Phĕt Năr Hưch Wă Dih Băl sơnăm ‘nâu đei truh, năr mă lơ plei nuih ‘nă hal, tơtơ̆, chang gô kơdôm tơdrong rơngơp. Năm tơyơ lu bơ̆n kŭm ‘bôh ‘bĕnh kơ jơ năr Valentine: sôkôla, pơkao, tơmam ăn păng dôm kơ hla ar nơ̆r ‘mêm mơnat. Mă lei lăm đĭ đăng kơdôm tơdrong ‘noh, ‘nâu kŭm jơ̆ jơ wă kơ lu bơ̆n pơdơh păng tơchĕng tŏ sĕt: Tơdrong ‘mêm tơpă mă Nơ̆r ‘Bok Kei-Dei pơma truh jơ̆ kiơ? Păng ‘nâu jơ̆ tơdrong ‘mêm gơh tuh tơ ‘bĕnh bơhngol rim bơngai, mă oei lăm mĭnh tơdrong pơgơ̆p dah oei yak năm mĭnh drô̆?

Năr ‘nâu, ‘năr 14/02/2026, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Maria Schleicher kơ̆l ‘bai TƠDRONG ‘MÊM KRĂ YANG LĔCH RO ĐƠ̆NG LU BƠ̆N

“Ơ lu ‘nhŏng oh mă juăt păng inh, bơ̆n athei ‘mêm mơnat dih băl yua kơ ‘Bok Kei-Dei ăn kơ lu bơngai mă khŭl kon Sư athei ‘mêm mơnat dih băl. Bơngai bu ‘mêm mơnat kơ ‘nhŏng oh sư, bơngai ‘noh sư kon ‘Bok Kei-Dei păng sư băt kơ ‘Bok Kei-Dei tơpă.” (I Yôhan 4:7)

Dang ei lu bơ̆n ‘bônh dêh pơma nơ̆r “ hưch” Lăp kăl kơ đei tŏ sĕt mơn lăm jơhngơ̆m, bơngai nai kŭm gơh krao ‘noh jơ̆ hưch. Trŏ kơ thoi noh, tơdrong tơm tơpă đơ̆ng tơdrong hưch wă rai đei hlôh ưh kơ trŏ. Lơ tơdrong pơgơ̆p “pơkă jơ wă tơ’bơ̆p” pơtơm hrĕnh tĕnh, yak ataih kŭm hrĕnh tĕnh, mă khan lăm măr sư ưh tim mă đei tơdrong hưch wă tơpă. Lăm kơplah ‘Bok Kei-Dei đei ‘măn tơdrong hơdai ‘noh lăp ‘măn ăn kơ ŭnh om đĕch (Êphêsô 5:31-33)

Thoi noh na, tơdrong hưch wă tơpă đei tơm kăl ‘noh kiơ? Păng nơ̆r ‘Bok kei-Dei pơma thoi yơ gah tơ drong hưch wă?

Mĭnh pôm rup tơ’bôh hơđăl gah tơdrong hưch wă đei tơ’bôh lăm I Kôrintô 13:4-8, chăl trong Sơ̆p Hla Bơar Nơ̆r ‘Bok Kei-Dei juăt mă lu bơ̆n đei mơ̆ng kơtơ̆ng lăm rim kơ phĕt pơkong: “Bơngai bu ‘mêm kơ ‘Bok Kei-Dei hăm bôl buăl sư, đe pơm kơnê̆ kơ sư, sư hreh đĕch; sư iŏk tơdrong iơ̆m dim ling-lang, sư ưh kơ klai kơ đe, sư huay kơ pơang akâu kơ đe, sư ưh kơ pơ’lŏ, sư ưh kơ pơ’brơh kơ đe, sư mơ̆ng kơ đe, sư ưh kơ pơjah, jơhngơ̆m sư huay kơ ‘bônh kơ blĕk. Bơngai bu ‘mêm kơ ‘Bok Kei-Dei hăm bôl buăl sư, sư ưh kơ lah jô̆ yo kơ đe pơm kơnê̆ kơ sư ôh, sư ưh kơ lăp đon kơ tơdrong kơnê̆, sư lăp đon kơ tơdrong ‘lơ̆ng tơpăt. Bơngai bu băt ‘mêm kơ ‘Bok Kei-Dei hăm bôl buăl sư, mă đe pơm kơnê̆ kơ sư, sư oei ‘mêm kơ đe; đe areh kơ buăl sư mă-lei sư oei lui kơ nơ̆r buăl sư; păng sư lui kơ ‘Bok Kei-Dei wei-lăng sư lăm tôm tơdrong khŏm khŏm; mă đei tơdrong gleh pơmat-tat, sư oei khŏm adrin lui ‘mơ̆i. Bơngai bu ‘mêm kơ ‘Bok Kei-Dei hăm bôl buăl sư, sư ‘mêm tơpă ling-lang ưh kơ layơ tôch.”

‘Mêm kiơ̆ thoi Nơ̆r ‘Bok Kei-Dei bơtho trŏ jơ̆ mĭnh tơdrong athei anat dêh wă pơm. Hăm tơdrong rơdu păng yoch glăi trŏ thoi noh, lu bơ̆n ưh kơ gơh kơdih tơ’bôh tơdrong ‘mêm ‘noh. Mă lei jơ̆ bơngai lui kơ Kră Yang, lu bơ̆n ưh kơ mĭnh drô̆. Yang Bơhngol ‘Lơ̆ng oei arih lăm rim ‘nu lu bơ̆n. Kơdih Sư jơ̆ Tơ’ngla tơgŭm lu bơ̆n ‘mêm mơnat kiơ̆ kơ jơhngơ̆m mă Nơ̆r ‘Bok Kei-Dei đei tơ’bôh.

