Tus phooj ywg uas hlub tshua, xyoo tshiab twb los txog lawm! Lub sijhawm no, koj tab tom txais tos lub tsiab peb caug li cas? Tej zaum muaj ntau leej hauv peb nyuam qhuav hla dhau ib ntu uas ntev twb sab sab, dlau cov tsheb loj, tsheb nqaj hlau uas puv npo thiab siv nyiaj ntau, tsuas yog kom tau rov qab los sib txoos nrog lub tsev neeg, cov uas yus hlub. Tiam sis kuj muaj, ntau tus kwv tij nkauj muam vim kev nrhiav noj nrhiav haus lossis yog vim tej kev txhawj xeeb hauv lub neej yuav tsum tau tos txais lub tsiab peb caug nyob deb, lub siab yeej tsis kaj thaum tig saib rau yus lub zej zog. Txawm yog tab tom zaum ua ke ib ncig ntawm lub rooj mov sov so, los yog tab tom nyob ib leeg rau hauv ib lub tebchaws txawv, los muaj ib lo lus nug rau peb txhua tus: “Tseeb tiag, peb puas tau rov qab mus lawm los tsis tau?”

Hnub no, yog hnub 17/02/2026, yog hnub Ib hauv lub paj tsiab peb caug, peb kev thov Vaj Tswv Txhua Hnub caw koj los nrog peb kawm thiab mloog Vaj Tswv Txoj Lus dlau lub ntsiab lus: KOJ PUAS TAU ROV MUS TSEV?

“Tus Tswv, koj yeej ib txwm yog peb lub chaw nyob. Thaum koj tsis tau tsim lub ntiajteb thiab tej toj roob hauv pes, koj yeej muaj nyob los lawm, thiab koj yeej yog Vajtswv mus ibtxhis li” (Phau Ntawv Nkauj 90:1-2).

Txhua zaus txog lub caij tsiab peb caug, hauv kuv lub siab rov nco txog tshwm txog cov tsheb xyoo ntawd: ti kawg, nroo nroo, thiab tsw hws, tsw roj tsheb. Ntawd yog thawj zaug uas kuv mus kawm ntawv deb tsev, thiab tom qab ob peb lub hlis kawm deb ua rau kuv lub siab rov qab nco tsev tshaj plaw. Lub sijhawm ntawd kuv tseem yog tub ntxhais kawm xyoo ib, thaum yuav daim ntawv tsheb rov mus tsev kuv tsuas tau zaum ib lub rooj me me tseg raws kev taug hauv lub tsheb xwb. Nrog kuv muaj ib tug muam xeeb ntxwv, txawm nws twb tau mus kawm deb ntau los lub sij hawm thaum zaum saum tsheb los ntuav ua ntsej muag daj tas. Saib nws lub ntsej muag daj vog li ntawd, kuv lub siab mob heev tiam sis kuv pab tau dab tsi rau nws tsuas yog npuaj nws xwb pwg plij nws siab…

Zaum tsheb hmo ntuj deb kawg nkaus. Ob txhais kotaw loog tas vim qhov chaw nqaim dhau, nraub qaum mob kawg, kuv thiaj li qhau cev pw rau saum daim txiag tsheb uas qias neeg kom tsaug zog me ntsis. Hauv qhov tsaus ntuj, lub tsheb qub qub ua yuj yees hla tej qhov pob zeb, qee zaus hla dhau tej teeb kev cig daj daj uas ci dlau ntawm qhov rais tsheb, ci rau saum tej ntsej muag nkees nkees thiab tej pawg khoom thauj hauv tsheb. Cov kab teeb ci plooj plooj ntawd, zoo li lub plawv dhia ceev ceev ntawm tus neeg nyob deb tsev, uas tab tom suav txhua daim phiaj zeb uas hla dhau hauv xeev. Kuv rov nug kuv tus kheej tias: “Txoj kev rov qab los tsev ua cas tseem tshuav deb ua luaj li…”

Vaj Tswv Txoj Lus sau tseg zaj keeb kwm ntawm haiv neeg Ixayees, ib haiv neeg uas tau mus mus los ntev xyoo nrhiav kev rov qab mus rau thaj av uas Vajtswv tau cog lus tseg. Los ntawm tebchaws Iyi, ib lub tebchaws uas lawv tau nyob 400 xyoo, lawv tau sib coj hla kev deb nrog ntau yam kev txom nyem, thiab tau ncig mus ncig los tau 40 xyoo hauv teb chaws tiaj suab puam. Yog lub sijhawm thaum uas tsis muaj ib lub tsev ruaj khov, Mau-xes tau hais lo lus tseg tias: “Tus Tswv, txij ib tiam dhau ib tiam los, Koj yog peb lub chaw nyob” (Ntawv Nkauj 90:1).

