Bơngai yak kiơ̆ Kră Yang ưh kơ trŏ khan gô ưh kơ tơ’bơ̆p dôm tơdrong pơmat tat păng tơdrong pơlong lăng. Dah Kră Yang ăn tơdrong pơmat tat truh, lei Sư đei tơdrong tơdă kơ lu bơ̆n đơ̆ng kơdôm tơdrong pơlong lăng noh. Mưh lăp Sư wă pơjuăt lu bơ̆n jing pran kơ tang hloh. Mă arih tŏk bŏk dôm tơdrong kial hơbut tih krưp, tơdrong lu bơ̆n kăl kơ pơm păng sơng iŏk băt kơ Kră Yang ling lang oei hơdai, păng lu bơ̆n kŭm gơh đei jơhngơ̆m kơjăp.

Năr ‘nâu, ‘năr 08/02/2026,tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Eddie Jones kơ̆l ‘bai ‘NĔ PĂ HLI!

“Mă-lei Yêsu thar khan kơ lu sư: “Iĕm ‘nĕ pă hli, Inh âu lah.” (Mathiơ 14:27)

Dôm khei adrol ki, inh đei jơ dơ̆ng hơdai hăm mĭnh ‘nu bơngai chih hla ar Bơngai Lui đe đei pơ-ư jơ̆ Bruce Wilkinson tơ mĭnh anih hŏk hôp, lăm kơplah sư oei gô wă tŏk tơ anih pơdah. Lăm kơplah ‘noh, ‘bar ‘nu măr nhi đei thĕng hreh, mă lei lăm tơdrong thĕng hreh ‘noh, inh ‘bôh băt mĭnh tơdrong lei lăi lăm nhi. ‘Noh jơ̆ măr nhi đei kơtơ̆ng nơ̆r krao đơ̆ng Kră Yang, na păng tơdrong ‘mong ăn wă yak kiơ̆ nơ̆r krao ‘noh, đơ̆ng lăm kơdôm tơdrong pơlong lăng păng ưh kơ đei kĕjei.

Kơplah Bruce yak tơ kơpal anih pơdah, sư đei ră roi khan sơ̆p hla ar blŭng a sư chih đei ưh kơ yua lăp đơ̆ng rŏng kơ sô̆ sơ̆p tơlĕch. Ưh kơ đei kĕ jei noh pơm kơ sư lui khan kơdih gô ưh kơ layơ ăn in tơlĕch mĭnh sơ̆p hla ar ayơ dơ̆ng. Mă lei, khei năr đơ̆ng rŏng, mă khan sư đei tơtăm, sư oei pơtrơp tơdrong jang ‘nâu. Sơnăm 1978, sư đei in tơlĕch sơ̆p hla ar “Daily Walk”, đơ̆ng noh đei pơjing tơdrong jang “Yak lăm sơ̆p hla bơar ‘Bok Kei-Dei- Walk Thru the Bible”. Bruce pơma khan pơtih gia sơ̆p hla ar blŭng a đei kĕ jei, hơbŏ lăng sư đei tơchĕng khan dôm tơdrong kĕjei đei truh đơ̆ng tơdrong gơh hơgei kơdih sư. Mă lei trŏ đơ̆ng tơdrong ưh kơ kĕ jei ‘noh tơgŭm sư băt kơnăl ‘Bok Kei-Dei ‘mơ̆i jơ̆ Tơ’ngla trŏ kơ sơng iŏk dôm tơdrong ư-ang, ưh kơ trŏ kơdih kâu sư.

Kơplah mơ̆ng klah song, inh ‘bôh kơdih ‘bơ̆t anih ayơ noh lăm hơ’mon đơ̆ng sư. Inh kŭm đơ̆ng pơjing lăm dôm tơdrong wă in tơlĕch păng đei hiong lơ jên tơmam. Inh lui khan kơdih đei kiơ̆ kơ đơ̆ng Kră Yang wă, mă lei tơpă đei huŏng lăm tơdrong hre đom păng ngĭl ngŭl. Lăm dôm kơplah ‘noh, inh tơchĕng khan dah inh đei chu yom nơ̆r Kră Yang, yua kơ liơ inh oei ưh kơ kĕ jei? Dah tơdrong ‘nâu truh đơ̆ng Kră Yang, yua kơ liơ sư ưh kơ kĕ jei?

