Kơplah mĭnh ‘nu bơngai tơ‘bơ̆p lăm sơlam tơdrong arih păng tơdrong lôch, rŏ lăng lu sư gô ưh kơ layơ lăng chăl arih kiơ̆ thoi so dơ̆ng bơih. Dôm kơ tơdrong nhen thoi tih dêh jing thar iĕ ioch. Tôm tơdrong proh hơmet, tơchĕng pơwao păng hiơ̆k bơngơ̆t kơ chăl arih thar hiong đĭ. Dah tơdrong arih ‘bônh kơ hiong tôch đei tơ’bôh hơđăl thoi noh, jơhngơ̆m kon bơngai ngăl wih brŏk tơ Kră Yang- Bơngai Wei bơhngol, Mĭnh Sư đĕch bơwei tơdrong arih, păng jơ̆ minh anih Sư đĕch lu bơ̆n gơh lui gơnang.

Năr ‘nâu, ‘năr 02/03/2026, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Bob Segress kơ̆l ‘bai TƠDRONG ARIH ‘BÔNH KƠ HIONG TÔCH.

“Mă-lei iĕm ưh kơ băt kơ năr dơning iĕm thoi yơ, băt kơ iĕm oei arih băt kơ thoi yơ. Tơdrong arih bơ̆n thoi lĕ kơ tŭk, dang ei bơ̆n oei ‘bôh sư gom kông, pă ‘biơ̆ kơ ‘noh ưh pă ‘bôh kiơ dơ̆ng.” (Yakơ 4:14)

“Tơdrong arih bơ̆n thoi lĕ kơ tŭk…” (Yakơ 4:14)

Dah mĭnh ‘nu bơngai arih dơ̆ng đơ̆ng rŏng kơ tơdrong jĭ pơ̆k trăp, bơngai ‘noh gô hŏk iŏk lơ tơdrong gah tơdrong arih. Lăm kơplah jơ ‘noh, đon tơchĕng ưh pă bơ̆jang thoi juăt hmă bơih. Ưh pă đei tơchĕng, ưh pă đei dôm kơ nơ̆r jet, lăp jơ̆ mĭnh anih rơhông đĭ đăng- nhen kơ thoi đĭ tơdrong đei pĭt đĭ- păng akâu jăn lei ưh pă đei tơ ‘bưh hăm đon tơchĕng.

Brei mơsơ̆ ‘nâu, mĭnh ‘nu ‘bok pơgang jet khan lei inh hăm đei hli tơrơ ưh dah huŏng lăm kơplah rơhông ‘noh, kơplah ưh kơ gơh pơpơ̆ dah pă gơh tơchĕng kiơ. Inh tơl khan ưh. Yua kơ dah tơpă pel ‘bơm truh tơ kon bơngai bơ̆n trŏ thoi yơ- băt kơdih jơ̆ bu, păng băt tơdrong mă hrôih dah klui bu kŭm gô tơ’bơ̆p- lei ưh pă đei anih kơ mơn lăm jơhngơ̆m dah tơchĕng dơ̆ng bơih.

‘Bok Kei-Dei Mơsêh Mơyang đei tơ’blŏk kơ rim ‘nu lu bơ̆n hơđăl lăm Sơ̆p Hla Bơar Nơ̆r ‘Bok Kei-Dei:

“Mă-lei iĕm ưh kơ băt kơ năr dơning iĕm thoi yơ, băt kơ iĕm oei arih băt kơ thoi yơ. Tơdrong arih bơ̆n thoi lĕ kơ tŭk, dang ei bơ̆n oei ‘bôh sư gom kông, pă ‘biơ̆ kơ ‘noh ưh pă ‘bôh kiơ dơ̆ng. Na iĕm kuă kơ kiơ kơ pơma thoi âu trŏ: “Dah ‘Bok Kei-Dei oei ăn kơ bơ̆n arih, bơ̆n gơh jang sa tơdrong âu tơdrong to.” (Yakơ 4:14-15)

Đơ̆ng rŏng kơ ‘noh, lu ‘bok pơgang raih đei iŏk mĭnh kơ tuăl pham tih lăm ‘ngok inh hăm mĭnh pôm đing ‘bet đơ̆ng anih blu. Inh ‘net ‘net hơdơ̆r, mă lăm lơ năr đơ̆ng rŏng ‘noh, kơ̆l ‘ngok inh oei nhen thoi rơhông.