Txawv kawg nkaus li! Nyob hauv tiaj suab puam, sab nrauv yog yeeb ncuab caum raws, tom qab kuj yog thaj av ua qhev, thiab lawv tab tom mus rau lub tebchaws uas muaj mis thiab zib ntab, tom hau ntej tsis paub thaum twg thiaj txog, Mauxes txhais lo lus “Tsev” tias yog Vajtswv. Tsev raws li Mauxes tsis yog kev nplua nuj nrog “dib, dos, qej” hauv tebchaws Iyiv, kuj tsis yog ib lub chaw nyob tshwj xeeb nyob rau saum daim ntawv qhia. Tsev yog ib txoj kev sib raug zoo nrog Tus Tsim Ntuj thiab Ntiaj Teb. Vajtswv Nws yog lub chaw nkaum thaj yeeb nyob rau ntawm yeeb ncuab txoj kev caum tua, yog lub qhov dej txhawv ntawm kev nqhis dej, thiab yog thaj chaw laj nyob ntawm qhov chaw tshav ntuj kub tawv nqaij.

Peb cov neeg Nyab Laj yeej ib txwm saib nuj nqis heev rau lub tsev, yog lub chaw nkaum tshav ntuj nag, yog qhov chav ua mov hluav taws liab vog ntawm pluas mov xaus lub xyoo. Yog li ntawd, qhov sov uas peb pom ntawm hluav taws lossis txhua yam kev yooj yim tsuas yog ua sov so rau sab nrauv, tshuav qhov txias zias nyob sab hauv yuav ua li cas? Muaj qee tus neeg txawm nyob tab tom hauv ib lub tsev loj thiab zoo nkauj heev los lub siab tseem txias, kho siab, thiab khoob lug vim tej teeb meem nyob puag ncig? Qhov sov so sab cev nqaij daim tawv tsuas sov tau lub cev xwb. Tsuas yog thaum Tswv Yexus nyob hauv thiab kav peb lub neej, Tus Tswv thiaj yog Tus uas cig ci rau hauv peb sab ntsuj plig, ua peb lub siab sov so, rub peb los sib sau nyob ze kom peb paub sib hlub, zam txim, thiab sib koom ua ke tsim tsa lub neej.

Lub tsiab peb caug tau rov qab los yog ib qhov kev zoo siab uas tsis muaj dab tsi piv tau. Tiam sis, tej zaum hnub no nyob rau ib qho twg tab tom muaj tej kwv tij nkauj muam mloog peb lub kev thov Vaj Tswv no los ntawm lub siab ntxhov nyo, tau ntev npaum li cas koj tsis tau muaj lub siab tawv tig rov qab los tsev? Tus phooj ywg, cia li rov qab los tsev! Tsev yog qhov chaw rau rov qab los, yog qhov chaw uas muaj ntau tus tab tom tos koj, hlub koj. Cia li ua siab loj tso tej kev mob siab, txuas tej kev tu siab thiab cia Tus Tswv kho koj nrog tsev neeg. Muaj tej zaum peb tau raug tej kev mob siab loj ua rau koj tau ntev tsis rov khiav los cuag Vaj Tswv, kuj tsis pub Tus Tswv los plij yus. Tau hov ntev lawm uas koj tsis tau nrog Vaj Tswv sib txuas lus?

