Tej zaum muaj ntau tug hauv peb twb tau hnov txog txoj cai ntawm lub hwjchim dag zog hais tias “lub hwjchim dag zog nws tsis yug los thiab kuj tsis txawj ploj mus, tiam sis tsuas yog hloov yam no mus ua lwm yam lawm xwb.” Thiab lub hwjchim dag zog, txawm yog yam uas tsis pom tau los ntawm qhov muag, los nws yeej ib txwm tshwm muaj nyob thiab yeej yog yam tseem ceeb rau txhua yam kev ua haujlwm hauv lub qab ntuj thiab hauv lub ntiajteb no.

Lub neej sab ntsuj plig ntawm Vaj Tswv cov me nyuam kuj zoo ib yam li ntawd. Cov ntseeg Tus Tswv Yexus Khetos kuj xav tau lub hwjchim dag zog, tau lub hwjchim dag zog ntawd thaum lub sijhawm caum Tus Tswv qab. Thiab peb muaj ib lo lus cog tseg uas peb tso siab thiab ruaj siab, kom paub tseeb tias Vajtswv yeej ib txwm npaj siab pub lub hwjchim dag zog tshiab rau cov uas tos ntsoov rau Tus Tswv Koj.

Hnub no, yog hnub 10/02/2026, peb Kev Thov Vaj Tswv Txhua Hnub caw koj los nrog peb kawm Vaj Tswv Txoj Lus ntawm Brooke Keith dlau lub ntsiab lus LO LUS COG TSEG RAU TUS UAS TOS TUS TSWV.

“Tiamsis cov neeg uas cia siab ntsoov rau tus TSWV yuav muaj zog, lawv yuav nthuav tis ya ib yam li tus dav. Thaum lawv khiav lawv yuav tsis qaug zog, thaum lawv mus kev lawv yuav tsis tsaug leeg.” (YaxayaS 40:31)

Puas muaj leej twg yog tus txhawb koj lub siab yog lub zog txhawb rau koj lub neej? Nyob ntawm kuv, tus ntawd yog Benji, kuv tus tub yau. Benji tsis yog ib tug menyuam uas loj hlob thiab siab zoo li ntau tus neeg, tabsis nws yog ib qho timkhawv tseeb qhia txog Vajtswv txoj koob hmoov.

Ua ntej Benji yug los, cov kws kho mob xav tias nws me dhau piv rau lub hlis uas nws nyob hauv plab. Kuv tseem nco ntsoov txog txoj kev ntshai poob siab thaum mus kuaj hauv kws kho mob (siêu âm) zaum ntawd, thaum paub tias tus me nyuam twb yuav txog hnub yug lawm los nws tsuas hnyav tsis tau txog ob kis lus thiab zoo li nws twb nti tsis taus. Lub sijhawm ntawd, wb ob niam txiv tsuas paub thov Vaj Tswv lawm xwb. thiab Vaj Tswv tau ua hauj lwm.

Tag kis sawv ntxov, kuv rov qab mus tsev kho mob dua ib zaug ntxiv dua, thiab npaj siab yuav tau phais yug menyuam sai sai. Qhov uas ua rau kuv ceeb tshaj plaws, Benji lub ntsej muag me me rov tshwm rau saum lub vijtsam (màn hình). Zaum no, kuv pom tias nws loj hlob dua, thiab nws txav mus txav los tsis so, txog qhov uas tus kws kho mob yuav tsum siv zog heev thiaj li thaij tau tau daim duab.
Tus kws kho mob hais tias: “Kuv yeej xav tsis thoob vim kuv tsis tau pom dua ib zaug zoo li no”. Kuv tsuas luag teb tias: “Kuv mas tsis xav li ntawd. Kuv paub tias muaj ntau tus tau thov Vajtswv rau kuv tus menyuam, thiab Vajtswv tau mloog tej lus thov.”

Tom qab zaug kuaj ntawd, peb rov qab mus tsev thiab tos hnub uas tus me nyuam yug los. Tabsis, thaum txog hmo yug menyuam, txhua yam kub ntxhov siab heev. Cov kws kho mob thiab cov neeg saib mob mus los tsis tseg, cov tshuab thiab hlua xaim nyob puv txhua qhov. Thaum Benji lub plawv dhia pib qeeb zuj zus, tus kws kho mob hais tias kuv yuav tsum tau phais menyuam, tabsis hauv kuv lub siab, kuv ntseeg tias Vajtswv tseem tab tom tswj txhua yam. Thiab tom qab ntawd, tsuas yog ob peb feeb xwb, txuj ci tseem ceeb tau tshwm sim. Kuv tus me nyuam yug los muaj lub cev zoo nkauj, nyob kaj siab lug thiab muaj zog.

Tam sim no, thaum Benji yuav luag muaj rau lub hlis lawm, nws siv zog kom nws zaum sawv tau. Nws ua yuj yees, ntog ntau zaus, tabsis nws tsis tso tseg. Tsuas yog muaj neeg pab nws sawv, nws cia li pib xyaum sawv dua thaum lub sijhawm ntawd. Qhov kev ua siab ntev ntawd ua rau kuv pom tias cov menyuam yaus yeej qhia tau rau cov neeg laus ntau yam tseem ceeb txog lub neej.

