Muaj tej qhov teeb meem nyob hauv lub neej cia li xwb tim tshwm los, ua rau muaj ib qhov khoob lug tsis muaj leej twg xav tau. Kev pob puas, txawm yog yuav zoo li cas los- txoj kev tuag, kev puas tshuaj, kev mob kev nkeeg lossis tej kev npau suav uas tseem ua tsis tau tiav- puav leej ua tej qhov caws uas nyuaj hu npe. Ntawm peb lub qhov muag yog tej hnub tsaus ntuj nti, lub neej tom ntej cia li tsis pom qab mus, thiab peb lub siab cia li ntas mus ntas los rau ntawm tej lus nug tsis muaj lo lus teb. Tiamsis nyob hauv lub neej uas muaj kev hloov pauv li no, muaj ib tug uas tsis hloov pauv tshwm ntsej muag. Thiab Vajtswv yog tus ncaj ncees yuav txhawm kom puv nkaus tej ntawd hauv peb lub siab.

Hnub no, yog hnub 12/02/2026, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Courtney Johnson dhau ntawm Zaj kawm LUB COS PLIAV NTAWM NTIV TES.

“Tiamsis thaum nej raug kev tsimtxom ib nyuag ntu dhau lawm, tom qab ntawd Vajtswv tus uas muaj koob hmoov nplua mias yuav pab kom nej ua tau neeg zoo kawg nkaus, thiab kom nej muab siab rau ntseeg Vajtswv heev ntxiv. Nws yuav txhawb nej lub zog kom nej nyob ruaj nrees.” (I Petus 5:10-11).

Tas kuv rov qab ntsia pom dua – qhov caws pliav nyob ntawm kuv ntiv tes rwg sab laug. Saib nws tsis muaj dabtsi npog, ua rau kuv cim civ nug tias tsis paub tej neeg ib ncig lawv puas xav li cas. Kuv twb coj nplhaib rau ntawm ntiv tes no ntau xyoo, txog qhov uas saib nws me dua ntiv sab xis. Yog li thaum no, yeej tsis muaj ib lub nplhaib twg nyob hauv kuv lub chaw rau khoom txaus coj rau ntiv tes no ntxiv. Kuv paub zoo qhov no, vim kuv twb sim tas nrho lawm.

Txij hnub uas kuv tus txiv nws qhaib kuv nyob hauv lub tuam tsev nyob ntawm taw roob zoo nkauj ntawd, ntawm tus ntoo khaub lig, ntawm kuv ntiv tes no thaum twg twb coj rawv ib lub nplhaib kub dhos cov hlaws muaj nqis. Kaum hli tom qab, lub nplhaib no pauv los ua lub nplhaib sib yuav, thiab kuv sab tes laug dhau los tseem ceeb heev. Tej qe zeb muaj nqis thiab kub mas yeej ib txwm zoo. Tiamsis qhov zoo tsis los ntawm tej ntawd los. Ntiv tes no nqa lub cim ntawm kuv txoj kev cog lus pub rau kuv tus txiv, txog rau thaum txoj kev tuag quas, ib yam li wb cov lus tau cog tseg ntawm Vajtswv xub ntiag.

Tas txoj kev tuag tau quas wb tiag tiag li. Thiab thaum no tsuas tshuav kuv ib leeg lawm xwb. Ntiv tes no dhau los ua qhov lus ntuas kuv txog txoj kev poob – ntawm tus neeg ntawd, txog lub neej tom ntej, txog tej kev npau suav uas tseem ua tsis tau tiav. Lub nplhaib no tsis yog tsuas yog kub xwb tiamsis tseem yog lub cim ciaj sia.

Koj puas thooj yim nrog kuv thiab? Tej zaug, koj kuj muaj dhau ib ntiv tes coj nplhaib sib yuav dhau los, tiamsis thaum no tsis muaj lawm. Lossis txhua zaug saib ntawm tsom iav, koj pom ib feem twg ntawd nyob hauv yus lub neej tsis zoo li yav dhau los, vim mob nkeeg, vim kev tu siab, lossis ib qhov kev puas tshuaj twg ntawd tsis paub muab tham tau ua lus.

