Hauv txoj kev ua neej, muaj ntau yam xwm txheej uas yuam peb yuav tsum xaiv sawv rau ib sab twg, xws li hauv kev sib tw dlia ua si lossis hauv ib qho kev sib tw twg li. Txawm li ntawd los, tej kev xaiv ntawd tsuas yog ib ntus xwb. Peb txhua tus tseem yuav tsum ntsib ib lo lus nug tseem ceeb dua, peb yuav xaiv sawv rau sab twg hauv peb txoj kev ib txhiab ib txhis. Thaum ntsib tej xwm txheej zoo li no, koj puas tau npaj muaj lo lus teb rau koj tus kheej lawm?

Hnub no, yog hnub 09/02/2026, peb kev thov Vaj Tswv Txhua Hnub thov caw koj los nrog peb sib kawm Vaj Tswv Txoj Lus dlau ntawm tus Shadia Hrichi ntawm lub ntsiab lus KOJ SAWV RAU SAB TWG?

“Ua Vajtswv tsaug nws pub peb kov yeej vim yog peb tus Tswv Yexus Khetos.”(I Kauleethaus 15:57)

Nyob rau tebchaws Asmeskas, ua ntej yuav muaj kev sib tw kawg ntawm kev ncaws pob bầu dục, txhua qhov chaw puv npo kev zoo siab thiab tos ntsoov. Tibneeg hnav tsho pab pawg ncaws pob uas yus nyiam, hauv pab pawg mus txog rau cov xov xwm txhua hnub los puv npo kev sib tham txog qhov kev sib tw no. Nyob tom chaw ua haujlwm, tom kev, txawm yog hauv tsev pehawm los yeej hnov tib neeg hais txog qhov kev sib tw yuav los no. Muaj ntau tsev neeg npaj chaw saib kev sib tw hauv tsev, hauv tej khw muag khoom loj mas neeg coob heev vim sawv daws maj nroos mus yuav khoom noj, khoom haus kom ncav lub sijhawm tshwj xeeb no.

Qhov tseeb mas kuv tsis yog tus neeg uas nyiam kev sib dlia ua si. Kuv tsis paub txog cov pab pawg ncaws pob lossis cov neeg ncaws pob uas muaj suab npe. Tabsis muaj ib yam uas kuv pom tau tias yog qhov kev tos kev yeej ces yooj yim tshab xo heev. Txawm yog cov neeg uas tsis saib kev dlia ua si los yeej raug rub mus nrog rau tej lub sij hawm ntawd. Vim li cas? Tej zaum yog vim tib neeg txhua tus yeej muaj kev ntshaw kom yeej.

Thaum kev sib tw kawg los ze zuj zus, cov neeg txhawb nqa ntawm ob pab pawg puav leej ntseeg tias pab pawg uas yus nyiam yuav yeej. Tabsis tsuas yog thaum kev sib tw xaus lawm xwb, mam li paub qhov tseeb tiag tiag. Muaj coob tus tso siab thiab cia siab rau ib pab pawg ncaws pob, tabsis thaum pab pawg ntawd swb, ces lawv poob rau hauv kev tu siab thiab chim siab.

Hauv txoj kev ua neej, leej twg los yuav tsum tau sawv ib lub sijhawm tseem ceeb heev, ntawd yog thaum peb yuav tsum teb lo lus nug txog peb txoj hmoo nyob mus ib txhis. Txoj hmoo ntawd yuav zoo li cas los yog nyob ntawm “sab” uas peb tab tom sawv. Peb yuav xaiv sawv ntawm Yexus sab los yog ntiajteb sab, xaiv txoj sia lossis xaiv txoj kev kev tuag, xaiv kev yeej lossis yog kev swb? Peb paub meej sijhawm ntawm kev sib tw, tabsis tsis muaj leejtwg hauv peb paub tias lub sijhawm twg peb mus sawv tim ntsej muag ntawm Vaj Tswv thiab mus ib txhis. Vim li ntawd, txoj kev xaiv yuav tsum tau ua lub sijhawm ntawd ntag. Hnub no ntag, peb yuav tsum txiav txim siab sawv mus rau sab uas muaj kev yeej, yog Tswv Yexus.

