xyem xyav twg, lossis muaj qhov kev puas tshuaj twg tab tom muaj koj ntaus kom tog? Puas muaj qhov kev ntshai twg tab tom ua rau koj ua xyem xyav tsis kam mus raws li Vajtswv lub suab hu? Ntau zaug peb qaug zog vim tab tom mus nrog Vajtswv lub suab hu, tab tom ua Vajtswv haujlwm, tiamsis txhua yam ho txomnyem dhau. Hnub no, peb cia lub siab xav txog Vajtswv tej lus hais: “Tsis txhob poob siab, yog kuv, txhob ntshai!” kom tsis ntshai thiab mus ntxiv ua kom tiav tej zeem muag homphiaj uas Vajtswv tso rau hauv peb lub neej. Tej kev sim siab txog kev ntseeg dhau ntawm tej kev puas tshuaj, kev txomnyem, yuav ua rau peb pom Vajtswv ntau dua, thiab zoo siab hlo tawg paj txi txiv rau Vajtswv ntau dua thaum peb muab peb lub siab tso plhuav rau ntawm Vajtswv tej lus cog tseg zoo.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.