Rŏ lăng lơ bơngai lăm lu bơ̆n kŭm đei kơtơ̆ng gah tơdrong juăt đei lăm tơdrong arih noh jơ̆ “tơdrong arih kơdih sư ưh kơ đei kơdih, kŭm ưh kơ kơdih sư hiong răm, mă đei đơ̆ng tơdrong ‘nâu gô jing tơdrong to.” Păng tơdrong arih mă khan măt lăng ưh kơ ‘bôh, mă lei ling lang oei hơdai păng ling lang kăl kơ bơ̆jang lăm plĕnh teh âu.

Tơdrong arih bơhngol đơ̆ng kon Kră Yang kŭm thoi noh. Bơngai Lui kŭm kăl kơ đei tu tơdrong arih, kăl kơ jơhngơ̆m pran kơ trong yak năm kiơ̆ Kră Yang kơdih bơ̆n. Păng lu bơ̆n đei mĭnh nơ̆r pơkă wă kơ gơh lui gơnang păng jơhngơ̆m kơjăp, wă kơ băt tơpă khan Kră Yang ling lang gô ăn tu jơhngơ̆m pran ‘nao kơ dôm lu đe bu chang gô Sư.

Năr ‘nâu, ‘năr 10/02/2026, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Brooke Keith kơ̆l ‘bai NƠ̆R PƠKĂ ĂN KƠ ĐE BU CHANG GÔ KRĂ YANG.

“Mă-lei bu chang gô Kră Yang sư gô đei jơhngơ̆m pran ‘nao, sư gô păr kơjung thoi sem klang; kơdâu mă ưh kơ băt kơ lap, nơnăm mă ưh kơ gleh.” (Êsai 40:31)

Hăm đei bu jơ̆ bơngai pơm kơ buăl đei jơhngơ̆m ‘maih wă, jơ̆ jơhngơ̆m pran kơ buăl lăm chăl arih ưh? Hăm inh, ‘noh trŏ jơ̆ Benji, kon drŏnglo hơdruch inh. Benji jơ̆ mĭnh ‘nu hơ’lơ̆p ưh kơ đei kơjung tih thoi lơ bơngai, mă lei kon jơ̆ mĭnh tơdrong tơ’bôh hơđăl rơđah kơ tơdrong mơnat ăn đĕch đơ̆ng ‘Bok Kei-Dei.

Adrol kơ tơpŭ kơ Benji, ‘bok pơgang đei khan kon iĕ dêh hăm trŏ kơ khei hơnăp. Inh oei ‘blŏk mơn lăm jơhngơ̆m hli tơtăm lăm kơplah năm khăm ‘noh, kơplah băt kơ kon ‘lơ̆p wă truh tơ năr tơpŭ mă lei lăp trăp ưh tim mă truh ‘bar kĭ păng nhen thoi ưh kơ đei pơpơ̆. Jơ ‘noh, klo akăn nhi lăp băt kơ krao khan. Păng ‘Bok Kei-Dei đei bơ̆jang.

Pơge đơ̆ng rŏng, inh wơ̆t dơ̆ng tơ hnam pơgang wă khăm pă mĭnh dơ̆ng, hơmet jơhngơ̆m kơ tơdrong kăl kơ đei tơpŭ raih hloi. Hlĭch tơpă, muh măt hơ iĕ Benji đei ‘bôh lăm rup tơ kơmăi, na kŭm đei pơpơ̆ hơnơ̆ng, mah truh kơ ‘bok pơgang đei pơmat ‘mơ̆i na gơh phĭn rup.

‘Bok pơgang pơma: “Inh hlĭch hlăch tơpă yua kơ ưh tim mă đei ‘bôh tơdrong ayơ thoi ‘nâu.” Na inh lăp hiĕk tơl: “Inh lei ưh kơ đei hlĭch. Inh băt đei lơ bơngai đei krao krao kơ kon inh, păng ‘Bok Kei-Dei đei mơ̆ng kơtơ̆ng.”

