Kon bơngai bu bu kư̆m rơhing wă kơ đei jơhngơ̆m ‘mêm. Tơdrong ‘mêm pơm kơ tơdrong arih đei lơ tơdrong wă yak năm, pơm kơ lu bơ̆n băt kơ gĭt kăl, đei anih wă gơnang. Mă lei, tơdrong ‘mêm lăm kơ pal teh đak ‘nâu mă khan ‘lơ̆ng truh tơdang yơ kư̆m gô đei tơplih, oei đei hơgăt ăn, păng gô đei rơhông lăm jơhngơ̆m wă ‘bŭ tơnat kơ ‘bĕnh. Pŭn dêh, đei tơdrong ‘mêm ưh kơ nhen thoi tơdrong ‘mêm nai. Tơdrong ‘mêm đơ̆ng ‘Bok Kei-Dei ăn kơ lu bơ̆n ưh kơ đei hiong răm. Noh jơ̆ tơdrong ‘mêm ling lang chơchă, krôp gom tưk tơ iung lu bơ̆n, mă kơplah lu bơ̆n rơdu dêh. Kơplah sơng iŏk tơdrong ‘mêm noh, jơhngơ̆m lu bơ̆n gô mơn kơ đei hiôk hian mă teh đak ‘nâu ưh kơ đei ăn.

Năr ‘nâu, ‘năr 15/02/2026, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Missey Butler kơ̆l ‘bai KON GAH INH.

“ ‘Nĕ kơ hli yua kơ Inh huai iŏk iĕm bơih. Inh bơih krao iĕm hăm anăn iĕm păng iĕm gah Inh.” (Êsai 43:1)

‘MÊM! lăp dôm noh đĕch kư̆m pơm kơ lu bơ̆n hiĕk tôm bơih păng mơn kơ jơhngơ̆m hơđơ̆ng.

Sơnăm ayơ kư̆m thoi noh, lơ tơdrong ‘mêm đei chih tơlăm kơthơ Valentine ‘lơ̆ng dêh. Kăl kơ drong tơ anih tĕch ayơ noh, buăl gô ‘bôh lơ hlak kơthơ proh hơmet ‘lơ̆ng dêh, đei pơm phara băl. Tôm kơ kơthơ đei chih hăm đak mư̆k brĕu, brê, đak mư̆k hơhĭm – dôm kơ chư đei tơdrong ‘mêm hơ iă.

Dôm kơ kơthơ noh nhen thoi chang gô bơngai bu noh dơ̆ng ‘mơ̆i, chĕp sư, păng apinh: “Hăm trŏ kơ chư đei chih ‘nâu inh wă tơ’bôh tơdrong inh pơma ưh?” Yua kơ kăl kơ minh ‘bar trong đĕch, tơdah hơtŭt ‘bơm tơlăm jơhngơ̆m bơngai bơ̆n ‘mêm, gô nhen thoi “ ‘brơ̆m hră” păr năm tơpăt tơ plei nuih sư. Pơma mă tơpă, drŏkăn ayơ noh gô ưh kơ drơ̆ng iŏk Sôkôla, pơkao brĕu dah tơmam jên măk… mă wă mơ̆ng nơ̆r pơma đơ̆ng bơngai sư ‘mêm tơ ‘bôh tơpă đơ̆ng lăm jơhngơ̆m.
Đei lơ anih tih pơm kơthơ adrin chơchă dôm kơ hla bơar đei chih nơ̆r gơh hơgei pơma tơ ‘bôh chư ‘mêm. Mă lei, mă khan lu sư adrin truh tơ dang yơ, kư̆m ưh kơ hloh kơ nơ̆r tơ ‘bôh đei chih ‘lơ̆ng đơ̆ng lăm hla bơar Yôhan:

“ ‘Bok Kei-Dei ‘mêm mơnat tơpă rim ‘nu bơngai jơ̆p ala teh âu na Sư mah ăn Kon pôm Sư lôch tang kon bơngai. Bơngai bu lui kơ Kon Sư huay kơ lôch hiong ôh. Bơngai ‘noh sư gô oei hơdai hăm ‘Bok Kei-Dei arih ling-lang.” (Yôhan 3:16)

Tơdrong ‘mêm ‘Bok Kei-Dei đei jơwa đơ̆ng rim nơ̆r lăm sơ̆p hla bơar ‘Bok Kei-Dei. Yua kơ ‘Bok Kei-Dei jơ̆ tơm kơ tơdrong ‘mêm. Sư ‘mêm ưh kơ kăl kơ tơdrong pơm đơ̆ng bơ̆n, tơdrong ‘mêm Sư ưh kơ đei hơgăt. Sư krôp gom lu bơ̆n păng pơma: “Inh ‘mêm kơ kon.”