Ntev tuaj, kuv pom tias ntiv tes no tsis yog ntuas kuv txog yam uas poob lawm xwb, tiamsis tseem nthuav tawm yam uas tsis paub txog lub neej tom ntej. Tag nrho tej uas kuv tau teem tseg rau lub neej cia li hloov pauv tas. Wb ib niam txiv koom tu tej kev cia siab, kev npau suav rau lub neej tom ntej – rau wb thiab wb tej menyuam. Thaum no, kuv ib leeg yuav tau cim civ ris tej no. kuv paub Vajtswv nrog nraim kuv, tiamsis kuv lub siab pheej raug cab mus rau hauv txoj kev ntshai uas kuv tsis paub.

Tiamsis, zaum no tas txog lwm zaus, Leej Txiv saum ntuj maj mam ntxhi nws tej lus cog tseg rau kuv lub siab tias: “Kuv tus ntxhais, yog, ntawm no yog qhov kev puas tshuaj uas koj yuav tau ris, thiab yeej yog txhua yam twb hloov pauv lawm. Tiamsis kuv tsis muaj hnub hloov pauv.”

Nyob hauv 2 Kevcai 31:8, peb tau ntuas tias: “Tus Tswv yuav mus ua koj ntej thiab nrog nraim koj. Nws yuav tsis ncaim koj lossis tso koj tseg; koj tsis txhob pooh siab lossis ntshai” Tus Vajtswv uas kuv pehawm yog tus uas tsis hloov pauv thiab ncaj ncees rau txhua yam uas Nws tau tsim los. Nws yeej tseem yog tus nag hmo, hnub no thiab mus ib txhis tsis hloov pauv, thiab Vajtswv muaj cuab kav siv tej kev puas tshuaj ntawd hauv kuv lub neej kom ua tiav Vajtswv lub homphiaj tseg rau kuv.

Ntiv tes ntawd thaum no kuj muaj dua lwm lub ntsiab lus. Thiab kuv ntseeg tias thaum txog lub sijhawm, Vajtswv yuav ua kom lub qhov caws ntawd zoo. I Petus 5:10-11 hais meej meej: “Tiamsis thaum nej raug kev tsimtxom ib nyuag ntu dhau lawm, tom qab ntawd Vajtswv tus uas muaj koob hmoov nplua mias yuav pab kom nej ua tau neeg zoo kawg nkaus, thiab kom nej muab siab rau ntseeg Vajtswv heev ntxiv. Nws yuav txhawb nej lub zog kom nej nyob ruaj nrees. Thov kom Vajtswv lub hwjchim muaj nyob mus ibtxhis li. Amees.”

Yeej tsis muaj ib qhov khoob twg uas Vajtswv lub hwjchim yuav txhawm tsis tau. Thaum Vajtswv lub sijhawm los txog, kuv ntiv tes ntawd yuav tsis yog lub cim ntawm qhov kev pob puas tsis muaj kev cia siab. Pauv rau tej ntawd, Vajtswv yuav hloov pauv tus nplaim taws coj kev ntawm qhov kev zoo siab thiab cia siab hauv Nws. Yam uas Vajtswv yuav ua rau kuv, Vajtswv kuj muaj cuab kav ua rau koj hnub no.

Thov caw nrog kuv peb thov Vajtswv ua ke: Leej Txiv tus muaj kev hlub, koj paub zoo tej txua khoob lug hauv kuv lub siab, tej yam uas kuv tau poob lawm, thiab tag nrho tej kev ntshai txog lub neej tom ntej. Ua Vajtswv tsaug vim nyob hauv txhua yam uas tsis hloov pauv ntawd, tsuas yog Koj ib leeg xwb thiaj tsis hloov pauv. Thov Leej txiv los thiab txhawm tej qhov khoob ntawd hauv kuv tus ntsujplig los ntawm Koj txoj kev kaj siab thiab cia siab. Thov kho kom zoo tej qhov txhab uas kuv tab tom ris, pab kom kuv zoo yog koj lub sijhawm. Kuv thov muab lub neej tom ntej rau koj txhais tes. Kuv thov hauv Tswv Yexus Khetos lub npe, Amees.

Cov kwv tij txhua tus, nyob hauv tej kev puas tshuaj thiab tsis muaj kev cia siab hauv lub neej no, Vajtswv yeej ua twj ywm ua Vajtswv qhov hauv lwm. Vajtswv ntsia pom tej qhov khoob lug ntawm peb lub siab, thiab Vajtswv yuav tsis cia peb nyob ib leeg. Txog lub sijhawm zoo, Vajtswv yuav txhawm, yuav kho kom zoo thiab ua kom tshiab tej yam uas cuag li tsis muaj hnub yuav rov qab zoo. Tej yam uas twb pib pob puas, Vajtswv yuav ua kom rov qab zoo.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.