Tej hnub uas yog tsiab yeej muaj nws ib txoj kev ua neej txawv heev, tej pa ncuav tsw rau txhua qhov, tej kev sib ntsib yam li lub sijhawm tsis txaus ib zaug li. Nyob rau hauv txhua yam tsis khoom puv npo kev hlub ntawd, peb lub siab ntau zaug kuj raug cab mus, txhawj rau tej haujlwm hauv tsev, tej kwv tij, tas txog tej kev npaj rau xyoo tshiab tab tom qhib nyob rau tom ntej.

Tsiab yog lub caij uas sawv daws los ua ke, tej kev npaj rau ib qhov pib dua tshiab. Tiamsis kuj yog vim li no, tsiab dhau los ua lub caij uas peb puv npo tej haujlwm yuav ua, tseeb tiag yog tej hnub uas peb tsis muaj sijhawm khoom li!

Hnub no, yog hnub 18/02/2026, yog hnub tsiab siab ob teb chaws Vietnam. Kev thov Vajtswv txhua hnub thov caw sawv daws nrog kawm Vajtswv Txojlus ua ke dhau ntawm Zaj kawm LUB NTSIAB LUS LOJ.

“Tus Tswv teb hais tias, “Mathas, Mathas! Koj txhawj thiab ntxhov siab rau ntau yam haujlwm kawg li, tiamsis tsuas muaj ib yam zoo xwb. Malis twb xaiv yam zoo ntawd lawm, tsis muaj leejtwg yuav txeeb tau yam uas nws muaj ntawd mus li.” (Lukas 10:41-42)

Nyob hauv Vajluskub, lub zos Npethanis yog ib qhov chaw txuas nrog Tswv Yexus thiab cov thwjtim txoj kev. Ntawd yog qhov chaw uas lawv tau txais tos, tau hlub, thiab qhov chaw uas muaj ob viv ncaus lawv sib swm yog Mathas thiab Malis nrog tus tijlaug Laxalaus pub rau Tswv Yexus, yog lawv tus xibhwb uas lawv hlub.
Rau hnub ua ntej hnub ua kevcai hla dhau thaum kawg hauv Tswv Yexus lub neej hauv ntiajteb, ntawm lub tsev uas muaj peb tug kwv tij nus muag zoo siab hlo txais tos Tswv Yexus, muaj ib pluas hmo tab tom npaj rau ntawm no.

Kuv pom txog txoj kev tsis khoom npaj rau pluas noj ib yam li npaj rau tej hnub uas yuav txog tsiab, tej suab luag hais lus nrov nrov ua rau kuv raug nqus rau tej haujlwm yuav tau ua.

Tiamsis tsiab xyoo ntawd, hauv lub tsev me, nyob rau ntawm kem tsev tsaus ntuj, muaj peb lub taub hau dub dub, hnub nyoog tab tom hlob pheeb rau ntawm tej nplooj ntawd hauv Vajluskub. Lub suab nrov nroo ntws ntau tej hnub tsiab cuag li yog lub suab zoo li npau suav. Thawj lub tsiab uas kuv yog ib tug ntxhais tsis quav ntsej txog tej suab nrov, tsis quav ntsej txog tej khoom pub, lub siab nthuav dav, lub qhov muag qhib dav dav los mloog tus niam laus lub suab taw kev: “Ntawm no yog lub sijhawm uas wb ib viv ncaus yuav tau xam “rau Vajtswv”. Txawv ua luaj li! Cov lus no tshiab dhau. Kuv tsau tsawv rau hauv kuv tus niam laus txoj kev taw kev, ua ntu zus saib txog xyoo dhau los, los ntawm lub siab nco ntshav ntuj, thiab zoo siab nrog rau ntseeg siab rau Vajtswv ib lub xyoo tshiab.