Vaj Tswv Txoj Lus qhia peb paub tias Tswv Yexus yog Tus Yeej. Tus uas lees txais yuav Tus Tswv, tus ntawd yuav tau txais kev cawm dim thiab tau txais txoj sia nyob mus ib txhis: Rau qhov Vajtswv hlub neeg ntiajteb kawg li, nws thiaj txib nws tib Leeg Tub los rau hauv ntiajteb. Tus uas ntseeg nws Leej Tub, tus ntawd yuav tsis tuag, tiamsis yuav tau txojsia ntev dhawv mus ibtxhis (Yauhas 3:16)

Thaum peb saib saum tus ntoo khaub lig, thaum Tswv Yexus raug ntsia saum ntoo khaub lig, txhua yam zoo li twb swb lawm. Tabsis Vajtswv tau tsa Tus Tswv Yexus sawv hauv qhov tuag rov los, thiab muaj hwjchim, Tus Tswv tau kov yeej tus yeeb ncuab kawg nkaus, uas yog txoj kev tuag.

Txoj kev tuag, koj swb lawm lauj! Txoj kev tuag, koj tej taug tsuag tas lawm lauj! Txoj kev tuag muaj taug yuam tau neeg rau qhov neeg muaj txim; yog tsis muaj Vajtswv txoj kev cai, txoj kev txhaum yeej yuav tsis muaj hwj chim yuam neeg. Tiamsis peb cia li ua Vajtswv tsaug, rau qhov Vajtswv twb kom Yexus Khetos tus uas yog peb tus Tswv pab peb kov yeej lawm (I Kausleethaus 15:55-57).

Xib hwb Pov Lauj tau qhia peb paub tias kev tuag los ntawm kev txhaum, thiab txoj kevcai ua rau kev txhaum tshwm pom tseeb dua. Txoj kevcai yeej ib txwm tsis muaj peev xwm cawm tau tib neeg. Yog peb tsuas vam khom peb tus kheej lub zog thiab peb txoj kev ncaj ncees xwb, ces peb yeej tsis muaj kev cia siab rau kev yeej twg li. Tabsis Vajtswv tau los ua hauj lwm thaum Nws pub Tswv Yexus los rau peb. Dlau los ntawm Tswv Yexus txoj kev tuag thiab sawv rov los, hwjchim ntawm kev tuag raug rhuav tshem, thiab peb tau txais kev yeej. Twb yog vim li ntawd, xib hwb Pov Lauj thiaj zoo siab tshaj tawm hais tias: “Ua tsaug rau Vajtswv uas tau pub txoj kev yeej rau peb…”

Yog li ntawd, lo lus nug rau txhua tus niaj hnub nim no yog koj tab tom sawv rau sab twg, thiab koj puas npaj txhij los sawv nrog Tswv Yexus sab lawm los tsis tau?

Thov caw nrog kuv peb thov Vajtswv ua ke: Kuv Tus Tswv! Nyuam yaus ua koj tsaug vim nyuam yaus yog tus uas nyob hauv Koj, vim nyuam yaus tau txais kev cawm dim tsis yog los ntawm nyuam yaus tus kheej lub zog lossis kev rau siab, tabsis txhua yam yog los ntawm Koj txoj kev theej nyuam yaus tej kev txhaum. Thov Koj pub rau nyuam yaus paub hnov Koj txoj kev hlub uas tob tshaj kom nyuam yaus txiav txim siab sawv ntawm Koj sab, txawm yuav nyob rau lub sij hawm twg. Thov Koj coj nyuam yaus hauv txhua txoj kev xav, txhua lo lus thiab txhua yam nyuam yaus ua kom nyuam yaus thiaj paub qhia tshwm tias nyuam yaus yog Koj li rau cov nyob ib ncig ntawm nyuam yaus. Nyuam yaus koom siab taij thov los ntawm Tswv Yexus Khetos lub npe, Amees.

Tus phoojywg, txhua hnub dhau mus, txhua txoj kev xaiv, txhua txoj kev xav, thiab txhua yam peb ua yeej tab tom qhia tias peb tab tom sawv sab twg. Nyob hauv lub ntiajteb uas puv npo kev dag ntxias, Vajtswv Txojlus hu peb kom ua siab loj sawv Tus Tswv Yexus sab, ncaj ncees thiab dawb huv, thiab tsis yog txhua yam uas yog kev txhaum thiab cev nqaij daim tawv. Thov kom peb txhua tus tau txais kev kov yeej ntawm Tus Tswv Yexus thaum uas peb xaiv nrog Tus Tswv sib raug zoo txhua hnub.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.