Thaum lub sijhawm txais tos xyoo tshiab, thaum lub xyoo laus xaus thiab lub xyoo tshiab tab tom qhib lub paj tsiab peb caug raws li Nyab Laj, tib lub siab neeg feem ntau nyob nruab nrab ntawm ob txoj kev xav: ib sab yog tej yam uas twb dhau lawm, ib sab yog tej yam uas tseem tsis tau paub tab tom los. Thaum peb hnov suab foob pob hluav taws thiab cov lus foom koob hmoov zoo, puas yog feem ntau peb nres thiab xav hauv siab tias: Xyoo dhau los no, kuv tau yam nqa dab tsi nrog kuv? Thiab kuv yuav mus li cas rau hauv lub xyoo tshiab?

Hnub no, yog hnub 16/02/2026, yog hnub txais tos xyoo tshiab li Nyab Laj teb, peb kev thov Vaj Tswv Txhua Hnub caw koj los nrog peb sib cog kawm mloog Vajtswv Txoj Lus dlau lub ntsiab lus HAUV LUB SIJ HAWM ZOO TSHAJ

Vajtswv yeej teem caij teem nyoog tseg rau txhua tsav yam lawm (Tej Lus Qhia 3:11)

Zaug uas koj tau tsiv chaw nyob yog thaum twg?

Nyob ntawm kuv, qhov uas tsiv chaw nyob tsis yog yam txawv ntawm kuv lawm. Txij thaum kuv me, kuv tau nrog niam thiab txiv mus rau txhua qhov chaw, kuv suav los mas kuv tau tsiv chaw nyob tsawg tshaj twb yog kaum zaug nyob rau thaum kuv muaj 5 – 7 xyoo mus txog thaum kuv muaj 18 xyoo. Vim kuv yog tus ntxhais hlob, kuv nyiam pab ua hauj lwm hauv tsev, ces kuv ib txwm koom tes thiab nco ntsoov meej txhua zaus peb tsiv tsev: Cov thawv khoom uas ntim nrawm nroos, tej kaum tsev uas ib txwm paub zoo cia li hloov uaqhov txawv, thiab kuj hnov nkees, kuj zoo siab, kuj txhawj siab thaum uas tsiv mus rau ib qhov chaw tshiab. Muaj tej zaus peb tsiv mus rau qhov chaw zoo dua, tiam sis kuj muaj tej zaus tsiv mus rau qhov chaw phem dua vim yog txom nyem nyiaj txiag thiab peb kev ua neej. Lub sijhawm ntawd, vim kuv tseem yau, kuv tsis muaj cai xaiv. Kuv tsuas muaj peev xwm ntseeg siab thiab mloog raws li kev npaj ntawm kuv niam kuv txiv xwb.

Qhov tseeb mas, kuv nyuam qhuav tsiv tsev lub Ib Hlis Ntuj xyoo 2026 xwb! Nws yog ib lub sijhawm tshwj xeeb heev nyob rau ntawm xyoo 2025 thiab 2026. Zaum tsiv chaw nyob no txawv dua txhia zaus yav dlau los. Kuv tsis yog ib tug me nyuam uas tseem mus raws li lwm tus siab lawm. Tam sim no, kuv twb loj hlob lawm, muaj kev paub, muaj peev xwm npaj ua ntej, thiab muaj cai xaiv rau kuv tus kheej. Kuv xav tias tej no yuav ua rau txhua yam yooj yim dua.

Tiam sis tsis yog li ntawd. Nyob rau zaug tsiv chaw nyob zaum no, muaj ib zaj kawm tshiab tuaj: Muaj cai txiav txim siab tsis yog muaj peev xwm tswj tau txhua yam. Txawm tias kuv tau suav xam, npaj tseg txhua yam, thiab ua tib zoo xaiv zoo npaum li cas los, tseem muaj tej yam uas hla dhau kuv txoj kev xav. Muaj tej yam kuv tsis muaj peev xwm nqa nrog kuv mus. Muaj tej yam kuv yuav tau raug tso tseg. Thiab muaj tej yam kev txwv uas kuv tsis muaj peev xwm sib tham kom haum xeeb.

