Đei hlôi mơn juăt kơ đei tơdrong arih hiôk chơt, wă kơ đei Kră Yang lăp đon noh jơ̆ jing minh tơdrong “bơngai chơchă”. Chơchă ưh kơ sĭ khan layơ kư̆m đei jơhngơ̆m pran, đei tơdrong hlôh wao, mă ưh kơ đei pơdơh năm tơ Kră Yang, mă kơplah gleh lap, ngĭl ngŭl. Tŏk bŏk dôm tơdrong rơih iŏk lăm tơdrong arih, jing “bơngai chơchă” jơ̆ tơm kơ tơdrong drơ̆ng iŏk đơ̆ng lăm jơhngơ̆m: rơih iŏk Kră Yang, păng ăn kơ Sư chông anhăk rim trong yak năm lu bơ̆n rim năr.

Năr ‘nâu, ‘năr 03/03/2026, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Scott Presson kơ̆l ‘bai BƠNGAI CHƠCHĂ

“Chă bĕ Kră Yang kơplah bơ̆n oei gơh tơ’bơ̆p; krao khan bĕ kơplah Sư oei jê̆!” (Êsai 55:6)

Đei layơ buăl jet kơdih: kơdih hăm trŏ kơ “bơngai chơchă” ưh? Buăl tam đĭ jơhngơ̆m kiơ̆ ‘Bok Kei-Dei, dah oei chĕp ba dôm tơdrong chhŭr nuih tam mă đei achăng lê̆? Tam đei layơ buăl oei chĕp ba dôm tơdrong rơka so, khĕnh hơwĕng, dah oei jô̆ yo? Na dôm lu ơh sơ’ngon, dôm lu tơdrong jĭ lăm plei nuih noh thoi yơ?

Mă tơpă, lu bơ̆n ‘bônh kơ pơm tơ’bôh anăn đĕch noh jơ̆ “Bơngai lui kơ ‘Bok Kei-Dei”, mă lei gah lăm oei tơblah dih băl, arih kiơ̆ kơ jơhngơ̆m kơdih, hăm tơdrong ‘maih wă kơdih. Lu bơ̆n khan noh jơ̆ “yak năm hăm Kră Yang”, mă lei lơ wơ̆t lu bơ̆n oei dơ̆ng ‘bơ̆t ter dur đĕch, hơpơi pơm liơ wă kơ huay kơ đei tơdrong pơlong lăng hloh kơ jơhngơ̆m lu bơ̆n.

Nơ̆r Kră Yang lăm Êsai 55:6 đei chih: “Chă bĕ Kră Yang kơplah bơ̆n oei gơh tơ’bơ̆p; krao khan bĕ kơplah Sư oei jê̆!”

‘Bok Kei-Dei đei athei lu bơ̆n chơchă Sư. Păng inh wă kơ sĭt thoi noh. Ưh kơ đei kiơ ưh kơ đei hlôh. Mă khan buăl nơ̆r ‘Bok Kei-Dei kiơ̆ kơ tơdrong tơblang ayơ, kư̆m đei nơ̆r athei: Chă Kră Yang.

Lu bơ̆n đei krao iŏk jing “bơngai chơchă” lăm tôm tơdrong yak năm hăm ‘Bok Kei-Dei. Đawit đei arih thoi noh. Ưh kơ dơ̆ng ‘bơ̆t chơchă đĕch, sư iŏk jơhngơ̆m đon ala apinh Kră Yang bơwei sư wă kơ huay kơ wơ̆l jrok.

“Inh chă Ih hăm đĭ jơhngơ̆m. ‘Nĕ ăn kơ inh weh đơ̆ng nơ̆r Ih tơtă.” (Hơriso 119:10)

Arih nhen thoi “bơngai chơchă” ăn kơ lu bơ̆n gô jing đei pŭn hiôk, mă lei kư̆m hơdai dôm tơdrong ‘maih wă. ‘Bok Kei-Dei ‘maih wă kơ kon Sư arih hăm tơpang ti ‘lơ̆ng rơgoh hăm jơhngơ̆m ‘lơ̆ng, huay kơkuh kơ rup yang, huay kơ arih lăm tơdrong hơlĕnh. Na kơplah lu bơ̆n rơih iŏk tơdrong arih trŏ lăp, na nơ̆r pơkă đơ̆ng Kră Yang ăn kơ lu bơ̆n rơđah dêh:

