Đei dôm kơ tơdrong kơnê̆ thar blư truh lăm chăl arih, đei ‘măn lê̆ mĭnh anih rơhông ưh kơ đei bu chang gô. Tơdrong hiong răm, mă đei lăm dôm tơdrong thoi yơ- tơdrong lôch, pơchah răm, tơdrong jĭ jăn dah dôm tơdrong hơpơi wă ưh kơ jing- đei ‘măn lê̆ dôm rơka anat kơ krao anăn. ‘Bơ̆t măt lu bơ̆n jơ̆ dôm kơ năr măng mu, tơ anăp thar nhen thoi ưh kơ băt, păng jơhngơ̆m bơ̆n ưh kơ hơđơ̆ng lăm dôm kơ nơ̆r jet ưh kơ đei nơ̆r tơl. Mă lei tŏk bŏk chăl arih đei lơ tơdrong tơplih, ling lang ‘bôh mĭnh Tơ’ngla ưh kơ layơ tơplih. Păng Sư ling lang jơ̆ Tơ’ngla tơpăt tuh tơ’bĕnh dôm anih rơhông lăm jơhngơ̆m lu bơ̆n.

Năr ‘nâu, ‘năr 12/02/2026 tơdrong tơdă Amăn Jơ Krao Khan Rim Năr, apĭnh krao wơ̆n‘bơngai mơ̆ng hơdai tơchĕng pơwao nơ̆r Kră Yang hăm bơngai chih Courtney Johnson kơ̆l ‘bai ĐÊL ĐƠ̆NG ‘BOT CHƠ KHIĔN TƠ HƠNGLŎU TI.

“Mă-lei ‘Bok Kei-Dei krao iŏk bơ̆n Sư wă kơ bơ̆n oei hiôk hăm Sư ling-lang yua kơ bơ̆n lui kơ Yêsu Krist, na Sư ăn kơ bơ̆n pơmat tŏ sĕt đĕch ưh kơ đunh, Sư gô pơm kơ bơ̆n lui kơjăp jing bơngai tơpăt lăm tôm tơdrong. Yua kơ Sư mơnat na Sư tơgŭm bơ̆n tôm tơdrong thoi noh.  Pôm ‘Bok Kei-Dei đĕch boih mơsêh mơyang pơgơ̆r ling-lang ưh kơ đei layơ tôch.” (I Pêtrôs 5:10-11)

Na inh kŭm đei lăng ‘bôh ‘noh- đêl đơ̆ng ‘bot chơ khiĕn tơ hơnglŏu ti tơtil hơnglou dĕng pah ‘ngiĕo inh. Lăng sư kơnê̆ păng ‘bôh hơđăl, pơm kơ inh jet kơdih lei dôm lu bơngai jum dăr hăm đei lăng kơnhăm ưh. Inh đei ‘bot tơ khiĕn ‘bơ̆t hơnglŏu ‘nâu đunh sơnăm, đunh dĭng truh kơ lăng sư nhen iĕ hloh kơ hơnglŏu dĕng pah ‘ma. Yua kơ thoi noh na dang ei, ưh kơ đei tơ khiĕn ayơ nai lăm tơmam tah maih pơguăng inh gơh lăp hăm hơngŏu ti ‘nâu dơ̆ng. Inh băt hơđăl tơdrong ‘noh, yua kơ inh đei pơlong lăng đĭ đăng bơih.

Đơ̆ng năr klo inh pĭnh hơkơ̆t kơ inh lăm hnam anih krao khan jeng kông ‘lơ̆ng rŏ, ala yơ̆p ‘long pơglang hmă đĕch, kơpal hơnglŏu ti ‘nâu layơ kŭm ‘bot mĭnh pôm tơ khiĕn. Blŭng a, sư rang hơdah hăm tơ khiĕn maih đei pơklep tơmo jơmŏng. Jĭt khei đơ̆ng rŏng, tơ khiĕn hơkơt đei tơplih hăm tơ khiĕn pơkong, păng đĭ tơpang ti pah ‘ngiĕo inh lăng ‘lơ̆ng rŏ. Tơmo gĭt păng maih lei ‘lơ̆ng tơpă, mă lei tơdrong rang rŏ tơpă ưh kơ đei truh đơ̆ng ‘noh. Hơnglŏu ti ‘nâu đei chĕp tơdrong tơ’bôh đơ̆ng nơ̆r pơkăm pơkă inh ‘măn kơ mĭnh ‘nu bơngai drŏnglo, dĭng truh tơ kơplah tơdrong lôch tơklah, thoi nơ̆r pơkă măr nhi đei pơkă ‘bơ̆t anăp ‘Bok Kei-Dei
Na tơdrong lôch tơpă đei tơklah măr nhi. Păng dang ei inh lăp pă mĭnh drô̆.