Lo lus “Xam rau Vajtswv” caum kuv tej xyoo tom qab no thaum uas nrog tus Tswv mus. Txhua hnub uas yog tsiab, xyoo laus dhau mus, xyoo tshiab tuaj, tsis khoom nrog tsev neeg, tej menyuam thiab tej haujlwm tom tuam tsev, kuv khiav ntawm pab hu nkauj mus txog rau hauv chav ua mov, puv npo tag nrho tej yam tsis zoo uas yus cheem tsum ua, ib yam li Mathas maj nroos rau txoj kev txais tos Tswv Yexus thiab cov thwjtim.

Nyob hauv lub tsev uas hnov ntxhiab ncuav tsw qab, sov so ntawm qhov cub, tej suab dej npau, cuag li ua rau Mathas hnov kub siab lug rau tes haujlwm. Tswv Yexus lub suab kuj nrov sov so nkag rau hauv txhua tus lub siab, nrog rau Malis thiab cov thwjtim ib ncig. Lub tsev puv npo Tswv Yexus kev tshwm ntsej muag, tiamsis Mathas tsis hnov. Pog lub siab tab tom tsis khoom, lub hlwb tsom tsoov rau tej yam zoo uas yus tab tom ua rau Vajtswv, nyob hauv txoj kev, thiab pog tus tshim ntsuas uas pog suav tias zoo kawg nkaus.

Mathas lub qhov muag tau pom tim ntsej tim muag Tswv Yexus lub hwjchim thaum hu nws tus tij laug Laxalaus sawv hauv qhov tuag rov qab los, Mathas pehawm tus Mexiyas hauv pog lub siab, pog saib taus txhua lub sijhawm uas tau tu Tswv Yexus, tau ua haujlwm pub rau Tswv Yexus.

Kuv xam tias, Mathas yuav maj nroos hliv dej rau Tswv Yexus, ntxiv ncuav ntawm tes. Oh! Ncuav sawv lawm, yuav tau muab coj mus tso rau hauv qhov cub ci. Daim ntaub pua rooj tsis ncaj lawm, Mathas ntxhi, tes kho khob haus dej, ntim noj mov kom yog chaw. Mathas lub hlwb puv npo maj mam khiav, nyob rau txhua lub sijhawm, tus xibhwb tsuas zaum deb pog kem ib lub rooj zaum, tiamsis tsis muaj nyob hauv pog lub siab. Hauv pog lub hlwb tab tom txhawj npaj rau rooj noj rooj haus.

Lub sijhawm uas tsis muaj Tswv Yexus nyob hauv lub siab txaus ua rau Mathas xav tsis thoob, thiab pog pib nrhiav kev pab. Tig mus saib ib ncig, ntsia pom Malis lub qhov muag saib ntsoov, pog lub qhov muag cig lam lug, ib yam li tab tom txais tos Tswv Yexus tej lus qab zib. Tas Mathas hais rau Vajtswv: “Tus Tswv, kuv tus niam hluas cia kuv ua haujlwm ib leeg, Koj txawm tsis pab hais los? Thov txib nws los pab kuv.”

Oh Mathas! Mathas! Kuv ceeb tas, pom tias muaj tej lub sijhawm, yus tab tom zaum hauv tsev, tiamsis lub siab xav ntsoov txog pluas noj uas yuav txais tos qhua, ib yam li puas muaj txaus khob, puas muaj ntawv, cov ncuav hauv chav ua mov tsis muaj ncuav dej thiab kuv hnov tsis tso siab, kuv txhais tes cia li thau xov tooj los xav nrhiav kev pab. Vajtswv txojlus kuj puv npo rau hauv tuam tsev, dhau ntawm Vajtswv tus tub txib, dhau ntawm tej nkauj hu qhuas Vajtswv, tiamsis kuv lub siab tsis txuas nrog txoj kev pehawm Vajtswv tab tom tshwmsim los.

