Đei lăm tơdrong arih, blư truh tơ lu bơ̆n đei “pŭ iŏk” minh tơdrong kiơ noh mă ưh kơ đơ̆ng lu bơ̆n pơm. Minh tơdrong đei hơtŭt bơm dih băl mă ưh kơ đơ̆ng bơ̆n pơtơm pơm ăn. Đei tơdrong pŭ iŏk mă ưh kơ đơ̆ng bơ̆n pơm. Đei pŭ tơdrong trăp yua kơ … bơ̆n đei măt tơ noh, yua kơ hlôh tơdrong noh, dah kư̆m đei bơ̆n ưh kơ wă lăng đĕch tơdrong noh.

Lăm dôm lu tơdrong thoi noh, tơdrong đơ̆ng lu bơ̆n pơm noh gô wer weh, pơma pơdŏng kơdih, dah jet kơdih: “Yua kơ kiơ noh jơ̆ inh?” Mă lei, Nơ̆r ‘Bok Kei-Dei đei ră roi ăn kơ lu bơ̆n mơ̆ng tơdrong hơ’mon kơ minh ‘nu bơngai drŏ kăn đei drơ̆ng pŭ iŏk gah tơdrong ưh kơ đơ̆ng sư pơm, păng đơ̆ng tơdrong noh jing pơih ăn dŏng pơklaih kơ minh pôm hnam dơnŏ, truh tơ găn tơdrong tuh pham.

Năr ‘nâu, ‘năr 11/02/2026 todrong toda Amăn Jơ Krao Khan Rim Năr, apĭnh krao wơ̆n‘bơngai mơ̆ng hơdai tơchĕng pơwao nơ̆r Kră Yang hăm bơngai chih kơ̆l ‘bai JƠHNGƠ̆M HIÔK PŬ IŎK TƠDRONG TRĂP.

“Thoi noh dang ei ih athei tơchĕng lăng wă pơm liơ …” (I Samuel 25:17)

Kon hơ’lơ̆p tŭn pơih ‘măng, kơdâu mơ̆t, măt sư praih hiôk, “Mĕ ơi, lu sư pơih ‘măng jang teh đak ăn kơ kon mơ̆t hŏk bơih âu, kon đei ‘bôh lăm email, hla bơar pơdrơ̆ng đơ̆ng bơngai sek tơlang”. Ô hiôk dêh, jơhngơ̆m inh ‘nă hal yak năm lĕch tơ kon.

‘Bôh kon đei jơhngơ̆m hiôk chơt, inh đei nơ̆r pơma: “Na kơmăng hei kon pơm kơ mĕ hiơ̆k bơngơ̆t dêh”. Kon drŏ kăn inh dơrăng dơ̆ng kơtă ‘bơ̆t ‘măng, hoe lăng tơ inh: “Băt kơ thoi noh kon ưh kơ roi, wă kơ mĕ huay kơ hiơ̆k bơngơ̆t”. Nơ̆r pơma noh druh kiơ̆ inh dôm năr hloi.

‘Blŏk kơ đei jơhngơ̆m hiôk kơplah dơ̆ng hơdai ‘Bok Bơtho dơ̆ng tơlăm sơlŭng đak pơm Batem tơgŭm kon drŏ kăn inh môch tơ đak tơtŏ, inh đei pơsĭt lăm jơhngơ̆m nơ̆r ‘Bok Bơtho athei: “Ih gô hơdai Tương Vi yak năm hăm đon lui mon ‘nâu i?” Mă lei, đơ̆ng rŏng kơ minh măng krao khan hăm jơhngơ̆m sơ’ngon đơ̆ng kon, krê ưh kơ đei wă hŏk yua kơ đơ̆ng đei jĭ hơbuh Covid, inh đei jet kơdih inh “Inh hăm wă đei jơhngơ̆m pran jur tŏk hăm tơdrong arih wei rong kon?”. Inh ưh kơ đei pơ̆n nuih păng mơn kơ jơhngơ̆m ngĭl ngŭl.

Tơdrong roi hơ’mon kơ bơngai drŏ kăn Abigail nơ̆r ‘Bok Kei-Dei đei roi lăm I Samuel 25, pơm kơ inh đei tơtăm kơ tơdrong tơchĕng inh. Kơplah đei tơdrong kăl păng krê dêh kơ adrĕch adrŭng đơ̆ng klo sư noh jơ̆ Nabal, Abigail iung pŭ iŏk, tơdrong ‘nâu trŏ kơ bơngai tơm lăm hnam dơnŏ pŭ iŏk, bơngai tơ’bưh, bơwei tơdrong rơnŭk rơnua, bơwei tơdrong arih rim ‘nu lăm hnam dơnŏ.

