Lăm chăl arih, đei lơ tơdrong pơm kơ bơ̆n rơih iŏk wă dơ̆ng gah ayơ noh, thoi kơ lăm tơdrong pơchơt pơjei băl lăm bơngai lơ. Mă lei, noh jơ̆ dôm lu tơdrong rơih iŏk ‘biơ̆ đĕch. Rim ‘nu lu bơ̆n gô tơ’bơ̆p nơ̆r jet kăl hloh, jơ̆ gô rơih iŏk gah ayơ lăm tơdrong arih khŏm khŏm lu bơ̆n. Lăm kơplah thoi noh, buăl hăm đei nơ̆r tơl ăn kơdih bơih ưh?

Năr ‘nâu, ‘năr 09/02/2026, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Shadia Hrichi kơ̆l ‘bai BUĂL DƠ̆NG GAH AYƠ?

“Mă-lei bơnê kơ ‘Bok Kei-Dei Sư mơnat ăn jei bơ̆n yua kơ Kră Yang bơ̆n Yêsu Krist lôch tang bơ̆n.” (I Kôrintô 15:57)

Tơ teh đak Mi, adrol kơ pơkeh tơdrong pơchơt gah ‘bŏng lŏng wong, ‘bôh jơhngơ̆m ‘nă hal tơ jơ̆p kơ anih. Lu sư hrŭk ao khŭl ‘bŏng lŏng mă sư hơ iă, đơ̆ng lăm điê̆n thoăi truh tơ tiwi đei pơma ‘bơm lơ. Tơ anih bơ̆jang, tơ ter trong, kư̆m truh tơ lăm hnam akŭm đei kơ tơ̆ng ang kơ wă pơjei băl ‘bŏng lŏng tơ anăp. Đei lu hnam dơnŏ hơmet anih wă lăng tơ lăm hnam, tơ anih tĕch tơmam đei lơ bơngai yua kơ bu bu kư̆m hơtĕch răt tơmam sa, đak nhă ăn kơ tơdrong phara ‘biơ̆ ‘nâu.

Pơma tơpă inh jơ̆ bơngai ưh kơ hưch hanh kơ tơdrong pơchơt tơpôl lơ. Inh ưh kơ răk ‘blŏk kơ lu khŭl pơchơt ‘bŏng lŏng dah bơngai đe ư ang. Mă lei đei minh tơdrong inh mơn tơdrong chang gô kĕ jei ‘bônh dêh kơ tơlĕch tơ’bôh. Mă lu bơngai ưh kơ hnhoi lăng tơdrong pơchơt kư̆m ‘bônh kơ hơdai lăm tơdrong ‘nă hal noh. Yua kơ kiơ thoi noh? rŏ lăng yua kơ đơ̆ng lăm kon bơngai lu bơ̆n rơhing wă kơ kĕ jei.

Kơplah tơdrong pơchơt wă truh tơ tuch luch, bơngai hưch wă kơ khŭl sư gô kĕ jei. Mă lei gô tơdrong pơchơt keh đang ‘mơ̆i gô băt kơ thoi yơ. Đei lơ bơngai dan jơhngơ̆m lui ngeh kơdih ăn kơ minh khŭl bŏng lŏng, mă lei kơplah khŭl ‘bŏng lŏng noh ưh ko đei kĕ jei, lu sư sơ‘ngon.

Lăm chăl arih, bu bu kư̆m gô tơ’bơ̆p tơdrong kăl dêh, noh jơ̆ lu bơ̆n gô tơl nơ̆r jet gah tơdrong arih kơdih đei khŏm khŏm. Tơdrong arih noh gô thoi ayơ gô đei đơ̆ng “gah” lu bơ̆n oei dơ̆ng. Lu bơ̆n gô rơih iŏk dơ̆ng gah Yang Yêsu dah gah lăm teh đak ‘nâu, rơih iŏk tơdrong arih lei tơdrong lôch, rơih iŏk tơdrong kĕ jei dah hiong răm? Lu bơ̆n băt hơđăl kơ jơ năr tơdrong pơjei băl, mă lei bu bu lăm lu bơ̆n ưh kơ băt kơdih bơ̆n gô dơ̆ng ‘bơ̆t anăp Kră Yang na gô tơ’bơ̆p tơdrong arih khŏm khŏm. Yua kơ thoi noh, tơdrong rơih iŏk ưh kơ đei gô ‘mơ̆i. Năr ‘nâu, lu bơ̆n kăl kơ rơih iŏk dơ̆ng gah kĕ jei, wă khan jơ̆ gah Yang Yêsu.