Thaum tab tom npaj txhua yam, kuv tau muab thiab pov tseg ze li ib nrab ntawm tej khoom siv hauv tsev. Hais tseeb tiag mas, thaum chiv thawj kuv kuj muaj lub siab ua xyeem xyav. Txhua yam khoom yeej nrog ib zaj kev nco, ib theem hauv lub neej, lossis tsawg kawg nkaus yog ib txoj kev xav tias “twb tau siv txog”. Tiam sis yam uas ua rau kuv xav tsis thoob tsis yog vim tias kuv pov tseg ntau npaum li cas, tiam sis yog qhov kev xav tom qab ntawd. Kuv yeej tsis hnov tias tsis txaus ib yam dab tsi li. Tab sis mas, kuv hnov zoo siab dua qub. Lub chaw nyob zoo nyob dua, kuv lub siab zoo li tau qhib. Kuv tau lub chaw tshiab nrog rau txoj kev xav dav, ywj pheej dua, zoo li kuv nyuam qhuav tso pov tseg ib lub nra uas tsis muaj npe, uas kuv tau ris tau ntau lub xyoo los.

Kuv rov nug kuv tus kheej tias: peb xav tau pes tsawg yam thiaj ua neej nyob tau? Lossis ntau xyoo dhau los, peb tsuas yog khaws cia tej yam uas tsis coj tau txoj sia rau peb; tsuas yog vim peb khuv xim, vim peb ntshai tsam tsis txaus, vim xav tias “tej zaum muaj ib hnub twg yuav rov qab siv tau”? Muaj tej yam dhau los ua lub nra rau, tab sis peb tseem tuav ruaj khov vim yog peb hnov swm. Peb ntshai tso tseg, vim nyob ntawm kuv, kev tso tseg txhais yog kev ntseeg siab. Thiab kev ntseeg siab mas yeej ib txwm nrog rau kev poob siab.

Tsis yog tej khoom siv hauv tsev xwb thiaj yuav tsum tau kho. Peb lub siab ntsws kuj yuav tsum tau kho ib yam li ntawd thiab. Muaj tej xwm txheej qub tsis tau kho zoo, muaj tej kev mob siab uas twb dhau lawm los tseem nyob rau hauv peb, muaj tej kev sib raug zoo uas coj peb yuam kev tiam sis tsis tau tso pov tseg, tabsis peb cia li swm rau qhov ua nws tshwm rau hauv peb lub neej. Thiab vim yog swm, peb cia li tso txhua yam ntawd nyob nrog peb.

Vaj Tswv Txoj Lus qhia tias, thaum nyob hauv tiaj suab puam, haiv neeg Yixalayees tsuas raug pub sau manna txaus rau hnub ntawd xwb. Leej twg khaws manna cia rau hnub tom qab ces yuav lwj. Vajtswv tsis yog tsis muaj hwj chim los pub kom lawv muaj txaus nkaus. Tus Tswv yeej muaj peev xwm pub rau lawv ntau dua qhov lawv xav tau. Tiam sis Tus Tswv tsis ua li ntawd. Vim Tus Tswv xav qhia lawv kom paub tswj txhua yam hauv txoj kev ntseeg siab thiab mloog lus. Ua neej nyob ib hnub zuj zus, txais txaus rau hnub no, thiab kawm paub-ntseeg tias tag kis Vajtswv tseem yuav nyob ntawd ib yam nkaus.

“Kuv txojkev hlub txaus rau koj lawm” (2 Kauleethaus 12:9) tsis yog tsuas yog ib lo lus nplij siab thaum peb qaug zog xwb. Nws yog ib txoj kev ua neej nyob ntawm sab ntsuj plig. Yog ib txoj kev ua neej uas peb tsis tas yuav khaws cia ntau dhau thiaj muaj kev thaj yeeb, tsis tas yuav tuav txhua yam ruaj khov thiaj li zoo siab, thiab tsis tas yuav tswj txhua yam tshwm sim tuaj kom peb thiaj li hnov yus zoo. Vim qhov kev nyab xeeb tiag tiag tsis yog los ntawm qhov peb khaws tau pes tsawg, tiam sis yog los ntawm qhov peb paub tias peb lub neej nyob hauv leej twg txhais tes.

Kuv nco ib tug viv ncaus hauv Haggai Nyab Laj tau nug ib lo lus nug hauv ib chav kawm tias: Yog hais tias koj tsuas tau nqa peb yam khoom mus rau ib lub koog pov txwv, koj yuav xaiv nqa yam dab tsi? Lo lus nug ntawd mloog mas zoo li nug ua si xwb, tiam sis tiag tiag mas nws yog ib lo lus nug tseem ceeb heev. Nws ua rau peb nyob ntawm qhov uas xav thiab cheem tsum. Thaum muaj txhua yam txaus, peb xav tias peb cheem tsum ntau heev. Tiam sis thaum peb yauv tsum tau txiav txim siab, ces peb mam li pom tseeb tias: yam peb xav tau tshaj plaws tsis yog tej yam khoom siv, tiam sis yog kev ntseeg, taw kev, thiab muaj Vajtswv nrog peb nyob.