Đơ̆ng rŏng kơ jơ khăm ‘noh, bre nhi wih brŏk tơ hnam păng pơtrơp gô năr tơpŭ kơ kon. Mă lei, truh tơmăng tơpŭ, dôm tơdrong đei tơtăm. ‘Bok pơgang, duch jang pơgang đei mơ̆t lĕch hơnơ̆ng, na kơmăi păng tơlei chai ‘noh tơ jơ̆p anih. Kơplah plei nuih Benji đei rơdu, ‘bok pơgang pơma kơ inh athei tơpŭ raih, mă lei lăm jơhngơ̆m, inh lui kơ ‘Bok Kei-Dei oei pơgơ̆r tôm tơdrong. Na păng, lăp dôm phŭt đơ̆ng rŏng, tơdrong mơsêh đei truh. Kon inh đei tơpŭ lăm akâu jăn ‘lơ̆ng rŏ, hiôk hian đĭ đăng păng đei jơhngơ̆m pran.

Dang ei, kơplah wă jê̆ drâu khei, Benji ling lang adrin iung hơ oei kơdih. Kon dơ drŏ, ngăl đei pơ̆k, mă lei ưh kơ layơ achăng. Lăp kăl kơ đei bơngai tơgŭm kon iung, kon đei pơhrăm iung dơ̆ng hloi. Tơdrong kĕ chơ̆n ‘noh pơm kơ inh ‘bôh băt khan kon hơ’lơ̆p gơh bơtho kơ bơngai ‘lŏ đei lơ tơdrong gah tơdrong arih.

Kơplah lăng tơ kon, inh đei tơ’blŏk truh tơ Nơ̆r Kră Yang lăm Sơ̆p Êsai 40:30-31: “Mă lu bơngai ‘nao iung kư̆m gleh lap lu tơdăm kư̆m gô kơtơih pơ̆k. Mă-lei bu chang gô Kră Yang sư gô đei jơhngơ̆m pran ‘nao, sư gô păr kơjung thoi sem klang; kơdâu mă ưh kơ băt kơ lap, nơnăm mă ưh kơ gleh.”

Êsai 40 jơ̆ chăl Nơ̆r ‘Bok Kei-Dei pơma gah tơdrong pơlung đơ̆ng ‘Bok Kei-Dei ‘măn ăn kơ kon pơlei Sư lăm anih hnam phak. Kơplah tơ’bơ̆p hăm tơdrong ơh sơ’ngon păng ưh pă hơmĕng, lu sư chang gô mĭnh tơdrong chang hơmĕng gơh dŏng pơklaih. ‘Bok khan lê̆ adrol Êsai đei yua rup “bơngai ‘nao iung” păng “tơdăm”- jơ̆ dôm lu bơngai ‘bơ̆t sơnăm đei jơhngơ̆m pran hloh, wă pơma khan mă khan jơhngơ̆m pran noh đei tih truh dang yơ, lei kŭm lăp jơ̆ đei hơgăt, na trŏ kơ jơ gô đei “gleh lap” păng “kơ tơih pơ̆k”. Mă lei Nơ̆r Kră Yang pơkă khan bơngai bu “chang gô” anih Sư lei “tơpă gô đei jơhngơ̆m pran ‘nao”. Nơ̆r ‘Bok Kei-Dei ưh kơ đei pơma “rŏ lăng gô đei jơhngơ̆m pran ‘nao” na jơ̆ “tơpă gô đei jơhngơ̆m pran ‘nao”. “Jơhngơ̆m pran ‘nao” ‘noh jơ̆ jơhngơ̆m pran truh đơ̆ng ‘Bok Kei-Dei, ling lang ro ‘bĕnh blai, tơgŭm lu bơ̆n jơhngơ̆m kơjăp lui gơnang kơ Sư, kĕ chơ̆n păng chang hơmĕng tŏk bŏk lăm dôm tơdrong ưh kơ wă păng ơh sơ’ngon truh lăm chăl arih.