Nơ̆r ‘Bok Kei-Dei ăn kơ lu bơ̆n băt Yang Yêsu jơ̆ Tơ’ngla kĕ jei. Bơngai bu lui sơng iŏk Sư gô đei tơdrong dŏng pơklaih păng đei tơdrong arih khŏm khŏm: “’Bok Kei-Dei ‘mêm mơnat tơpă rim ‘nu bơngai jơ̆p ala teh âu na Sư mah ăn Kon pôm Sư lôch tang kon bơngai. Bơngai bu lui kơ Kon Sư huay kơ lôch hiong ôh. Bơngai ‘noh sư gô oei hơdai hăm ‘Bok Kei-Dei arih ling-lang.” (Yôhan 3:16)

Kơplah lăng tơ ‘long pơglang, kơplah Yang Yêsu đe pơ̆ng kơ đinh, dôm lu tơdrong lăng nhen thoi hiong răm bơih. Mă lei ‘Bok Kei-Dei ăn kơ Yang Yêsu iung arih đơ̆ng tơdrong lôch, păng lăm tơdrong iung arih ư ang, Sư kĕ jei ayăt tuch luch bơih, wă khan kĕ jei đơ̆ng tơdrong lôch.

“Ơ tơdrong lôch, tơ yơ jei e? Ơ tơdrong lôch, tơ yơ e gơh pơrăm nhôn dơ̆ng?” Tơdrong yoch pơm kơ bơ̆n lôch răm păng yua kơ bơ̆n ưh kơ kĕ kiơ̆ tơdrong juăt ‘Bok Kei-Dei, na bơ̆n yoch rai dêh. Mă-lei bơnê kơ ‘Bok Kei-Dei Sư mơnat ăn jei bơ̆n yua kơ Kră Yang bơ̆n Yêsu Krist lôch tang bơ̆n.” (I Kôrintô 15:55-57)

‘Bok Pôl đei tơbăt tơdrong đei noh lĕch đơ̆ng tơdrong yoch, păng khôi juăt pơm kơ tơdrong yoch rai hơđăl hloh. Khôi juăt đĕch ưh kơ gơh dŏng pơklaih kon bơngai. Tơdah gơnang kơ jơhngơ̆m adrin đĕch păng tơdrong tơpăt kơdih, lu bơ̆n ưh kơ đei tơdrong hơmĕng kơ wă kĕ jei ayơ. Mă lei ‘Bok Kei-Dei đei bơ̆jang kơplah Sư ăn Yang Yêsu kơ lu bơ̆n. Đơ̆ng tơdrong lôch păng Yang Yêsu iung arih, tơdrong pran kơtang tơdrong lôch pơrăm đĭ bơih, na lu bơ̆n đei kĕ jei. Yua kơ đơ̆ng tơdrong noh na ‘bok Pôl hiôk chơt dêh păng pơma thoi âu: “Bơnê kơ ‘Bok Kei-Dei ăn kơ lu bơ̆n tơdrong kĕ jei …”

Yua kơ thoi noh, nơ̆r jet ăn kơ rim ‘nu lu bơ̆n năr ‘nâu buăl oei dơ̆ng gah ayơ, buăl tam hơmet jơhngơ̆m dơ̆ng gah Yang Yêsu bơih ưh?

Apĭnh đĭ đăng krao khan hơdai: Kơkuh kơ Kră Yang! Kon bơnê kơ Ih yua kơ kon oei lăm Ih, kon đei dŏng pơklaih ưh kơ đơ̆ng tơdrong kon pơm dah adrin kơdih, mă đơ̆ng Ih pŭ iŏk tơdrong lôch. Apinh Ih ăn kơ kon đei mơn tơdrong ‘mêm jrŭ să đơ̆ng Ih wă kơ adrin dơ̆ng gah Ih mă đei tơdrong arih thoi yơ. Apinh Ih chông anhăk kon đơ̆ng rim tơdrong tơchĕng, nơ̆r pơma, păng đei pơm wă kơ kon đei tơ’bôh kon dơ̆ng gah Ih ăn kơ bơngai jum dăr ‘bôh. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, rim năr đei hlôi hloh, đơ̆ng lăm tơdrong tơchĕng, tơdrong pơm lu bơ̆n đei tơ’bôh thoi âu lu bơ̆n dơ̆ng gah ayơ. Tŏk bŏk teh đak đei lơ tơdrong pơhlŭ, Nơ̆r Kră Yang đei krao lu bơ̆n athei đei jơhngơ̆m dơ̆ng gah Yang Yêsu, dơ̆ng gah tơdrong kiơ trŏ lăp, tơpăt păng ‘lơ̆ng rơgoh, ưh kơ đei tơdrong yoch păng kiơ̆ kơ sĕch akar. Hơpơi kơ rim ‘nu lu bơ̆n hlôi mơn kơ kĕ jei đơ̆ng Yang Yêsu kơplah rơih iŏk lăm tơdrong tơ’bưh hăm Kră Yang rim năr.
Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.