“Đei minh ‘nu bơngai đĭch roi ăn kơ Abigail, Akăn Nabal …Thoi noh dang ei ih athei tơchĕng lăng wă pơm liơ yua kơ gô đei tơdrong răm truh kơ yŏng tơ’ngla lu nhôn păng kư̆m truh kơ hnam dơnŏ ih; yŏng tơ’ngla khĕnh dêh, ưh kơ đei bu pơ̆n pơma kiơ hăm sư.” (I Samuel 25:14, 17)

Mơ̆t yak năm lăm tơdrong hơ’mon nơ̆r ‘Bok Kei-Dei đei chih, inh đei mơn kơ tơdrong pơ̆n nuih đơ̆ng Abigail, đơ̆ng tơdrong sư hơmet adrol kơ wă tơ’bơ̆p hloi ‘nâu, đơ̆ng tơdrong sư proh hơmet, klah song tơdrong jang, wơ̆r thŏng nan hnam dơnŏ lĕch hlôi kơ kial hơbŭt, đak poh yă:

“Abigail hăt hot iŏk ‘bar-hrĕng tŏ tơpei ‘bĕng, ‘bar kơthŭng akar sik hơmu; ‘nhĕm pơđăm tŏ triu pai sĭn boih. Pơđăm kơthŭng phe ‘ba mi hơdrĕng. Minh-hrĕng hơie plei hơmu, ‘bar-hrĕng tơpei ‘bĕng plei hơra kro, sư hơtŏk tơ rŏng aseh iĕ.” (trong 18 )

Abigail kơtơ̆ng tơdrong noh tĕnh dêh, drơ̆ng pơm tĕnh hloi. Tôm tơdrong ‘nâu truh ưh kơ đei thar truh đĕch mă đơ̆ng đunh sơnăm bơih sư lui gơnang kơ Kră Yang, đei lăng ‘bôh Kră Yang pơm tơdrong mơsêh kơ adrĕch adrŭng sư. Tơdrong ‘nâu đei tơ’bôh tih dêh sĭt thoi Đawit: “Apinh ‘nĕ jơ̆ yo kơ đĭch đam ih âu! Kră Yang tơpă gô ăn kơ teh đak pơtao ih kơjăp sot, yua kơ ih wang tơblah hơdai hăm Kră Yang păng đĭ lăm chăl arih ih ưh kơ đei ‘bôh minh tơdrong răm kiơ.” ( trong 28). Kư̆m nhen thoi sư đei krao apinh: “Hơpơi rŏ kơ ih huay kơ tơtăm dah jơhngơ̆m ưh kơ hiôk yua kơ đei tuh pham mă tơdrong ưh kơ đei pơm ‘mong kơ kơdih akâu. Layơ Kră Yang ăn kơ ih đei pŭn hiôk, apinh ‘blŏk kơ inh!” (trong 31)

Đơ̆ng rim kơ chư lăm sơ̆p hla bơar ‘Bok Kei-Dei pơm kơ jơhngơ̆m inh blŏk. Jơhngơ̆m lui ngeh kơ ‘Bok Kei-Dei đơ̆ng Abigail đei dŏng pơklaih đĭ đăng bơngai lăm hnam dơnŏ sư, păng kư̆m tơgŭm Đawit huay kơ đei tơblah truh tơ đei pham lĕch sĕch pơchah đơ̆ng lu bơngai ưh kơ đei tơdrong yoch kiơ.

Lăm jơphut noh inh sơtơ̆p kŭl tăng, huay kơ tơchĕng drut tơrŏng, krao khan rơ̆n re hloi, “Kră Yang ơi, kon ưh kơ kơdŭn tơrŏng, kon oei ‘maih wă yak hơdai hăm kon drŏ kăn kon, lăm tơdrong hiôk chơt dah sơ’ngon, wă kơ hăm kon drŏ kăn kon đei lăng ‘bôh tơpang ti ‘lơ̆ng rŏ Ih. Kon apinh ih mơnat kơ kon kơplah đei jơ phŭt kon rơdu lăm đon lui, đei hiơ̆k bơngơ̆t hiơt bơih kơ tơdrong pơgơ̆r Ih. Jơ ‘nâu, kon lui ngeh kơ ‘Bă ăn kơ kon đei jơhngơ̆m pran.”