Tseeb tiag mas, kev npaj ua ntej yog ib yam zoo. Peb kuj tsis txhob lam tau lam ua lossis tsis muaj kev lav ris txhua yam. Tiam sis lub neej tsis yog txhua lub sijhawm twg pub rau peb npaj txhua yam kom txhij txhua. Muaj tej kev hloov pauv los tsis ceeb toom ua ntej, xws li: poob haujlwm, tsiv chaw nyob, kev sib raug zoo tawg, kev mob nkeeg, los yog ib txoj kev npaj uas peb xav tias ruaj khov heev tam sis cia poob. Thaum ntawd, lo lus nug tsis yog tias: “Kuv puas tau npaj txaus lawm?” tiam sis yog tias: “Kuv tab tom cia siab rau yam dab tsi tiag?”

Aplahas yog ib tug neeg zoo li ntawd. Thaum Vajtswv hu nws tawm hauv nws lub tebchaws, Vajtswv tsis tau muab ib daim ntawv qhia kev meej meej rau nws. Vaj Tswv Txoj Lus tsuas qhia tias: “Aplahas mus tiam sis tsis paub nws mus qhov twg” (Henplais 11:8). Aplahas tsis taug kev vim nws twb to taub txhua yam, tiam sis vim nws ntseeg Tus Tswv uas hu nws. Kev ntseeg tsis yog paub ua ntej txhua kauj ruam, tiam sis yog nws txhais ib kauj ruam ua ntej thaum Vajtswv hu.

Yim ua neej nyob ntev, yim khaws tau ntau lub xyoo, tsev neeg coo tug tuaj, thiab tej kev xav tau hauv lub neej muaj ntau yam ntxiv; yog peb tsis txhob txwm khaws tseg yam tsim nyog thiab pov tseg yam tsis siv txog, ces kev sau txhaws yog yam yuav tshwm sim xwb. Tsis yog tej khoom siv xwb, tiam sis tseem yog tej kev xav uas peb khaws cia vim peb tsis tau muaj peev xwm tim ntsej tim muag, thiab vim peb ntshai hloov tej kev coj qub uas peb tseem tuav, tej nra ntawm kev lav ris uas peb tsis muaj peev xwm tso tseg… Maj mam zuj zus, peb ua neej nyob rau tej kev hnyav siab-nkees tam sis peb yeej tsis nug hais tias vim li cas, vim peb twb swm rau txoj kev ua neej li ntawd lawm.

Xyoo tshiab yuav tsis txawj dhau los ua tshiab yog peb lub siab tseem qub. Vaj Tswv Txoj Lus hais tias “Tsis txhob nco txog tej xwm txheej uas twb dhau los lawm lossis tsis txhob xav txog tej xwm ntawd li.” (Yaxayas 43:18–19) tsis yog hu peb kom tsis lees paub yav dhau los, tiam sis hu peb kom tsis txhob cia yav dhau los los kav peb lub neej niaj hnub no. Vajtswv hais tias: “Saib maj, Kuv tab tom ua ib yam tshiab!” tiam sis yam tshiab ntawd tsuas muaj chaw sawv thaum peb zoo siab kam muab lub chaw rau yam tshiab. Qhov chaw rau yam tshiab tsuas tshwm sim thaum peb kam tso yam qub mus.

Txhua theem hauv kev tsiv chaw nyob, ntim khoom, thauj khoom, rov qab teeb tsa dua… tsis muaj theem twg yooj yim li. Txhua theem yeej yuam kom peb nres, xav, thiab xaiv: xaiv khaws cia, xaiv muab pub, lossis xaiv yuav tso rau qhov twg… Kev ua neej raws Tus Tswv qab kuj zoo ib yam li ntawd thiab. Tsis muaj ib txoj kev ncaj-ze rau txoj kev loj hlob. Tsis muaj kev ncaj-ze rau kev mloog lus. Yog peb khiav tawm zaj kawm hnub no, tej zaum peb yuav tau ntsib nws rau tag kis, feem ntau yuav nyob hauv txoj kev nyuaj dua qub.