Tơdrong ‘mêm noh ưh kơ đei tơ’bôh đơ̆ng nơ̆r pơkă ăn tơdrong arih ling lang, mă đei tơ’bôh đơ̆ng lăm rim năr kơplah Kră Yang yak năm hơdai lu bơ̆n lăm tơdrong arih ‘nâu. Sư lăng ‘bôh dôm lu jơhngơ̆m hiơ̆k bơngơ̆t ôn hlơp, kơplah jơhngơ̆m rơdu, hli tơrơ dah mơn kơdih ưh pă đei gĭt kăl. Lăm tơdrong arih mă lu bơ̆n mơn kơ pă đei hơđơ̆ng, nơ̆r ‘mêm đơ̆ng Kră Yang đei pơma rơngơp păng ‘bĕnh kơ tơdrong ‘mêm: “ ‘Nĕ kơ hli yua kơ Inh huai iŏk iĕm bơih. Inh bơih krao iĕm hăm anăn iĕm păng iĕm gah Inh.” (Êsai 43:1)

Apĭnh đĭ đăng krao khan hơdai: Kơkuh kơ Kră Yang, kon bơnê kơ Ih yua kơ tơdrong ‘mêm Ih ăn kơ kon ưh kơ đei tơplih. Kră Yang ơi! Jơhngơ̆m ‘mêm kon bơngai oei đei hơgăt, mă lei tơdrong ‘mêm Ih đei ăn tôm kơ kon, jơ̆ anih kon chă ‘bôh wă pơdơh hiôk păng gĭt kăl tơpă ăn kơ kon. Apinh tơgŭm kon pơih jơhngơ̆m sơng iŏk, lui gơnang păng arih lăm tơdrong ‘mêm noh lăm rim năr. Hơpơi kơ tơdrong ‘mêm Kră Yang tơplih kon păng tơgŭm kon băt kơ ‘mêm kơ bơngai nai hăm jơhngơ̆m đon pơyom, tơpă tơpăt. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, buăl hăm wă kơ đei sơng iŏk kơthơ ‘lơ̆ng hloh ưh? Mă tơpă, buăl đei sơng iŏk bơih. Kơthơ noh đei gưih ăn kơ buăl đơ̆ng ‘bar rơbâu sơnăm adrol sơ̆ bơih, đơ̆ng Kon Pôm ‘Bok Kei-Dei noh jơ̆ Yang Yêsu Krist. Pă minh tơdrong đĕch…buăl hăm wă sơng iŏk ưh? Kră Yang rơhing wă ba ăn kơ buăl tơdrong ‘mêm noh, wă kơ rim năr buăl arih đei tơdrong rơnŭk rơnoa păng jơhngơ̆m chơt hiôk đơ̆ng Sư.

Na kơplah lu bơ̆n oei hiôk chơt sơng iŏk tơdrong ‘mêm păng dŏng pơklaih đơ̆ng Kră Yang na tơ ‘ngoaih to oei lơ bơngai chơchă tơdrong ‘mêm tơpă. Năr ‘nâu, tơdrong tơdă Krao khan Rim năr krao wân lu bơngai mơ̆ng athei ‘măn jơ krao khan kơ buăl juăt, bơngai bơ̆n băt, bơngai bơ̆jang hơdai… bơngai ayơ noh tam mă băt kơ Kră Yang mă lu bơngai noh lu bơ̆n băt. Athei krao khan tơgŭm păng ră roi tơdrong ‘mêm Kră Yang ăn kơ bơngai noh, wă kơ tơdrong ‘mêm Kră Yang đei đơ̆ng lu bơ̆n, hơtŭt ‘bơm chăl arih bơngai noh.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.