Valentine wă jê̆ truh bơih, kơplah rim ‘nu ‘nă hal hơmet tơmam pơkao, Sôkôla ăn kơ bơngai bơ̆n ‘mêm, hăm đei la yơ buăl đei mơn ‘blŏk lăm jơhngơ̆m? Tŏk bŏk đei lơ hơgrop bơngai hiôk chơt jum dăr kơ buăl, jơhngơ̆m ơh sơ’ngon lu bơngai oei minh adrô̆ ‘bôh nhen rai rơ đah hloh. Rim sơnăm buăl kư̆m đei chang hơmĕng đei bơngai ayơ noh ‘blŏk kơ buăl, đei tơmam ăn kơ buăl…na gô tơ’bơ̆p sơ’ngon pă minh ‘măng dơ̆ng. Mơn kơ thoi noh ưh kơ đei hiôk, mă lei kư̆m đei tơ’blŏk kơ kơdih buăl păng inh: lu bơ̆n kăl kơ pơhrăm iŏk ‘mêm kơdih akâu, yua kơ rim ‘nu lu bơ̆n jơ̆ đei pơjing gĭt kăl đơ̆ng tơpang ti Kră Yang.

Năr ‘nâu, ‘năr 13/02/2026, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Pat Young kơ̆l ‘bai HŎK IŎK ‘MÊM MƠNAT KƠ KƠDIH

“Inh bơnê kơ Ih, yua kơ Ih đei pơjing inh hlĭch chrơp tơpă. Tơdrong jang Ih hlĭch chrơp mă jơhngơ̆m inh băt nhen tơpă.” (Hơriso 139:14)

Đei năr inh ‘maih wă hơmet akâu kơdih ‘biơ̆ tŏ sĕt. Thoi kơ năr ‘nâu, inh năm kăt hơmet tơngiơh. Minh tơdrong iĕ đĕch, mă lei pơm kơ inh hiôk hlĭch dêh. Mơn kơ wă kơ đei bơngai ‘blŏk hiơ̆k, hơmet kơ tơpang ti inh, pơm kơ jơhngơ̆m inh mơn phiơl hiôk hloh. Đơ̆ng rŏng kơ noh inh năm tơ spa, ‘bĭch ăn kơ đe prot tơ akâu jăn hiôk tơpă, tơgŭm inh đei minh giĕng huay kơ gleh lap. Truh tơ ‘năr kơsơ̆, inh đei sa tơmam ‘lơ̆ng, đei tơmam sa Sôkôla mă inh ‘maih wă. Minh ‘măng đei ‘măn jơ năr… ăn kơ kơdih akâu.

Năr noh jơ̆ năr Valentine! Kơplah noh pơm kơ bơngai oei minh drô̆ thoi kơ inh đei jơhngơ̆m sơ’ngon. Đei bơngai chĕp ba jơhngơ̆m sơ’ngon, hơpơi kơ bơngai bu noh gô ‘blŏk. Đei bơngai mơn kơ đei achăng lê̆, nhen thoi năr ‘nâu ‘măn ăn kơ lu bơngai hơ iă dih băl. Na lu bơngai oei minh adrô̆ jơ̆…hlôh kơ dôm lu bơngai đei hlôi mơn thoi noh.

Inh đei mơn kơ tơdrong thoi noh. Đei sơnăm inh hơpơi kơ gô đei tơmam đơ̆ng yơ noh. Chang hơmĕng gô đei bơngai pơtơm năm chă ngôi. Hơmĕng kơ sơnăm ‘nâu huay pă sơ’ngon bơih. Mă lei Kră Yang bơtho inh ‘bai hŏk pha ra ‘biơ̆: hŏk băt ‘mêm kơ kơdih akâu.