Thaum kuv saib kuv tus menyuam, kuv tau nco txog Vaj Tswv Txoj Lus hauv phau ntawv Yaxaya 40:30-31: “Txawm yog tej hluas los lawv yeej txawj qaug zog, thiab cov tub hluas los ntog pujpoog; tiamsis cov neeg uas cia siab ntsoov rau tus TSWV yuav muaj zog, lawv yuav nthuav tis ya ib yam li tus dav. Thaum lawv khiav lawv yuav tsis qaug zog, thaum lawv mus kev lawv yuav tsis tsaug leeg.”

Yaxayas 40 yog ib feem uas hais txog Vajtswv txoj kev nplij siab uas Nws pub rau Nws haiv neeg thaum lawv tab tom khiav. Thaum lawv ntsib kev mob siab thiab kev poob siab, lawv tos ntsoov ib txoj kev cawm dim. Tus cev Vajtswv lus Yaxayas siv daim duab “cov hluas” thiab “cov tub hluas muaj zog” uas yog cov neeg nyob rau lub hnub nyoog uas muaj zog tshaj plaws, los qhia tias txawm lub zog ntawd loj npaum li cas los xij, nws kuj yog yam muaj ib ntus, thiab ib hnub twg los “yeej yuav nkees” thiab “yuav ntog”. Tabsis Vajtswv Txojlus cog lus hais tias txhua tus uas “tos ntsoov” rau Nws yeej yuav tau txais “lub zog tshiab”. Vaj Tswv Txoj Lus tsis hais tias “tej zaum yuav tau lub zog tshiab”, tabsis hais meej tias “yuav tau lub zog tshiab tiag”. “Lub zog tshiab” ntawd yog lub zog los ntawm Vajtswv, uas ntws los tsis tu ncua, pab kom peb ruaj siab ntseeg thiab vam khom Nws, muaj siab ntev thiab muaj kev cia siab txawm nyob rau hauv tej kev nyuaj siab thiab kev tu siab hauv lub neej.

Benji yog ib tug me nyuam me thiab tsis muaj zog, tabsis nws yog tus uas coj kev txhawb siab rau kuv txhua hnub. Nws yog ib lo lus qhia tias kom kuv sawv rov los thaum kuv ntog, luag ntxhi thaum kuv swb, thiab tso siab ntxiv rau Vajtswv. Tus Tswv tseem tab tom kav tswj txhua yam, puv npo hwjchim, tseem tab tom mloog kuv tej lus thov.

Thaum kuv tus me nyuam tuav kuv txhais tes, nws txhais tes me me tuav rawv kuv tus ntiv tes rwg, kuv pheej xav hauv siab tias nws puas paub tias kuv kuj tab tom tuav thiab hlub nws kawg siab kawg ntsws. Kuv vam tias thaum nws loj hlob tuaj, nws yuav to taub tias nws tau yug los thiab loj hlob los tshwj xeeb npaum li cas. Tias dlau ntawm nws, kuv tau ntsib thiab paub Vajtswv tej lus cog tseg li cas, kuj zoo yam li Vaj Tswv tau ncuav kev hlub thiab hwjchim rau kuv tus menyuam, rau kuv tus kheej, thiab rau txhua tus tib neeg, tus uas tab tom tos ntsoov Tus Tswv.

Thov caw nrog kuv peb thov Vajtswv ua ke: Au tus Tswv, Koj yog Tus uas pub lub zog tshiab rau nyuam yaus. Nyuam yaus ua Koj tsaug vim Koj tseem tab tom kav tswj txhua yam thiab tseem mloog kuv tej lus thov. Tus Tswv aw, thaum nyuam yaus qaug zog hauv txoj kev raws Koj, thaum nyuam yaus lub zog ploj tas lawm, thaum nyuam yaus pw ib leeg hauv tej kev kho siab, poob siab, thov Tus Tswv Koj pab kom nyuam yaus paub tos ntsoov Koj, ntseeg thiab vam khom Koj tej lus cog tseg, thiab cia siab rau Koj txoj koob hmoov thiab Koj lub hwjchim nyob ntawm tej kev nyuaj siab thiab kev tu siab. Thov Koj tsa nyuam yaus sawv rov los thiab pub nyuam yaus ya siab, thiab pab kom nyuam yaus tau txais Koj lub zog tshiab txhua hnub hauv nyuam yaus txoj kev ua neej. Nyuam yaus taij thov txhua yam los ntawm Tus Tswv Yexus Khetos lub npe, A-men.

Tus phooj ywg, hnub no koj puas tab tom tos ntsoov Vajtswv teb koj tej lus, kev ntxiv dag zog, thiab kev qhib rau koj lub neej? Qee zaum, txawm yog tibneeg muaj zog npaum li cas los, yeej yuav muaj lub sijhawm ntog thiab qaug zog. Vim li ntawd, nyob rau lub caij ntsib kev nyuaj siab tshaj plaws, lossis tej hnub uas tsis muaj dab tsi tshwm sim, txhua lub sijhawm thiab txhua qhov chaw, cia peb kawm kom paub tso siab thiab tos ntsoov Vajtswv. Tsis yog lwm lub sijhawm twg, tabsis yog hnub no, caw koj los cuag Tus Tswv lub zog tshiab. Thov kom peb tuav ruaj Vajtswv tej lus cog tseg! Thov kom cov uas tos ntsoov Vajtswv yuav tsis raug txaj muag. Thiab thov kom peb tau ntsib thiab tau txais lub dag zog tshiab los ntawm Vajtswv, yuav ya tau siab, thiab hla dhau txhua txoj kev qaug zog.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.