Dah lu bơ̆n yak trŏ kiơ̆ tơdrong proh hơmet đơ̆ng Kră Yang, tơpă lu bơ̆n gô sơng iŏk tơdrong đei yua lăm jơnăr đơ̆ng Sư. Mă lei tơdrong ‘noh ưh kơ trŏ tơm jơ̆ lu bơ̆n gô ưh kơ đei glăi răm dah pơ̆k huŏng. Đei kơdôm kơnao lu bơ̆n đei oei lăm “anih char glă”. Kơnao “ char glă” jơ̆ gĭt kăl păng đei Kră Yang yua wă hơmet ăn kơ lu bơ̆n dôm tơdrong tih hloh. Đơ̆ng tơdrong pơlong lăng, đon lui lu bơ̆n jing dôm lu bơngai đĭch đam tơpăt păng tơnăp, rŏ lăng pơm jing dôm tơdrong hơpơi wă tih kơ Kră Yang. Dôm kơ tơdrong pơjuăt lăm “char glă” athei lu bơ̆n lui gơnang Kră Yang mă khan dôm kơplah lu bơ̆n ‘bôh ưh kơ gơh wă lui gơnang.

Inh đơ̆ng đei hiong kơsô̆ jên tih kơ tơdrong jang in tơlĕch sơ̆p hla ar păng pơkă lăm jơhngơ̆m gô ưh kơ layơ jang gah tơdrong ‘nâu dơ̆ng bơih. Mă lei pêng jit sơnăm đơ̆ng rŏng, inh oei jang in tơlĕch sơ̆p hla ar Bơngai Lui.

Đơ̆ng rŏng kơ hŏk hôp keh đang, inh đei jơ năm tŏk tơ kông. Kơplah dơ̆ng kơpal gŏl kông păng lăng tơ ala, inh ‘bôh dôm kơ kông hrĕng kro. Dôm kơ kial tih tơngiĕt dơhlu nhen ‘maih tơlơ̆ inh đơ̆ng tơ ter kông. Lăm jơ noh tơ ‘blŏk inh truh kơ dôm tơdrong hli tơrơ đơ̆ng kon bơngai: hli kơ ưh kơ đei kĕ jei, hli kơ đei drŭt tơrŏng, hli kơ tôm tơdrong gô tôch. Lu bơ̆n ling lang đei hơpơi wă, mă lei na ưh kơ đei kiơ yua kơ đơ̆ng lu bơ̆n hli tơrơ. Bruce đei pơma khan: “tơdrong đơ̆ng Khŭl Bơngai Lui jơ̆ đei lơ dêh Bơngai Lui hli kơ ưh kơ đei kĕ jei. Mă lei, tơplih yua kơ ăn kơ tơdrong hli gô hiong tơpă, ‘Bok Kei-Dei đei wă kơ lu bơ̆n jing pran kơtang păng pơ̆n nuih.”

Sơ̆p Hla Bơar ‘Bok Kei-Dei đei roi khan kơplah lu bơngai pơhrăm oei tŏk bŏk đak dơsĭ, thŏng nan đei kial hơbŭt tih yua kơ ưh kơ trŏ trong kial, na Yang Yêsu đei yak năm kơpal đak dơsĭ năm tơ lu sư. Lu bơngai pơhrăm hli tơrơ, ngeh kơdih đei ‘bôh hơtâu. Mă-lei Yêsu thar khan kơ lu sư: “Iĕm ‘nĕ pă hli, Inh âu lah.” (Mathiơ 14:27)