‘Bok Kei-Dei trŏ jơ̆ tơdrong ‘mêm mơnat. Yôhan 3:16 pơma khan ‘Bok Kei-Dei ‘mêm mơnat tơpă rim ‘nu bơngai jơ̆p ala teh âu na Sư mah ăn Kon pôm Sư lôch tang kon bơngai. Bơngai bu lui kơ Kon Sư huay kơ lôch hiong ôh. Bơngai ‘noh sư gô oei hơdai hăm ‘Bok Kei-Dei arih ling-lang. ‘Noh jơ̆ tơdrong ‘mêm dŏng pơklaih- tơdrong ‘mêm ưh kơ sĭ pơma hăm nơ̆r mă lei đei tơ’bôh hăm tơdrong pơm tơ’bôh pŭ iŏk truh tôch.

Păng lu bơ̆n kŭm gơh tơ’bôh tơdrong ‘mêm mơnat dŏng pơklaih đơ̆ng Sư hăm tơdrong pơm tơ’bôh hăm dôm lu bơngai jum dăr, đơ̆ng lăm tơdrong dan tơdrong đei yua kơ bơngai nai adrol hloh kơdih bơ̆n, păng gô huay kơ jô̆ yo hloi thoi kơdih gơh đei huay kơ jô̆ yo (Êphêsô 4:32).

Yêsu khan kơ sư thoi âu: “ Bơ̆n athei ‘mêm kơ ‘Bok Kei-Dei Kră Yang bơ̆n hăm đĭ jơhngơ̆m klơm klak bơ̆n păng đĭ dôm tơdrong đon bơ̆n tơchĕng.” (Mathiơ 22:37)
‘Noh jơ̆ tơdrong juăt tih hloh. Păng kŭm trŏ tơdrong ‘mêm ‘noh tơgŭm lu bơ̆n arih tôm tơdrong juăt mă ‘bar: “Bơ̆n athei ‘mêm kơ bôl buăl thoi bơ̆n ‘mêm akâu kơdih.” (trong 39).

Dah lu bơ̆n pơyơ̆r đĭ jơhngơ̆m kơ ‘Bok Dŏng Pơklaih Yang Yêsu Krist, Sư pơtơm tơplih lu bơ̆n đơ̆ng gah lăm. Yang Bơhngol ‘Lơ̆ng pơm kơ tơdrong ‘mêm đơ̆ng Sư ‘blĕnh blai bơhngol lu bơ̆n, dĭng truh ưh kơ gơh iŏk bơwei na thar tuh lĕch ro, hơtŭt ‘bơm truh kơ dôm lu bơngai jum dăr. Kơplah noh, lu bơ̆n ưh pă đei ‘mêm mơnat hăm tơdrong adrin dah mơn lăm jơhngơ̆m đơ̆ng kơdih bơ̆n bơih, na ‘mêm hăm trŏ tơdrong ‘mêm mơnat truh đơ̆ng Kră Yang.

Păng dah lu bơ̆n đei Kră Yang ‘mêm, na klah asong dơ̆ng tơdrong ‘mêm mơnat ‘noh kơ bơngai nai, lei ‘noh bơih tơpă jơ̆ mĭnh Valentine- mĭnh năr ‘bĕnh blai tơdrong ‘mêm đơ̆ng ‘Bok Kei-Dei.

Apĭnh đĭ đăng krao khan hơdai: Kơkuh kơ Kră Yang, kon bơnê kơ Ih yua kơ tơdrong ‘mêm tih hloh Ih ‘măn ăn kơ kon, tơdrong ‘mêm ưh kơ đei kiơ wă ‘mong ăn ưh kơ đei layơ tơplih. Apinh tơgŭm kon mơn đei jrŭ să tơdrong ‘mêm noh, ăn kơ Kră Yang tơplih jơhngơ̆m băt ‘mêm kơ bơngai kiơ̆ thoi Ih ‘mêm. Apinh tơ’blŏk kơ kon khan Ih trŏ jơ̆ tu tơdrong ‘mêm tôm mah hloh. Hơpơi kơ kon ling lang ‘mêm kơ Kră Yang, ‘mêm kơ bơngai nai hăm jơhngơ̆m kĕ chơ̆n, iơ̆m dim, huay kơ jô̆ yo păng pŭ iŏk. Apinh bơtho tơ’bôh kơ kon lăm rim kơ tơdrong pơgơ̆p, bơwei jơhngơ̆m kon, păng tơgŭm kon pơchrang tơdrong ‘mêm Ih kơ dôm lu bơngai jum dăr. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, lăm năr Valentine sơnăm ‘nâu, mă buăl oei mĭnh drô̆, oei pơkă jơ wă tơ’bơ̆p, dah đei iŏk ŭnh om, hơpơi khan buăl gô mơn đei jrŭ să tơdrong ‘mêm tih hloh mă ‘Bok Kei-Dei ‘măn kơ bơ̆n. ‘Noh jơ̆ tơdrong ‘mêm mơnat ưh kơ tơplih, ưh kơ đei ‘mong ăn păng ưh kơ layơ tôch. Dah tơdrong ‘mêm mơnat noh ‘bĕnh blai jơhngơ̆m, chăl arih lu bơ̆n gô tơplih păng bơngai nai gô lăng ‘bôh tơdrong ‘noh đơ̆ng bơ̆jang, đơ̆ng nơ̆r pơma. Păng trŏ jơ ‘noh, Valentine ưh kơ sĭ lăp jơ̆ Phĕt Năr Hưch Wă Dih Băl na jing nơ̆r tơ’blŏk khan lu bơ̆n oei arih lăm tơdrong ‘mêm ‘lơ̆ng rŏ đơ̆ng Sư.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.