Na ‘Bok Kei-Dei ling lang tơpăt. Kon drŏ kăn inh năm hŏk tơ ataih đei brŏk ngôi tơhnam lơ wơ̆t. Păng đei minh ‘măng, ‘bôh kon drŏ kăn inh mơ̆t tơ lăm hnam, “Mĕ ơi, kon ‘maih pơma dơnuh hăm mĕ tŏ sĕt hăm gơh ưh?” inh ‘bôh hlĭch dêh, “Ô kon tam mă tep ah?”. Kon hăm khŭl hŏk pơhrăm nơ̆r ‘Bok Kei-Dei sơng iŏk sơnăm ‘nao, ‘nao đang, inh đei gleh lap tŏk tơ giơng, mơ̆ng rah kon drŏ kăn roi: “Kon gô mĕ đơ̆ng hei bơih, ‘maih pơma dơnuh hăm mĕ”, inh praih kơ đơ̆ng tep hloi. Lăng tơ klo inh sư lap oei tep, inh pĭt ŭnh lĕch đơ̆ng anih tep. Đơ̆ng rŏng kơ tang pơ‘lơ̆ng ‘măng, inh bĭch hloi lăm anih tep kon drŏ kăn inh, ‘bôh sư su khăn truh tơ kang, inh kư̆m su khăn hơdai hiôk lăng tơ kon kơplah đei ŭnh hơdah, inh gô sư wă pơma kiơ. Na đei pơma tŏsĕt đĕch, đơ̆ng sư hŏk tơ ataih, dôm kơ proh hơmet kơ tơ sơnăm tơ anăp. Inh hơ iă kơ sŏk gĕnh kơ jung kon inh, oei krao khan lăm jơhngơ̆m păng apinh hloi “Mĕ krao khan hăm kon ưh?”

Inh rôp kơ jăp ti iĕ rơmuăn, tơtŏ đơ̆ng kon drŏ kăn inh păng krao khan lăm kơ măng noh. Na inh lăng tơ kon drŏ kăn inh, inh hiĕk hơkat ăn kơ sư tep hiôk ‘lơ̆ng, jơhngơ̆m inh hiôk bơnê kơ Kră Yang. Sư ăn kơ inh lăm sơnăm ‘nao hloh kơ đon inh tơchĕng. Lăm tơdrong ‘mêm đơ̆ng bơngai mĕ rŏ kơ pŭ trăp pă đei kĕ hlôi, jơ ‘nâu Kră Yang đei pơlung inh pŭ iŏk, yua kơ inh băt Sư ling lang oei hơdai, chông anhăk păng pơgơ̆r.

Bu bu lăm lu bơ̆n gô đei layơ noh, gô iung pŭ iŏk. Rŏ lăng noh jơ̆ pŭ iŏk kơdih, dah tơdrong noh trŏ kơ bơngai bu noh. Mă lei kơplah tơ’bơ̆p tơdrong arih thoi noh, apinh Kră Yang pơlung lu bơ̆n jing bơngai đei jơhngơ̆m pŭ iŏk, wă kơ đơ̆ng noh, dôm lu bơngai jum dăr kơ lu bơ̆n đei rơnŭk rơnua, păng lu bơ̆n gô hlôi mơn đei Kră Yang pơgơ̆r tôm tơdrong ‘lơ̆ng tơpăt Sư.

Apĭnh đĭ đăng krao khan hơdai: Kơkuh kơ ‘Bok Kei-Dei, ‘Bă mă ‘mêm, apinh Kră Yang huay kơ jô̆ yo kơ kon yua kơ lơ wơ̆t kon rơdu, ưh kơ pơ̆n pŭ iŏk tơdrong trăp mă Ih pơjao. Apinh Kră Yang ăn kơ kon đei đon hlôh wao đơ̆ng Ih, đei jơhngơ̆m ăn kơ Ih yua iŏk, wă kơ ba ăn tơdrong hiôk ‘lơ̆ng ăn kơ bơngai jê̆ kon, păng ăn tơdrong ‘lơ̆ng tơpăt Ih đei tơ’bôh. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, Kră Yang oei chă lu bơ̆n bơngai thoi kơ Abigail, lu bơngai băt kơ mơ̆ng ‘mơ̆i, pơwao păng gô pơm lăm tơdrong hli yom kơ ‘Bok Kei-Dei. Rŏ lăng lăm hnam dơnŏ, tơ anih bơ̆jang, dah tơ kon pơlei, tơ lăm Hnam Akŭm, dah tơ lăm lu khŭl, Kră Yang dan lu bơ̆n tơ lăm tơdrong bơ̆jang ưh kơ ‘bônh, tơdrong pŭ trăp rŏ kơ ưh kơ gah lu bơ̆n. Na đơ̆ng lăm tơdrong noh, sư krao sơng iŏk lu bơ̆n yak năm hăm đon lui, huay kơ kơdŭn tơrŏng, đei jơhngơ̆m pŭ iŏk hăm đon lui gơnang kơ tơdrong pơgơ̆r Sư. Apinh Kră Yang ăn kơ lu bơ̆n đei đon hlôh wao wă kơ băt wă pơm thoi yơ. Apinh Kră Yang ăn kơ lu bơ̆n đei jơhngơ̆m pơ̆n nuih wă kơ iung pơm hloi, đei jơhngơ̆m rơmuăn wă kơ bơ̆jang hăm jơhngơ̆m ‘mêm mơnat. Kơplah lu bơ̆n chu yom yak năm hăm Kră Yang, Sư gô yua iŏk đơ̆ng jơhngơ̆m chu yom noh ăn kơ lu bơ̆n rơnŭk rơnua, tơdrong arih đei pŭn hiôk ăn kơ lơ bơngai jum dăr kơ lu bơ̆n.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơp dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.