Lăm kial hơbŭt, Yang Yêsu oei oei hơdai hăm lu bơngai pơhrăm, mă khan lăm kơplah lu sư oei ưh kơ hơđơ̆ng păng hli tơrơ, kơplah lu sư ưh kơ ‘bôh pah to kơ đak, kơplah lu sư hlôh ưh kơ trŏ gah Kră Yang. Dang ei lu bơ̆n oei yak kiơ̆ Kră Yang, mă lei tơdrong ‘noh ưh kơ trŏ khan lu bơ̆n gô ưh kơ đei tơ’bơ̆p kial hơbŭt. Mă lei lu bơ̆n oei mơn ‘bôh hơđơ̆ng yua kơ đei mĭnh Tơ’ngla ling lang oei hơdai păng khan: “Iĕm ‘nĕ pă hli!” hăm lu bơ̆n lăm dôm anih. Kră Yang pơkă lu bơ̆n “Iĕm ‘nĕ pă hli” mă khan kơplah lu bơ̆n ưh tim mă ‘bôh anih pah to kơ đak, dah ưh tim mă băt dơning gô thoi yơ, mă lei nơ̆r khan đơ̆ng Kră Yang jơ̆ tôm ăn kơ lu bơ̆n pơtrơp yak tơ năp, pơtrơp “wơ̆r thŏng nan” păng pơtrơp lui gơnang kơ Sư.

Apĭnh đĭ đăng krao khan hơdai: Kơkuh kơ Kră Yang mă ‘mêm, lăm dôm kơ tơdrong ưh kơ đei kĕ jei hli tơtăm, dah tŏk bŏk kơdôm kial hơbŭt krưp đơ̆ng chăl arih, apinh Kră Yang tơgŭm kon ‘bôh băt tơdrong oei hơdai đơ̆ng Ih ling lang hơdai kon. Apinh nơ̆r khan “Iĕm ‘nĕ kơ hli!” đơ̆ng Ih pơlung jơhngơ̆m kon, hơmet lê̆ dôm kial hơbŭt hli tơrơ, tơter hơlŭng jrŭ păng hiong tơdrong lui ngeh. Apinh Kră Yang ăn kơ kon tơdrong kơjăp wă pơtrơp yak kiơ̆ nơ̆r krao đơ̆ng Ih. Apinh ăn kơ ‘bar pah măt kon ưh pă lăng lăm dôm tơdrong pơmat jum dăr, dah lăng gah ning mônh ưh kơ hơđăl tơ anăp, na ling lang lăng gah Ih păng chơ chă tơdrong hơđơ̆ng tơpăt lăm kơdih Ih. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, đei kial hơbŭt ayơ, đei tơdrong ngĭl ngŭl ayơ, dah ưh kơ đei kĕ jei ayơ oei răp gô tơmôch buăl ưh? Đei tơdrong hli tơrơ ayơ oei pơm kơ buăl oei tơchĕng ưh kơ pơ̆n năm kiơ̆ nơ̆r krao đơ̆ng Kră Yang ưh? Mưh lăp lu bơ̆n bơ̆l hăl yua kơ ‘bôh kơdih oei yak kiơ̆ nơ̆r krao đơ̆ng Kră Yang, oei bơ̆jang tơdrong jang Kră Yang, mă lei tôm tơdrong đei pơmat tat. Lăm năr ‘nâu, lu bơ̆n athei ăn kơ jơhngơ̆m kơdih tơchĕng pơwao gah nơ̆r khan đơ̆ng Kră Yang:

“Iĕm ‘nĕ pă hli, Inh âu lah.” wă kơ huei kơ hli tơrơ mă lei pơtrơp yak năm păng pơkeh dôm tơdrong tơ’bôh, tơdrong kơnhăm mă Kră Yang dan ăn lăm chăl arih lu bơ̆n. Dôm kơ tơdrong pơlong lăng đơ̆ng dôm kơ tơdrong ưh kơ kĕ jei, pơmat tat, gô rai pơm kơ lu bơ̆n hlôi mơn đei Kră Yang lơ hloh, păng gô đei yua lơ hloh kơplah lu bơ̆n dan ăn đĭ jơhngơ̆m kơdih anih nơ̆r pơkă hơđơ̆ng đơ̆ng Kră Yang.
Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.