“Bu gơh tŏk tơ kông Kră Yang? Bu gơh kĕ dơ̆ng lăm anih rơgoh Sư? Noh lu bơngai đei ti rơgoh păng jơhngơ̆m rơgoh, Ưh kơ wă ăn bơhngol sư tơdrong yoch glăi, Kŭm ưh kơ pơkă hơlĕnh. Bơngai noh gô đei pŭn hiôk đơ̆ng Kră Yang, Păng tơdrong tơpăt đơ̆ng Kră Yang ‘Bok Kei-Dei, Tơ’ngla dŏng pơklaih Sư.” (Hơriso 24:3-5)

Lu bơ̆n đei tơdrong pŭn hiôk đơ̆ng Kră Yang ăn. Lu bơ̆n đei dơ̆ng ‘lơ̆ng tơpăt ‘bơ̆t anăp Kră Yang. Na lăm tơdrong mơsêh mơyang, Yang Yêsu đei pơsĭt rơđah ăn kơ lu bơngai chă Sư.

“Bơngai bu krao khan apinh ‘Bok Kei-Dei kiơ kiơ, ‘Bok Kei-Dei gô asong. Bơngai bu chă kiơ kiơ, ‘Bok Kei-Dei gô tơ’bôh ăn. Bơngai bu dơdŭ ‘măng ‘Bok Kei-Dei, ‘Bok Kei-Dei gô pơih ăn.” (Luka 11:10)

Kơplah lu bơ̆n chơchă, lu bơ̆n gô đei. Kơplah lu bơ̆n năm jê̆, lu bơ̆n gô tơ’bơ̆p Sư. Kơplah tơdŭ ‘măng Sư gô tơl ăn. Đĭ jơhngơ̆m chă ‘Bok Kei-Dei ưh kơ đei layơ khan tơdrong ưh kơ đei layơ yua. Noh jơ̆ trong Sư yua wă ăn pŭn hiôk, wă tuh ăn tơdrong ‘lơ̆ng tơpăt ‘bĕnh blai lăm tơdrong arih lu bơ̆n.

“Rei bĕ lu iĕm kơdih hăm tơdrong ‘lơ̆ng tơpăt, yuă iŏk bĕ plei đơ̆ng tơdrong ‘mêm sĭt, choh bĕ teh lu iĕm mă lê̆ bri! Truh boih jơ chă Kră Yang, dĭng truh tơ Sư ăn jur tơdrong tơpăt thoi đak ‘mi tơ lu iĕm.” (Hôsia 10:12)

‘Bok Kei-Dei pơma khan thoi âu: ‘nâu jơ̆ trŏ kơ jơ chă Sư. Kơplah lu bơ̆n rĕi tơdrong ‘lơ̆ng tơpăt lăm tơdrong pơgơ̆p hăm Kră Yang, lu bơ̆n gô đei lơ tơdrong lăm jơhngơ̆m rơhing – tơdrong ‘mêm đơ̆ng Kră Yang ưh kơ đei layơ tôch.

Bơngai chơchă ưh kơ đei layơ pơdơh kiơ̆ Kră Yang. Noh jơ̆ bơngai rơhing kơ krao khan, rơhing kơ pơm kơdranh, rơhing arih kiơ̆ kơ Kră Yang wă. Jơ̆ bơngai ling lang chă ba ăn tơdrong Kră Yang ăn rim năr – thoi kơ ‘bai hơri ư ang, minh nơ̆r pơma pơlung, dah gô pơih jơhngơ̆m đon mơ̆ng kơplah bơngai nai kăl.

Mă tơpă, ưh kơ đei layơ lu bơ̆n mơn kơ “rơkah rơkai”. Đei dôm lu năr lu bơ̆n mơn kơ hrĕng kro, gleh lap. Mă lei lăm dôm tơdrong arih noh, Kră Yang oei yua lu bơ̆n wă kơ ư ang anăn Sư.