Hơnglŏu ti ưh kơ đei ‘bot tơkhiĕn ‘nâu jing nơ̆r tơ ‘blŏk gah tơdrong hiong răm- gah bơngai ‘noh, gah ning mônh ‘noh, păng gah dôm tơdrong hơpơi ưh tim mă jing tơpă. Dôm kơ tơ khiĕn ‘noh ưh kơ sĭ jơ̆ kong maih, lu sư jơ̆ rup tơ’bôh arih.
Buăl hăm đei mơn lăm jơhngơ̆m hăm inh ưh? Rŏ lăng, buăl kŭm đei mĭnh hơnglŏu ti đơ̆ng đêl ‘bot tơ khiĕn pơkong dah tơ khiĕn hơkơ̆t, mă lei dang ei biao ưh kơ đei. Dah rŏ lăng, rim kơplah lăng lăm kơ mĭl, buăl ‘bôh băt mĭnh tơdrong ayơ ‘noh lăm chăl arih kơdih ưh pă đei thoi adrol sơ̆, yua kơ tơdrong jĭ jăn, yua kơ ơh sơ’ngon, dah mĭnh tơdrong hiong răm ưh kơ gơh wă pơma hăm nơ̆r.

‘Net ‘net, inh ‘bôh băt khan hơnglŏu ti hmă ‘noh ưh kơ sĭ lăp tơ ‘blŏk kơ inh gah tơdrong inh đei hiong, mă kŭm tơ’bôh tơdrong ưh kơ băt hơđăl kơ tơdrong tơ anăp ning mônh. Đĭ đăng dôm tơdrong inh đêl proh hơmet kơ chăl arih inh đei tơplih đĭ. Klo akăn nhi đei hơdai rong bơwei dôm kơ tơdrong chang hơmĕng, dôm kơ hơpơi wă tơ anăp ning mônh- kơ măr nhi păng kơ lu kon hơ’lơ̆p. Dang ei, inh đei adrin kơdih tơchĕng pơwao dơ̆ng dôm kơ tơdrong ‘noh, mă lei jơhngơ̆m inh oei ngăl đei pơhlŭ huŏng lăm tơdrong hli tơrơ ‘bơ̆t anăp dôm tơdrong ưh ko băt.

Mă lei, đĭ kơplah ‘nâu truh kơplah nai, ‘Bă Kơpal Plĕnh đei pơ’lơ̆ng pơma mơmơnh dôm kơ nơ̆r pơkă đơ̆ng Sư hăm jơhngơ̆m inh: “Kon drŏkăn inh, trŏ thoi noh, ‘nâu jơ̆ tơdrong hiong răm kon đei pŭ iŏk, păng trŏ jơ̆ tôm tơdrong đei tơplih hăm kon. Mă lei Inh ưh kơ đei layơ tơplih.”

Lăm Bơtho Khôi Juăt 31:8, lu bơ̆n đei tơ’blŏk khan: “Kră Yang boih gô năm adrol kơ ih, Sư gô oei hơdai hăm ih păng Sư ưh kơ achăng lê̆ ih, kư̆m ưh kơ weh ataih đơ̆ng ih. Ih ‘nĕ kơ hli păng ‘nĕ kơ rơdu jơhngơ̆m.” ‘Bok Kei-Dei mă inh kơkuh jơ̆ Tơ’ngla ưh kơ đei tơplih păng ling lang tơpăt hăm tôm tơmam Sư pơjing. Sư jơ̆ Tơ’ngla oei hơnơ̆ng ling lang, mă đơ̆ng sơ̆ khơ̆ dang ei truh tơ ning mônh. păng Sư gơh yua trŏ kơ dôm anih pơchah răm lăm chăl arih inh wă pơkeh jing tơdrong kơnhăm mơsêh mơyang Sư ‘măn ăn kơ inh.