Nyob rau hauv 40 xyoo dhau los, txhua xyoo yuav xaus, ces npaj “xam nrog Vajtswv” yeej tseem caum kuv, txawm ib leeg, lossis koom ob peb tug phooj ywg dhau ntawm lub rooj kawm Vajluskub. Thiab thaum no, ua siab tus, kuv ntxhi twj ywm rau Vajtswv: Kuv tab tom mloog! Tus Tswv! Kuv tab tom mloog koj. Kuv hnov koj lub suab, yeej sov so ib yam li koj tab tom hais rau Mathas thaum twg: “Tus Tswv teb hais tias, “Mathas, Mathas! Koj txhawj thiab ntxhov siab rau ntau yam haujlwm kawg li, tiamsis tsuas muaj ib yam zoo xwb. Malis twb xaiv yam zoo ntawd lawm, tsis muaj leejtwg yuav txeeb tau yam uas nws muaj ntawd mus li.” (Lukas 10:41-42). Yog, Malis yeej tab tom zaum ntawd, ua twjywm ntsiag to ntawm Tswv Yexus ko taw, mloog Tswv Yexus qhia ua ntej uas Tswv Yexus yuav taug txoj kev txomnyem tom ntej.

Tig rov qab mus saib ib xyoos dhau los nrog tej kev maj nroos, tej kev puas tshuaj, kuv txais tau Vajtswv txoj kev hlub. Tau Vajtswv hloov, txiav tej ceg uas tsis txi txiv. Mob tshaj, tiamsis kuv tau dhau los zoo li Tswv Yexus dua. Nws cob kuv rau txoj kev uas kuv ua Nws dejnum, tsis xav raws li kuv txoj kev xav, tsis raws li kuv lub homphiaj. Xav tsis thoob, tiamsis kuj tau koob hmoov thaum peb mus raws li Vajtswv lub homphiaj. Thiab thaum no, kuv kub siab lug rau lub xyoo tshiab, tso siab rau Vajtswv. Vim Vajtswv txoj kev siab dua thiab deb dua, tiamsis khov kho thiab kaj siab rau kuv.

“Kuv tib leeg thiaj paub tej uas kuv npaj yuav ua rau nej, kuv yuav pab kom nej vammeej tsis yog ua kom nej puastsuaj, nej thiaj muaj kev cia siab rau yav tom ntej” (Yelemis 29:11).

Thov caw nrog kuv peb thov Vajtswv ua ke: Kuv tus Vajtswv, tus Tswv, nyob rau hauv xyoo tshiab no, kuv thov kom xaiv tau feem uas zoo, yog feem uas tsis muaj leej twg yuav txeeb tau rau xyoo tshiab tab tom los. Pib kiag lub sijhawm no, thov pub kom kuv ncaj ncees rau txoj kev cog lus tseg lub sijhawm ntsiag to rau Vajtswv, txuas nrog Vajtswv tej lus, ua tib zoo mloog Vajtswv ua tus coj. Kuv xav hais rau koj tias kuv ntseeg koj lub homphiaj zoo uas koj twb npaj txhij rau kuv txij thaum uas koj tsim kuv los, thov Leej Txiv nthuav tawm thiab coj kuv kev, ncaj ncees rau koj. Kuv thov hauv Tswv Yexus Khetos lub npe, Amees.

Cov kwv tij txhua tus, nyob rau tej hnub maj nroos rau kev npaj lub tsiab peb caug uas cov neeg Vietnam npaj, yuav tau tseg sijhawm nyob ntsiag to nrog Vajtswv, nrhiav Vajtswv lub siab nyiam thiab Vajtswv lub homphiaj zoo rau peb txhua tus lub neej. Hnub no koj puas maj haujlwm, hauv lub hlwb, hauv tej kev sib raug zoo, puas muaj yam twg tab tom txeeb ntej hauv peb lub neej, qhov chaw uas ib txwm yeej yog Vajtswv li? Nyob rau hauv tej haujlwm zoo uas koj npaj yuav ua vim Vajtswv lub npe, yuav tau tseg sijhawm los mloog Nws nyob hauv lub sijhawm ntsiag to ntawm Vajtswv txhais taw, saib Vajtswv kev ua siab ntev, kom tau tsau tsawv rau hauv Vajtswv kev tshwm ntsej muag, thiab txaus siab rau feem zoo hauv txoj kev sib raug zoo qab zib nrog Vajtswv.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.