‘Bok Kei-Dei ưh kơ đei ataih. Nơ̆r Kră Yang pơma khan Sư jơ̆ “buăl juăt hloh kơ ‘nhŏng oh pôm mĕ ‘bă”. Mă khan năr ‘nâu buăl mơn kơdih ataih đơ̆ng Kră Yang dang yơ, athei pơtơm ming đơ̆ng blŭng a rĕi tơdrong ‘lơ̆ng tơpăt ‘bơ̆t anăp Sư. Sư gô tơl hăm tơdrong tuh ăn tơdrong ‘lơ̆ng tơpăt lăm tơdrong arih buăl. Na kơplah buăl yak năm ‘lơ̆ng tơpăt, buăl gô yuă iŏk trŏ kơ tơdrong lu bơ̆n rĕi.

Na đơ̆ng noh, buăl gô ‘net ‘net mơ̆t lăm anih Kră Yang ăn kơ dêh char ‘Bok Kei-Dei. Kơplah buăl arih lăm tơdrong krao iŏk đơ̆ng Kră Yang ăn kơ bơ̆n, buăl gô tơgŭm bơngai nai mơ̆t tơ lăm tơdrong Kră Yang krao ăn kơ lu sư. Na Hnam akŭm gô jing Hnam Akŭm mă Kră Yang lăp đon.

Lu bơ̆n đei hơdai lăm tơdrong tơdă ‘Bok Kei-Dei tơ kơpal teh đak ‘nâu, mă kơplah lu bơ̆n ưh kơ mơn. Na tôm đơ̆ng blŭng a lăng kơ thoi hmă đĕch: jơhngơ̆m rơhing chơchă Kră Yang păng rơhing arih kiơ̆ kơ Kră Yang lăp đon.

Athei tŭk lê̆ tơdrong so sơ̆. Athei tŭk lê̆ tơdrong yoch đêl pŭ trăp so sơ̆ tơ ataih tơ kơđĕl đak dơsĭ, hiơt hiong đơ̆ng lăm tơdrong ‘Bok Kei-Dei huay kơ jô̆ yo. Na athei yak năm tơ anăp, nhen thoi minh ‘nu bơngai chơchă ‘Bok Kei-Dei đĭ jơhngơ̆m, nhen thoi minh ‘nu bơngai chơchă Kră Yang jơ̆ tơm kơ tơdrong arih tơpă tơpăt lăm chăl arih bơ̆n.

Apĭnh đĭ đăng krao khan hơdai: Kơkuh kơ ‘bă mă ‘mêm, apinh bơtho kon jing minh ‘nu bơngai chă Ih rim năr, wă kơ yak năm jê̆ Ih hloh, ư ang kơ Ih hơdrol hloh lăm chăl arih kon, mă kơplah jơhngơ̆m kon oei đei lơ tơdrong ưh kơ ‘lơ̆ng păng gleh lap. Apinh pơih jơhngơ̆m kon đei mơn Ih oei chang gô kon hăm tơdrong ‘lơ̆ng tơpăt Ih. Hơpơi kơ đon lui kon huay kơ pŭ trăp, na ‘bĕnh kơ pŭn hiôk. Apinh ăn kơ kon đei arih rim năr lăm tơdrong ‘mêm đơ̆ng ‘Bă ưh kơ đei layơ tôch, păng yak năm kiơ̆ kơ Ih hăm đĭ jơhngơ̆m lui gơnang. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, Kră Yang gĭt kăl kơ dôm lu jơhngơ̆m ling lang năm tơ Kră Yang. Sư oei ling lang dơ̆ng ‘bơ̆t doh, chang gô, ‘lơ̆ng tơpăt, păng ling lang tơl tơwih dôm lu đe bu chă Sư đĭ jơhngơ̆m. Gô jing “bơngai chơchă” ưh kơ đei gĭt kăl kiơ. Noh jơ̆ rim năr rơih iŏk wih brŏk, rơih iŏk Kră Yang noh jơ̆ tơm, mă khan lăm jơhngơ̆m tam mă tôm mah. Noh jơ̆ rơih iŏk rĕi tơdrong ‘lơ̆ng tơpăt wă kĕch iŏk tơdrong pŭn hiôk khŏm khŏm. Na tơm đơ̆ng tơdrong noh, tơdrong arih lăm đon lui huay kơ hrĕng kro, trăp trĭn dah ơh ol, na jing trong yak năm đei pŭn hiôk lăm tơdrong chông anhăk păng tơdrong ‘mêm Kră Yang ưh kơ đei layơ tôch.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.