Benji iĕ ioch păng rơdu rơmơ̆n, mă lei kon jơ̆ bơngai ba ăn tơdrong pơlung kơ inh rim năr. Kon jơ̆ nơ̆r tơ’blŏk ăn kơ inh dơ̆ng iung kơplah kơtơih pơ̆k, hiĕk kơplah ơh sơ’ngon, păng pơtrơp lui gơnang kơ ‘Bok Kei-Dei. Sư oei pơgơ̆r, oei ‘bĕnh tơdrong mơsêh mơyang, oei mơ̆ng nơ̆r krao khan đơ̆ng inh.

Kơplah kon rôp ti inh, tơpang ti iĕ ioch đơ̆ng kon rôp kuăr hơnglou dĕng inh, inh jet kơdih lei kon hăm băt khan inh kŭm oei rôp iŏk păng ‘mêm mơnat kơ kon hăm đĭ jơhngơ̆m dah ưh. Inh hơmĕng kơplah kon wơ̆ ‘lŏ, kon gô hlôh kơdih đei tơpŭ păng wơ̆ ‘lŏ kiơ̆ hăm tơdrong gĭt hlĭch thoi yơ. Khan đơ̆ng kon, inh hlôi mơn đei nơ̆r pơkă đơ̆ng ‘Bok Kei-Dei thoi yơ, kŭm kiơ̆ thoi Sư tơ’bôh tơdrong ‘mêm păng tơdrong mơsêh mơyang kơ kon drŏnglo inh, kơ kơdih inh, păng kơ đĭ đăng kon bơngai, dôm đe bu chang gô anih Sư.

Apĭnh đĭ đăng krao khan hơdai: Kơkuh kơ Kră Yang jơ̆ Tơ’ngla ăn jơhngơ̆m pran ‘nao lăm kon. Kon bơnê kơ Ih yua kơ oei pơgơ̆r păng mơ̆ng nơ̆r krao khan đơ̆ng kon. Kră Yang ơi, dah kon gleh lap lăm trong yak năm kiơ̆ Ih, dah kon ưh pă đei tu tơdrong arih, dah kon ‘bĭch pơdăng mĭnh adrô̆, ưh pă hơmĕng, apinh Ih tơgŭm kon băt chang gô Kră Yang, lui gơnang anih nơ̆r pơkă đơ̆ng Ih, gơnang tơdrong mơnat ăn đĕch păng tơdrong mơsêh mơyang Ih tŏk bŏk dôm tơdrong pơmat tat păng ơh sơ’ngon. Apinh dŏng tơ iung kon păng gô păr kơjung, kŭm thoi hlôi mơn đei tu jơhngơ̆m pran ‘nao đơ̆ng Ih lăm rim năr kơ chăl arih kon. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, năr ‘nâu buăl hăm đei chang gô tơdrong tơl nơ̆r, tơdrong pơthim jơhngơ̆m pran, tơdrong pơih trong đơ̆ng Kră Yang kơ chăl arih bơ̆n ưh? Mưh lăp, mă ăn jơhngơ̆m pran đơ̆ng kon bơngai đei pran kơ tang truh dang yơ, lei kŭm đei jơ kơtơih pơ̆k păng gleh lap. Yua kơ thoi noh, lăm dôm kơ năr pơmat tat hloh, mă lăm dôm lu năr hmă, rim jơ, rim anih, athei pơhrăm iŏk lui gơnang păng chang gô anih Kră Yang. Ưh kơ trŏ jơ nai, mă lei lăm năr ‘nâu, buăl đei krao wơ̆n năm hăm tu jơhngơ̆m pran ‘nao đơ̆ng Sư! Hơpơi kơ dôm lu bơngai chang gô Kră Yang Yêhôwa ưh kơ mơlâu. Hơpơi kơ lu bơ̆n gô hlôi mơn đei tu jơhngơ̆m pran ‘nao đơ̆ng anih Kră Yang, gô păr kơjung, hlôi ataih đơ̆ng dôm tơdrong lap, gleh.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.