Muaj tej lub sijhawm hauv lub neej, peb cia li ris ib yam dabtsi twg uas tsis yog yus ua. Ib qhov teeb meem uas tsis yog yus pib. Ib lub nra nyhav uas tsis yog yus tsim los. Lub nra nyhav poob los rau saum xub pwg vim… yus muaj ntsej muag qhov ntawd, yus paub, lossis ntau zaug yog yus tso tseg tsis tau.

Tej zaum zoo li no, peb tus cwjpwm ib txwm coj yog khiav nkaum, hais daws yus zaj, lossis cim civ nug: “Vim li cas ho yog yus?” Tiamsis Vajluskub tham rau peb mloog txog ib tug pojniam tau cim civ ris lub nra uas tsis yog yus li, thiab qhov ntawd dhau los ua ib tug cawmseej cawm tag nrho ib tsev neeg, tsis tas li xwb tseem tav tsis pub nchuav ntshav.

Hnub no, yog hnub 11/02/2026, Kev thov Vajtswv txhua hnub thov caw sawv daws nrog kawm Vajtswv Txojlus ua ke dhau ntawm Zaj kawm ZOO SIAB RIS NRA

“Koj sim xav saib yuav ua li cas….” (1 Xamuyees 25:17).

Nws muab qhov rooj tsoo thiab nkag los, lub ntsej muag ci lam lug, ob lub qhov muag ci iab, “Niam, lawv qhib ciam teb rau kuv mus kawm ntawv lawm, kuv nyuam qhuav txais tau email, daim ntawv uas nom tswv tso cai”. Oh zoo siab tshaj, kuv lub siab zoo heev raws kuv tus menyuam mus nraum zoov.

Ntawm kuv tus menyuam qhov kev zoo siab, kuv ho cia li tsa suab: “Ua li nag hmo koj ho ua rau kuv txhawj ua luaj”. Xwb tim kuv tus ntxhais cia li nres kiag ntawm qhov rooj, tig taubhau rov qab los, ib txiav muag: “Paub li no kuv twb tsis hais dabtsi, kom niam koj tsawg txhawj”. Lo lus no nrog nraim kuv ntau hnub.

Nco txog lub sijhawm uas tau txhawb nqa nrog xibhwb sawv ua ke ntawm lub pas dej ua kevcai raus dej kuv tus ntxhais pw rau hauv cov dej sov, kuv tau ua twjywm lees yam uas xibhwb tau hais: “Koj puas yuav nrog koj tus ntxhais Tường Vi mus ua ke nyob hauv nws lub neej sab ntsujplig?” Yog li thaum no, tomqab ib hmo thov Vajtswv nrog kuv tus menyuam qhov kev mob, tsam nws raug kaw tsis pub kawm ntawv vim ntu sijhawm kab mob Covid tshwm tuaj, kuv thiaj rov qab cim civ nug kuv tus kheej “Tsis paub kuv puas tseem txaus zog mus los nrog tej kev hloov pauv ntawm txoj kev tu tej menyuam?” Kuv ua xyem xyav thiab pom kuv lub siab yoj yees.

Zaj xwm txheej txog tus pojniam npe hu ua Anpinkayis tau Vajluskub hais txog nyob hauv I Xamuyees 25, ua rau kuv pheej tsis txaus siab rau kuv qhov kev xav. Nyob rau ntawm ib lub sijhawm phomsij rau tag nrho caj ces vim tus txiv Nanpas txoj kev tsis paub cai, Anpinkayis tau sawv los, ris lub nra, sawv rau qhov chaw uas yog tus tswv tsev tiag tsim nyog ris, tus neeg uas txuas nrog, tus tiv thaiv kom muaj kev ywj pheej, tiv thaiv sawv daws txhua tus txojsia.

“Nanpas cov tubtxib ib tug mus qhia rau Anpinkayis uas yog Nanpas tus pojniam hais tias…Koj sim xav saib yuav ua li cas; rau qhov tej no yuav ua kev puastsuaj rau peb tus tswv thiab nws tsevneeg. Peb tus tswv yog ib tug neeg uas tsis zoo hais lus, nws tsis mloog leejtwg hais li.” (1 Xamuyees 25:14,17).