Thaum peb nyob rau xyoo tshiab 2026, peb tsis tas yuav tsum khiav ceev dua, peb yuav tau mus kom ruaj khov dua. Tsis yog kom tuav tau ntau yam ntxiv, tiam sis kom peb ua neej ntseeg siab ntau dua. Tsis yog qhia tias peb muaj zog npaum li cas, tiam sis yog kawm mloog Vajtswv lus txawm yuav nyob rau lub sijhawm peb tswj tau los tswj tau. “Cia siab rau tus Tswv kom kawg koj lub siab lub ntsws. Tsis txhob cia siab rau koj tej kev txawj ntse.” (Paj Lug 3:5). Thiab tej zaum, qhov no thiaj yog qhov tseem ceeb tshaj plaws uas peb yuav nqa nrog peb mus rau xyoo tshiab no: txaus siab tso tseg, ntseeg siab, mloog lus, thiab ua neej txo hwj chim nrog Vajtswv txhua hnub.

Thov caw nrog kuv peb thov Vajtswv ua ke: Leej Txiv Tus uas muaj kev hlub, lub sijhawm ntsiag no, thaum xyoo laus tab tom xaus mus thiab xyoo tshiab tab tom tawm los, kuv xav los nyob ze Koj. Nyuam yaus ua Koj tsaug rau txhua txoj kev uas nyuam yaus tau dhau los, vim rau tej yam uas nyuam yaus to taub lawm thiab rau tej yam uas nyuam yaus tseem tsis tau to taub. Nyuam yaus paub tseeb tias tsis muaj ib lub sijhawm twg hauv nyuam yaus lub neej uas tsis nyob auv Koj txhais tes saib xyuas.

VajTswv, thov Koj zam txim rau nyuam yaus vim ntau zaus nyuam yaus tseem khaws cia tej yam uas twb tsis muaj txoj sia, vim kev ntshai, vim kev khuv xim, vim kev tsis muaj kev ntseeg siab. Thov pub rau nyuam yaus muaj siab tawv tso tseg tej yam uas tsis los ntawm Koj, kom nyuam yaus lub siab npaj txhij txais tos yam tshiab uas Koj tab tom ua. Thov Koj qhia nyuam yaus caum Tus Tswv Koj txhua hnub ntawm cia siab thiab mloog lus, txawm yog thaum nyuam yaus nyob rau lub sijhawm muaj kev tswj tau lossis tswj tsis tau. Thaum nyuam yaus qaug zog, thov Koj nco ntsoov qhia tias Koj txoj koob hmoov twb txaus rau nyuam yaus lawm. Thaum nyuam yaus tseem ua lub siab xyeem xyav, thov pub kom nyuam yaus pom tseeb tias Koj tab tom coj nyuam yaus kev. Tus Tswv, thov Koj ua nyuam yaus lub siab tshiab dua rau xyoo tshiab no, kom nyuam yaus tsis yog pib zoo dua xwb, tiam sis ruaj khov mus txog thaum kawg, ua neej nyob kom haum Tus Tswv siab hauv txhua kauj ruam uas nyuam yaus mus. Nyuam yaus koom siab taij thov los ntawm Tus Tswv Yexus Khetos lub npe, Amees.

Tus sphooj ywg, Vajtswv tsis tau hu peb kom mus rau xyoo tshiab nrog kev nrawm nroos lossis kev nyuaj siab yuav tsum hloov txhua yam. Peb tau txib mus ua neej kom tshwm tau Vaj Tswv lub hwjchim, pib ntawm lub siab uas tau txhim kho. Cia li sawv tsees thiab mus, tsis yog nrog lub nra ntawm tej yam uas twb dhau los, tiam sis nrog txoj kev ywj pheej ntawm tus uas paub tseeb tias Vajtswv coj txoj hau kev. Cia li pib ntawm teg hauj lwm: txhim kho koj tej kaum tsev, xaus txoj kev sib raug zoo uas ua rau koj sab ntsuj plig qhuav qhawv, tso tseg tus cwj pwm qub uas Vajtswv twb qhia koj ntev los lawm lossis yog ua siab tawv mloog lus rau ib yam uas koj tseem pheej ua tsis tau. Tsis txhob tos kom txhua yam tshwm meej mam li txhais ruam. Cia li ruam mus txoj kev kaj yuav tshwm. Tsis txhob tos kom koj muaj zog txaus mam li mloog lus. Vim yog kev mloog lus yuav ua rau koj tus kheej muaj zog. Txawm hais tias txoj kev tom ntej tseem muaj ntau yam uas koj tsis tau paub, koj yuav tsis taug kev ib leeg li. Tus Tswv uas tau hu koj kuj yog Tus Tswv uas yuav nrog koj nyob thiab ua kom tiav txoj hauj lwm uas Tus Tswv twb pib rau hauv koj.

Yog li ntawd, lub sijhawm ua ntej xyoo tshiab no…
Cia li mus!
Cia li ua neej kom puv npo!
Cia li ntseeg siab thiab mloog lus!

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.