Hnub no yog lub sijhawm zoo rau koj. Cia li teb Vajtswv hais tias koj xav rov qab los tsev nrog cov neeg uas koj hlub. Koj xav kom Vajtswv kho koj lub siab, thiab foom koob hmoov rau koj tsev neeg. Tus Tswv tseem nyob ntawd, ua siab ntev tos koj tsa lub suab nrog Nws sib txuas lus. Vajtswv Txojlus hais tias: “Cia li thov, nej yuav tau; cia li nrhiav, nej yuav ntsib; cia li khob, lub qhov rooj yuav qhib rau nej.” (Mathai 7:7) Los sis tej zaum, koj yog tus uas tsis tau rov qab mus tsev vim txoj kev khwv noj khwv haus, vim kev mob nkeeg lossis tej kev nyuaj siab, thov tsis txhob nkees. Txawm yog koj nyob hauv ib chav tsev ntsiag to los yog tab tom taug kev nyob deb nroog txawv teb chaws, thov nco ntsoov tias: Tej zaum koj yuav tsis muaj ib lub tsev sab cev nqaij, tiam sis lub qhov rooj ntawm Leej Txiv lub tsev Saum Ntuj Ceeb Tsheej yeej qhib lug. Hauv Tus Tswv Yexus, tsis muaj leej twg raug tso tseg ua ntsuag thiab tsis muaj ib yam dab tsi los cais tau koj ntawm Tus Tswv txoj kev hlub uas nyob mus ib txhis.

Ntau xyoo twb dhau los, hnub no kuv twb muaj ib lub tsev rau kuv tus kheej lawm. Lub tsiab peb xyoo no, kuv lub tsev neeg rov qab tsev noj tsiab peb caug. Peb sawv daws zaum ua ke ib ncig lub rooj haus dej ntawm hmo txais tos xyoo tshiab, muaj lus thov Vajtswv rau lub xyoo tshiab nrog Niam Txiv thiab tej tub ntxhais menyuam hauv lub tsev neeg. Kuv Niam thiab kuv Txiv twb muaj hnub nyoog lawm tiamsis nkawv tseem muaj lub siab kub lug hlub Vaj Tswv. Txhua zaj lus tim khawv tau qhia rau hauv peb lub siab txog Vaj Tswv txiaj ntsig rau lub xyoo laus uas ntau kawg nkaus. Tseeb tiag, ua Vajtswv tsaug uas tau rov qab los tsev zoo siab kawg. Tseeb tiag, Vajtswv yog lub chaw zoo tshaj plaws rau peb tsev neeg.

Thov caw nrog kuv peb thov Vajtswv ua ke: Tus Tswv uas kuv hlub, tiam no mus rau tiam tom ntej, Vaj Tswv Koj yog nyuam yaus qhov chaw nkaum thiab peb lub tsev neeg… Thawj hnub lub xyoo tshiab, nyuam yaus thov muab lub siab rau Vaj Tswv nrog lub siab nco koj txiaj ntsig. Nyuam yaus ua Tus Tswv Koj tsaug vim nyuam yaus tau nyob hauv Koj, tau Tus Tswv Koj hlub, tau Tus Tswv Koj foom koob hmoov saib xyuas nyuam yaus ib ntu zuj zus. Thov Vaj Tswv foom hmoov zoo rau nyuam yaus lub tsev neeg ntawm lub xyoo tshiab no, thov kom Koj yog nyuam yaus lub hauv paus hauv nyuam yaus lub neej, thiab hauv nyuam yaus lub tsev neeg. Txiv, nyuam yaus xav nyob hauv Koj mus ib txhis. Nyuam yaus taij thov txhua yam ntawm Tus Tswv Yexus Khetos lub npe, Amen.

Tus phooj ywg hlub tshua, nyob zoo siab xyoo tshiab! Ua tsaug rau nej cov uas mloog peb kev thov Vaj Tswv txawm lub xyoo tshiab muaj hauj lwm ntau kawg, los nej tseem siv sijhawm los thov Vaj Tswv nrog Oneway Radio. Thov kom lub tsiab peb caug xyoo no, peb tsis yog tsuas zoo siab lub tsiab peb caug thiab kho kom zoo sab nraud xwb tiam sis peb yuav tau ntsib qhov tshiab thiab thaj yeeb hauv lub siab, peb yuav tau paub meej tsis yog muaj mov noj nplua mias saum rooj mov xwb tiam sis txaus siab rau ntawm sab ntsuj plig. Thov kom tus Tswv yeej ib txwm yog peb qhov chaw nkaum. Thov tus Tswv kho kom peb tsev neeg kom zoo. Thiab kom peb lub siab ruaj khov vim paub tseeb tias peb nyob hauv Vajtswv, nyob hauv lub tsev nyob mus ib txhis. Thiab peb cia li cog lus ua ke tias peb yuav sib pab ntau leej yuav paub meej tias: Tus Tswv, tiam no mus rau tiam tom ntej, Koj yog peb qhov chaw nyob…. Haleluyas!

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.