Hơngŏu ti hoh ‘nâu dang ei kŭm đei chĕp mĭnh tơdrong tơm kăl nai. Păng inh lui khan truh trŏ jơ năr, kơdih Kră Yang gô pơm tơ’bĕnh đơ̆ng đêl ‘bot tơkhiĕn ‘noh. Pêtrôs 5:10-11 pơma khan: “Mă-lei ‘Bok Kei-Dei krao iŏk bơ̆n Sư wă kơ bơ̆n oei hiôk hăm Sư ling-lang yua kơ bơ̆n lui kơ Yêsu Krist, na Sư ăn kơ bơ̆n pơmat tŏ sĕt đĕch ưh kơ đunh, Sư gô pơm kơ bơ̆n lui kơjăp jing bơngai tơpăt lăm tôm tơdrong. Yua kơ Sư mơnat na Sư tơgŭm bơ̆n tôm tơdrong thoi noh. Pôm ‘Bok Kei-Dei đĕch boih mơsêh mơyang pơgơ̆r ling-lang ưh kơ đei layơ tôch! A-men.”
Ưh kơ đei tơdrong rơhông ayơ mă tơdrong mơsêh mơyang Kră Yang ưh kơ gơh tuh tơ ‘bĕnh. Dah jơ năr đơ̆ng Sư truh, hơnglŏu ti hoh inh gô ưh pă jơ̆ tơ’bôh đơ̆ng tơdrong hiong răm dah ơh sơ’ngon bơih. Tơplih lăm ‘noh, Kră Yang gô pơm kơ sư jing gŏl ŭnh đơ̆ng tơdrong hiôk chơt păng chang hơmĕng lăm Sư. Tơdrong ‘Bok Kei-Dei gơh pơm kơ inh, Sư kŭm gơh pơm kơ kơdih buăl năr ‘nâu.

Apĭnh đĭ đăng krao khan hơdai: Kơkuh kơ ‘Bă mă ‘mêm, Ih băt hơđăl kơdôm anih rơhông lăm jơhngơ̆m kon, dôm kơ tơdrong kon đei hiong, păng hăm đĭ kơdôm tơdrong hli tơrơ gah tơ anăp ning mônh. Bơ nê kơ Ih yua kơ lăm đĭ đăng dôm tơdrong ưh kơ pơdơh tơplih, lăp mĭnh Ih jơ̆ Tơ’ngla ưh kơ layơ tơplih. Apinh ‘Bă mơ̆t pơgơ̆r păng tuh tơ’bĕnh dôm kơ anih rơhông anih bơhngol kon hăm tơdrong hiôk hian păng tơdrong chang hơmĕng đơ̆ng Ih. Apinh pơklaih ‘lơ̆ng dôm rơka jĭ kon đei, dŏng tơgŭm păng pơklaih praih kon trŏ lăm jơ năr ‘lơ̆ng rŏ đơ̆ng Ih. Kon apinh pơyơ̆r tơdrong tơ anăp kon lăm tơpang ti Kră Yang. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, tŏk bŏk lăm dôm tơdrong hiong răm păng ưh kơ tơpă đơ̆ng chăl arih ‘nâu, Kră Yang oei thĕng hreh bơ̆jang tơdrong pơklaih praih đơ̆ng Sư. Sư lăng ‘bôh dôm kơ anih rơhông lăm jơhngơ̆m lu bơ̆n, păng Sư gô ưh kơ ăn kơ bơ̆n mĭnh adrô̆. Truh jơ năr tôm mah, Sư gô ‘mong ăn, pơklaih, păng pơm ‘nao dôm tơdrong nhen thoi ưh kơ layơ wơ̆t dơ̆ng. Dôm kơ tơdrong kiơ đơ̆ng jơ̆ pơtih kơ tơdrong ơh sơ’ngon na gô jing tơdrong tơ’bôh ăn đơ̆ng tơdrong chang hơmĕng. Dôm kơ tơdrong đei pơtơm lăm tơdrong pơchah răm, Kră Yang gô pơkeh lăm tơdrong pơklaih praih.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.