Inh mơn kơ đei kơdih kăl kơ đei ‘mêm mơnat, đei tưk tơiung – đơ̆ng kơdih akâu. Inh ưh kơ kăl kơ bơngai bu noh wơ̆n năm chă ngôi, dah ba ăn kơdih akâu pha ra ‘biơ̆. Tơplih kơ noh, inh pơm kơ kơdih akâu wă kơ chơt. Năm tơ Valentine, inh răt kơdih minh hơchô̆ pơkao, pơthim dôm tơdrong mă năr hmă ưh tam mă đei kơ kơdih akâu.

Na tơdrong noh ưh kơ đei lăm rim sơnăm. Inh hŏk iŏk bơwei kơdih akâu rim năr, yua kơ Kră Yang ăn kơ inh ‘bôh inh noh bu lăm măt Sư. Inh jơ̆ tơmam đei pơjing hlich chrơp.

Hơriso 139:14 chih thoi âu: “Inh bơnê kơ Ih, yua kơ Ih đei pơjing inh hlĭch chrơp tơpă. Tơdrong jang Ih hlĭch chrơp mă jơhngơ̆m inh băt nhen tơpă.”

Mơ̆ng nhen thoi… nơ̆r ‘bơ̆r pơma đĕch. Mă hloh loi hăm bơngai bu oei adrô̆, kư̆m đei lu bơ̆n ‘bônh kơ ngĭl ngŭl kơ tơdrong gĭt kăl kơdih akâu yua kơ lăng tơ lu bơngai jum dăr lơ hloh. Mă lei tơdah lu bơ̆n dan Nơ̆r Kră Yang tơ lăm jơhngơ̆m, na tơdrong tơpă tơpăt noh đei đơ̆ng lăm jơhngơ̆m đon tơchĕng truh tơlăm tơdrong arih rim năr.

Mă khan buăl sơnăm oei ‘lơ̆p dah sơnăm ‘lŏ bơih, tơdrong oei adrô̆ ưh kơ pơm tơ jur tơdrong gĭt buăl. Lăm măt Kră Yang, buăl jơ̆ bơngai Sư ‘mêm, đei dan proh hơmet ‘lơ̆ng đơ̆ng Kră Yang.

Jêrêmi 29:11 đei tơ ‘blŏk kơ lu bơ̆n thoi âu: “Yua kơ Inh băt tơdrong kiơ Inh pơkă wă pơm kơ lu iĕm. Inh đei pơkă ăn tơdrong hiôk-hian phĭ jơnap ưh kơ trŏ tơdrong kơnê̆ răm ôh, wă kơ lu iĕm đei tơdrong gơnang hơmĕng. ”

Apĭnh đĭ đăng krao khan hơdai: Kơkuh kơ Kră Yang, rim wơ̆t kon đei sơ’ngon, apinh tơ’blŏk kơ kon Ih ưh kơ đei layơ hiơt kơ kon. Apinh tơgŭm kon băt lăng tơ kơdih akâu đơ̆ng măt lăng ‘mêm mơnat Ih, Ih đei pơjing kon hlĭch chrơp, gĭt kăl mă Ih ‘mêm. Apinh ‘bŭ tơ’bĕnh dôm kơ rơhông lăm jơhngơ̆m kon, păng bơtho kon băt kơ bơwei, mêm kơ kơdih akâu kiơ̆ kơ thoi Ih lăp đon. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, tơplih kơ lăng kơdih akâu kiơ̆ kơ bơngai tơpôl lơ, dah lăng kiơ̆ kơ hnam dơnŏ, dah lăng kơdih kiơ̆ kơ thoi Kră Yang lăng. Buăl đei tơdrong pŭn hiôk, gĭt kăl, buăl jơ̆ Kră Yang ‘mêm. Buăl jơ̆ tomo gĭt, jơ̆ mŭk măk mă Kră Yang ‘mêm. Athei arih hăm tơdrong buăl đei. Apinh Kră Yang chông anhăk buăl yak năm lăm tơdrong Sư đei hơmet ăn bơih kơ buăl, hăm tơdrong rơnŭk rơnoa păng jơhngơ̆m lui ngeh, buăl huay kơ‘bah kiơ kơplah lăm Kră Yang.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.