Tsau tsawv rau hauv zaj xwm uas Vajluskub sau tseg, kuv pom Anpinkayis lub siab tawv thaum uas pog npaj yuav maj nroos mus ntsib, txoj kev uas pog tswj, pog faib haujlwm, tswj lub nkoj ntawm tsev neeg kom tiv dhau tej teeb meem:

“Anpinkayis txawm ua tsawg tsuag tau ob puas lub ncuav, ntim tau ob hnab cawv txiv hmab, muab tsib tug yaj tua ci, muab ob thoob txhuv kib, ib puas pob txiv hmab qhuav thiab ob puas lub txiv ncuavpias qhuav nog rau neesluav thauj” (Nqe 18).

Anpinkayis txais tej xwm ntawd sai, thiab txiav txim siab sai, ua haujlwm sai. Tag nrho tej no tsis yog xwb tim cia li ua tau, tsis nthuav tawm lub peev xwm tiamsis yog ib txua kev ntev uas pog ntseeg Vajtswv, tau ntsia pom Vajtswv ua haujlwm rau saum pog haiv neeg. Qhov no nthuav tawm nyob ntawm cov lus uas pog hais rau Daviv tias: “Tus tswv, thov koj zam txim rau tej uas kuv tau ua txhaum lawm. Tus Tswv yuav tsa koj ua vajntxwv, thiab koj cov xeebntxwv los yuav tau ua vajntxwv; qhov uas koj ua rog yog koj ua tus Tswv tes haujlwm, thaum koj tseem ua neej nyob no, koj yuav tsis ua ib qho phem li” (Nqe 28). Thiab nyob hauv cov lus uas pog tau thov: “mas kuv tus tswv yuav tsis ntxhov siab, rau qhov koj tsis tau ua phem pauj phem lossis tsis tau ua rau luag nqaij ntuag ntshav nrog. Thaum tus Tswv ua zoo rau koj uas yog kuv tus tswv lawm, thov koj nco txog kuv thiab” (nqe 31).

Txhua lo lus nyob hauv Vajluskub ua rau kuv lub siab kub lug. Kuv lub siab ntseeg rau Vajtswv uas yog Anpinkayis tus Vajtswv tau cawm tas nrho pog tsev neeg, cawm tag nrho txhua tus tub mab tub qhe hauv pog tsev neeg, thiab kuj pab rau Daviv dim qhov uas tsis tua cov neeg uas tsis muaj txim.

Lub sijhawm ntawd, kuv txhos caug ntua, tsis pub rau kuv ua xyem xyem, tsa suab hlo thov Vajtswv, “Tus Tswv kuv yuav tsis thaub qab, kuv xav nrog kuv tus ntxhais mus nyob hauv txhua txoj kev zoo siab, nyuaj siab. Koom nrog nws ntsia pom Leej Txiv txhais tes ua haujlwm zoo kawg nkaus. Thov Vajtswv zam txim rau kuv lub sijhawm uas kuv kev ntseeg tsawg, tau txhawj vim hnov qab Vajtswv txhais tes tswj. Thaum no, kuv ntseeg tias Leej Txiv ntxiv zog, thiab lub hwjchim rau kuv”.

Thiab Vajtswv yeej ib txwm ncaaj ncees. Kuv tus ntxhais mus kawm ntawv deb rov qab los saib tsev ntau zaug. Thiab muaj ib zaug, kuv ntsia pom nws nyho hau los hauv kuv chav hu, “Niam, kuv nrog koj tham me ntsis puas tau?” Kuv xav tsis thoob, “Oh, koj tsis tau pw los?”. Nyuam qhuav nrog pab kawm Vajluskub txais xyoo tshiab tas, kuv qaug zog nce mus saum txaj, tiamsis hnov tus ntxhais hu:

“Kuv tos koj los txog tav no, kuv xav nrog koj sib tham”. Xwb tim kuv cia li tsis tsaug zog. Tig saib kuv tus txiv nws pw tsaug zog heev tom qab ib hnub khwv khwv, kuv cev tes mus tua teeb thiab maj mam tawm los. Tomqab uas maj mam kaw qhov rooj, kuv pw ntawm tus ntxhais lub txaj, saib rub pam vov kuv, kuv kuj pw hauv daim pam sov xo ntawd, saib nws lub ntsej muag ntawm tus duab teeb daj pom kev zem zuag, kuv xam saib nws xav hais dabtsi. tas ib sij dhau mus sai heev, tus ntxhais tej kev xav nyob hauv lub siab tomqab uas ob xyoos mus kawm ntawv deb tsev, tej kev ua xyem xyav rau qhov kev txiav txim rau xyoo tshiab ntws lug los. Kuv plhws nws cov plaus caws ntev ntev, ua twj ywm thov Vajtswv thiab xwb tim nws cia li nug “Niam koj thov Vajtswv rau kuv puas tau?”

Nws cov ntiv tes me me muag muag sov so nyob ntawm kuv txhais tes, nti nti, raws li kuv qhov kev thov Vajtswv thaum ib tag hmo ntsiag to. Tas saib nws luag, lub qhov muag cia iab yam li hais lus kom kuv pw zoo, kuv lub siab nco Vajtswv tshav ntuj. Nws pub rau kuv muaj qhov pib dua tshiab ntawm xyoo tshiab ntau tshaj li yam uas kuv xav txog.

Leej niam lub nra, saib cuag li yog lub nra nyhav uas yuav tiv tsis dhau, thaum no Vajtswv tau txhawb kuv zoo siab ris, vim paub tias Vajtswv nrog kuv ua ke, coj kev thiab ua tus tswj.

Peb kuj muaj tej lub sijhawm yuav tau sawv los, ris lub nra. Tej zaug ntawd yog lub nra uas yog peb ua, lossis ntau zaug nws yog ib tug twg ntawd li. Tej lub sijhawm uas ntsib qhov teeb meem zoo li ntawd, thov Vajtswv txhawb peb zog kom dhau los ua cov neeg zoo siab hlo ris lub nra, txij ntawd los, tej neeg ib ncig peb yuav txais tau kev kaj siab, thiab peb kuj yuav saj tau txoj kev uas Vajtswv tswj txhua yam hauv Vajtswv txoj kev ncaj ncees.

Thov caw nrog kuv peb thov Vajtswv ua ke: Tus Tswv, Leej Txiv muaj kev hlub, thov Vajtswv zam txim rau kuv vim txhua zaug uas kuv tsis muaj zog, ua xyem xyav rau lub nra uas koj muab cob. Thov pub kom kuv muaj koj txoj kev txawj ntse, thiab lub siab npaj txhij cia rau Vajtswv siv, coj txoj kev kaj siab rau cov neeg ib ncig kuv, kom koj txoj kev ncaj ncees tau nthuav tawm. Kuv thov hauv Tswv Yexus Khetos lub npe, Amees.

Cov kwv tij txhua tus, Vajtswv yeej tseem tab tom nrhiav cov neeg uas zoo li Anpinkayis, cov neeg paub nres, tshuaj thiab zoo siab hlo ua haujlwm hauv Vajtswv txoj kev hwm Vajtswv. Tej zaum nyob hauv tsev neeg, qhov chaw ua haujlwm, lossis hauv lub zej zos, hauv Pawg Ntseeg lossis hauv tej pab pawg, pawg me, Vajtswv tso peb rau ib thaj chaw uas tsis yooj yim, ib lub nra nyhav cuag li tsis yog yus li. Tiamsis nyob rau lub sijhawm ntawd, Vajtswv caw kom peb txhua tus txhais ruam mus nrog kev ntseeg, tsis thaub qab, tsis ua xyem xyav, zoo siab hlo ris lub nra los ntawm lub siab ntseeg Vajtswv ua tus tswj. Thov Vajtswv pub kom peb muaj lub siab tawv kam sawv, thiab muaj lub siab mos muag ua haujlwm hauv txoj kev hlub. Thaum peb mloog lus nrog Vajtswv mus, Vajtswv yuav siv txoj kev mloog lus ntawd ua kom muaj kev kaj siab, muaj siab thiab ua koob hmoov rau ntau tus neeg ib ncig ntawm peb.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.