Inh tơpă băt bơnê kơ Kră Yang yua kơ năr ‘nâu inh oei gơh klah asong tơdrong hlôi mơn đei ‘nâu. Trong yak năm ‘noh ưh kơ đei tơproh ‘lơ̆ng: jĭ gơsoh trăp mah truh kơ hăk lĕch pham, hlôi kơ tơdrong jĭ dêh pơ̆k, na pơtrơp ‘noh pham kơtuăl tơ lăm tơlei huan gơsoh. Lơ bơngai krao ‘noh jơ̆ “tơdrong jĭ lôch đei pơdơh dơ̆ng kiơ̆ trong hlĭch chrơp”- mă khan lu ‘bok pơgang hơmet inh kŭm pơma thoi noh. Mĭnh ‘nu ‘bok pơgang pơma hơđăl tơpăt hăm inh: “Inh đei chih kĭ lơ hla bơar lôch yua kơ jĭ gơsoh dah pơ̆k jĭ trăp. Gah tơdrong jĭ ‘nhŏng ‘nâu tơpă jơ̆ mĭnh tơdrong mơsêh hlĭch.”

Đơ̆ng doh truh dang ei, inh lăng chăl arih pha bơih. Yua kơ inh đơ̆ng đei “pă ‘bôh thoi lĕ kơ tŭk” lăm kơplah khei năr ‘noh.

Pơma tơpă, adrol ki inh ưh tim mă hlôh tơpă Hơriso 23, mă ‘noh jơ̆ chăl trong mă inh hơ iă. Đŏk Sơ̆p Hla Bơar ‘Bok Kei-Dei păng iŏk tơlĕch Nơ̆r Kră Yang jơ̆ mĭnh tơdrong, na tơpă yak năm hlôi đơ̆ng hơlŭng tơdrong lôch tă kơ jơ̆ mĭnh tơdrong pha.

Anih hơlŭng jrŭ măng mu ‘noh, mĭnh tơdrong đĕch inh gơh mơn đei lăm jơhngơ̆m jơ̆ tơdrong oei hơdai đơ̆ng Bơngai Wei. Inh ưh kơ gơh tơchĕng gah Sư, yua kơ đon tơchĕng inh rơhông đĭ đăng. Pơm thoi yơ gơh tơ’bôh mơn đei jing mĭnh kial tŭk, kơplah kơdih kâu oei jơ̆ mĭnh kial tŭk?

Kơplah nơ̆r pơma păng tơdrong tơchĕng ‘net rai wơ̆t đei dơ̆ng, tơdrong hơđăl hloh mă inh gơh ră roi jơ̆ thoi ‘nâu: anih hơlŭng jrŭ tơdrong lôch, tôm tơmam gah tơdrong arih- dôm tơdrong iĕ iĕ, dôm tơdrong pơdrơ̆ng, tơdrong pơjei băl, pŭ trăp, tơdrong pơgơ̆p, tơdrong jang- đĭ đăng đei jing iĕ đĕch. Lu sư lăp thoi kial tŭk, ‘bônh kơ hiong đĭ mă ưh kơ đei gĭt đunh. Kơplah dơ̆ng ‘bơ̆t anăp sơlam ‘noh, tôm tơdrong đei ‘bôh hơđăl trŏ thoi tơdrong sư thoi noh: lăp jơ̆ hơmơ̆l ‘nhui.

Kơplah lăng đêl, hlôi mơn đei jê̆ tơdrong lôch đơ̆ng inh ưh kơ hli thoi bơngai nai ngăl tơchĕng. Inh lăp gơh krao ‘noh jơ̆ mĭnh tơdrong hlôi mơn đei hlĭch chrơp, ‘bĕnh tơdrong hiôk hian rơngơp, chơt hiôk, păng mơn đei lăm jơhngơ̆m kĕ jei. Kơplah plei nuih pă đei dui jơhngơ̆m, lu bơ̆n ưh pă mơ̆ng ‘bôh gơsoh dui jơhngơ̆m dah plei nuih pơpơ̆ đơ̆ng kơdih kâu bơih. Kơplah noh, lu bơ̆n gơh hli tơrơ tơdrong ưh kơ băt. Dah lu bơ̆n gơh rơih iŏk pơdơh lăm tơdrong tơpăt, khan Kră Yang jơ̆ Bơngai Wei lu bơ̆n, păng lu bơ̆n ưh kơ đei mĭnh drô̆. Inh đei hlôi mơn đei mĭnh tơdrong thĕng hreh ‘lơ̆ng rŏ dêh, tơdrong hrĕp hreh trŏ kơ ‘bơ̆t doh đơ̆ng adrol. Inh ưh kơ ‘maih weh achăng tơdrong ‘lơ̆ng ‘noh. ‘Noh jơ̆ blŭng a inh gơh đei rơngei hlôi kơ đơ̆ng dôm tơdrong re kơtơ̆ng ưh kơ pơdơh păng dôm kơ tơdrong kăl yua hơnơ̆ng đơ̆ng akâu jăn inh.

Mă khan thoi noh, inh oei băt bơnê kơ Kră Yang yua kơ gơh wih brŏk, wă kơ huei kơ achăng akăn mă inh ‘mêm mĭnh drô̆, păng ăn kơ hnam dơnŏ inh huay kơ oei lăm tơdrong ơh sơ’ngon.

Dang ei, đei dui jơhngơ̆m mă jrŭ pă ‘bĕnh kơ tơh ‘bâu kial rơngơp đơ̆ng kông gah rŏng kơ hnam, gơh lăng kial dơhlu ‘noh pơpơ̆ kơ dôm trong ‘long juăt kơ ‘bôh, hăm inh jơ̆ mĭnh tơdrong mơn lăm jơhngơ̆m đei plơ̆ng ‘nao păng hlĭch chrơp dêh.

Apĭnh đĭ đăng krao khan hơdai: Kơkuh kơ Kră Yang ‘mêm, kon bơnê kơ Ih yua kơ rim kơ dui jơhngơ̆m mă năr ‘nâu kon oei đei sơng iŏk. Kon ‘bôh băt chăl arih kơdih ‘bônh kơ hiong tôch, lăp thoi lĕ kơ tŭk đei hlôi. Apinh huay kơ jô̆ yo kơ kon yua kơ mưh lăp kon oei arih nhen thoi kơdih oei pơgơ̆r, hiơt khan tôm tơdrong đei oei lăm ti Kră Yang. Apinh bơtho kon băt chu iŏk đon ala sơng iŏk tơdrong hơgăt đơ̆ng kơdih, păng dan đĭ jơhngơ̆m lui anih Ih jơ̆ Tơ’ngla bơwei tơdrong arih, tơdrong lôch, păng đĭ dôm tơdrong kon ưh tim mă băt truh. Dah tơ’bơ̆p hăm dôm tơdrong truh ưh kơ kiơ̆ thoi wă dah hli tơrơ, apinh ăn kơ kon ‘blŏk khan Kră Yang jơ̆ Bơngai Wei kon, păng kon ưh kơ đei mĭnh drô̆. Hơpơi kơ rim năr oei đei tơnăp lăm chăl arih kon gơh arih kiơ̆ tơdrong tơm, Ih lăp đon, păng pơchrang tơdrong chang hơmĕng kon đei lăm Ih. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, gô truh kơ năr đĭ đăng lu bơ̆n đei ‘bôh băt khan: tơdrong arih ‘bônh kơ hiong tôch tơpă, păng đĭ chăl arih ‘nâu, lu bơ̆n lăp trŏ jơ̆ dôm kơ tŭk đak. Kơplah chăl arih kơpal teh ‘nâu đei hlôi, lu bơ̆n gô mơ̆t lăm hnam mă kơdih Kră Yang, Tơ’ngla Wei Triu gơh găt đei hơmet ăn bơih kơ rim kon triu Sư- dôm kơ bơngai kon mă ‘mêm ‘măn kơdih gah Sư păng đei Sư ‘mêm krao anăn rim bơngai, đơ̆ng kơdih rim ‘nu. Bơnê kơ Kră Yang, lu bơ̆n ưh kơ kăl athei hơmet kơ mĭnh tơdrong năm dang ei hloi ayơ, yua kơ Sư đei hiơ̆k bơngơ̆t đĭ kơ lu bơ̆n bơih. Lăm tơdrong ‘bônh kơ hiong tôch đơ̆ng chăl arih ‘nâu, athei gĭt kơ rim jơ phŭt gĭt kăl mă Kră Yang ‘măn ăn kơ rim ‘nu lu bơ̆n wă arih đei tơm kăl păng đei yua kơ dêh char Sư pơgơ̆r.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.